2006 年 1 月 31 日 星期二 【晴】

今日係初四，所以男友仔已經開工喇．．．係度祝佢開工大吉啦．．．

而我？都冇咩特別野好做，今日下午就媽咪d朋友上左黎我地屋企度拜年，咁都要做番地主之宜招呼人地既．．．無計，受人錢財（利是），替人消災（減退唱k癮），所以都要借出場地比佢地開concert啦，哈．．．

就咁樣成日留左係屋企，咁即係做就時間同機會比我好好咁搵搵工，所以今日又寄左幾封信囉！

而男友果度．．．好在我整左d手腳比佢，哈．．．係咩黎，唔講啦．．．其實係一d小禮物，慶祝我地兩個拍拖周年紀念日既．．．佢梗係鍾意啦，我整架喎，好有心思架！

>>February 6, 2006 at 4:02:22 PM GMT+8

2006 年 1 月 30 日 星期一 【晴】

今日係初三，係赤口，通常d人都唔會去拜年既，因為怕同人嘈交嘛，哈．．．但係我今日都有去男友屋企度拜年呀．．．不過去之前我就同左屋企人去睇戲，睇魔幻王國：獅子．女巫．衣櫥．．．唔，幾好睇呀，不過較多少少小朋友feel囉，內容都係好似harry porter果d咁啦，都幾好睇既．．．睇完之後就去左男友屋企喇．．．

唉，真係好既唔靈醜既靈囉，今日係赤口，我竟然激嬲左男友呀！天呀！點解我咁黑仔架．．．唉！希望佢快d會原諒我啦．．．我以後唔敢架喇．．．

>>February 1, 2006 at 5:59:59 AM GMT+8

2006 年 1 月 29 日 星期日 【晴】

哈，今日係初二，所以都係同以往一樣一早出去二舅母度開年，因為二舅舅要開工呀，所以要一早出到去啦．．．係二舅母度又順便去埋妹妹個撤媽媽屋企度拜年，所以咁樣又益我多左兩封利是，呵呵！

之後，我地一樣去左舅婆屋企拜年，去到之後表姨同表姨丈又黎左喎，所以咪又多左兩封利是囉．．．哈，好似好市儈咁呀，係咁計住d利是錢．．．hehe~ 不過好在媽咪佢都醒，一早係舅婆度推左我地d細路走先，唔洗我地悶，咁我地梗係去左市中心度行下街先返屋企啦，因為大表哥同阿力都想一心返黎香港shopping架嘛，咪帶佢地行下街啦．．．

嘩！今晚勁多人黎我度食飯囉，除左有姨媽姨媽大表哥阿力之外，仲有二舅母細表哥，仲有契哥同佢女友uki，之後仲加埋舅婆同玲表姨，最後加埋我男友同我一家，仲有阿哥隻狗狗芝麻呢，哈，成十七個人同動物呀！勁！真係好開心架，我地d細既係度玩uno同七級豬呀！勁好玩，好耐冇試過喇．．．今日好開心呢！

>>February 1, 2006 at 5:56:24 AM GMT+8

2006 年 1 月 28 日 星期六 【晴】

嘩~ 今日係大年初一，在此恭祝各位：
心想事成！
萬事如意！
身體健康！
笑口常開！

唔，今日如往年一樣，起身後就同屋企人係度食年榚，向爹地媽咪拜年咁，之後就出左去姨媽屋企度拜年．．．又係一樣去姨媽屋企之前約左二舅母表哥係麥記度等同食少少野先再去．．．今年特別d，因為大表哥同佢女友阿力都係美國返左黎香港，所以多左兩個人一齊過年啦！去完姨媽度拜年後，我地仲全部人去左食魚蛋，哈！幾好丫．．．今年又豆多左姨媽姨丈兩封利是，真係開心．．．

>>February 1, 2006 at 5:36:38 AM GMT+8

2006 年 1 月 27 日 星期五 【暴雨】

嘩，今日幾開心丫，同男友去左購物呀，同佢去左買鞋囉，之後仲去左百佳度掃貨，因為佢好慘，初一二都係自己一條友係屋企，佢媽媽去左澳門旅行淨低左佢同隻狗狗係屋企．．．唉！之後同左佢同佢媽媽行左元朗既花市．．．唔，都冇咩好睇同好行，地方又細，而且天氣又差，係咁落住雨，好冇心情行，不過佢媽媽媽都買左少少花啦．．．之後我就返左屋企食飯，食完飯同左屋企人去左屯門個花市行．．．嘩，果度比起元朗個仲大少少，多野睇少少，仲好多人添，都幾熱鬧．．．之後爹地話今日有古巨基去屯門市廣場度倒數，所以我同妹妹一行完花市就即刻去啦！好正呀，睇到基仔呀．．．真係想大叫，好近好近呢，哈哈．．．好興奮．．．真係一個好好既新伴禮物呀！

好啦，在此祝願各位好友：

新年快樂！
身體健康！
心想事成為
有情人終成眷屬！
笑口常開！

恭喜恭喜．．．

>>January 28, 2006 at 5:54:44 PM GMT+8

2006 年 1 月 26 日 星期四 【暴雨】

今日主要係陪左媽媽同妹妹去左購物，買完要買既野之後就返左屋企喇．．．

之後夜晚就去左男友度，因為佢剛去完camp返黎，所以咪去佢度陪下佢啦．．．

聽日我地打算去元朗果個花市度行下，希望天氣可以好d啦．．．

>>January 28, 2006 at 5:49:27 PM GMT+8

2006 年 1 月 25 日 星期三 【晴】

哈，今日陪左媽媽出去旺角度買野，之後妹妹又黎埋，我同左妹妹一齊行街街買新衫過新年．．．今日大出血呢，買左成五百蚊野，琴日又買左成四百蚊喎，好慘呢！真係要慳住洗喇．．．

>>January 26, 2006 at 4:33:33 PM GMT+8

2006 年 1 月 24 日 星期二 【陰】

哈~ 今朝早男友打黎比我，叫我陪佢出去尖沙咀聽講座，咁算啦，都要陪佢一次喇．．．出到去點知發現我又唔方便入去聽埋一份，所以最後得我一條友自己行街街囉，行足兩個幾鐘呀，都幾累下，不過都有收獲，買左少少野．．．都幾開心既！

跟住男友終於聽完講座，我地就去左旺角喇，陪左佢今日做一件大事．．．就係陪佢拎漫畫喇．．．其實男友佢前晚伙網上邊終於搵到佢一直想搵既"島耕作"系列漫畫，佢終於可以買晒全套喇，咁今日就陪佢去交收囉．．．佢真係捨得，用八百幾蚊買四十幾本漫畫．．．不過都明白既，心頭好呢d野好難講既，我見到佢開心我都為佢開心．．．不過我估今個新年都要陪佢捱喇，因為佢冇晒錢啦．．．哈！

>>January 26, 2006 at 4:28:33 PM GMT+8

2006 年 1 月 23 日 星期一 【陰】

今日同左班中七同學食飯聚會，去左其中一個同學仔既新居度玩同食野傾計．．．其中小win佢爹地近日因病而入左醫院，大家都知道佢好擔心佢爹地既情況，我地都好為佢同佢既家人擔心．．．

我在此為她祈禱，”無所不能既上帝，我們既天父，希望祢大發慈悲，可以為小win既爹地帶來堅強及積極既態度去面對病魔，同時亦給予小win同佢既家人多些既勇氣及信心，協助佢地帶領佢爹地脫離疾病；同時亦可以不時平伏佢地既不穩情緒，好讓佢地給予更多既正面支持比佢爹地面對前境，神呀，我知道你係希望讓小win佢去嘗試面對逆境同困難，好讓佢能夠在當中得到成長及體會，但係我亦希望神你可以不時在旁協助佢，保守住佢同佢既家人，好讓佢地一齊克服得到呢個你所給予既難關，以上係靠主耶穌基督既名而求，誠心所願．．．”

除此之外，今日既聚會我覺得簡直係用一句粗口去形容：”燒你數簿”．．．點解我咁激氣？其實都唔係所有人既問題，只係其中某幾個人既行為令我覺得自己好不被尊重o者，而最重要既係我覺得自己好似一個outsider咁囉，我一講親野，人地就係背後同某某細聲講大聲笑，咬完左耳咬右耳；算啦，呢d野我都慣架喇，我都唔會怪佢地，因為呢個世界一樣米養百樣人，總有一d八婆鍾意講人是非架啦，只不過人地識話人係喇叭口唔識得話自己係o者．．．呢樣都唔緊要啦，最激氣既係，如果真係發生左d咩野問題係唔妥既，或者係有d咩野係出錯左而關我事既，我唔介意人地開心見誠講出黎囉，洗乜呢埋講哩講路，細聲講大聲笑，之後仲要作個大話出黎呢？真係當我傻仔咩？我唔講到出面係我識得尊重番人，尊重番個場面，尊重番自己，唔係什麼潑婦罵街．．．講真，我唔係d咁介懷或者小器既人，有咩既咪講出黎囉，我冇所謂架，講真，我送得份禮物出黎我冇諗過要咩回報，最緊要就係大家happy之嘛．．．但係我唔知點解總係有d人唔會將我呢個人當係朋友去看待囉！我同一個過路人有咩分別呀？

其實大家做得朋友既，最重要既坦誠相對o者，如果要做到咁樣既，真係冇意思囉．．．或者我有時我都因為工作關係而好少能夠參加得到聚會啦，有時候總會對佢地既近況同話題有脫節．．．但係我都已經好努力咁去令自己update番，盡量跟番同迎合番佢地既步伐．．．唉，但係有時真係事與願違，我真係好失望囉，做左真係有8年朋友喇，有個仲唔至添，十年有多囉，點解都可以係咁呢？我唔明白囉．．．唔通自己願意交個心出黎同人做朋友都係錯，哼，而家先至發覺自己一直係傻仔囉，自己交個心出黎比人當狗肺．．．唉！算啦，我都唔介意人地喜歡在我背後說三道四囉，因為清者自清；二來人地喜歡點就點啦，我參加聚會所享受既係同其他人既見面同相處，享受既係當中與朋友聚會既氣氛同友誼感覺，其他野我唔在乎架喇，人地鍾意點我都控制唔到架啦，而家化架喇，做朋友呢d野隨緣罷啦！唉！

>>January 24, 2006 at 5:34:13 PM GMT+8

2006 年 1 月 22 日 星期日 【陰】

唔~ 今日係屋企雖然悶悶地，但係日頭可以同芬芬豬傾msn，順便同佢講句sor．．．哈，都幾開心呀！不過我都知我係咁同佢講野，唔多唔少都有少少阻住佢做野架喇，哈！知佢新年又去行山真係羨慕死人，我都好想去玩玩啦．．．跟住夜晚又有個好姊妹小a公主傾電話，真係個人都冇咁悶．．．不過講起就過年，諗起又要去拜年．．．

其實諗起拜年真係悶，年年都差唔多去埋同樣地方，見埋同樣人，做埋同一樣野，講埋同一類既說話：”又大個女左喎！””又靚女左喎！！”（心諗真係行都爆，有冇創意架？）而到左呢兩三年仲特別多左幾句：”幾時結婚o者！””係時候結婚喇，唔係要生細路年紀太大唔好架！”（嘩，結婚呢d野唔到我話事架，都要有人要先得架！）”你表哥都仲未結婚，你咪爬佢頭呀！”（我心諗如果佢呢世唔結婚既，我咪成世都唔洗結？）．．．

有時諗番新年都幾攪笑，每年年初一同一時間都係去同一個親戚屋企拜年，通常都係d大人係度傾計，我地d細既都係係咁易應幾句，但係都係十分之悶，而通常果個時候電視都總係做緊一個節目，就係呢個賀歲波喇．．．哈，真係好笑，眼就望住部電視，但係又其實冇用心去睇架喎，而果個親戚婆婆年年都問我地d細肚唔肚餓，煮年榚煎堆比我地食．．．我地通常梗係話唔食架啦，因為去之前一定會去同一個地方，就係全年無休既麥記食野．．．哈，諗起真係越來越好笑呀！

相信今年既新年都係布同樣既情境發生架喇．．．

在此，願祝各位新年行大運啦！

>>January 24, 2006 at 9:02:25 AM GMT+8