2006 年 7 月 29 日 星期六 【晴】

哈，今日拎左d糯米慈返去比d同事食．．．佢地個個都讚好呀，真係開心．．．見到人地食自己整既野開心，自己都好開心滿足架．．．有個師兄好好笑，佢整左個美女廚房既比分牌比我，仲寫左八分比我添．．．真係開心！另外有個師兄仲叫我兩個星期整一次返黎添．．．哈，咁我咪好唔得閒？我唔好整比自己人食？哈！

>>August 10, 2006 at 1:06:21 PM GMT+8

2006 年 7 月 28 日 星期五 【晴】

哈~ 今日係屋企度整左好多芒果糯米慈呀，我都覺幾好味呀，諗住整d比屋企人，男友，同埋同事食嘛，希望佢地都鍾意啦．．．

今日整好d糯米慈之後，就特登拎過去比男友食喇，因為好急不及待要佢試一試呢．．．好在佢都話好好味．．．唔，我整野食既信心又大左喇，希望日後可以有多d機會整多d野食比男友食啦．．．

>>August 10, 2006 at 1:04:20 PM GMT+8

2006 年 7 月 22 日 星期六 【晴】

嘩，我今日大出血啦，一日內洗左三千幾蚊．．．

點洗發？返完教會之後我地出左去行街，首先去左agnes b既travel主題店度行，唉，我其實一向都有睇中個袋既，點知就係忍唔住買左喇，之後妹妹同爹地都有買到野，妹妹買左條頸項，爹地買左條電話繩．．．我咁樣就洗左千六蚊先．．．之後我地去左A-LOOK，其實我本來都打算換眼鏡架喇，點知睇黎睇去都係睇中D名牌眼鏡既款式，最後我買左一副紅色既GUCCI眼鏡，咁樣又千五蚊喇．．．唉！

之後我地一家人去左食飯，再去左吉吉島十蚊店行，之後爹地媽咪話走先，我同妹妹再繼續行，我地去左百德新街果頭，行左ARNOLD PALMER同BEAMS BOY，妹妹係BEAMS就有收獲，而我就係ARNOLD PALMER買左件衫．．．之後我地去左皇室堡對面個商場，即係IKEA樓上間AGNES B再行過！妹妹係呢度買左條手錬比我做生日禮物，哈，好鍾意同好開心．．．好想再次講句：妹妹，多謝你．．．之後我地就好開心咁返左屋企，而我既銀包就空空如也咁回家．．．好苦呀，今次都唔知點死，D卡數呀，天呀！！

>>July 25, 2006 at 1:26:58 PM GMT+8

2006 年 7 月 21 日 星期五 【晴】

今日好乖，放左工之後就返左屋企同屋企人食飯，今日我地去左一間之前未試過既酒樓食，叫二宜樓．．．呢間野既格調同食物質數都好好，之但係價錢唔係抵，同埋d野太細碟喇，所以都係試一次夠喇．．．

聽日我地會一家人一齊返教會，我都有一段時間冇返過去喇．．．

>>July 25, 2006 at 1:26:49 PM GMT+8

2006 年 7 月 20 日 星期四 【晴】

唔~ 今日係最後一堂上普通話理喇．．．感覺有開心又有唔開心咁啦．．．之前都有諗過想讀埋個中班，但係‘男友佢暫時唔打算讀住，所以就陪佢遲d先至再讀啦．．．

今日上完堂之後同左班朋友仔一齊去左食糖水同傾計，都好開心呀，都食到成十二點呢，之後我就去左男友度喇．．．男友佢聽日會去行山pre-trip呀，希望聽日唔好太曬同太熱喇，如果唔係佢會好辛苦．．．

而我聽日要繼續返工，又要開OT喇，好苦呢！

>>July 24, 2006 at 2:53:14 PM GMT+8

2006 年 7 月 19 日 星期三 【晴】

今日妹妹佢去左中環見工，所以我地順便約埋一齊走．．．後來妹妹話要去旺角拎野，所以我地就去左旺角果頭行下街街啦．．．我地去左朗豪一間叫EURO GO GO食，真係好好味呀，尤其係杯鮮忌廉朱古力奶，係超超吉超好味囉．．．我會介紹人去試架．．．太好味．．．

我今日都有買左野，我係無印度買左兩件衫，有折丫嘛，一定唔可以錯過．．．

之後男友打比我，佢話想去我屋企度，因為掛住我．．．哈，好開心呀！真係近日好感動，因為男友真係對我好好，而且好錫我．．．HEHE~ 之後佢就係我度過夜，我地係度玩同傾計，真係好開心．．．雖然好夜訓，不過都值既．．．

>>July 21, 2006 at 11:30:36 AM GMT+8

2006 年 7 月 18 日 星期二 【晴】

今日我冇開OT呀，唔係因為我累或者懶，而係男友佢今日帶活動時唔小心整爛左副眼鏡，所以盲摸摸咁要去佩眼鏡，而我就梗係要做既身邊既導盲太小ANN啦．．．哈！

因為銅鑼灣果間A-LOOK可以兩個鐘即時拎，所以都同佢去左果度佩眼鏡．．．我幫佢搵左副靚仔眼鏡，梗係正啦，即刻靚仔晒．．．咪就係型囉．．．哈！

後來我地去左BISTRO DELIFRANCE度食．．．真係唔同D架，一分錢一分貨呢，野又好食D，服務又好D，氣氛又好D．．．一個字，正！但係成個過程最重要既係男友佢同我突然表白左好多野，我都好心動好感動呀！我都從來冇試過咁感動架．．．我好想同佢講：”我收到架喇，我好開心同感動，我永遠記住你講過既說話，我都好愛你呀！！”哈，希望男友收到啦．．．

真係成晚都訓唔著呀，太開心喇．．．

>>July 21, 2006 at 11:25:28 AM GMT+8

2006 年 7 月 17 日 星期一 【晴】

唔，今朝早可以遲少少先起身，所以非常之好，可以精神少少．．．跟住就去見工喇！過程都算幾好，我係見工果度好似撞到個舊同學，不過大家都唔知大家叫咩名，只係覺好熟面口．．．算啦，都唔多熟，費時相認喇．．．

之後見完工就返去中環，係IFC換左衫之後就去左買野食返公司食，果時都係點幾，所以咪當自己休息下先再努力做野．．．今日都要開OT呀，不過都係粒半鐘咋．．．之後IC同我講今朝原來可以計三粒半鐘，唔係四粒鐘，真好，可以減少半粒鐘，開心呀！

>>July 21, 2006 at 11:20:07 AM GMT+8

2006 年 7 月 16 日 星期日 【晴】

今日繼續努力返工同開OT呀！聽日要見工，所以更加要開多D，因為聽日要請四個鐘假去見工呀，之後返番工．．．所以聽日都要開多D OT，唔洗一次過咁傷少咁多個鐘．．．

唔，今日返到屋企後就努力溫習，因為有好多野已經生疏左喇，而且又要補習一下關於DRUGS既野呀！要努力努力．．．希望聽日成功啦．．．

>>July 21, 2006 at 11:17:12 AM GMT+8

2006 年 7 月 14 日 星期五 【雨】

呀，今日超累呀，因為琴日成兩點先至訓，今日朝早起身時極之眼訓呀．．．今朝男友送左我返工之後佢就走左，但係佢都冇訓番，哈．．．而我就繼續返工．．．今日仲OT左成粒半鐘呀，因為琴日收到個電話叫我下星期二去見工，係禁毒處做計劃主任果份．．．唔，希望成功啦！所以要努力去開OT呀，如果唔係我唔夠鐘八月尾去交流團架喇．．．係喇，唔記得同大家講，我八月尾會去交流團，去連南，清遠同廣州，共去五日，由廿二號去到廿五號．．．我要持五日假呀，順便諗住拎埋廿六號果日，一來我廿七號生日想早放一日假，二來旅完行返黎好累既，抖下都好．．．所以而家要努力儲鐘，起碼要一日一粒至粒半鐘呀．．．我好驚我會係MTO度猝死！

跟住今日放左工之後約左男友去旺角行街，我買左個新既行山背囊，因為之前果個比較細容量，所以換個大既，一來以後唔洗男友成日要拎特別多野，二來我去交流團都要大個少少啦．．．唔打緊啦，橫掂爹地佢會津貼我，哈！跟住就返左男友度喇．．．因為聽日佢難得放假呀，所以都要陪下佢啦．．．

>>July 16, 2006 at 2:21:12 PM GMT+8