2006 年 2 月 26 日 星期日 【乍雨乍晴】

今日我好乖留左係屋企呀，除左下午同左媽媽去買野之外啦．．．跟住留係屋企一次過打左好多封信呀．．．唉，希望可以快d搵到份工啦．．．我都唔想再繼續放呢個悠長假期喇．．．

>>February 28, 2006 at 3:41:27 PM GMT+8

2006 年 2 月 25 日 星期六 【颳風】

嘩~ 今日下午請左屋企人飲茶茶，雖然價錢真係唔係貴，不過因為我而家仲係糧地中，所以都幾肉赤下架，哈．．．不過唔打緊啦，最緊要屋企人開心丫嘛．．．

跟住夜晚就約左男友出旺角，因為我地諗住星期二三去wild camp呀（男友佢又放兩日大假丫嘛），所以我地特登出去旺角購買下d露營用品囉．．．後來男友帶左我去廟街度食煲仔飯呀，我都係第一次係廟街度食，初時都幾驚d野會唔乾淨架，不過算啦，都幾好食，死就死啦，仲食埋蠔餅同田螺添，驚死死唔去咁，哈！不過今日食完之後雖然有少少肚痛，但係後來都冇事喎．．．我估冇野既．．．

嘩~ 今晚d天氣突然變左好凍呀，仲好大風添，我地係旺角朗豪坊附近見到有個招牌半天吊咁，仲跌左落去枝燈柱度，果度而家圍晒鐵碼有晒警察係度呀，都好似幾危險下．．．唔，之後d天氣好凍呀，真係唔多鍾意．．．

>>February 28, 2006 at 3:40:04 PM GMT+8

2006 年 2 月 24 日 星期五 【晴】

今日同左男友出左去教育及職業博覽會度行下，我地拎左好多資料返屋企呀，因為我都有打算讀書進修下咁，所以都拎左好多資料返黎，希望可以有用啦．．．

本來我地去完呢度之後諗住去中央圖書館度買義賣平書既，點知去到又話今日full晒，唔比入喎．．．都唔知有冇攪錯架，佢明明四點半至六點有一場架嘛，我地四點七去到已經唔比人入喇，真係冇癮呀，一心諗住黎睇書架嘛．．．好掃興．．．咁唯有係附近行下街啦，之後就一齊返左元朗，我仲整左個delifrance大餐比男友食添，整左個煙三文魚法式包，好正囉，好好味呢！

>>February 28, 2006 at 3:06:25 PM GMT+8

2006 年 2 月 22 日 星期三 【陰】

因為男友呢兩日都放假，所以我都去左陪佢．．．

我地呢兩日傻左，係咁打機囉，打到傻左，不斷係咁打，打到好夜好夜呀！個人都好似呆埋添呀，哈！

不過琴晚收到個好不幸既消息．．．係關於牛奶仔架．．．佢就係星期一返屋企果晚，佢半夜突然哀鳴左好耐，而佢主人因為太累冇起身睇佢咩事，第二朝牛奶仔就走左喇．．．唉，我好傷心呀！當時聽到呢個消息時真係好想喊出黎，真係好傷心．．．唉！我相信佢當晚見到主人時係有少少所謂回光反照吧，同埋佢半夜哀鳴我都認為係佢用盡佢最大既力量同佢主人講再見．．．唉，真係好唔開心呀！！！！！聽到d咁既消息，一來好為牛奶仔不值，二來我真係好討厭寵物店既人．．．男友講得好o岩，有愛心既人根本就唔會開寵物店，只有為利是圖，利用人既愛心去賺錢既壞人先至會開寵物店．．．唉，我好心up呀！而剛好今日係電視度睇左個有關叫人唔好虐待動物既廣告，當中既內容都令我好心up，我相信真係要做多d呢d既宣傳，教育下一代愛護動物，先至可以改變而家d人既心態．．．

”動物都係一條生命，我地都要尊重佢地”

>>February 23, 2006 at 1:39:48 PM GMT+8

2006 年 2 月 19 日 星期日 【晴】

今晚去左男友度，因為本來我地聽日同後日打算上大陸玩番兩日既，點知突然出左少少意外，所以都最終告吹左．．．

唔，不過有件好不心up既事呀．．．因為男友媽咪有個朋友，佢係做寵物店既，佢個老闆簡直唔係人黎架，佢地成日對d貓貓狗狗拳打腳踢咁，一見佢賣唔出或者病左，就將d貓狗掉出街，即使係未斷氣既都係咁掉出街有佢，真係冇人性架．．．就係因為個朋友佢唔忍心，所以已經多次係間舖頭度帶左好幾隻狗仔返佢屋企收養，而佢仲用左好多錢去醫番好d狗狗添．．．就係咁樣如是，男友媽咪個朋友佢先幾日又帶左隻貴婦bb狗仔返黎，佢改左個名叫牛奶仔．．．佢個樣好可愛架，就係因為佢有病，近日唔知係咪食錯左野成日嘔，但係寵物店又唔同佢睇醫生，有佢係咁嘔，仲想掉佢出街添，好在個有心朋友又帶左牛奶仔返屋企，即刻就帶左佢去睇醫生．．．醫生話牛奶仔情況不妙，佢應該係食左d唔應該食既野先至會咁，而牛奶仔會否好番就要睇佢既意志喇．．．唉，佢第一晚睇完醫生已經要吊鹽水喇，真係心up，隨即第二日因為男友媽咪朋友唔得閒，所以叫左男友媽咪幫手睇住牛奶仔同埋帶佢去覆診，醫生都係同樣既說話，但係今次比前一日嚴重，要一路返屋企一路吊住鹽水，直至佢唔再嘔為止．．．唉，我同男友當晚返到屋企見到佢咁既情況真係好心痛，見佢又冇晒精神同反應，真係好驚呀！唉，後來當佢一見到主人時，突然好似莫明咁開心，用盡佢最大既力量去掙大眼，同郁左幾下．．．唉，當時我見到真係好想喊．．．唉，真係希望牛奶仔佢可以吉狗有天相，大步攬過啦．．．快d好番呀！牛奶仔你要加油呀！

>>February 23, 2006 at 1:31:56 PM GMT+8

2006 年 2 月 17 日 星期五 【晴】

因為男友佢又放假喇，所以我呢兩日又去左陪佢囉．．．

琴日同佢去左深水土步，我地去左明將果度倀果個四十蚊任食壽司．．．嘩，食到好飽，我地食左成十八碟囉，真係乜都抵番晒啦，哈．．．

而今日真係攪笑喇，就係因為一個美麗既誤會，令到我地兩個今日係度遊車河，仲要做唔到我地原本打算做既任務囉，真係激死．．．不過算啦，當係拍拖囉．．．

>>February 23, 2006 at 1:19:35 PM GMT+8

2006 年 2 月 15 日 星期三 【晴】

今日成個日頭都留左係屋企，因為都要準備下夜晚見工既野．．．

今日見工都算順利啦，人地請唔請唔到我控制囉，因為我已經出晒力架喇，希望ok啦．．．

>>February 18, 2006 at 2:44:09 PM GMT+8

2006 年 2 月 14 日 星期二 【晴】

哈~ 今日同左大表哥，阿力，同埋佢地d朋友仔一齊出左去唱k同食飯．．．當然啦，梗係有人照我先至會去啦．．．有人照我先至有興趣去喇，其實我都唔係咁想識大表哥d朋友仔，大家都好似唔係咁o岩咀型咁啦，冇咩好講，大家咪講下笑咁囉，好快就咁過左一晚．．．

之後，佢地本來想叫我一齊同佢地聽晚去pub玩，其實我一來唔想夾住係中間，得一條友好怪o者，二來男友又唔係度陪我好悶既，三來係我唔多想同佢地去玩呢d地方囉，哈．．．不過點都好啦，佢地今個星期日走人架喇，希望可以盡人事同佢地多d玩下啦．．．

唔，聽日又要去見工喇，今次都要好好咁準備下先．．．聽日要努力呀！

>>February 18, 2006 at 2:42:54 PM GMT+8

2006 年 2 月 13 日 星期一 【暴雨】

今日係情人節，願祝各位有情人既終成扣肉，冇情人既快d搵個好既．．．

今日都冇咩特別，主要係去見工，一見就見左成三粒鐘囉．．．天呀，好悶囉，又要做筆試，又要見人，又要考打字．．．好煩．．．不過點都見完．．．後來返左屋企換衫再出街．．．

之後就同左男友去食飯行街睇戲．．．同平日冇咩唔同．．．初時我都有點兒唔開心架，點解過節唔係應該特別d架咩．．．後來，男友提醒左我，做人如果識得去享受同欣賞平凡，日日都可以係情人節．．．最後，男友佢真係鬼馬，send個手機msg比我，叫我睇下我張床度有份寶物係度．．．原來佢之前親我唔知道時將份禮物放左上去．．．哈，有個咁鬼馬既男友，有時都幾激死架，不過我鍾意呀！哈！

>>February 18, 2006 at 2:39:03 PM GMT+8

2006 年 2 月 12 日 星期日 【晴】

哈，今晚去左個中學同學既新居度，嘩，好正囉，真係好羨慕d人有錢買靚樓住，唉，有時候真係想問，點解自己冇咁好既濟遇既，如果識番個有錢男人，自己又有份人工高福利好既工，咁就真係好都冇得頂喇．．．唉，不過事與願違呢！

不過講真，做人最緊要係知足，唔好羨慕人咁多，最緊要係自己努力就得啦．．．

但係而家真係傷緊頭腦，下個月兩個朋友結婚呀，真係好傷囉．．．

唔，聽日又要去見工喇，今次我都好想可以成功呀．．．唉，唔通我真係又要走番社工呢行？

>>February 14, 2006 at 5:06:48 PM GMT+8