2006 年 11 月 15 日 星期三 【陰】

頭先放工沖沖忙忙咁終於買左份禮物．．．其實係咁，因為我有個識左成二十年既朋友下星期結婚呀，咁大家識左咁耐，人地又請我去飲（係唔洗我比人情果隻），咁我點都要買份野送‘比人架嘛，所以頭先放工用左好快既速度去買左份野．．．其實，近日眼見好多身邊既朋友，親戚結婚，自己唔多唔少都有d唔開心．．．講真，人地結婚我當然要為人地高興啦，但係．．．卻諗起自己唔開心既野！講真，結婚係咪一生當中必經既階段呢？其實，我又覺得唔係必定既．．．而我就覺得最重要係能夠找到一個同自己互相愛護，互相扶持，互相尊重，互相分享，互相分擔喜與悲，有共同志向及決心面對未來既一個伴侶．．．我相信每一個人都希望得到咁既一個伴侶，我都唔係好貪心o者．．．

無可否認，我身邊確實有好多好愛我好錫我既人，父母，妹妹，貓貓波波，表哥表姐，姨媽姨丈舅父舅母，好朋友，好姊妹，好兄弟，好同事．．．但係，呢d人始終最後都會離我而去，亦會有佢自己既伴侶，有佢自己既家庭．．．所以有時候都好無奈要面對我一個人的生活！想要一個愛我既人真係咁困難嗎？結婚，其實都係一種對對方一種既承諾，但係有時候想一想，結婚後可以離婚，！而男人向女人講過既承諾又幾可信呢？哈．．．

今朝早搭車返工時聽mp3，聽到呢首歌時我喊左出黎．．．

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

不 你太好 想 你更糟
我仍未接受到
被 被你突然就算宣佈 分手更好
當你待我好 該難忘程度
心頭如像被插刀
好到太慨沒有好報
似是個圈套
令難捱度更加高

*不能懷念愛惜
不如懷恨更激
恨人亦要花氣力
例如恨你 為人自私也任性
我憎你不停來為我添加大量情敵
將鹹甜回憶
記恨你才能令愛著你也沒價值
直到令我的強烈愛意平息

想你太傷 不會設想
再懷念變孽障
就絕到亂誣衊你醜樣 毀懷形象
因你受了傷 憎你會有獎
想到缺點便拍掌
不要讓我面對真相
掛念似騷癢
恨才能令我輕傷

Repeat *

我愛你麼 我怕你麼
厭惡你方能夠不難過
憎你那過錯 憎你放棄我
再愛你嫌命長麼

不能懷念愛惜
不如懷恨更激
恨人亦要花氣力
恨完就怕 如情隨宣洩絕跡
不停來為我添加大量情敵
憎 完全被迫
記恨你才能令愛著你也沒價值
直到令我的強烈愛意平息

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

那一刻我在想．．．是否真的要我狠狠地狠佢先至可以放得低他同這一段感情？但係，狠一個人確實是一件很辛苦的事吧！而其實，我不去叫自己去狠佢，我又會不時想起他的一切吧！真係好矛盾呢．．．但係，狠一個人只係一個逃避既行為，我一向都不喜歡逃避的，既然事實如此就要面對吧，對嗎？或許，大家做朋友，又或是我選擇繼續等待．．．都是一種的幸福吧！

>>November 16, 2006 at 11:49:31 AM GMT+8

2006 年 11 月 14 日 星期二 【雨】

今日天氣真係唔多好，出出下街無啦啦落起雨黎，又冇帶遮，攪到幾狼狽呀！！後來都係唔得，買左把遮頂一頂擋先至得．．．今日同左媽咪，姨媽，姨丈同佢地既一個朋友auntie飲茶．．．雖然真係好悶架，因為d長輩係度傾計，講埋d陳年舊事（因為佢地好多年冇見架喇．．．），不過算啦，當係陪下佢地啦．．．跟住我同左媽咪行街，我地行左好多地方，仲買左好多野，因為下星期我地要去飲呀，所以要買定件飲衫丫嘛（哈，其實係承機買衫o者）．．．

頭先係度睇肥田喜事．．．真係好感動，因為肥田同大四喜終於可以係埋一齊，大家可以沖破障礙，找到自己既真愛，不怕困難面對問題，鼓起勇氣去面對自己所愛既人．．．！其實，真係好羨慕架．．．我幾時先至可以找回自己既真愛呢？找到一個很愛我既人，而我又好愛佢架呢？愛一個人真係需要勇氣吧．．．

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

她緩緩走向湖心，水有一點冰冷
她想要去弄清楚，一些無法確定的事情
她不曉得她心中那些不確定的感覺
是真的不確定，還是因為她自己的不確定，
所以才變得如此不確定
如果是因為她自己的確定，才會攪得一團糟，
她該如何確定那些不確定？
如果是因為別人的不確定，她又該如何和那些不確定取得確定？
水真的很冷，她一直發抖，她快要無法呼吸了！
她只能確定一件事，
她要慢慢走回岸邊．．．

>>November 15, 2006 at 2:29:32 PM GMT+8

2006 年 11 月 13 日 星期一 【陰】

琴晚訓到半夜醒左，後來諗住睇下個鬧鐘睇下幾多點啦，點知發現左我個鐘停左唔郁喎，真係煩，整左幾耐先整番郁佢．．．後來，唔知係咪怕佢又停過，之後果幾個鐘都訓得唔係咁好喇，係咁捱下捱下到左七點起身．．．所以今日返工超累超眼訓呀．．．直到而家都係超累超眼訓呀！！

今日返工好似冇咩特別野做，只係好努力咁去plan緊跟住d工作，做緊一d之前I/C叫我做既導賞員menu．．．仲有好多野要諗，係諗爆頭果隻呀．．．因為有d野真係以前冇做過，真係唔可以亂咁黎．．．加上，呢度有好多人事上同行政上既野要做同改革，所以．．．超煩呀！！！

今日成日個頭都好痛呀，可能一來訓得唔好，二來真係有好多野要諗．．．唉，突然間今日放工之後情緒唔多咁，見到有d情侶一齊放工，一齊返屋企咁．．．唉，真係好羨慕！我都好想身邊有人錫我，關心我，愛我．．．唉，突然之間又想起alan佢．．．頭先搭搭下車喊左出黎．．．真係嚇一嚇隔離個人呀！唉，算啦，我都知道諗咁多黎都係令自己傷心，因為我知道佢而家都係喜歡自由自在既生活多d．．．

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

雖則天真的蠢豬
我未博得歡呼讚譽
然而有你愛上我的短處
快樂也許不必富庶

繁盛世界慣了以冷眼
去看我滑稽的際遇
能令你去發笑也有用處
我用傻事去捐輸

多麼蠢的蠢豬　個個也來揶揄
充當不起公主　並沒段段艷遇
悠然面對這悲劇遭遇
齊集給了你當笑話書

多麼蠢的蠢豬　哪勝過那條人魚
即使爭都爭輸　仍然從未怪罪於天主
自信戀愛運很特殊
明日你前來叫我蠢豬　講愛情暗語

>>November 14, 2006 at 2:45:38 PM GMT+8

2006 年 11 月 12 日 星期日 【陰】

wow...今日好唔慣呀，因為要早左半粒鐘起身返工．．．好在我起身既時間冇同其他屋企人撞時間o者，如果唔係就麻煩喇．．．早左半粒鐘出門口，搭早左好多班車，所以要重新適應那班車既人既新面孔了．．．哈！因為返了兩個多月九點半，都習慣左同同一班人一齊搭同一班車，而家要重新認識下d新面孔．．．返到公司留下，哈，因為早左既原故，可以拎到頭條日報同am730報紙睇喇．．．平日因為太晏所以成日都派鬼晒．．．返到公司，望一望個鐘，哈，差d記錯左自己仲係返九點半，以為自己早左咁多返到公司．．．真好笑．．．不過確實開心既，因為今日又差d唔記得左六點就放工，不經不覺到左六點I/C就話我知我放工喇，嘩，真係好開心興奮架！

今日下午有班紅絲帶既人黎左參觀，初時我地都唔知佢地係咩人，我意思係廣東話人丫，普通話人丫，定係英文人．．．後來先知道原來係普通話人，哈，即時好似啞左咁．．．又再一次證明我d普通話真係唔係咁出得場面架，真係下季讀埋個中級先至得喇．．．真係講到好"甩咔"囉！好在有bernice係度撐住咋，佢d普通造真係唔普通呀，都撐得下場面架．．．如果得我一個就真係死得人喇．．．哈！我真係要好好惡補下喇！

今日都同I/C Bernice傾左好多新工作，之後我會有一連串既野要跟同做架喇．．．好似有突如其來既新衝擊咁，真係好．．．但係因為要做既野都唔容易，所以我都有d壓力呀，始終有d野唔係以前自己做開既野黎嘛．．．不過，我會努力的．．．黎曉寧，加油哦！

>>November 13, 2006 at 11:42:18 AM GMT+8

2006 年 11 月 11 日 星期六 【晴】

o...今日超累呀．．．因為琴晚成十二點先至返到屋企，所以好夜先有得訓呀！今朝又一朝早起身返工喎，好辛苦．．．今日都冇咩特別工作要做，主要都係帶下午果個成百人既tour，不過因為係d家庭團，所以都好簡單帶完啦．．．

由聽日開始，我既返工時間將有改動．．．由原本既九點半至六點半，改為九點去六點．．．其實有好有唔好既，因為可以早半個鐘放工，放工果時唔洗趕車趕得咁急．．．不過就要早左成半粒鐘起身喇，又辛苦左好多喇，哈！其實而家既生活習慣都同以前唔同左，以前一放早或者放假都會同alan出街咁，但係而家通常都好痴家，放工都會返屋企，做電車女，哈．．．唔，其實真係唔多習慣新既生活架，有時候都覺得好孤寂，突然間好似失去左好多野，尤其感到失去左身邊一個好親好親既人．．．不過，我知道自己是時候要好好自強，自信，自愛起來的了．．．各位，要好好支持我呀！，我會努力的．．．

>>November 12, 2006 at 1:31:14 PM GMT+8

2006 年 11 月 10 日 星期五 【晴】

今日朝早個tour本來約左十點正架 ，點知佢又遲左到，所以最後好快就攪掂左個tour喇，真係好．．．因為琴晚又係訓得唔多好呀，成晚都唔係咁訓得著，所以今早起身時好累好辛苦呀！！幸好下午個tour又取消左，所以十分HAPPY呀！下午lunch同左I/C去食上海野，哈係就係肥D，不過幾好食喎，而且價錢唔貴嘛．．．諗番起琴日果餐，真係好肉痛呀！！

今晚去左天使社群既周年聚會．．．我覺得自己今日表現得好好，情緒十分平靜，而且又能做番自己既角色．．．所以，我比自己有五個：叻！哈．．．自己唔讚下自己，唔通仲等人去讚我咩？人地唔識珍惜我，愛護我，讚賞我．．．係人地唔識貨O者，所以自己要愛自己多Ｄ囉，哈！最後我都係早左走人，因為聽日要返工，咁O岩alan佢又係聽日返工，所以我地兩個自己早左走人，一齊出左去搭車走囉．．．佢好好，好有風度，送左我上車先至走．．．唉，如果以前可以更gentle既我會更欣賞吧！想起，以前真係十隻手指數得到七年半來佢有幾多次係去完街送我返屋企架．．．不過算啦，過左去既野都唔好再提喇，係咪？

點都好，我而家知道我要更愛自己，因為冇左人愛我，我唔通仲唔去愛自己多點嗎？當然，我仍然好需要各位好朋友既愛護架．．．多謝你地呀！！

>>November 11, 2006 at 4:07:48 PM GMT+8

2006 年 11 月 9 日 星期四 【晴】

唔~ 琴晚又係唔係訓得咁好，本來好早十點鐘走左去訓架喇，點知訓到半路就比妹妹同媽媽嘈醒左，之後用左好耐時間先至可以訓得番．．．到左今朝早，因為貓貓波波在大事破壞，打爛左媽媽盤花，攪到又晨咁早比佢攪醒左喇．．．唉！

今日好肉痛呀，因為今日下午同左班同事出左去飲茶．．．其實我呢度d同事好古怪，平日就唔會一齊去食飯，只係每逢星期五都會約埋一齊出去食lunch，咁由於琴日已經有個同事約我同新黎IC出去食飯，所以為左同同事打好少少D關係，所以我地兩個都決定出去食一次飯．．．原來琴日同事已經BOOK定左位，我地係一間酒店既酒樓度食，嘩，D野好食就好食喇，但係真係好貴囉，最後每人食左成九十蚊呀，而且我因為下午有TOUR呀，所以仲早左走，冇點食過野架，所以而家覺得又肉痛又蝕卓呀．．．唉．．．不過冇計，呢D咁既飯局點都要食一次架喇，咪最多下次唔食囉．．．

明晚，我將會參加天使社群既周年聚會．．．其實，當我在上月月尾時得知我要去考慮是否續會時，我都曾經好矛盾同猶豫．．．我曾經問自己，我再次加入社群係為左乜野？我係為左ALAN佢？希望可以多點機會與他一起工作？為左可以同那班義工朋友再一起工作？為左社會上一班有需要既人？．．．最後，我知道左自己既方向之後，我知道自己將要去面對尷尬既情況，就是．．．終有一天要讓一班義工朋友知道我與ALAN的事．．．到了明天，一個所有義工朋友均會出席的聚會，我相信很多尷尬既場面將會出現．．．其實，我決定回歸社群時已經有心理準備要面對這個問題的了，但係，我確實有點擔心，唔知道聽日會有什麼情況出現？又唔知到時我同ALAN應該如何處理？ALAN他會如何回應？自己究竟是否有能力去面對及處理呢？．．．不過，無論點都好，我只係想ALAN知道．．．無論事情是好是壞，我都會與他一起面對及處理，我是不會留下他一個人面對及處理的．．．因為．．．我從來沒想到要離棄他．．．

>>November 10, 2006 at 2:04:59 PM GMT+8

2006 年 11 月 8 日 星期三 【晴】

嘩~ 今日周身骨痛呀，因為琴日打完波黎，所以今日起身果時d肌肉超痛呀，尤其係隻右手呢．．．慘慘！真係太耐冇打波就好容易咁，即使做晒熱身先打都係咁，真係衰．．．

今日下午終於可以好好咁開會傾下跟住落黎既工作喇，真係好，而家可以專注多d時間係工作度，個人都可以冇咁多多餘時間去諗埋其他既野．．．我同自己講，我而家要努力工作，專注多d係工作度，要有多d發展，學多d野．．．加油呀，黎曉寧．．．．

今日成日個人都好累呀，係physical加metal啦，已經周身骨痛，仲唔夠訓，琴晚成晚鼻敏感發作呀，又鼻塞又流鼻水咁，幾辛苦呀！所以琴晚唔係訓得咁好啦．．．聽朝早又要一早返去開會喇．．．可能日後既返工時間有改變呀，聽日要傾左先至有決定！唔，如果要返早左都幾慘呢，又要早起身喇，嗚！

>>November 9, 2006 at 12:53:11 PM GMT+8

2006 年 11 月 7 日 星期二 【晴】

嘩~ 琴晚同表哥食飯返到屋企都成十一點幾十二點喇，因為琴晚都太累，所以o拿o拿聲都走去訓覺，因為今朝早約左涼芬芬打羽毛波嘛．．．哈，點知佢仲遲過我起身呀，所以唯有我去book場先啦，點知仁愛堂果邊又要人地做左會員先至比人book場喎，咁我唯有做會員啦，嘩，要成八十蚊呀，痴線架，咁貴！不過．．．算啦，我跟住可能都好多時會去打波架喇，真係要比d恆心去做下運動先得喇，同埋順便約下朋友仔玩下丫嘛．．．可能太耐冇打波喇，（其實五月果時好似打過黎，都差唔多半年冇打喇，哈！）加上琴日隻腳抽過筋黎，所以今日打完波之後隻腳既酸軟情況好似嚴重左咁喎，而且仲有少少開始肌肉痛添呀．．．不過，都打得開心既．．．兩條友打一粒鐘確實好死架，當然我地都冇咁博咁傻仔，都係打左四十分鐘度o者，哈，有二十分鐘係o係度傾計休息！

打完波之後join左媽媽，因為佢今日又係去市中心果頭做gym丫嘛，仲行左一陣！之後我地又join左媽媽d朋友去飲茶．．．o...又係飲茶！琴日先至飲完咋，好死！雖然兩次都同唔同既人飲，但係，真係幾肥膩下架．．．芬芬話我知佢肥左呀！哈，我就都仲係 90 lb.o者，暫時冇再輕落去或者重番咁．．．但係胃口就好似比之前好左少少咁啦！唔，我都希望keep得住而家既體重，雖然我有d朋友係咁迫我食番多d野呀，佢地想我補番之前冇左果10 lb.呀，我梗係唔制，咁辛苦輕左咁多，可以承機減肥，我唔會咁蠢比自己肥番架，哈！keep番o係 90 lb.左右就差唔多喇．．．

頭先好努力咁執過d衫黎，順便執下冬天既衫，睇下有冇缺少既就去補下倉．．．原來我都幾多裙同冷衫，所以今季可以唔洗點買衫架喇．．．我都掉左好多野，硬係覺得有d野望落去篤眼篤鼻咁既，所以都好狠心咁掉左去．．．篤眼篤鼻就仲有d原因既，係咩原因？算啦．．．

話咁快兩日既假期就咁快完喇，之後又要捱一個禮拜後先再有假放喇．．．唔，聽日會開會呀，希望可以傾到多少少新既工作，可以快手開始啦，我想快d有野做呀！

>>November 8, 2006 at 10:56:54 AM GMT+8

2006 年 11 月 6 日 星期一 【晴】

嘩~ 今朝早臨起身前，本來想係張床度轉番半個身，之後伸一伸隻腳，點知就咁就出事喇，我隻右腳小腿無啦啦抽起筋黎，嘩，好辛苦呀！整左幾耐先至唔再抽呀，而家講起隻腳都仲有d酸酸軟軟咁呀，真係好死痛，好可憐．．．

琴晚咪賣左個關子既，話今晚會約一個咁多年黎都冇試過同佢單獨食飯既人既．．．其實果個係我既edmond表哥．．．真係架，我地由小至大都未試過好似今晚咁單獨約出黎食飯架，仲係要一路食飯一路傾計，傾左好多野，好多心裡面既說話，好多唔開心既事，好多我地而家面對緊既問題．．．當然，表哥佢好好，今次佢特別約我出黎，都係想鼓勵我要自愛，自強，有自信．．．表哥，我知道架喇，我會努力的．．．放心吧！而你都要加油呀，不要為自己加添太多既壓力，令自己辛苦呀！

其實真係好感謝神架，因為今晚可以好開放咁同表哥去分享我既事，仲有，我知道佢一直都好關心同擔心我，令佢擔心真係過意唔去架！不過，我答應你，我唔要再令你擔心我架喇，我知道跟住落黎自己真係要好好咁計劃一下自己既前景．．．

明天早上約左涼芬芬打羽毛波，哈，都好幾個月冇打過喇，加上今日隻腳又抽一抽筋，唔知會點呢．．．不過，我都係想自己打一大餐，出一身汗，好好咁渲洩一下．．．芬芬，辛苦你了，要你陪我打波波．．．最多請你食野啦，哈！

>>November 7, 2006 at 4:05:51 PM GMT+8