2006 年 12 月 5 日 星期二 【微冷】

今日既假期都算幾特別，特別在．．．我今日竟然同爹地媽咪一齊食lunch囉，哈！．．．平日我都絕對極少機會同爹地食luinch既，（當然除左係大家都放假既時間啦）所以今日好特別呀！我地今日三個去左太子果間太子冰室度食野，都幾好味丫，我之前都去過食一次，係食扒，因為佢出名扒丫嘛．．．今日我又係食扒，哈，其實食lunch食扒我都覺得有點兒那個．．．不過都幾ok丫．．．

之後，我地三個一齊去左行花墟，因為爹地媽咪想買野去裝飾屋企，因為聖誕丫嘛，整靚屋企都幾開心架！點知，最後都係買唔到心水既野，反而買左好多靚花．．．媽咪最鍾意買花花架喇，次次去親花墟佢都必定滿載而歸架，哈！不過，有時候見到d咁靚既花，個人都會開心d架！

跟住，爹地佢趕住返公司，所以得番我同媽咪繼續行街，我地去左行聯合，好似好耐冇行過喇，所以去行．．．媽咪買左好多新衫呀，我都買左兩件野．．．哈，女人一買衫就特別開心架喇，尤其係買到自己鍾意既野就特別開心．．．

妹妹今日講公司話見佢表現好，所以佢過左probation之後會加人工呀，真係恭喜佢！哈，好野，又可以屈佢請食飯，yeah~

>>December 6, 2006 at 1:54:21 PM GMT+8

2006 年 12 月 4 日 星期一 【晴】

哈，今日好開心，到而家心情仍然十分興奮．．．即使而家已經係零晨既十二點半喇．．．哈！今日既返工日本來是十分平凡且有點沉悶的，但幸運同驚喜就始於放工前既一個電話．．．放工前好兄弟布lum打比我，話有好野益我，原來佢有今晚新城攪既古巨基演唱會飛，佢問我去唔去．．．哈，大家都知我係古巨基既超級fans黎架啦，所以我又點會錯過呢！後來，布lum話佢又多左一張飛，所以最後係我同佢同alison仲有我妹妹四個一齊去睇喇．．．

嘩，個show正都爆啦，雖然坐得好遠，但係都好開心了．．．可以見到古巨基之外，仍仲請左好多嘉賓，包括EO2，王苑之，鄭融，方力申，張繼聰．．．古巨基把聲真係越唱越正，尤其係佢同王苑之合唱果首”花與琴的流星”，真係超正．．．仲有佢同小方唱左首”MY LOVE MY FATE"，同樣係正到爆．．．哈，而家都仲好興奮好HIGH，心情仍未平伏．．．

我好感恩呀，因為今日係近日既一點點綴，為近日平凡既生活帶來一點色彩．．．我好感恩我有個好兄弟都常常想住我呢個好朋友，有好野都不忘我，哈！多謝，包括多謝神，多謝布LUM．．．

在聽MY LOVE MY FATE時，個心有好深既感受，其實那一刻卻眼淚己充滿在眼眶處，只要還沒有掉下來，強忍著淚水的感覺是很難受的．．．

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

My love my fate you will fade away　以後隔天與地
I love I hate I'll miss you always　我永遠亦愛你

太美好的東西　會走　還未愛夠了你　怎放手
從來不肯假想　失去你那感受　我這對腳　怎麼走
從來並未練習過溫柔　遲學你或已經沒法接受
然後你會說我跟她分左與右　誰希罕這種手拖手

My love my fate you will fade away　再沒有戀愛味
I love I hate I'll always be afraid　永遠也害怕你

我要首先講聲　我走　還是愛到你說　請你走
如果講一聲　請照顧　我感受　我最怕你講出口
從來並未練習過溫柔　遲學你或已經沒法接受
然後你會說我跟她分左與右　誰希罕這種手拖手

下次開心已要靠自己　下次頂多飾演好知己
其實再次見你　真需要　靠演技　也要你我好心地

My love my fate you will fade away
過去當做看戲　世界當沒有你　Ooh......

>>December 5, 2006 at 5:03:22 PM GMT+8

2006 年 12 月 3 日 星期日 【晴】

今日既天氣仍然有點凍．．．哈，可能其實係因為我份人怕凍，係咪我都覺得好凍．．．加上今日．．．唉，又係一個月一次果d啦．．．所以個人好虛呀，成日都好唔舒服，個肚又超痛喎，好可憐．．．下午仲要帶tour，超辛苦呀！

今日成日個人都”牛牛”地，哈，冇黎心機同反應咁呀，帶隊都帶到悶悶地喇，唉！好想快d有新野做，所以今日已經好努力係咁寫proposal，希望早日完成之後可以再同centre IC好好咁傾下d細節野．．．不過，跟住落黎下半月開始至三月都會忙碌非常的了．．．哈，我喜歡呀！最怕冇野好做架喇．．．

差d唔記得左．．．今日係爹地媽咪既結婚周年紀念，佢地今年係珍珠婚呀！其實，兩個人可以一齊三十年真係一件唔容易既事，我都好希望可以找到自己既真愛，可以同我既另一半同渡下半生．．．在此，祝爹地媽咪結婚周年快樂！

>>December 5, 2006 at 4:24:50 PM GMT+8

2006 年 12 月 2 日 星期六 【微冷】

wow．．．今朝返教會，但係卻十萬個唔願意起身呀！我都已經懶啦，成八點半先識得起身，但係媽媽就仲懶，成九點先至肯起身，而爹地同妹妹就一早出左去喇，因為今日妹妹要認信，要見d執事，睇下佢是否合適行堅信禮，正式成為基督徒．．．後來，我等左媽媽好耐先至出得門口，我地出到去都遲左到，真係衰！

今日既崇拜請左我地附近既一間學校既同學黎我地呢度參加主日崇拜，所以今日成個聖堂都係人，真係人頭湧湧呀！佢地仲獻唱左一首詩歌添．．．不過有d學生真係好差，其中有一男一女坐係我後面，佢地由開始到完都係度傾計，人地係度祈禱佢地就大大聲聲係度講野，中途仲電話響，個死仔仲係度講埋個電話添．．．仲有，個女仔又不斷係度話：”乜咁耐架，幾Q時完架，晒我時間”．．．我初時真係好想拎轉頭話佢地架，不過見到崇拜進行緊，唔方便同容許我咁做，唯有唔理佢地啦．．．完左之後，爹地同左盧宛茵（高朋滿座果個事頭婆呀）傾計，我都有同佢傾左幾句say個hi咁啦！因為同佢唔熟所以冇咩好傾．．．今日梁榮忠都有黎參加崇拜，不過佢完左好快就走左囉，可能佢怕d狗仔隊又亂寫啦！今個平安夜我同爹地妹妹都會去報佳音呀，希望到時好玩啦，好期待呢！果日雖然要返工，但係因為放三點，所以放左工都仲有時間返教會練歌同預備！

之後，我地去左食飯，跟住就去左行街，妹妹就好啦，爹地媽咪送左份大禮比佢做畢業禮物呀，係一個agnes'b既銀包，真開心死啦．．．我都有份夾錢送比佢架，哈！希望佢鍾意份禮物啦！

今晚食得好飽，因為我地打邊爐呀，哈．．．雖然天氣未到好凍，但係一家人打邊邊既過程真係好happy架，不過就真係好肥喇，哈！我而家肥番少少喇，已經超過左90磅囉，真慘！初時諗住可以保得住個磅數唔會反彈，點知都係守唔住，唉！不過冬天叫人唔食野又好難既，天氣咁凍個人自然食多左野保暖架啦，係咪？

PS，知道ALAN病了，希望佢早日康復啦！要多多休息呀！快D好番啦！
而家天氣反覆無常，大家真係要小心呀，要好好保重身體呀！

>>December 3, 2006 at 2:17:31 PM GMT+8

2006 年 12 月 1 日 星期五 【颳風】

今日好精神，因為琴晚訓得好夠，十一點已經訓喇，加上今日返十點，所以可以八點先至起身．．．我琴晚訓到連波波半夜上左我張床訓我都唔知，直至到佢半夜三四點時叫醒我開門比佢出我房時我先知原來佢一直訓左係我隔離．．．到左今朝七點鐘，呢個人肉鬧鐘波波貓又叫我起身，因為平日我七點就起身架嘛，可能佢今日見我夠鐘都未起身，所以入黎房係咁叫我啦．．．哈，其實都幾好笑．．．

今日係中心都冇咩心機同心情做野，可能呢幾日對住d paper work已經發晒癲喇，唔想再做．．．所以見到同穹係度貼label，我都幫埋手一份，因為想做d "hair"少少既野．．．下午果陴帶tour，只係一團得十個細路既團，真係好晒資源囉，唉，冇計，佢book果陴話20人，點知最後得番十條友，都要帶架啦．．．真煩！

放工果陴突然心情唔多好，可能今日太游閒，所以反而搭車返屋企果時個腦係咁轉，係咁諗左好多野．．．唉！不過．．．我容許自己會有咁既情況，因為所有我既感覺都係真正既感覺，都係好實在既感覺，所以．．．我接受得到自己會咁樣．．．我唔會去逃避同呃殺自己既感受．．．不過．．．有時真係覺好難受！

>>December 2, 2006 at 2:44:47 PM GMT+8

2006 年 11 月 30 日 星期四 【颳風】

嘩~ 今朝起身時覺得天氣好凍，一睇電視，嘩，得果十七度咋，真係凍左好多．．．各位好友，天氣凍了，記住著多件衫呀，小心身體呀！

今日工作都幾順利，上午好努力咁繼續做我既proposal，好頭痛呀，好麻煩．．．d大老細真係煩到要死呀，又呢又路咁，超級麻煩．．．下午果時攪teacher seminar，今次比上星期五果日差好多反應，d老師真係水平好差，已經好多都遲到啦，仲要有個遲左到仲大安旨意咁拎盒KFC出黎食，個個都望住佢呀．．．呢度擺明係唔食得野架啦，但係我見CENTRE I/C都冇出聲，所以我最後都冇話果個人．．．有D中途仲訓覺同講電話添，D反應仲差過D學生答問題呀！唉，完全唔講都估唔到呢班人係老師．．．真諷刺！

琴晚收到一個好朋友菲比既電話，從佢口中得知近日有D朋友出左事．．．唉，我都好擔心佢地呀，尤其係雪梨．．．希望佢冇事啦，為佢祈禱呀！

>>December 1, 2006 at 1:47:14 PM GMT+8

2006 年 11 月 29 日 星期三 【微冷】

今日不算是十分忙碌，只是下午時段出了學校約來回兩小時既時間．．．而其餘時間都在公司做paper work．．．一想起paper work真是十萬個想死呀！有好多野要著手去plan同做喇，加上差唔多日日都有tour要我去帶，真係得閒死唔得閒病．．．所以咪之前病左囉，唉！

下午果時行左陣pacific place，突然想起爹地媽咪下個月4號就係結婚周年紀念喇，今年佢地仲係珍珠婚添呀，所以我打算送份禮物比佢地．．．不過，而家仲未諗到呀！頭先下午行街時都冇咩insight，放工第登行左去一間基督教書室行都係唔知買咩好，真係好頭痛呀！

頭先搭車返屋企時聽mp3，聽到一首歌，呢首歌係我一個好兄弟係我最失意既時候送比我聽．．．其實呢首歌我之前一直都唔敢．．．或者係唔想聽，只係今日先至去聽．．．內裡既歌詞我相信係佢完全想同我講既野黎，我聽完好感動，其實．．．感動在知道呢個好兄弟都係想我好，二來係我對自己既事而感到感慨．．．呢首歌既歌詞係咁既．．．

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

落淚亦愛他給你突然　找新愛人權利
他要拋開你方逼到你　誓要事業爭氣

練習沒有他一個去飛 難堪的只是心理
在你的陣地真愛淋漓 仍然會獲到歡喜

＊如果不愛他怎好　他教人知道
　相戀失戀　總要受點苦至共老
(相戀失戀　先算做任青春飛舞)
　來鳴謝他　證實你尚有未吻的荒草

　不愛他怎好　因愛才生怖
　苦與樂也修到
　人家多少對做夫妻終老
　雖笑著談吐　還比激喊枯燥＊

浪漫助養他怎會在乎　將一個人來負
這條路得你一個迷糊　別怪情人可惡

特別謝過他給你痛苦 隨便講低便不顧
令你不模糊不要人扶 何愁以後更辛苦

REPEAT＊

你是你維持你這多麼好
他有他人抬他當做瑰寶
滾滾的旅途　兜兜轉未到

REPEAT＊

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

其實我好多謝呢位好兄弟架．．．我想話佢知，我會努力的．．．

>>November 30, 2006 at 11:52:40 AM GMT+8

2006 年 11 月 28 日 星期二 【微冷】

今日係妹妹畢業禮，在此恭喜佢，並祝佢前程錦繡！

今日好奔波勞碌呀，今朝早就幫佢揀衫整野，而我自己都要執整下啦，之後十二點半就出門口喇．．．兩點九去到紅館會場，嘩，好多人呀，我地兩點九去到都要坐係山頂位呀．．．不過猜所謂啦，前同後都冇咩分別既．．．不過，成個過程中真係令我好氣憤呀！我發覺而家d人既質素水平十分之差．．．

尤其係坐係我後邊果三個年青人．．．佢地由開場到散場都係示威係咁大聲傾計同笑，嘈到死，更加衰既係，人地話左為左尊重畢業者，請各位在正式完場時先至離開，但係呢班人都未完晒就走左．．．（不過佢地早d走仲好，唔洗嘈到死），咁都不特止呀，呢班野人地叫起身奏國歌，佢地竟然繼續坐係度，我同媽媽都睇唔過眼，所以媽媽出聲：”喂，奏國歌呀，仲唔起身？”跟住個靚仔就話：”乜奏國歌要起身架咩？”跟住我答：”起身係代表我地尊重國家，而家你唔起身就係連你自己都唔識得尊重自己．．．”之後果三個年青人先死死氣起身，但係之後佢地依然故我，嘈到死，仲要中途拎左包薯片出黎食．．．我真係好想打佢呀！除此之外，四邊d家長都唔見得識做，一係就無啦啦中途電話響，仲要好大聲咁：”喂！邊個呀？我而家去緊阿仔個畢業禮度呀．．．”，一係就係度恰眼訓．．．唉，我真係想打人呀！好討厭．．．

其實，定係我份人太認真，太執著呢？好似今日樣樣都好睇唔過眼咁．．．唉！我係咪真係對人要求太高呢？樣樣野都想做到最好最完美．．．所以往往都會令身邊既人有壓力呢？但係．．．明明有d野你係可以做得好d既，點解係都唔肯去做或者去改變呢？或者做左後結果會好好呢？係咪？我份人就係既格言就係，既然可以做得好d既，點解唔再努力d去做得更好，或者行多一步做多少少呢？．．．

>>November 29, 2006 at 2:22:23 PM GMT+8

2006 年 11 月 27 日 星期一 【微冷】

嘩，今日既天氣真係比起之前凍左好多，今日著唔夠衫呀，好慘．．．本來著左件厚少少既褸，點知妹妹又話我發冷，所以換番件簿d既，點知就出事，真係凍到傻左．．．最衰係妹妹，如果我繼續病落去我一定殺左佢，因為我今次病係因為佢病先，佢份人好衰，病又唔肯去睇醫生喎，唔睇都算啦，連成藥都唔食，係咁"ouw"落去，唉，好討厭．．．我就係咁比佢野左喇，乞人憎！

今日返工因為食左藥，所以成日都好似打左懵仔針咁，呆呆滯滯咁，好辛苦呀！因為下午要帶tour，好在得十幾人黎左o者，所以都好易就攪掂左，不過就好辛苦，把聲又沙左喇．．．今日帶隊時dept. head特登落左黎睇我帶隊，嘩，幾突然呀，帶帶下突發檢查喎，真係防不勝防呀！好在，佢都大讚我帶得好，一句very good總結晒佢既意見喇，哈！都好開心架，聽到有人讚自己喎，yeah~

聽日係妹妹既畢業禮，佢將會係紅館度攪，哈，我地以前都冇咁high既，真係開心．．．因為爹地去唔到呀，所以佢張飛由我代替左去，好野，有得睇．．．聽日要同妹妹映多d靚相先，yeah~ 真係越來越覺自己老喇，連妹妹都畢業囉，真係安慰．．．哈！好似突然好感慨咁呀！真係希望妹妹可以成材啦．．．妹妹，恭喜你呀！！希望你前程無限．．．

>>November 28, 2006 at 11:51:52 AM GMT+8

2006 年 11 月 26 日 星期日 【微雨】

今日好慘，一朝早起身又發燒又喉嚨痛，個頭又重又痛，好辛苦先至捱左一日咋．．．

最後．．．夜晚都係去左睇醫生呀．．．醫生叔叔話我傷風感冒呀，好可憐．．．明天仲要帶隊呢，點好呢，喉嚨仲係好痛呀！

真係開口中啦，琴日仲同alan講開逢係個人一喉嚨痛，好易就會引發埋發燒架喇，點知．．．真係中左呀！噢，shit．．．

而家食左藥，好眼訓呀．．．所以，訓覺喇，早抖喇各位！

>>November 28, 2006 at 11:44:44 AM GMT+8