2006 年 4 月 27 日 星期四 【溫暖】

嘩~ 今日好黑仔囉．．．今日超級大雨呀．．．我今朝出門口返工果時係落得最大雨果時，我出門口時都係間住水行，簡直係海灘漫步咁（真係唔恨呀！）最後梗係由頭濕到落腳啦！

之後黑野繼續黎．．．搭962又塞車喎：首先係屯門公路水浸事件；因為水浸，所以我未上屯門公路已經開始塞車，好經辛苦塞左大半粒鐘之後過左果度，但係果時已經係九點，真係死，返工冇耐就遲到．．．唉！之後即刻打電話番去話塞車遲到啦，真係冇計．．．之後諗住應該快返到去啦，點知架車去到青馬隧道又塞過，一架巴士壞左車囉，呀！天呀！心諗唔好玩啦．．．跟住終於出左果度去到美孚果頭，頂，又塞，見到兩架的士炒埋左一舊囉．．．真係人到癲呀！

好在跟住冇再點塞，係去到公司留下又塞左一陣等埋站囉，最後九點九返到去．．．都算快架喇．．．好在有個又係住屯門既同事陪我，不過佢搭村巴，所以一早知道果頭塞車就司機醒目，轉路線行荃灣出尖咀又炒上西隧．．．

跟住公司又傻架，要我補番今日遲左果九個字喎，真係有病架，我又唔係有心遲既，佢去查下都知真係有塞車啦，根本唔信人咁．．．不過算，我豪比佢．．．

今晚第一堂返普通話班，真係好好笑，好笑在因為唔識而引發好多既笑料出黎．．．哈，我都越來越有興趣學，我要努力！

>>April 30, 2006 at 11:29:49 AM GMT+8

2006 年 4 月 24 日 星期一 【雨】

一直期待以久既九巴消息．．．今日終於收到．．．．就係一封reject既信．．．雖然係被人reject左，不過都總算鬆左一口氣，唔洗再等佢啦，係咪？而家索性叠埋心水繼續努力去搵工！

男友佢呢兩日都放假，真係好有假放，好羨慕佢呢．．．佢琴晚都同左個朋友上左大陸去dup骨，我都好想去呀，因為我先兩日扭到個背脊，雖然而家好番少少，不過都想按摩下，歎下丫嘛！

>>April 26, 2006 at 3:08:11 PM GMT+8

2006 年 4 月 22 日 星期六 【晴】

今日難得放假，但係因為妹妹今日話要交份比賽作品去beams boy t，所以都陪左佢出去尖沙咀交野，順便行下街．．．

嘩，行左好耐囉，又行左好多地方，我今日仲要著左對新鞋仔，所以超累超辛苦呀．．．不過都幾好，因為今日又有收獲．．．但係諗番起卡數．．．真係好驚呀．．．

天呀，仲有成三星期先至有糧出呀，真係好慘．．．點解呢度係七號先至出糧架．．．仲要第一個月係唔足糧添．．．好痛苦！其實而家份工比以前份工少左成四千蚊，我都好擔心會一時負擔唔到呀．．．真係有排要適應！不過食得咸魚抵得喝，要脫離社工行列入新行列，就預左要重新開始．．．有好多人覺得我好晒，冇左社工呢個專業，但係我自己覺得繼續留係度都冇前途可言架啦，而且而家都唔可以話社工係咩專業啦，簡直係爤市啦，呀豬呀狗都做得，人工又越來越低，做既野又越來越多，成個社福界都一潭死水咁．．．真係好灰．．．

我身邊都有好多同學仔轉左行．．．講起轉行，哈，今日好驚囉，因為有個舊同學無啦啦打電話比我，而果個人不但大家畢業後一直冇聯絡，而讀緊書果時大家都係唔係熟果隻囉；當然，佢打黎梗係有原因啦．．．佢而家轉左去做宏利既financial planner，我就梗係唔會上當啦，佢係咁話約我出黎食飯傾下大家近況喎，傻既，我先唔會咁蠢囉！我都唔知點解佢會知道我轉左行既，都唔知邊個講佢知．．．不過算啦，我都唔會赴約架啦．．．哈！

>>April 26, 2006 at 2:43:51 PM GMT+8

2006 年 4 月 21 日 星期五 【晴】

今日星期六，所以返工十分有holiday mood囉，日日返工都係等呢一日放假．．．

放工之後就約左男友，我地約左係尖沙咀等，後來我地好浪漫，沿住海皮行呀行，一直生到去紅磡，後來去左黃埔度行，都好耐冇去過果度囉，我地上次去都好幾年前囉．．．不過發生左件趣事．．．先兩日男友同一個好耐冇見既朋友傾電話，而個朋友佢係住係黃埔既，我地去到果度時都曾經諗過不如約果個朋友出黎食飯，不過後來因為怕太急人地唔得閒所以冇約．．．後來我地去左吉吉島度行街，點知比我見到一個好似果個朋友既人（因為我見到果個好似比之前果個朋友肥左好多，所以一直好猶豫），不過我地都冇叫到佢呀，因為我地相信如果大家有緣既，一定會再見．．．點知真係，我地十分鐘唔夠又再見到佢，今次男友把心一橫走去叫佢，點知真係佢．．．大家真係有一見如故既感覺，仲講起本來想約佢，點知大家咁有緣份見到面．．．哈，真係好攪笑！

後來，我同男友一齊返左元朗，仲好嘆咁一路切芝士食一路飲紅酒！真係正~

>>April 26, 2006 at 2:35:29 PM GMT+8

2006 年 4 月 20 日 星期四 【晴】

今日終於放工後去左見工．．．個結果？講真，我個感覺唔多好囉，因為佢由頭到尾都係度踐踏我，又話以我既學歷同工作經驗係唔價14k喎．．．佢都傻既，我之前都係呢個價架啦，佢比唔起可以好少少態度去講，人地都明白啦，唔洗連態度都寸埋咁，係咁話我學歷低喎．．．

算啦，證明我同呢份工都係冇緣，而且要同咁既同事合作都未必係好事啦．．．我曾經都為呢份工是否做而頭痛，我亦同同事傾過．．．有個同事佢講得好o岩，佢覺得：”當初你決定左要離開社工呢一行，而且亦同自己講唔要再返轉頭做番呢行，亦分析得好清楚自己既前途問題．．．咁到而家呢一刻就唔應該再去煩呢份工，因為根本係唔需要去考慮；反而應該繼續履行自己當初要離開社工呢行既決定同目標！”我好同意架，所以都係叠埋心水唔理佢啦！

今日見完工之後都同左男友出去旺角，但係因為佢之前約左朋友，比朋友捉左去食飯先，所以抌到我都唔上唔落．．．其實係有少少嬲架，因為佢根本可以推左個朋友唔食住，等埋我架嘛．．．不過算啦，我都明既，鬼叫我知道自己同佢既朋友比較下唔夠人地有地位咩！

>>April 26, 2006 at 2:27:49 PM GMT+8

2006 年 4 月 18 日 星期二 【晴】

今日港專果度打比我，叫我星期五去2nd in．．．其實都幾矛盾，因為自己當初毅然要離開社工行列，但係而家又走去見工．．．哈，我都好頭痛呀．．．不過講真，如果佢個pay好既，我都會quit左而家果份去囉，因為實在太冇前途可言喇．．．

不過而家講咩都冇用，人地又唔係一定要請我既．．．睇定d先啦．．．

>>April 26, 2006 at 2:21:42 PM GMT+8

2006 年 4 月 16 日 星期日 【晴】

哈，今日返工真係個個同事都好holiday mood後遺症，仲好似放緊假咁，個個都未回魂呢．．．而其他舊同事都因為太少人返工，所以佢地都好free，成日行黎行去傾下計食下野．．．後來下午茶時段，梁IC仲請晒我地飲野添，佢真係好好人．．．

唔，今日上半日都係幾虛渡咁過，因為中途有成粒鐘係冇電腦用，入唔到野囉，之後又係度傾密計．．．哈．．．我覺得好少返工可以成日同同事傾密計．．．不過當然遲D唔會再有咁既機會架喇，大家都要各散東西．．．

聽日又要去GPO果邊上堂，真係好怕會好眼訓同好悶囉，而且知道個TOPIC係好悶好多野要記好難囉．．．真係好擔心自己冇精神呢！

今日放工果時打左個電話比一個舊同事，我地約左聽日放工之後出黎飲野傾計．．．唔，好期待呢，因為太耐冇見喇．．．

>>April 17, 2006 at 2:24:24 PM GMT+8

2006 年 4 月 15 日 星期六 【陰】

嘩，今日好難得可以放一日假喇．．．如果唔係個人真係會collaspe架喇．．．．

其實今日本來諗住返教會既，不過真係太累喇，起唔到身呀．．．真係衰喇．．．我知架！不過真係敵不過睡魔！

今日自己一個係屋企，因為媽咪佢返工，爹地佢返左教會，妹妹佢約左朋友出街街，所以自己同貓貓波波係屋企你眼望我眼囉．．．不過都幾好，難得一日可以自己一條友係屋企，做自己想做既事，上自己好耐冇上過既網，亦寫左自己好耐冇寫過既日記．．．哈！

唔，聽日雖然大家都放假，但係我仍然要返工．．．好慘呢．．．人人可以大覺訓，我就要早起身返工．．．唉．．．唔知聽日d電腦會唔會又壞左呢？哈，咁又可以hea番一陣唔洗做囉！

>>April 17, 2006 at 2:20:21 PM GMT+8

2006 年 4 月 14 日 星期五 【暴雨】

今日時間比起琴日較難過，今日d電腦都係死左，所以又係入唔到野囉，真係好無癮．．．

仲有，今日發覺教我地野果個師姐真係．．．好寸囉，而且又唔多采人咁，真係唔多好囉．．．

今日我地仲無啦啦比佢寸左一寸，大家都o晒咁唔知咩事．．．一句講晒，呢度既同事都係古古怪怪咁

>>April 15, 2006 at 2:20:57 PM GMT+8

2006 年 4 月 13 日 星期四 【陰】

哈~ 今日返工真係時間好易過，因為一朝早返到公司，上司話d電腦死晒，要時間去整理一下，所以我地呢班新同事就可以圍埋一齊，表面好似係度溫書，但其實我地係度傾計．．．我地傾左好多野，大家亦交流左好多想法同經歷．．．好開心咁傾左成兩粒幾鐘呀！而其他同事呢個時間就係度做一d好似briefing既野，不過都係唔知佢地係度做乜野啦．．．大家就好hea咁過左兩粒幾鐘，之後就上左一個鐘頭堂就食lunch喇，所以好開心．．．

之後下午既時間都係好快好易咁過左．．．大家係今日都了解大家多左，因為多左時間去傾計同交流丫嘛．．．係好事黎既．．．不過想起一個月後大家都會各有各路，要分開工作既時候，就真係好唔捨得喇．．．

今日放工之後就好開心咁走左出去旺角搵男友喇．．．見到佢之後真係好開心，因為實在太掛住佢喇．．．跟住就不斷將呢幾日發生過既野講比佢知，係咁講唔停咁．．．都好多謝佢好留心同有耐性咁聽我去發牢騷．．．

不過最唔開心既係聽日要一條友好早起身返工呢．．．唉

>>April 15, 2006 at 2:19:03 PM GMT+8