2006 年 1 月 21 日 星期六 【陰】

今日男友去左跑馬拉松呀，真係辛苦，佢跑左5.6公里喎，用左四十分鐘時間完成左．．．佢跑完成後仲要返工做嘉年華，真係慘到暈低啦．．．之後佢話對腳好似唔係自己咁，痛到要死呀，真係好慘呢！我做女友既，已經冇去到當場支持佢架啦，唯有今晚去左佢度探下佢，睇下佢啦，順便睇下佢隻腳仔點啦，哈！

而我下午時間就同左爹地媽咪三個人去左市中心度食飯，跟住就行下街啦．．．嘩，市中心超多人囉，真係度度都係人呀，但係點知都係一度睇緊衫時撞到個舊同事，呀芬芬豬．．．哈，初頭係我無啦啦聽到有人叫我全朵，我果時心諗邊個衰人呀，想死呀，響我全朵？點知一抬頭就見到芬芬，哈，即時唔想罵人啦，因為太耐冇見喇，當時佢媽媽都係度，我仲叫左聲auntie添，不過因為當時太多人，我又要兼顧埋媽咪爹地，所以之後大家都冇點講野就分開左喇．．．真係要同佢講聲sor sor呀！遲d搵佢食飯仔啦！

>>January 23, 2006 at 8:12:22 AM GMT+8

2006 年 1 月 20 日 星期五 【陰】

嘩~ 今日日頭冇咩特別野做，不過係icq度遇到個舊同事，講起佢中心近日有人事既變動同埋先排發生既大鑊野．．．唉，聽到之後都覺得自己好幸運可以不需要面對呢d既情況同問題！其實有時冇既，做野最重要係自動自覺，樣樣野都要人督促住，跟住尾先至做得好既話，咁真係個個老細都忙到要死囉，淨係跟住同事既手尾都要死啦；有時候一d新既system發明或者出現，真係為人類帶來唔少既方便同優勢，可惜呢d既方便卻往往成為左人類懶惰賴皮既藉口，令好多本來應該可以好好既結果變成一塌糊塗．．．哈，真係好諷刺呢！

之後夜晚出左去同親友食團年飯，表哥又無啦啦收到朋友既電話，話有兩張免費既演唱會飛，係孫燕姿呀．．．勁正，表哥冇計，問我同妹妹邊個想去，要我地自己搵方法打生打死都好攪掂佢，因為其中一張飛係非佢莫屬架喇，唯一一張飛就唔知邊個拎到．．．唉，算啦，我做大既都要讓細架啦，唯有益妹妹去囉．．．哈，妹妹話勁正囉，佢地坐第五行呀，超近呀，仲握埋手添．．．真係羨慕死我啦．．．

>>January 23, 2006 at 8:12:30 AM GMT+8

2006 年 1 月 19 日 星期四 【乍寒還暖】

唔，今日天氣好差，令到個人既心情都麻麻．．．

今日下午陪左男友去拎身份證．．．哈，都映得佢幾靚仔丫（梗係，映左成六次先至收貨呀，唔靚都映到靚啦），而且明顯見到張相係有少少做左手腳既，見到個面口好似肥左d咁，哈！幾好丫，終於有張新身份證．．．三月應該到我架喇，真好，我想換好耐架喇，因為而家張身份證相好肉酸，係我中五果年映既，諗番起都唔想睇到呀，哈．．．所以我一知換得我一定第一時間去換架．．．

夜晚返到屋企，就同左男友一齊試個新v-cam，哈，幾好丫，個quality唔太差，不過係個mic唔係咁得，打算買過個喇．．．好玩丫，琴晚玩到比妹妹罵我嘈住佢訓，哈，真係sorry喇！

>>January 21, 2006 at 4:43:46 AM GMT+8

2006 年 1 月 18 日 星期三 【暴雨】

唉~ 今日係屋企都幾悶下，都係幫媽咪手執下屋企咁啦；越執就執發覺好多垃圾要掉，哈！後來仲比我發現原來我收埋左男友好多書添，所以今晚決定拎番比佢啦，最後接左佢放工，一齊入番元朗喇．．．

>>January 21, 2006 at 4:38:48 AM GMT+8

2006 年 1 月 17 日 星期二 【陰】

今日係屋企都幾悶下，下午跟媽咪去食完午餐後買餸，返到屋企食左藥個人好累，所以訓左一陣，之後就起身睇番星期日錄明珠台果套top model，跟住就食飯．．．而家？要繼續努力搵工囉．．．其實好想執下d野架，不過最衰妹妹，佢成日都係我執好晒野之後整亂晒架，真係氣死人．．．真係唔執好過執呀．．．但係見到咁亂，又過唔到自己果關．．．唔得，都係要執一執先至得．．．掉咁d野啦，唔好咁多野呀，如果唔係第二日嫁得出果時都唔知點搬野走人呀，哈，要走佬都走唔到呀．．．

>>January 21, 2006 at 4:43:56 AM GMT+8

2006 年 1 月 16 日 星期一 【晴】

今日下午陪媽咪出左去搵姨媽舅母飲茶茶．．．飲完茶之後我就同左媽咪去荃灣度行街街．．．其實見到好多野都好想買架，因為就到新年，又想找藉口買新衫啦，哈．．．不過冇錢呀，又唔想晒錢啦，而家糧地丫嘛，盡量都慳d啦，係咪！

>>January 18, 2006 at 1:01:22 PM GMT+8

2006 年 1 月 15 日 星期日 【晴】

今日冇咩特別野做，主要都係係屋企執下野囉，因為都就黎新年喇，順便大掃除下．．．其實大掃除咪即係掉野，哈，所以我都掉左好多野喇．．．都好既，唔洗間房咁亂丫嘛，個人都住得舒服d啦．．．之後我都好努力咁打信搵工啦，而家真係要積極搵工喇，唔可以再係懶落去囉．．．要加油！所以今日一次過寫左八封信囉，希望有消息啦．．．

>>January 18, 2006 at 12:59:31 PM GMT+8

2006 年 1 月 14 日 星期六 【晴】

嘩~ 今日訓到好晏先至起身呀，因為琴日行完山實在太累喇．．．難為男友今日仲要返工添．．．所以我今日都特登去佢中心度陪下佢，因為佢今日有個寵物美容班，我順便去見下佢之外，仲可以玩下狗仔，幾好．．．之後我都返左屋企食飯喇，睇完十大勁歌啦，個結果都幾好，哈，唔洗劉華拎就得架喇．．．

>>January 18, 2006 at 12:57:17 PM GMT+8

2006 年 1 月 13 日 星期五 【晴】

嘩！終於行完山露完營返黎喇．．．真開心呢，可以完成到呢個旅程．．．因為足足成二十公里架，我點都要讚一讚自己啦，我覺好叻架，男友都有讚我叻叻啦．．．不過今日行山途中發生了一個小插曲．．．就係我隻左手唔知點解，無啦啦腫起左，係成隻手掌腫左囉，唔知咩事，因為之前曾經比一隻蟲咬過黎，我行行下都曾經感覺到一點麻痺既感覺，唔知係因為隻蟲丫，定係行果時隻手比d草針到啦．．．最後我都好擔心，一路行一路腫落去，d手指仲好似越來越痛，有d好似就黎爆既感覺，好驚呀！隻手好似肥婆既手咁，好肉酸囉！

不過後來返到屋企，我係咁用凍水沖隻手，好似有少少起色咁，開始有少少消腫，直到夜晚先至冇事，我最腫果時我特登映左張相做對比，哈！講起都好驚架．．．好在有男友係身邊佑住我鼓勵我，如果唔係我真係唔想再行落去喇．．．

返到屋企就累到要死，對腳好似唔係自己咁囉，後來沖完涼之後就同家人出左去食飯，食完飯返黎都累到要死喇，拿拿聲都去訓啦．．．哈，聽日我都起唔到身返教會架喇．．．唉！

>>January 15, 2006 at 12:03:14 PM GMT+8

2006 年 1 月 11 日 星期三 【晴】

哈！今朝一早起身去左面試國泰喇，其實過程中並唔係好難，而身邊既人都好多好有質數架，我仲識左幾位一齊面試既女仔添．．．不過我估機會都不大架喇，因為當中有幾個人既過往經驗同份工好關連，有一個係之前係港龍做過地勤既，一個係讀旅遊既．．．我自問其實在其中表現不錯架，而且我覺自己在當中既學歷都不質低，不過即使唔得既都係因為過往工作經驗與呢份工不太相乎吧！唔緊要啦，等待神既安排啦．．．

下午見完工後約左妹妹去尖咀行街，都幾開心，我妹妹就好多收獲呀，我就因為當時著住又尖又高既皮鞋太辛苦喇，最後買左對平低鞋同牛仔裙，即時承機轉look啦，哈！之後夜晚因為媽咪剛好係尖咀附近，所以約埋一齊食飯，最後就帶住好累既身體回家喇．．．

唔！我約左男友聽日同後日一齊去行山露營呀，哈，好開心呢，又可以去玩喇．．．不過聽男友講，今次條路都幾長下，足足要行成十個鐘架．．．我都有少少擔心自己捱唔到，最怕係氣喘發作就死．．．不過．．．我都要努力呀！

>>January 15, 2006 at 11:52:01 AM GMT+8