2006 年 11 月 25 日 星期六 【微雨】

今日好可憐，因為好早起身返工，不過已經算好喇，返十點可以遲返一個鐘．．．琴晚我估我成兩點幾先訓到覺呀，所以好慘，今朝八點起身，訓得果六個鐘唔夠．．．嗚！今朝起身果時又喉嚨痛到爆呀，真係好慘，後來返工又遲到喎，今朝有tour架，我遲左到，好在有個同事幫我頂住咋，如果唔係死得人．．．今朝唔洗帶tour，所以可以係個位度抖下，真係好死眼訓，真係坐係度都訓得著果隻，今朝搭車果時已經訓到不知時日咁架喇，落車果時真係十萬個唔想起身呀，尤其一坐左落個位度，更加想訓落去呀！！

到左下午，出去買野食，見到間健康工房，所以走左去買杯苦茶飲，因為個喉嚨痛痛呀，又有幾聲咳咁，個人叫我飲杯風熱感冒茶，成二十蚊，不過．．．好似飲左之後又好左dd咁．．．有時真係中藥都幾有用咁架！下午要帶幾隊tour，十分麻煩，係果d本地旅行團果d，好鬼死麻煩．．．不過都完成左！

今晚約左alan去尖沙咀食飯，alan佢同我一樣琴晚好夜先訓，今朝又一早起身，所以大家都好累．．．不過點都完成左我地既飯局．．．我地去左南山谷食韓式料理．．．好味．．．其實之前就係我食過好味所以先介紹alan去食，因為話晒請佢食飯當生日禮物，梗係要食d正野啦．．．我仲係mrs. field度買左個忌廉芝士藍梅miffin比佢做生日蛋糕添，真係開心！其實我而家做人好簡單，只要係果件事可以令我自己或者人地開心既話，我都會去做的，我只係為開心，咁樣已經好足夠了．．．希望alan都喜歡今日的飯局啦！

>>November 26, 2006 at 2:31:24 PM GMT+8

2006 年 11 月 24 日 星期五 【微雨】

今日好早已經醒左，又是同樣先比妹妹個鬧鐘嘈醒，繼而又係波波豬既傑作，又是一下跳上我的肚上叫醒我啦．．．唉，最後我都係九點唔夠起左身．．．今日係我個好朋友結婚，佢本來叫我今早八點半落去佢屋企度玩，不過真係好累呀，真係唔願起身，所以都係冇去到．．．後來，同左媽咪落街食早餐，之後仲行左一陣街，去埋市中心果頭陪一個auntie拎介子添，因為佢個女下個月結婚．．．唉，近排真係好多人結婚呀！其實．．．真係好羨慕架！

今日去左跑馬地既馬場度飲，都幾grand下架．．．不過我覺得最令我深印象既並唔係因為富麗堂皇，什麼特別既服務，什麼好好味既野食．．．而係成個過程當中，我見到新郎哥同新娘子係好愛對方，特別係新郎哥，佢表白果時真係好令人感動，佢真係表現得好愛佢既老婆，好懂得欣賞佢既老婆！除此之外，過程中佢好體貼好溫柔好無微不致，又幫個新娘子拉裙，扶出扶入咁．．．唉，真係令人羨慕死！一個咁好既老公真係可以係邊度搵丫．．．如果我可以搵到一個咁愛自己既老公，真係叫我點都得呀！

想起，曾經在一位朋友的blog到見到以下的句子（他其實當日亦是參加朋友的婚禮而有感而發的）：

「我們愛，因為神先愛我們」！
「愛是恆久忍耐，又有恩賜，愛是不嫉妒、不自誇、不張狂，不作害羞的事，不求自己的益處...凡事包容、　凡事相信、凡事盼望、凡事忍耐，愛，是永不止息」！

相信大家都很同意這兩句說話吧．．．

飲完之後搭專車返屯門，嘩，最後成點幾先返到屋企，好眼訓呀！所以．．．要訓覺覺喇，因為聽日仲要返工呢！！

>>November 27, 2006 at 8:23:46 AM GMT+8

2006 年 11 月 23 日 星期四 【微雨】

在此，再次祝alan生日快樂！我誠心祝願他：身體健康！工作愉快！幸福快樂！最緊要梗係夢想成真啦．．．恭喜恭喜．．．（好似有d似新年咁，哈！）

今日下午約左alan，同佢慶祝生日，後來我地去左睇戲，我地去左睇墨攻．．．哈，套戲比想像中好睇呀，因為初時我都擔心會講太多什麼墨子理論而會太悶，但又唔係喎，佢有好幾場既戰爭場面都幾大場面下架，仲有，當中都有講到有關墨子”兼愛”呢一點．．．唔，其實”愛”呢樣野真係好難可以用詞語去形容的，是愛就是愛，不愛就是不愛．．．但是，我很相信，”愛”是可感動人的，感動到人去用行動同真心去愛人！正如，在戲裡劉華最後都知道自己最愛的是誰．．．他為了”愛”，不只是他愛那個人，更是愛天下百姓既生命，而再次回到危險之地，所以愛是十分偉大的一樣東西吧！

今日同alan好似交換禮物咁，我就送左一份小小既生日禮物比佢，同埋一筒好大筒既smarties．．．而佢又送左我一盒朱古力餅餅，請左我睇孰，同埋送左兩個青蛙扭蛋公仔比我．．．真係開心，好似提早收聖誕禮物咁，哈！

聽日就係我一位識左二十年既朋友結婚既大日子，在此先祝佢新婚愉快，百年好合，永結同心．．．恭喜恭喜！

>>November 24, 2006 at 11:55:14 AM GMT+8

2006 年 11 月 23 日 星期四 【微雨】

今日係公司都幾忙下，成日坐左係個位度對住部電腦都冇停過，係咁做proposal同time slot．．．嘩，死得人呀！I/C佢係咁放d野落黎比我做呀，就連跟住落黎我既下屬既apprasial都要我寫．．．當然，那班下屬好像有點兒不服咁，因為佢地從來都冇人管住佢地既，而家仲要一黎黎左兩條友喎，真係好難攪呀呢班人．．．我同I/C真係頭痛死，都唔知點攪呢班人好呀！呢班人成日都圍威喂咁，有咩野唔服就玩圍攻我地兩個．．．我地兩個就黎死得架喇！真係唔知點好！雖然，今次係一個好既機會比我學習下點樣去SUPERVISE人，但係真係一個好大既挑戰，我都怕自己做唔黎呢！黎曉寧，要撐住呀！

放工之後約左媽媽同妹妹出旺角，因為妹妹話要買裙，FOR畢業典禮同去飲著喎！認識我妹妹既人都知，佢真係轉左性．．．而家竟然會著裙喎，哈！不過女大真係十八變既．．．咁就攪左成晚喇，最後成十一點十先返到屋企！返到去之後就o拿o拿聲走去send sms喇，因為聽日係alan既生日嗎！梗係要夾o岩d時間send句生日快樂比佢啦！

唔，我約左佢聽日一齊食lunch，希望成為第一個陪佢慶祝生日既人！其實呢一刻有點兒落泊既感覺．．．今次可能是我最後一次同佢慶祝生日了，或許日後佢會有另一個人不但為佢慶祝生日，仲會陪伴住佢渡過每一個開心快樂既節日．．．突然一下真的感到好唏噓吧！想起自己．．．跟住既大時大節又有誰和我渡過呢？．．．曾經有朋友說："annie，你唔應該咁好人，佢明明在你生日中傷害過你，你為何仍然咁好人，為佢去慶祝生日？你應該狠狠的不再理佢．．．"　其實，是否人對我衰我就要報復呢？我真的不敢認同！我只知道，我對人好時，人地某程度上都會對番我好，呢個係我一向做人既原則！相信，認識我的人應該好明白我既，ok？

>>November 24, 2006 at 2:28:18 AM GMT+8

2006 年 11 月 21 日 星期二 【陰】

今朝好早已經醒左，首先係一朝早七點幾比妹妹個鬧鐘嘈醒左先，跟住就係果個波波喇，八點幾又嘈生晒要食野，跳上跳落咁，係正我個床頭位係咁叫，你話我唔起身都唔得啦．．．好啦，難得九點可以走番上床，點知九點幾又比媽媽嘈醒，佢又晨早開我部電腦，上網睇股市呀！唉，天呀！我真係好似冇點訓過咁．．．好在琴晚食左藥，個人好快都訓著左，一覺訓到大天光．．．如果唔係？真係好慘下．．．因為太早起左身，所以今朝陪左媽咪去食早餐，攪攪下都成十二點喇，拿拿臨走去買材料動工整野．．．

一條友返到屋企（因為媽媽佢去左染髮），我係度整一份生日禮物，一份結婚禮物，同埋一份畢業禮物．．．真係好忙呀！咁就成個下晏喇，我連lunch都冇跟媽媽出去食，只在家吃杯麵咋！不過．．．頭先將妹妹份畢業禮物整好之後，就放左係佢床上邊，佢一放工返黎見到，真係開心到爆炸呀！哈．．．最緊要係佢開心o者，係咪？辛苦點又何妨丫！yeah~

之前提過今個星期六有個朋友結婚，其實佢係我d街坊黎既，我地細個一年班時已經識架喇，到而家都有成二十年有多喇．．．不過，我同佢都唔算係什麼的好朋友，因為我地從來好少傾談，亦沒有一句真心話的，我們見面多數都是因為我地既媽媽約埋飲下茶咁先至見到．．．哈，所以今日佢媽媽見到我時叫我果晚早d去到，映下相睇佢切蛋糕喎．．．我都冇咩反應呀！一來我真係一向唔多鍾意呢個朋友，二來．．．自己感情路上不如意既時候，見到身邊有人結婚都重係唔多開心吧！我都知我唔應該將自己不愉快既心情影響人地，所以我一直都猜比佢知我同alan分開左，因為我一來唔想佢知，二來人地結婚無謂講呢d咁唔吉利既事丫，係咪？

今日下午果時整其中一份禮物時（那份生日禮物）時心情不太好，因為這份禮物是整給一個以前與我好親密，但而家只是我的朋友的一個人．．．無可否認，呢一刻真係有點感到唏噓落泊．．．唉！明天又是工作天，但是返埋聽日之後星期五同六又放假了．．．初時填更表在24，25號放假，就是想為一個"好朋友"慶祝生日．．．但現在已經今時不同往日了！

>>November 22, 2006 at 1:58:41 PM GMT+8

2006 年 11 月 20 日 星期一 【雨】

今朝早終於clarify左d野．．．我係呢度同當事人說句：對不起！因為我誤會了他，亦知道我當中的發問，語句，日記的內容令他感到不安，不愉快．．．所以真係好衷心說句：對不起呀！請原諒我的愚昧，我誤信他人．．．最多．．．星期日請你食番餐勁架啦，ok？

今日由於食左藥，所以成日個人都好似”溫溫燉燉”咁，真係食左懵仔藥咁，今朝帶隊果時個人反應好遲鈍呀，不過好在d學生發現唔到，哈！下午果時仲要同I/C開會傾跟住落黎既工作．．．嘩，好死呀！而家諗起都有點流汗呀！真係好多好多野要做呀！今次死得人囉．．．而家要努力去計劃定D野呀，好苦惱呢！仲要下星期前攪掂個TIME SLOT添．．．點算呀！我跟住都放假，又要帶隊，都唔知有冇時間做添呀！唉！天呀！

聽日是放假天，但係我將有特別既野做，因為我買左份神秘禮物比妹妹，我聽日要親有時間好好咁整D額外既野落份禮物度．．．仲有，有個好朋友星期六結婚喇，我都要比D時間去整一整份禮物，所以聽日祳會好忙喇．．．努力努力！

>>November 21, 2006 at 1:00:35 PM GMT+8

2006 年 11 月 19 日 星期日 【微雨】

今日好可憐，因為琴日空氣好差，所以我琴晚氣喘左幾次，又係咁咳，今朝仲有少少發燒添，所以今日最後返唔到工，我又請左病假．．．後來今朝係咁訓，訓到成十一點幾，起身果時個頭超痛超重，好尺添呀！後來，下午去左睇醫生，醫生話我氣管又開始發炎了，要我兩日後再去覆診！唉，我都想身體好d，但係都總係改善唔到．．．我媽咪就次次都怪我以前成日係我未病好既時間就出去玩，又游水又行山咁，攪到我身體越來越差落去．．．

琴晚祈禱左好長時間，初時都有喊，但係到左今朝，我覺得自己好似看化了一點東西．．．做人有時何不大方一點？預其做一些令自己不開心既事，不如令自己豁達點，開懷一點，目的就係令自己開心一點呢？愛一個人，不是要完全的擁有佢既，只要我能夠在他背後仍然默默地支持佢，祝福佢幸福快樂，我已經很心滿意足了，亦是愛對方的一個較好的方式吧！有時候，知道對方已經找到了更好的，作為朋友都應該為他高興，祝福他吧！大方點，不是令自己更開心嗎？往往令自己耿耿於懷，最終都只有自己傷心，對方亦永遠不會知道你因為他而傷心，不開心吧！．．．

>>November 21, 2006 at 1:01:25 PM GMT+8

2006 年 11 月 18 日 星期六 【陰】

今日心情極差．．．而家好想好想．．．十萬個好想．．．喊！

頭先有個好朋友話左件事我知，我聽完件事之後真係好唔開心，又有點不甘心，亦覺得好矛盾好無奈．．．我好希望可以clarify呢件事究竟係點．．．或者我唔到真正知清楚件事，或者親眼見到件事係點，我都唔會甘心同死心．．．！好希望個當事人真係可以認真誠實地告訴我究竟件事係點．．．

但係．．．如果真有其事既時候，我又可以點？我真係唔知道．．．我又可以做咩丫，我又唔係人地邊個，唔通去打死佢？自己死左去？挖當事人出黎講數．．．？所以我十分無奈同矛盾．．．我唔知道自己能否承受得到個結果，但係，呢一刻我好想澄清清楚件事係點．．．或者咁樣我會好過一點，好似一個好兄弟所講既，要”豁達一點”，”豁出去”去面對件事．．．但係，真係咁容易嘛？很難吧！而家呢刻好痛苦，覺得很難受，很傷心，亦很無助．．．天呀！點解會係咁架！

天父神呀，我好希望自己有能力承受得到個結果，我唔係想件事唔係真，而係即使件事係真定假都好，我都希望自己可以承受得到，因為始終一天我要面對咁樣既事實吧！神呀，我唔知點解自己好想澄清件事，或者，我呢刻仍然未能放得低，好想在逃避吧，但係，或許咁樣我先至可以完全地死心吧．．．我知道自己唔應該再係咁，亦唔應該再被事件或者當事人既所有野牽引住我，因為我確實係需要堅強，振作，有自己新既生活同未來．．．但係，我呢一刻真係好軟弱，亦對自己缺乏信心可以做得到，因為我覺得好困難呀，好難做到呀，好辛苦呀！！所以神呀，好希望你可以讓我振作起來，不要再軟弱下去，好好的面對一切．．．希望神可以給予我啟示我應該如何是好．．．我願意將一切交予神既手中，好讓為我安排一切．．．阿們！

>>November 19, 2006 at 12:01:12 PM GMT+8

2006 年 11 月 17 日 星期五 【晴】

今日仍然係好忙，因為今日又係要帶兩個tour，得得一條友帶咋，所以十分之辛苦．．．不過唔緊要啦，有時猜隊都幾開心既，可以同d細路傾下計，一齊講下笑咁，都幾happy下架．．．

今日五點時收到一個好朋友既來電．．．哈，其實收到呢個電話都幾突然架，因為自從同佢成為左朋友之後，佢都好少會主動打電話比我既，就算係打比我都係因為一d重要事情，而並非係因為佢突然想起我呢個朋友而打比我，所以，收到佢既來電，當時真係幾開心，因為我覺得佢終於想起我呢個朋友．．．雖然，可能佢想起我係因為想搵我zip時間，不過．．．我都好開心佢會想起我呢個朋友．．．雖然最終大家無緣相見，只係在電話裡傾談左一陣，但係我都好感恩喇，真係好感謝神呀！

近日，妹妹上緊教會既慕道班，準備係今個聖誕節正式行堅信禮，成為基督徒．．．今晚，妹妹突然問起我點樣寫祈禱文．．．哈，我覺真係好笑，真係傻妹黎架，佢以為寫祈禱文係要有個規格去寫．．．其實祈禱係好個人，好隨心既事黎，想講咩咪講咩囉，點可以問人點寫點樣祈禱架？真係傻．．．不過我明既，妹妹佢在這方面既認知比較少，所以都係時候好好咁帶領佢多d放在自己既宗教上架喇．．．其實好就好在佢而家係公司識既好幾個較friend既同事都係基督徒黎，希望佢地可以幫助感化多d妹妹佢，令佢熟靈多一點吧！而我自己，其實一點都不熟靈吧．．．就只係聽日雖然放假，都已經有點懶懶地想唔返教會喇，因為真係近日好累呢．．．所以．．．聽日真係睇下有冇果個恆心起身喇，哈！

>>November 18, 2006 at 3:19:51 PM GMT+8

2006 年 11 月 16 日 星期四 【晴】

嘩~ 今日超忙喔，上下午都有tour要帶，好死呀！真係講野講到氣咳聲沙呀，好苦喔．．．逢係果一日要帶兩場以上既tour我都好死 ，因為確實好辛苦，幾個鐘頭係咁講野，企住冇得坐，真係幾辛苦架．．．最麻煩既係，連做office既工作都做唔到，激死．．．不過冇計，呢個係我工作既一部分吧！

放工之後約左個好姊妹行街，我又買左野喇．．．哈，我買左一份神秘禮物比妹妹，因為佢今個月尾正式畢樹葉喇，所以都要送番份厚禮比佢，等佢開心下啦．．．除此之外，我當然都有tum下自己開心，買下野比自己啦．．．橫掂賣左隻"工商"，賺左幾百蚊．．．不過，呢幾日洗既錢都洗突左賺既錢囉，哈．．．唔緊要啦，冇人tum自己開心既，咪自己買一d自己喜歡既野tum下自己囉，呢樣野係表哥佢教我架．．．哈！

明天又是返工天，又是一日內帶兩個tour．．．唉，天呀！哈，突然之間聽日諗起下午食咩．．．好想食吉野家喎，哈！好，一於明天食佢啦．．．要對自己好點喔！！

>>November 17, 2006 at 3:31:27 PM GMT+8