2006 年 8 月 9 日 星期三 【陰】

今日都係一號風球咋，都冇再掛更高喇，真係唔開心．．．

但係今日就有個好消息喇．．．就係禁毒處果度請左我喇．．．其實我完全冇諗過得架，因為佢一直話好急等請人，加上佢又話八月要入職，我又要一個月通知，而且而家都八月中都黎啦，所以都放棄左架喇，琴日都有寄左三封信添．．．點知今日就打黎喇．．．唔通真係有好運到？屋企人知道都好開心，我今日都同左公司講左辭職喇，唔洗夜長夢多嘛．．．其實我都好唔捨得班好戰友同事架，唉，但係人各有志，大家都知我志不在此架喇，希望大家明白我既心意啦．．．

八月二十八日正式要返新工喇，而而家呢份就返到二十六號，二十一至二十五號我繼續放假去交流團．．．而家突如其來好似d時間過得好急好快咁．．．真係有點還未穩定咁，仲好似好緊張咁．．．哈．．．真係好突然呀！希望到左新環境會有個新開始啦．．．

>>August 10, 2006 at 1:24:56 PM GMT+8

2006 年 8 月 8 日 星期二 【陰】

今日會考放榜，但係呢件事已經離我好遠囉，哈！所以冇咩特別．．．而男友佢就琴晚係中心過夜，今日繼續聽熱線同做佢既計劃書．．．我都知佢近日好忙好多野做，但係我覺佢都完全冇去關心過我，真係有少少唔開心呀！唉！不過見到佢做野咁辛苦，真係好心痛佢架．．．但係又好嬲佢．．．真煩．．．

希望男友今日好好咁訓番一個好覺，聽日就有精神繼續工作啦．．．

今日掛一號風球呀，聽講有可能掛三號，唔知會唔會掛八號呢？哈．．．

>>August 10, 2006 at 1:20:33 PM GMT+8

2006 年 8 月 7 日 星期一 【陰】

唔，今日好可憐呀，朝早開始已經個人好唔舒服，個肚成日痛痛地咁，都知又係一個月一次既麻煩出現．．．唉，後來十點幾十一點時已經痛得十分厲害喇，真係出晒汗彎晒腰咁，同事見到我以為我咩事添．．．後來都忍住到午飯，同事都好好，又幫我買熱飲同止痛藥，食左飯之後食埋藥，但係都好似冇好轉．．．唉，最終頂唔順，兩點半時要早退，最後請左兩個半鐘假．．．

唉，都係星期日食左碗特大綠豆沙累事啦，都係自己貪吃！激死！

聽日係會考放榜，男友中心有攪會考熱線，所以今晚男友要返工返到十二點，不過男友話星期三都要返早，所以有可能係中心過夜．．．我真係有點擔心佢呀，因為佢一做起野黎，累同肚餓都唔識得照顧自己架，唉．．．都唔知點，我又唔敢打比佢怕騷擾到佢，真係煩．．．

>>August 10, 2006 at 1:18:09 PM GMT+8

2006 年 8 月 6 日 星期日 【晴】

真係好，今日終於出左糧喇，梗係第一件事返到去上環就去提款機拎錢先啦，個銀包今朝早搭車比埋餘下既廿蚊都冇晒囉，好可憐．．．

今日照樣努力開ot，好快架喇，仲有十個鐘就ok架喇．．．努力加油呀！

近日越來越討厭我其中一個同事，果個同事成日做埋一d令人憎佢既行為，真係好討厭．．我從來未試過討厭一個人討得咁厲害架．．．

>>August 10, 2006 at 1:13:10 PM GMT+8

2006 年 8 月 5 日 星期六 【晴】

今日天氣十分之好，同琴日既情況完全唔同，簡直係又曬又熱呀！！男友佢今日行山呀，熱到佢傻左啦．．．而我今日下午就同左妹妹去左市中心行下街，不過因為仲未出糧既原因，我都好引手呀，一d野都冇買到，加上都冇咩睇ｏ岩，唔係係野都買架嘛，係咪？所以行左一陣之後都返左屋企喇．．．後來我煮埋飯比妹妹同自己食，我就過左一陣出門口去男友度喇，因為男友行完山之後都累到要死，因為琴晚原來十分之大雨，佢扎營果度簡直係水浸呀，所以都冇點訓到．．．我今晚就過左佢度，見佢咁慘，就幫佢按下摩啦，哈！

>>August 10, 2006 at 1:10:24 PM GMT+8

2006 年 8 月 4 日 星期五 【綿綿細雨】

今日男友佢出發去露營呀，天氣咁唔穩定我初時都好擔心架，而且又少左我去幫佢手，真係唔知佢點添．．．日頭天氣都幾好咁，不過唔知夜晚會點．．．

今晚得我同爹地食飯，食飯之前我六點幾已經返到屋企，我食完藥之後訓著左覺，醒果時已經七點半，嚇１死我，即刻打比爹地，好在佢仲塞緊車，哈，後來我地都成八點先至食飯．．．

今日都成個人好累呀，所以返到屋企食左藥之後都訓覺喇．．．聽日要好好係屋企休息呀！

>>August 6, 2006 at 10:58:51 AM GMT+8

2006 年 8 月 3 日 星期四 【寒冷】

今日我完全係病倒了．．．好可憐！今日下午果時已經覺得自己係發緊燒，好多同事叫我走，但係我仲儲緊鐘，我點可以走人架，而且又唔係咩大件事到要走人既．．．都死忍住囉，下午果時我都帶住口罩架喇，費時傳染人啦，我好有公德心架．．．但係d同事當我怪物咁囉，好似有病毒咁呀！不過我唔會好似d人咁一般見識既！

今日我都唔ot多喇，半個鐘咋，跟住我上左車打比男友，佢話黎屯門同我睇醫生，我當時好開心呀，佢真係好錫我．．．其實今日上午時佢打過比我知我病，但係聽日又要幫佢帶活動，佢又唔想我既病再嚴重，都唔比我再去個活動喇．．．其實我都唔好意思，因為應承左幫佢手而家又唔得，仲攪到佢既計劃杗亂晒，真係唔好意思．．．後來男友係車站接我帶左我去睇醫生，醫生話我普通感冒，不過佢即時同我chk埋我既肺容量，醫生話我過低，因為以我高度同年齡黎計，一般人應該有四百度，但係我得二百五十度．．．唉，醫生要我多d運動呀，我都知架喇．．．希望身體可以好番多d啦，唔想成日要家人同男友擔心我呀！

>>August 6, 2006 at 10:55:17 AM GMT+8

2006 年 8 月 2 日 星期三 【驟雨】

今日三號風球呀，其實琴晚屋企既狀態根本唔似三號咁簡單．．．其實應該掛八號啦，天文台都唔知點攪架，咁樣大風都唔掛八號，我屋企係咁漏水添呀．．．我今日返工果時都超級大風啦，尤其我地果頭近海添，都唔知點攪架．．．掛八號等我地d打工仔放下一日假丫嘛！

今日發覺自己越來越唔舒服，所以都係繼續食藥啦，我覺自己好似有少少發燒添，所以都探過黎，但係又冇乜．．．唉，好苦呀！

>>August 6, 2006 at 10:47:50 AM GMT+8

2006 年 8 月 1 日 星期二 【寒冷】

嘩，今日有一號風球呀，不過天文台話冇機會發八號，真係唔開心．．．好似已經有一段日子未試過掛八蹺風球喇，真係好想再試下八號風球唔洗返工既日子呀！哈．．．

今日本來諗住放工之後去男友屋企度架，不過因為我今日有少少作病呀，好似有d感冒咁，所以都決定唔去喇，唔想野左男友啦，而且都好想返屋企搵藥食下啦．．．但係真係好可憐，一來病左，二來又好掛住男友，好想見佢又冇得見喎，真係好慘架！

唉，其實我都唔想病，係我有個同事囉，咳左成三四個星期都唔去睇醫生，唔睇醫生都唔緊要啦，你帶口罩丫嘛，叫左佢帶又唔帶，叫佢睇醫生又唔睇喎，仲要不斷飲甜野凍野，痴線架，真係有病．．．而家周圍傳染人，真係冇衛生常識架．．．討厭！

>>August 6, 2006 at 10:44:37 AM GMT+8

2006 年 7 月 31 日 星期一 【晴】

琴日同今日都好乖咁ot左粒半鐘呀，因為都冇野好做，而且精神又可以既，咪ot多d啦！要努力儲多d鐘呀，而且仲有成十幾粒鐘要儲，好可憐呢！唉，幾時先至儲夠呢？

>>August 6, 2006 at 10:44:50 AM GMT+8