2004 年 3 月 27 日 星期六 【陰】

諗住今日大把時間做o野，點知原來媽媽約o左阿姨食自助午餐，朝早可以騰出o既時間係………15分鐘。
約o係文化中心等，星期日o既文化中心有六、七對新人，睇住佢o地周圍影相，著起婚紗o既女人係最幸福(其實著起禮服o既男人何嘗唔係，37%男性對婚姻有好大o既憧憬)？今日都係得18度左右喳喎，佢o地應該唔會覺得唔凍o架，新郎哥們仲唔即刻送上外套？
文化中心隔離o既Cafe Concerto原來以前去過，已經冇乜印象。好耐未飲過香得咁厲害o既忌廉湯，朱古力蛋白好滑，牛排煎得o岩o岩好，食得尚算健康(以buffet標準計算)，不過都食到好飽。
之後行尖咀，好悶，都係睇衫、睇衫、睇衫，NBA波衫好貴(今季Lakers白色主場印33 Abdur-Jabber)，XL始終被禁，勁多舖頭播陳小春，差o的掂o左油漆未乾o既欄杆。其實俾我揀，我唔想行街o架，我唔好o係屋企睇o野？不過好彩Stphen Lee + Success總算睇哂………明唔明係另一回事。

P.S.呢兩日o既黃興桂只可以用一個字形容……………

>>March 28, 2004 at 1:55:03 PM GMT+8

2004 年 3 月 26 日 星期五 【陰】

呢個星期新聞多多，台灣政局相信唔係短期內解決到o既事，而大陸「民間」團體開船去釣魚台宣示主權，俾日軍拉返沖繩問話，最後送返上海。
自從美國結束對日本o既軍事佔領o個陣錯誤將釣魚台列島當作琉球群島o既一部分交還俾日本之後，o個度o既主權紛爭就一直持續到今日，其實以歷史演變o既角度，邊個先係釣魚台o既主人？
釣魚台列島早o係明代就歸入中國版圖之內，1895年甲午戰爭後簽訂o既《馬關條約》，滿清政府將連同釣魚台連同台灣、澎湖割讓俾日本。到o左1945年日本o係二次大戰戰敗之後，日本將由中國手上侵佔o既土地全數歸還俾中國，其中當然包括台灣一帶o既群島啦？所以釣魚台絕對冇可能仲係日本領土。
釣魚台唔屬於日本，咁o個度係咪應該插上五星紅旗呢？咁又未必，抗戰勝利後仍然管治中華民國o既國民黨o係國共內戰俾共產黨打敗，最後退守台灣，而共產黨就o係大陸建立中華人民共和國。但係中共始終冇辦法橫渡台灣海峽一舉將國民黨消滅，只係奪取o左中國大陸、海南島同南中國海o既群島，但係台澎金馬就攻佔唔到，仍然由退守台灣o既中華民國擁有。既然中共從未conquer台灣一帶o既列島，佢當然冇可能擁有釣魚台o既主權啦？而中華民國o係內戰戰敗後冇消失，只係範圍細o左好多，所以由歷史發展同政權更替兩方面睇，釣魚台列島插上o既應該係青天白日滿地紅旗。
我只係根據歷史去睇呢件事，有碗話碗有碟話碟，唔好亂扣我帽子！

2004年Eric好歌流行榜(第13週)：
1)兩個人的煙火(黎明)
2)香港地(陳冠希)
3)目黑(周國賢)
4)孩子王(吳浩康)
5)嫁妝(陳慧琳)re
6)世界之最(你願意) (鄭秀文)
7)奇洛李維斯回信(薜凱琪)new
8)Never Been Kissed(At 17)new
9)我們的合唱歌(2R)
10)一拍兩散(容祖兒)new

Re Vincent:你好，我當然唔會唔知啦，81都得添，行多兩步路o者，只係實在太多路線冇o係適當地方分段o者。
Re someone who did not change e-mail:咁你要小心身體喇，有人寫o左差唔多五版紙喎，佢咪係超人？

P.S.科比o係奧運400米自由式澳洲代表選拔賽被取消資格，好唔抵，好難挑戰史畢茲o既紀錄喇。

>>March 27, 2004 at 3:00:27 PM GMT+8

2004 年 3 月 25 日 星期四 【暴雨】

中史好唔掂呀，因為讀唔熟？死都唔做比較題，漢武NEP吹極都吹唔夠三版，連續兩次兩版多o的，死火，危機開始呈現，上學期尾o個股銳氣冇哂。
5 + 1鬧我o地o尋日大半班人冇去oral practice，唔知點樣又燒埋No.1 o個疊，今日再冇中文喇。
中化又shift去oral，類比思維，debate中環填海，Geog人玩哂，我都識o既，不過立場唔fit我，兩個point根本亂o黎。
之前幾次印History Notes都收唔番o的影印費，都係Miss Leung幫到我，收o左$10 per head先，o係o個$10扣番，不過都係冇乜人俾錢！Miss Leung唔知我可以一心多用o既咩？邊做Stephen Lee邊有Billy吹水邊聽雀叫！
Buss要叫數，陳江入極programme都入唔到，都係就咁用計數松 計啦，雖然真係好麻煩！
放學終於可以重開「自我留堂計劃」喇，目標係做哂遲交o既兩份Stephen Lee，奇蹟地清哂，不過我最後先發覺我竟然將中史file同中化書鎖o左o係locker，中史要做千字文，中化星期一要測科學，呢個weekend我可以做乜？o係cover見到Red Cross練步操，好恐怖，o的人唔打數，節奏亂哂，事後Kambo講原來Red Cross步操唔可以打數，各處鄉村各處例，不過都係當年童軍步操好o的。
o係學校hea到18:10先走，臨入地鐵站爸爸打o黎，話約o左公公沙田食京菜，好彩我未入閘。o係正新城市廣場麥記樓下，越南菜館隔離o既京菜館水準唔錯，「有餡沙翁」(公公咁叫o架)好滑，只係豆沙鍋餅好多油(有人話我博肥呀)。食飯都係其次，同表弟交流mock心得，借埋佢份英文卷，佢話o的卷一早捉哂路，好易做，對A History B Econ甚至B Maths都好似胸有成竹咁，希望得啦。食到20:45散水，我諗緊點解72出到沙田都冇分段收費。

To Someone:又話留言o既？

>>March 26, 2004 at 3:51:00 PM GMT+8

2004 年 3 月 24 日 星期三 【暴雨】

遲o左起身，不過未嘗唔係好事。
唔好再誘惑我喇～
Russia Essay好深，1990年o既candidates好低能，遲o的忙死喇，二揀一兩條都揀唔落。
一堂UE轉用中文，5 + 1講生平事跡，木門、牛肉通粉、唔得你死、葉劉淑儀、男女校、林瑞麟成個太監樣，笑到我趴哂地，講o黎講去其實咪又係No.1踩親佢條尾！
今日係中化日，全日趕中化功課，空堂冇哂。
陳水扁個「扁」字原來好有玄機，一石二鳥、以卵擊石、又一村………
Lunch同Billy出現大量兒童不宜內容，唔明就算啦，唔好俾我o地污染！
Buss要多謝魚囉，你好心嘛！鬧鬼疑雲，生人唔生膽。
中化呆哂，對我呢個藝術白痴o黎講。
放學冇練oral，扮哂忙衝落cover繼續博殺，等差唔多夠鐘先返屋企補習。中化做完 + 教Kambo作文 + 溫少少中史，XO海鮮杯麵好好食，唔知點解成為某人焦點。做做下突然見到5 + 1落o左cover，佢搵我o地？梗係避啦，先入toilet，再上2C，風聲冇咁緊，兵分兩路返落去。夠鐘喇，鬆人。
今日《蘋果日報》論壇，李怡o既《民主之錯？》：
不少人認為，由於台灣選舉出現亂局，使部份香港人及中央政府對香港普選進程持負面態度，因此對香港民主是不利因素。昨天《文匯報》發表社論，說「台灣作為發展民主政治的試驗場，已經並且正在付出沉重的代價。但香港決不能重蹈覆轍，被人當作政治制度的試驗場」。
這些意見在這個時候發出，當然會有一些市場，尤其是在一些沒有具體了解也不作深入思考的人當中。
倘若說中央政府對香港普選持負面態度，那麼從過去幾個月的表現來看，可說是「已經如此」，而且是「一貫如此」。台灣選局若平靜度過，甚至若連宋以大比數當選，你以為中央就會放鬆對付香港市民的普選訴求嗎？一黨專政並實行專權政治的中共政權，豈會心甘情願地放權讓香港市民普選？豈會讓普選產生的特首及全面普選產生的立法會，挾「民命」而增加與中央議價的能力？因此，台灣大選順利與否，其實與中央對香港普選的態度無關。只不過這次台灣大選出現亂局，給了中央、土共與香港親共人士一個延遲普選的藉口而已。
就香港市民來說，雖然最新的港大民調顯示，贊成○七、○八普選的市民，數字有所下降，但仍逾六成；至於認為○七、○八年可落實普選的，則下調至不足兩成。很明顯，現實的香港人已清楚看到了中央對於香港普選的態度。中央不同意，特首豈會向立法會提交普選的法案？特首不提，立法會縱使有三分二議席支持普選，也無法自提法案。因此，既不可能實現，就連贊成普選也變得意興闌珊了。在中央大發謬論，惡形惡狀反對香港普選的情形下，香港市民仍有逾六成人支持普選，可見普選確實是香港市民最大的政治訴求。
與台灣比，香港市民長期形成的法治觀念相當牢固，絕對有把握在憲政與法律的規範之下，和平實行法治的民主。香港人也沒有台灣社會那種由於獨特歷史而留下來的容易被挑動的族群意識，香港人並不歧視大陸來的人。董建華本人就是自小從上海移民來香港的，他在九六年當選第一屆特首時，民望高達六、七成。這些年他的民望江河日下，完全是因為他的無能與一味曲意迎合北京所致，與族群無關。香港市民甚至有相當多人支持大陸來港爭取居港權的人士。因此族群問題是不可能在香港被挑起的。
其實，台灣在日常生活中已看不出有任何族群矛盾。選舉時之所以會有政黨挑撥族群問題，其根本原因是中共對台灣的「文攻武嚇」、強求統一、打壓台灣國際空間並從而打壓台灣人的自主意識的政策使然。台灣人民已經自主了，台灣並沒有一個更高的主權被置於現有主權之上。台灣現在沒有「外來政權」。本土派之所以仍能把五十多年前從大陸移到台灣的國民黨，歸入為「外來政治力量」，是因為海峽對岸的政權有把權力強加在台灣人身上的意圖，這就給了民進黨一個在選舉時挑撥族群問題的藉口。因此，從根本原因來看，台灣選舉的亂局是中共對台政策造成的，並不是民主的錯。
冇錯，中共以「個案思維」處理台、港問題，台灣大選結果唔會改變中央o既立場。台灣之所以會亂，唔係因為民主而係「缺乏保險絲」，冇獨立o既司法機關｜亦冇可以主持公道o既宗教領袖，遇到紛爭就好難解決。香港冇呢個問題，司法仍然獨立(詩姑未破壞哂，基本法宣講團未到)，大部分市民都好理性，港式民主唔會台灣民粹式民主咁亂。

>>March 25, 2004 at 3:40:11 PM GMT+8

2004 年 3 月 23 日 星期二 【晴】

一個二個唔好曲線動搖我啦，我話過唔會幫襯麥記o架！
自小就冇藝術細胞，中國藝術一o的都唔識，答十題錯十題。
History改去IT房上，諗住同思穎打yahoo桌球，Miss Leung lock機播片，末代沙皇一家o既命運，Nicholas II身不由己之下被迫退位，又要俾人當人球咁周圍著草，最終半夜三更俾人送入地下室誅佢九族，逃唔過共產列寧o既魔掌。其實殺一個已經再冇人支持o既前朝皇帝對佢冇得益，反而蘇俄o既國際聲譽會大打折扣。
小息前三堂都要睇片，Buss已經捱唔住，扮哂睇article，釣魚為實。
今日o既talkback幾乎俾6A完全佔據，我第5次上喇，$200百佳coupon袋袋平安！不過5 + 1總係要玩我，其實唔係佢個腦o既問題，係我前三次未inform佢o者。
再去7A，中史開治亂興喪，好似好多o野讀又唔可以點飛，析論、綜論有乜分別？
今日ADT on duty比以前輕鬆得多，o的F.3好乖(做樣都好啦)，可以做自己功課，中化好好好好好好深！
完o左duty繼續做，落cover博殺，睇住籃球場o既黎正邦又著哂火。都係專心o的啦，頭都大哂，好不容易先舉到例，做o左兩題喇！星期五同時要交Stephen Lee同中化，前者拖住都得，聽日一定要做哂中化，留時間中史測驗呀！

>>March 24, 2004 at 2:09:41 PM GMT+8

2004 年 3 月 22 日 星期一 【陰晴不定】

熱又唔係涼又唔係，好難著衫…………
測Buss，記Standard Deviation原來冇用，吹水，最後o個part好似解錯題。李sir拆冷氣機隔塵網，千年塵，要我同肥龜拎去洗，花o左一大輪功夫先洗甩哂o的塵。李sir讚我o地，其實佢講o既唔係事實o既全部。
History轉去7A上，環境唔錯，幾光猛，我想o係度上o架，象棋、金元寶、百力滋…………冇教History，改上Social Issue(唔係完全Politics囉)，講陳水扁槍擊事件同台灣總統大選。一如所料，大部分人都係靜哂，印象中得我、楊晴旭、Step、Billy同Alison有出聲，同Alison討論幾有意思，我唔係話一定係阿扁自己打自己，不過呢件事實在太多疑點喇。原來我同Billy有分歧，如果台灣唔再可能維持現狀，統獨只可以二擇其一，Billy話統一，而我……………寧願俾佢獨立，不過我要重申，大體上我仲係淺藍o架。
中化閱讀理解速度冇問題，不過我係快夾唔準o個隻，我搵唔到樹幹。
李sir用完電腦唔記得鎖機，咁我要o黎做自己o野喇，聽日Buss補番presentation嘛，終於編排好哂。
班潮州仔霸住一個場(嚴格o黎講係半個)，廿幾人迫o係一個八人場，根本踢唔到，唔踢，返學校。打打下乒乓波見到潮州仔收埋o的飛碟，以為佢o地唔用，又拎波返出去，點知原來佢o地鬥波，唔返喇，o係兩個場中間搓波算數。睇住N人大混戰，肥峰原來好似奧雲，胡寅君都好似，挺都係，炒哂o的波出街。
Class Period做中期檢討，我係有碗話碗有碟話碟o架喇，照直講。
未做好Power Point，上CR2網吧搞掂埋，睇場o既人渣輝掟石頭落公廁，但係又其身不正喎。做好哂喇，Billy做「輔導員」？原來真係好耐冇做過Power Point，竟然唔係點記得點整效果。
呢個星期一樣多功課做，又要補習，足足一個禮拜冇得留堂！

Re ETandy:你又係………

>>March 23, 2004 at 4:00:47 PM GMT+8

2004 年 3 月 21 日 星期日 【晴】

一返學校即刻趕Practical Skills，做o左最重要o個part就交o左。
Triple History做discussion，不過大部分時間轉o左topic，抄人o地o的point，Miss Leung聽日會成全我呀！
Triple UE又返去最悶o既時刻，心不在馬，發白日夢，諗到WE7 International買乜平靚正後衛好喇。
子建今日考mock喇，加油呀，我睇好你o架！冇得再同佢食lunch，下次搵Billy陪我，不過佢一打鐘就一支箭走o左，咁我一支公食吉野家囉，有精神病患者周圍派香口膠，冇人要。返到學校同Candy做o左件蠢事。
又有交流團，唔使錢勁吸引，不過要4月前滿18歲先有資格，Alison囉。
中史同Billy完全作反，玩填字遊戲，笑到趴哂地，原來我咁好文采。經濟史都教完，下堂開paper 1喇。
放學社際drama開會，set & prop好大工程，我睇哂成份劇本，其實圓tum tum有冇存在o既必要？
康文署寄o左信o黎，Easter個足球camp抽中我，今日o既schedule同兩年前o既有o的變動，好吸引。

P.S.蒙古騎兵遠征阿拉伯(猜亞洲國家)

>>March 22, 2004 at 2:47:24 PM GMT+8

2004 年 3 月 20 日 星期六 【晴】

三日假期冇好好利用，大懶蟲，Practical Skills唔識，Buss測驗未溫，Buss Presentation做o左少少，中史更加未掂過，迫住做o既冇心機做，唔迫做o既更加諗都冇諗過，呢個禮拜要留幾多次堂追？
越搞越大單，藍營o的人唔肯走，總動員出o黎嗌驗票，台灣已經接近癱瘓。其實o係台灣呢個地方，問題可以透過尚算完善o既社會體制解決，不過當然未來四年陳水扁政府施政無可避免地會遇到極大阻力，台灣政局會慢慢逐漸變得唔太穩定。我只係擔心呢兩日台灣民眾o既小型騷動會俾到香港土共借題發揮o既大好機會，話推行民主就會有咁o既亂局，日嘈夜嘈冇得搞經濟，甚至宋楚瑜o尋晚都整o左句玩死香港人：「我們要堅持民主，因為只有民主才對抗中共！」差唔多咁o既wording啦，土共一直都話民主派有「民主抗共」o既思維，依家連宋楚瑜都幫人prove埋，香港人多得佢唔少。

>>March 21, 2004 at 1:34:57 PM GMT+8

2004 年 3 月 19 日 星期五 【晴】

沙田大會堂有關於寫推薦信報美國大學o既talk，如果唔係搭著密尾龍，我應該趕唔切。有學生有家長有教師，有教師邊聽talk邊改簿，超高大o既講者Doris Davis學卡斯特羅，有笑位，佢早段講得太high喇，超哂時後面勁趕。其實正如我之前所講，我10萬個唔願意去外國讀書，今次我不過係想為自己留條後路，始終世間上冇o野係冇可能。
完o左行一陣新城市，竟然搵唔到80M，我想睇下新o個套明信片呀。有間衫舖播Eason《我的快樂時代》，「長路漫漫是如何走過　寧願讓樂極忘形的我　離時代遠遠　沒人間煙火　毫無代價唱最幸福的歌」
表弟考mock喇，上佢屋企幫佢補History同Econ，佢話要A History B Econ喎，希望佢得啦，不過都係唔好咁大期望好o的，分分鐘兩科都B唔到。
真係峰迴路轉，陳水扁最終以唔夠三萬票之差壓倒連宋，成功連任，本來藍營可以大勝o既台北市、台北縣都俾綠營迫到只可以小勝(預計贏5萬，最後贏1萬)，台東更加係藍營o既滑鐵盧，647萬票係出乎意料之外，得票數字比上屆仲要多。話o尋日o既槍擊事件冇影響就假o既，當佢苦肉計得逞囉，而且連宋輸在太老(連戰68宋楚瑜62)，吸引唔到年青選民，小馬哥都幫唔到。唔係話連戰執政台灣會走向統一(台灣冇人想統一)，不過阿扁做多4年，如無意外，台灣海峽會越o黎越闊，修改憲法只係遲早問題，但係就未必會「更改國號」(我唔認為「台灣獨立」呢四隻字適合依家o既情況)，呢個只係形式，中華民國早已經本土化。國民黨要重奪失去8年o既總統寶座，睇怕要馬英九出動喇，我相信2008年台灣會再次變天。

2004年Eric好歌流行榜(第12週)：
1)香港地(陳冠希)
2)娃鬼回魂(何韻詩)
3)步步高(梁漢文)
4)目黑(周國賢)
5)明天請早(許志安)
6)兩個人的煙火(黎明)new
7)孩子王(吳浩康)
8)愛神(古巨基)
9)我們的合唱歌(2R)new
10)世界之最(你願意) (鄭秀文)new

P.S.球場大風得好恐怖………

>>March 20, 2004 at 5:14:15 PM GMT+8

2004 年 3 月 18 日 星期四 【晴】

終於搞掂部電腦，又可以上網，多謝呢幾日幫我post diary o既幾位！
又感冒，諗住今日大把時間做功課，最後唔知算唔算做過o野。
聽日就係萬眾觸目o既台灣總統選舉，四年前國民黨分裂，連戰、宋楚瑜分道揚鑣，俾民進黨陳水扁有機可乘，38%低得票率入主總統府。四年後o既今日角色冇變，只係連宋o係政治現實之下走埋一齊，藍營「國親聯盟」決戰綠營民進黨。
本來經過呢幾日o既黑金醜聞，阿扁打o左公投牌、香港牌都好難再留o係總統府，國親聯盟勝算的確比較高，連宋「凍蒜」樂觀o的。點知今日先o黎槍擊事件，令選戰增添無限變數。雖然呢件事多數係綠營置之死地而後生o既屎橋，但係基於台灣一貫強烈o既民粹主義，20%流離票有部分俾阿扁同情分o既可能性絕對存在，再加上綠營o係台南仍然有大量鐵票，藍綠兩營o既差距一定會拉近o左，選舉結果關鍵在於選民夠唔夠理性。
其實無論藍營定綠營入主總統府，可以肯定o既係兩岸關係最多只係維持現狀，台灣就算唔獨立都100%唔會向大陸方向走。過去四年民進黨唯一政績係致力「去中國化」，台灣民眾o既本土意識越o黎越強，連泛藍派都要俾泛綠派牽著鼻子走，迫住支持公投法案，提出「中華民國在台灣」，甚至黨名都諗住改為「台灣國民黨」，民進黨的確有佢一手。就算綠營唔可以再駐紮o係總統府，佢o既在野勢力對台灣政局o既影響仍然好大。

>>March 19, 2004 at 1:43:31 PM GMT+8