2006 年 10 月 4 日 星期三 【晴】

我越來越發覺自己原來係沒有想像中那麼堅強，沒有那麼有信心面對現實，沒有那麼有勇氣去面對結果．．．

自從踏入了十月後，我近日既心情開始轉壞，經常都胡思亂想，經常想一些很壞既結果，亦曾經有更壞既念頭．．．我很驚，我不知道應該如何面對，還有二十多天既日子要渡過吧．．．好苦好難受！我發現自己好像與這個世界漸漸抽離般，四周的人都好像不再值得我去相信了，好像開始找不回自己，亦沒有了人生意義，經常都不知道自己在這裡是為了什麼？是要受苦？是要白白地等待一個人？是要等一個沒有結果的結果？或是．．．

曾有人說過：
應該選擇為你所愛的而放棄自尊，
好過為自尊而失去你所愛的．．．

我願意的，我願意以自己的自尊去換來我所愛的人．．．但是．．．他呢？他又是否願意呢？七年的時間，你愛了七年的一個人，可以就這樣為了自尊而放棄了嗎？我做不到．．．

>>October 5, 2006 at 2:35:07 PM GMT+8

2006 年 10 月 3 日 星期二 【晴】

今日放假呀，所以都順理成章訓到成十點幾先至起身，因為琴晚食左藥，真係好累好眼訓．．．今日個病情好了少少，都仲咳得幾厲害下，不過我會繼續準時食藥，希望要早日好番．．．但係今朝起身時好周身骨痛呀，可能病，個人就特別累，成身痛啦．．．今朝都係留無屋企，上下網聽下歌咁．．．其實都幾悶下，屋企又冇人，就連波波貓都係度訓覺，雖然佢好乖，不時都會走去我身邊high下我，陪住我咁，我同佢傾計佢又會望住我聽我講野，我唔開心佢係知道架，佢都會走埋黎望下我叫下我咁，好似係度安慰我唔好唔開心咁．．．其實個心真係幾甜下架！

唉，我今朝早突然間心情好差，臨天光時成日都發夢，咪又係發夢見到佢囉．．．唉，今朝起身之後，坐係度食食下早餐，突然又諗起一d同佢既情境，就咁就喊左出黎喇，直頭係豪哭果隻．．．其實我已經好耐冇咁樣喊過架喇，（都有成兩個多星期冇再係每晚在眼淚既陪伴下睡覺同渡日．．．）我當時自己都覺得好突然，點解自己會喊成咁樣，簡直係成個淚人咁，收極都收唔到聲！後來我突然間成個人跪左係地下，我抬頭一望，見到屋企掛在牆上既十字架，頓時我便立即向神祈禱．．．我一邊喊住一邊祈禱．．．我跪左係度祈禱足足有十分鐘有多！

祈禱之後，我感覺輕鬆了一點，亦開始收伏到少許情緒，但係都未能完全收拾得到，直到差不多半個鐘有多既時間才能平伏番．．．我真係好驚，唔知係咪自己其實一直係度壓抑自己既情緒，成日同自己講我要堅強點，尤其返工我更加要裝作若無其事咁，因為我唔可以將情緒帶番去公司同工作上，點知就做成左今日既collapse．．．唉，我而家個人好混亂，成日有好多唔好既想法，我知心諗呢d會否都係撒旦既一d陷阱黎？我同自己講，我要繼續相信神，相信自己，同埋最重要係要相信佢，相信佢會真心係呢段時間去好好考慮同思考，相信佢曾經答應過既野，包括28號一定會聯絡我，同埋係呢段時間內唔會”見異思遷”等．．．

annie，你要努力加油呀！你身邊既朋友都不斷係度用精神去支持你之外，亦有d希望用佢地既行動去表示對你既支持同協助架，annie，你唔可以令佢地失望架，唔可以白費佢地既努力同精神架．．．

>>October 4, 2006 at 11:35:31 AM GMT+8

2006 年 10 月 2 日 星期一 【晴】

今日好可憐，因為病左．．．嗚．．．琴晚成晚係度咳，又發燒，所以今朝早都根本返唔到工，又咳到失左聲，就算今日返左工都帶唔到隊，所以都係請左一日病假．．．我都知唔係咁好，又請病假？但係真係唔得喇，我頂唔順．．．今朝起左身之後都即刻去左睇醫生，好左醫生話我個肺都好清，暫時未影響到條氣管，因為最怕係氣管又有事o者．．．

本來聽日係我一向既rest day，但因為有線電視仍借左我地場拍野，所以本來聽日要返工．．．但係，後來我下午收到個同事電話，佢話我知臨時有線果度cancel左，所以聽日我可以照樣放假！都好，我可以抖多一日，休息下，個病就可以快d好番．．．希望快d好番啦，真係好辛苦呢！！

唉，好多人話，失戀就好似病左一場咁．．．雖然我唔知道自己最後結果會點樣，但係而家同仍冷靜期，我都覺得好痛苦喇．．．有時候我都有點兒想心死，一個男人可以失蹤咁耐，你連一點佢既消息都沒有，呢個男人就有心擺明避開你啦．．．但係，我相信佢，我相信佢係真心去面對我地呢個冷靜期，我好希望佢真係係呢段時間裡邊好好去考慮我地既呢一段感情是否繼續，而唔係找一個藉口去拖延大家既時間，或者只係找一個藉口去讓自己去淡忘對方．．．當我知道我要相信佢，要對佢有信心既時候，我又再次振作起來，我知道我要繼續等下去，直至到deadline果一日，有左真正既答案為止．．．因為我信任佢唔係一個唔認真既人，唔係在玩弄我，玩弄大家既人，我相信佢真係真心去思索的．．．當然，我唔希望會失望啦．．．

每當病既時候，我都總係想起佢，想起佢對我的好．．．好痛苦吧！天父神呀！究竟我何時才可以與他重新開始？你要給我地既挑戰同考驗真的很大吧，大到我真係有點吃不消吧．．．好辛苦，好痛苦！神呀，我祈求你，受苦？我不怕，只要能夠達成我的心願，我什麼都不怕．．．雖然，曾經有位朋友同我講過：”就算你如何愛他又有什麼用？愛是雙方的，如果對方不再愛你了，你再愛他又有什麼用呢？你會開心嗎？這是不值得的”．．．我很明白這個朋友的想法，佢都係想我好，唔想我再受傷害．．．但係，我很想讓佢知道，我是很愛他，我是很有誠意希望與他再次在一起，我亦有信心可以與他一起解決困難同問題，只要他說一聲：”好！”，我便會願意只會為他而活！真的希望天父神可以憐憫我，答應我的祈求！

>>October 3, 2006 at 2:11:13 PM GMT+8

2006 年 10 月 1 日 星期日 【陰】

今天好可憐，要返工之外我又病了，是發燒加喉嚨痛吧，應該再加上一點感冒同咳嗽，很辛苦吧！好在今天沒有特別工作做，可以休息下．．．所以本來約了一位義工朋友吃飯都推掉了，但是我仍有與他今朝早傾電話，佢講左一件事比我知．．．雖然果刻聽到真係好hurt，因為我真的沒想到那個人可以這樣絕的，那樣冷血，逃避得那樣厲害．．．我真的那麼可怕嗎？但係後來自己冷靜左諗番清楚之後，都覺得其實都唔係好傷既一件事，因為事件當中有干涉到時間性，計算一上其實當時既情況都不能代表現在或一切．．．所以．．．我都唔再想太多，唔想令自己唔開心．．．不過同完個朋友傾完之後，其實佢又再比左少少insight我，其實我她感恩，因為每當我同不同朋友傾談既時候，每一次每一個朋友都比左好多意見同insight我，讓我真係可以更清楚自己可以如何走同安排我要行既路同計劃下一步．．．真係好多謝佢地！當然我最要感謝的當然係天父神，我相信佢係一直都係我身邊保守住我，不時透過我身邊既人比啟示我，真係好感謝神．．．！

今晚臨時約左alice同小強食飯，其實係小強主動話要約我出來食飯，佢成日想話見我同我講野．．．其實我知道佢地一直都好關心同擔心我，even連小強佢都不時同我講：annie，有咩需要即管開聲，我話過幫你就幫你架喇，只要你出句聲我就即時出現．．．其實真係好感謝佢地，確實係好感動架．．．我又再次好感恩，感謝神帶給我這麼多既好朋友在我身邊支持我，鼓勵我．．．其實，我好想講：alice，小強，我知道你地好關心我，好想我爭氣點．．．但係．．．對不起，算我而家呢一刻我做唔到！不過我都好多謝你地架，你地令我感受到溫暖呀！但係．．．alice，小強，我答應你我會愛自己多點的，放心吧！

>>October 2, 2006 at 2:57:23 PM GMT+8

2006 年 9 月 30 日 星期六 【陰】

今日返左教會．．．我個感覺同情緒好突變．．．我由初初返到去，覺得自己滿佈罪惡，缺乏信心，心情忐忑不安．．．到我離開時我同自己講：我要相信神，神會比啟示我指示我要走既方向同路．．．

今日好特別，因為教會黎左兩個大家都好可能好熟悉既人，一個係梁榮忠，一個係盧婉茵（高朋滿座個事頭婆呀）；其實佢地一向都有返我地教會既，只不過今日咁o岩得咁q佢地都同一個時間返左黎o者．．．

突然記起一個好姊妹佢送過一張卡仔比我，上面寫住：
你們祈求，我給你們；尋找，就尋見；叩門，就給你們開門．　　　太 7：7

真的很希望這是真的．．．

>>October 1, 2006 at 10:01:43 AM GMT+8

2006 年 9 月 29 日 星期五 【暴雨】

今日繼續係返工天．．．今朝早都冇咩特別野好做，一個人留係back office度就好好咁寫野，我寫左多好野呀．．．都係我自己既一d感受同事件，真係越寫越想喊．．．

下午就又帶tour喇，今日有新mic用呀，終於有屬於自己既mic喇，真係好．．．放工之後就返左屋企，跟住就同屋企人，表哥一家去左酒樓食飯，當係做節．．．今日二舅母又成日係度鬧人喇，鬧完二舅舅甄表哥．．．佢地真係可憐呢！攪到今日都冇咩機會同表哥傾下計．．．

聽日放假天，由於十月都冇得點放星期日，加上聽日係聖餐，所以我聽日返教會崇拜啦．．．唉，我而家都不時祈禱，仲多過一日三餐呀，好希望聽日可以更親近神，可以更誠心地向神禱告．．．

>>September 30, 2006 at 2:48:45 PM GMT+8

2006 年 9 月 28 日 星期四 【晴】

唔，今日既心情仍然被琴日知道件事所拖累住，心情十分不好，琴晚亦訓得唔好，因為．．．我又發夢喇，又見到佢，當然就唔只見到佢一個咁簡單啦．．．唉，好心傷．．．真係日有所思夜有所夢喇．．．

就前晚發生件事，我已經不斷同自己講，”annie，唔好諗咁多啦，唔係既，佢地都成日係咁架啦，有咩出奇o者．．．而且，佢應承過你架嘛，而家呢段時間係冷靜期，而唔係用黎"見異思遷"，所以annie，你要相信佢呀！一定要相信仍對你既承諾呀！annie，你唔可以放棄同鬆懈架！”

但係真係好辛苦呀！又唔知發生咩事喎，好痛苦呀！！今日好有衝動想做一件本來琴日已經打算做既事，但係後來都冇做到，因為我冇勇氣之餘，亦都想清楚前因後果．．．算啦，我是應該相信他的，我唔可以唔信任佢講過既野同承諾．．．

>>September 29, 2006 at 3:49:55 PM GMT+8

2006 年 9 月 27 日 星期三 【晴】

唉~ 今日從一個好姊妹口中收到一個消息，件事係琴晚發生既．．．唉，算啦，我都唔可以做到d乜野架喇，我有咩權力去做d咩丫，唉！

今日聽左個消息後成日都冇晒心機做野，好痛苦．．．

唉，究竟係咩一回事呀，好煩呀！！！！！！

我而家好想見佢呀，好掛住佢，好想知道佢而家點呀？我好擔心佢呀！

>>September 28, 2006 at 1:19:41 PM GMT+8

2006 年 9 月 26 日 星期二 【晴】

今日係好姊妹，涼芬芬既牛一，我係度祝佢生日快樂！身體健康！早日找到自己心目中既白馬王子啦．．．加油呀！芬芬．．．

今朝早約左芬芬去唱lunch k呀，順便梗係同佢慶祝下生日啦．．．我地又傾計，又係度大聲唱歌，承機好好咁發洩一下丫嘛．．．雖然我地兩個都係生日日子中遇過一d唔開心既日子，但係．．．身邊仲有好多朋友支持架，要加油努力呀！！

>>September 27, 2006 at 2:24:04 PM GMT+8

2006 年 9 月 25 日 星期一 【晴】

今日返工都有點忙碌，下午果時帶隊參觀，十分之辛苦呀，因為個mic用用下又short左，攪到我聲嘶力竭咁講野，極之辛苦呀！

琴晚訓得唔多好，因為訓到半途咳醒左，我d氣喘又發作喇，每逢天氣一轉我就係咁架喇，其實我都好怕咁樣既生活，成日都訓得唔好，訓到當夜就醒左，跟住又好難先至訓得番，一係當夜食藥攪到第二朝個人呆呆滯滯咁，我都好怕．．．不過冇計！

明天又係放假，我明天約左好姊妹涼芬芬去唱lunch k．．．其實我都好耐冇唱過k喇，咁好佢聽日又off，佢特登約我唱k話比我發洩下咁話．．．佢真係一個好姊妹呀，哈．．．

>>September 26, 2006 at 1:30:42 PM GMT+8