2006 年 8 月 19 日 星期六 【雨】

今日係個好姊妹既生日，首先係度再次祝佢生日快樂！雖然已經打左電話比佢祝佢生日快樂，但係都要再講多次啦．．．哈

嘩，今日天氣不太好，下午大約一點幾果時突然間下著一雨，而且又有閃電雷暴，十分之恐怖呀！男友今日仲帶隊去行山，佢後來打番電話比我，話今日十分之危險呀，佢地都中途要係涼亭度渡過，仲要折返呀，十分危險，佢地中途一路行一路打雷，真係驚嚇！後來今日睇新聞，有幾單新聞都關於今日天氣差，好多行山人士唔係被洪水被困，就係被洪水沖走甚至死亡．．．真係可怕．．．

今日繼續執我既野，仲買左少少用品．．．唔，今次去一去又洗唔少錢喇，唉！而家都最算攪掂晒D野喇，反而男友佢仲未有時間可以執好D野，因為佢仲要出去舊居攪少少野先至走得，唉，都唔知佢會否夠訓喇．．．由聽朝開始，我要好好控制同收拾自己既心情喇，因為我要變身做一個參加者既角色，對於男友唔可以特別著緊同照顧．．．真係好難呀！唉，頭先同佢傾電話時講起呢樣野，我自己都有少少唔多開心呀！唉，明明見到同相識，又要扮晒唔熟咁，真係討厭！我最怕係咁樣，但係又冇計，工作需要就係要咁，我明白既．．．聽日我要開始當唔識佢，唉，唔識咪唔識囉，我當自己去旅行呀！真係唔開心！

點都好，我期望自己在旅程中係平安及愉快既，更希望可以有所體會同經驗，有得著而回啦！返到黎將會渡過我既生日，其實我都唔知男友會否與我慶祝．．．雖然口中常說年年都有生日，怎樣也沒所謂啦，但係始終自己都希望生日與自己心愛既人渡過，如果佢連一點心意同回應都沒有時，真係特別覺得傷心架！唉，而家見男友仲好似冇咩動靜咁，而且知佢為左今次既交流團已經洗左好多金錢，唉，我都明白事實係如何，我都知自己唔可以再去要求什麼架喇．．．同得什麼人一起，我總要有一定既心理準備我如何與他一起生活！

最後，希望神會在旅程中繼續保守看顧我，感謝神，阿們！

>>August 20, 2006 at 11:38:01 AM GMT+8

2006 年 8 月 18 日 星期五 【晴】

今日繼續返工，因為之前已經儲晒要用既OT鐘喇，所以今日都特別輕鬆地可以五點鐘走人．．．走左之後頓時有種輕鬆既感覺，可能返埋今日之後會放一連五天既假期，而且仲會參加交流團，去體驗人生，所以心情都確實唔錯架，完全係準備去玩既心態．．．

返到屋企之後，同爹地妹妹出左街食飯，返到屋企後就開始執擔我連日黎既行李．．．真係越執越發覺好多野要帶同執，因為始終地方唔係太發達，都有唔少野都要帶定，尤其係自己既身體唔係太好，所以在藥物上同衣物上既準備特別著重，唔想自己輕易有事．．．今日足足執左幾個鐘，最後本來打算兩點前可以訓到，點知因為妹妹星期一要見工，佢有好多野向我請教，咁作為家姐既冇理由見死不救既，係咪？所以都捱著眼訓都要幫妹妹攪掂D野先至訓啦．．．希望妹妹星期一見工成功啦，可以早日搵到份好工．．．

聽日仲有好多野繼續要執同埋買呀，聽日都唔知幾點先起到身囉．．．有排煩．．．

>>August 20, 2006 at 11:26:33 AM GMT+8

2006 年 8 月 17 日 星期四 【晴】

今日繼續返工．．．本來同事布lum佢今日放假架，而佢之前話過今日會陪我一齊開OT，點知原來佢今日本來係放假架，佢冇話我知，自己靜雞雞去左消假．．．攪到我好唔好意思呀！ANYWAY，布LUM，多謝你既義氣呀！

今日OT之後本來打算去男友度既，但係男友今朝打比我話佢病左，仲越來越嚴重，所以今日要睇醫生不可．．．後來睇完醫生醫生話佢感冒，所以都叫佢好好休息喇，因為下星期成個星期都要帶隊去交流團，佢一定快D好番先至得呀！但係放工之後，我已經上左車返緊屋企時，佢突然又打比我話好掛住我，唉，見佢病到咁樣，其實我都想去探下佢架，但係又唔想互相傳染．．．哈，後來我都係返左屋企之後再出門口去探佢．．．

其實今日都冇人陪我係屋企食飯，因為媽媽佢今日已經搭飛機去左旅行喇，要下星期三先至返黎，而妹妹今晚又出左街街，所以得我一條友，但係屋企貓貓又要食飯，所以我點都要返一返去處理左貓貓既食物先至再去囉．．．而爹地可以自己攪得掂嘛，哈！最後去左陪男友，佢病情都因為食左一日藥，同訓左一日而好左少少．．．D藥都幾勁下喎！希望佢早日好番啦．．．

>>August 20, 2006 at 11:16:26 AM GMT+8

2006 年 8 月 16 日 星期三 【晴】

今日真係有少少唔開心，因為今朝早我既好同事兼好友布lum，佢今朝好唔開心咁同我講左好多心事，佢仲竟然係個女仔面前喊起黎添．．．唉，當時我都有少少好唔知點好，雖然我係一個註冊社工，但係對於自己既朋友有事時我都好無奈．．．

之後我都要鼓起勇氣，協助佢面對問題，安慰佢．．．唉．．．真係唔知點好，佢可能打算離開呢度（公司），因為呢度實在有太多問題困擾住佢喇．．．

不過點都好，我作為朋友都會支持佢架．．．

今日放工之後我去左簽約，其實都冇咩特別，而果度人事部咩都唔知，所以我最後都係咩都唔知架．．．要等到第一日返工果日先至知多少少詳細情況喇．．．

>>August 17, 2006 at 11:59:27 AM GMT+8

2006 年 8 月 15 日 星期二 【晴】

哈，今日超級開心呀！因為今日我班好同事好戰友為我預早慶祝生日．．．son son佢特別為我整左個chesse cake呀，仲要係有名堂架，叫做：愛爆annie雙層芝士益力多蛋糕．．．其實真係好好味，我都有向佢請教埋點整呀，希望遲d有機會可以自己試下整下．．．真係好開心呀，除左蛋糕仲有好好味好大粒既朱古力士多啤梨添呀，我真係超級感動呀！！我真係完全感受到愛，係一班好朋友比我既愛護呀．．．好感動，攪到我真係越來越唔捨得佢地呀．．．畢竟咁樣，唉，我都係要走．．．希望可以大家都keep住呢一份既友誼啦．．．

>>August 20, 2006 at 11:27:07 AM GMT+8

2006 年 8 月 14 日 星期一 【晴】

今日好開心，因為約左個好姊妹出黎食飯，一齊慶祝我地既八月生日．．．其實呢個活動已經有七年既傳統架喇，哈，所以特別開心同興奮架．．．我地去左italian tomato度食，因為順便有蛋糕食嘛，好好味呀，飽到傻左，我地又行左好多地方，我就冇咩特別收獲呀，而好姊妹就買左唔少野．．．而我則買左一把高飛狗既直遮呀，好正，終於可以有把只有高飛一個既遮喇．．．

直至今日為止，我已經收左兩份生日禮物喇，第一份係妹妹送比我既agnes b既手錬，第二份就係呢個好姊妹送比我既禮物喇．．．好開心呀！！唔．．．男友同屋企人問過我想要咩禮物，其實真係諗左好耐呀，都唔知想要咩好，因為確實有好多野我都已經有喇，真係唔知想要咩好，好頭痛呀．．．哈，好似有少少諷刺咁呀！

>>August 17, 2006 at 11:52:08 AM GMT+8

2006 年 8 月 13 日 星期日 【晴】

今日返工好眼訓呀，因為琴晚都成十二點先至訓，加上唔係咁訓得好，所以好累呀，返工就好似遊雲咁，而且可能就黎要走啦，自然冇咩心機工作喇．．．哈，好衰嘛？

今日既心情唔知點解唔多好，連同男友傾電話既心情都冇咩呀．．．其實心知自己係有d野嬲左男友架喇，但係又講唔出係咩野．．．唉，好心煩呀！我自己成日都不斷係度問自己究竟想點，究竟自己想要d咩野．．．

>>August 17, 2006 at 11:47:14 AM GMT+8

2006 年 8 月 12 日 星期六 【晴】

唔，今日好乖乖呀，留左係屋企執野，因為都諗住執下有冇咩野可以帶去交流團送比山區既小朋友嘛．．．點知都唔係好多野可以送，因為之前曾經執過野黎，發覺原來之前掉左好多野喇．．．唉，唯有期待同事們會有D野可以捐出黎送比D小朋友啦．．．而我都扲算再買少少糖果禮物仔比佢地，希望今次既旅程可以愉快順利啦，我真係好期待呀，希望快D可以去啦！

之後下午同媽媽去左海趣坊度食台灣野，間野既食物都幾好，不過價錢唔多抵食囉，真係食一次夠．．．後來同媽媽去左買野，我仲買左野諗住整野比屋企人同同事食．．．返到屋企我就開始整我要整既蘋果綠茶大菜榚喇．．．未試味呀，希望好味啦．．．

>>August 13, 2006 at 1:16:34 PM GMT+8

2006 年 8 月 11 日 星期五 【晴】

唔，琴晚真係好早訓，十點幾已經訓喇，因為男友佢前晚又係訓唔到覺啦，所以琴晚都好早都訓左，喧　我都陪佢一齊早少少訓覺啦．．．今日精神都唔錯既，本來諗住都OT番一粒鐘，但係後來男友約左我出街街，所以臨時變掛，淨係OT左九個字，哈！

之後我地出左旺角，去左大快活食飯，我又食左我至愛既鮮茄豬扒意粉喇，真係十分之好味，我至愛係個汁，十分之好味．．．而男友又係叫左佢至愛既咖哩牛腩飯，仲送埋個蕃茄果凍，都OK好味．．．之後我地約左個朋友，我地一齊行左陣街．．．男友佢問我想要咩做生日禮物．．．其實我都唔知呀，因為諗一諗自己真係冇咩特別野想要呀．．．後來男友話要同我玩個15/16遊戲，先至可以決定我有幾多錢可以買禮物．．．哈，我都覺幾好玩丫，希望可以有多D獎金買禮物啦，我會努力架．．．YEAH~

>>August 13, 2006 at 12:13:45 PM GMT+8

2006 年 8 月 10 日 星期四 【陰】

今日本來約左個好姊妹一齊去慶祝我地一年一度既生日會．．．但係男友突然急call想我陪佢，所以．．．唉，都係時候要做下”跟得夫人”喇．．．所以就飛起左個好姊妹，約佢下個星期再出黎食飯行街慶祝．．．

咁我一放工就連OT都唔開，就即時走人去左元朗廣場JOIN我男友同佢個同事一齊食TEA，我地去左DOUBLE STAR度食蛋糕同嘆咖啡，元朗廣場呢間我都係第一次去咋，即使我曾經係元朗返左兩年工都未曾去過呀，因為間野都幾細間，所以一直都未去過．．．不過今次去過都OK既，D蛋糕都OK好味，不過我都係覺得其他咖啡專門店好味D囉．．．

之後一齊返左男友屋企食飯，飯後仲食左AUNTIE整既綠茶大菜榚．．．我都覺唔錯，幾好味，所以都決定花下心思，下次試下自己整黎食啦．．．

>>August 13, 2006 at 12:08:54 PM GMT+8