2006 年 4 月 12 日 星期三 【陰】

唔，其實已經好幾日冇見過男友喇，又真係幾咁掛住佢既．．．

而且先幾日佢又心情唔多好，工作又忙碌，所以我都冇點同佢聯絡過．．．希望佢心情快d好番啦，因為都擔心佢．．．所以我琴日特登買左樣野比佢，希望佢收到會開心啦．．．

今日係北角做orientation，真係激死，黎上堂既其他部門同事真係太冇品，一d就由上堂訓到落堂，有d係度玩game boy，打電話，同tutor嘈，出出入入咁．．．總知一句，差啦．．．

唉，真係發覺原來我地都係一班好乖既同事仔

>>April 15, 2006 at 2:14:14 PM GMT+8

2006 年 4 月 11 日 星期二 【晴】

今日繼續上堂，不過已經冇琴日咁死，對工作好似多左少少了解咁喇．．．

聽日一朝早要出北角上堂呢．．．

今日放工無聊咁去左尖咀行街，之後就搭車返屋企．．．原來咁樣返屋企真係平好多車錢呢．．．

>>April 14, 2006 at 3:26:03 PM GMT+8

2006 年 4 月 10 日 星期一 【晴】

哈，琴日返工其實都幾hea下架，因為朝早就簽合約，之後都去左參觀中環總局同機場既空郵中心．．．其實都幾大開眼界架，因為冇乜機會可以去到空郵中心架，入去之前都要比海關守身，scan過晒你d手袋咁，好嚴密既保安架．．．都係一個榮幸可以去到果度參觀既．．．

而今日就真係好死悶囉，成日係咁講書，而且講書果位同事又真係唔係好識教．．．係，佢係有好多經驗，佢對所有野都好清楚，但係d野係晒佢個腦度囉，佢都根本唔識教人．．．唉！

算啦，佢今日講既都係一d概念既野，都係要實踐先至得既．．．

仲有，今日聽聞我地可能唔會所有人都做call centre呀，有部份同事可能會派去做其他部門！其實我都好擔心呀，因為始終聽落d野都好似好難好辛苦咁呀！唉，媽咪問過我有冇覺得自己揀錯左呢份工做．．．其實都冇既，當時在三個選擇中郵局又好似比較好咁，邊有人可以算到有呢一著架．．．

不過而家唯一支持我同推動我返工既，係因為識到一班好同事，可能大家年紀差唔多，所以好好傾，而且大家做野都好一致既，所以都係一件好事黎既．．．努力啦！

>>April 14, 2006 at 3:24:44 PM GMT+8

2006 年 4 月 9 日 星期日 【晴】

嘩~ 今日第一日返郵局....

真係好累呢，今朝好早起身喇，因為怕遲到，而且今日講明如果遲到就會取消資格唔比你簽合約喎，咁一於早d到啦．．．

點知去到先至發覺根本就係一個局．．．被坤囉．．．呢份工既offer不但唔好，而且佢合約所提及既條款同見工果時同佢出ad果時都有出入既！佢都好寸架，話如果我地對於合約條款唔滿意既話可以即刻離開，當今日白黎喎．．．講真，有邊個咁夠彊架，擺明要你局住上架啦．．．

哈，我又有少少衰囉，今日知道係咁之後返到屋企就即刻寫左兩封求職信喇．．．其實我都係希望九巴果度請我就好囉．．．咁唔洗煩啦．．．

>>April 14, 2006 at 3:18:38 PM GMT+8

2006 年 4 月 7 日 星期五 【晴】

琴晚去左男友度，所以今日都係陪住佢．．．男友今日係屋企係咁整電腦，咁我唯有做跟德夫人啦，一於陪住佢．．．

之後我地下午去左市中心行左陣街，仲買左少少野添．．．

唉，星期一要返工喇，真係好驚會果日唔知醒呀！！

>>April 8, 2006 at 5:56:35 PM GMT+8

2006 年 4 月 6 日 星期四 【晴】

今朝去左見工，嘩，搵死我先至去到，真係好趕．．．不過好在都預早左到．．．

見完工之後就返左屋企，等到夠鐘時又再出街，因為今日約左男友，男友既中學老師，同埋佢個好同學食飯．．．哈，呢個組合我覺都幾特別架．．．我同老師真係素未謀面，只係上年見過一次，但係大家就好似一見如故咁，有說不盡既話題．．．可能佢個老師本人為人健談，而且性格開朗，唔會擺起個老師款咁啦，特別容易傾得埋．．．佢個老師真係幾掂架，我指你外型同樣貌，都唔似一個四十出頭既老師，真係型仔到成個三十多歲既年青人咁．．．真係嗒得杯落架．．．後來食飯過程中講起男友好似瘦左好多．．．其實我都覺，我好擔心佢，因為知佢成日冇營養，又冇住家飯食．．．唉，有時真係好心UP架．．．唔得，我係時候要做番D野喇．．．

>>April 8, 2006 at 5:55:05 PM GMT+8

2006 年 4 月 5 日 星期三 【陰】

哈~ 今日去左見工黎．．．去左九巴度見工．．．呢份工既工作性質真係好好，返工時間都唔錯，人工都比郵局既高．．．其實．．．如果佢請我就好喇，我會放棄郵局呢份工囉，哈！

九巴呢份工類似PR既多，所以如果做到既話，我相信可以學到更多野，識到更多人囉．．．當然我都會擔心自己是否可以HANDLE得到．．．不過點都好，而家做住郵局先囉，邊做邊搵係我而家既目標．．．

其實有少少擔心架，因為而家仲係好悠長假期咁，仲未準備好心情返工．．．

聽日仲要去見工，係去見港專既青年發展主任．．．哈，如果佢好PAY既話，我都同樣考慮架．．．

>>April 8, 2006 at 5:46:19 PM GMT+8

2006 年 4 月 4 日 星期二 【炎熱】

今日同左屋企人去左薄夫林既基督教墳場掃墓，拜我既太公太婆，太姨婆，同埋表伯公表伯婆．．．其實呢d人都係我心中有好少印象，因為太公同太姨婆係我未出世前已經過身，即使太婆由我出世至八歲時都同我一齊住，而我記得細個果時成日都整蠱佢，拎走左佢個四腳架當龍門去踢波，哈，係咪好洩呢！而表伯公同表伯婆就係我細個時曾經去過佢地度拜年囉，所以印象真係唔深．．．只係記得佢地好好人，成日請我地食野．．．

拜完山之後我地一家人去左好耐冇一齊去過既KFC度食野．．．嘩，我地叫左個4-6人餐，真係食到傻左，都食唔晒呀．．．不過好好味，可能太耐冇去過啦．．．

今日男友佢繼續帶CAMP行山，佢話今日條頸冇琴日咁痛，仲可以轉到少少添，佢話覺得唔係D肌肉同D根痛喎，反而係骨度痛出黎．．．初時我都好驚好擔心架，不過後來諗諗下，可能佢近日熱氣，個人有火呀，我估計佢果D痛係火黎架．．．其實我都唔知咩係火，因為細個果時妹妹成日話腳痛，D老人家成日話佢D骨度有火，會走黎走去架喎！

點都好，見到男友好似好番少少，我都安心好多，因為真係好擔心佢架，佢份人好粗心大意，又成日掛住做野，一做野就咩都唔理架喇．．．不過而家見佢好左少少都好既．．．

唔，聽日下午要去見工，去九巴度見一份CHEIF CUSTOMER SERVICE ASSISTANT，冇既即管試下去囉，都知九巴沽寒架喇．．．，星期五又有一份見，係去港專見青年發展主任．．．如果佢有好PAY，可能唔做郵局囉．．．哈，希望係咁啦．．．

>>April 5, 2006 at 3:12:59 PM GMT+8

2006 年 4 月 3 日 星期一 【晴】

唔，今朝起身時好在隻腳冇咁痛，都心情好番少少．．．今日本來約左妹妹去沙田行街街架，點知個衰妹放左我飛機，話約左同學仔．．．唉，咁做家姐既唔通阻住妹妹同同學仔一齊玩咩，咁唯有搵媽咪啦，點知媽咪佢又同左個朋友出左去旺角睇裝修既材料喎，所以最後得番我一條友留番係屋企．．．

所以自己承機有時間去做下d野，整下野咁囉．．．都幾好既，難得係返工之前仲有時間去做下自己想做既野，真係要好好珍惜．．．

但係有個壞消息．．．男友佢今朝已經同我講突然間條頸覺得好痛，我仲以為佢係訓禮頸添，後來佢話三點幾時覺得越來越痛，所以後來去左睇鐵打．．．師傅話佢可能整到條根喎，可能因為訓既姿態唔好，或者係已經長年累積所致．．．我好擔心佢呀，因為佢今日仲要帶細路去camp呀，聽日仲話行山喎．．．我梗係叫佢唔去去啦，但係又唔得，後來唯有叫佢小心d啦，如果拎唔到重野咪比細路拎啦，唔好再去行山囉，叫佢戒口咁．．．

唉，希望佢冇事啦，師傅叫佢聽日要去覆診架，都唔知會唔會好手尾長添呀．．．好擔心！

>>April 4, 2006 at 12:24:12 PM GMT+8

2006 年 4 月 2 日 星期日 【晴】

今日約左個好姊妹去左葵芳行街食飯，都好開心呀，因為大家都傾左好多野呀．．．而且仲一齊去左shopping添，我地買左一條一樣既頸錬，一於做對孖公仔啦．．．

好姊妹佢打算去東京旅行呀，好羨慕呢，佢有男友請佢去呀，哈，到時要託佢買野啦，哈．．．

行完街之後我就入左男友度，因為難得可以過下二人世界嘛．．．但係好景不常，琴日唔小心撞親隻左腳呀，之後仲腫左同瘀埋，好慘，後來行都行唔到呀，真係痛到流眼水呢．．．好在有男友係度tum番我，如果唔係我真係會不斷係度發脾氣架喇．．．我最怕整親，一整到我就好想喊，跟住自然發脾氣．．．

唔，而家沖完個涼之後好似好左少少咁，希望聽日唔痛啦．．．

>>April 4, 2006 at 12:17:24 PM GMT+8