2009 年 11 月 2 日 星期一 【微冷】

今朝好凍，因為有個季後風從大陸吹黎香港．．．大陸果度，北京而家已經係零下兩度，而黑龍江更係零下廿四度．．．都唔知到時我地去果陣會係點既狀況喇，呵．．．

今日真係激氣，起身果陣無啦啦又喘喇，而且琴晚成晚都鼻塞．．．頂！真係好辛苦！最後，決定請SL，唉．．．好無奈！其實都唔想請，不過真係好爭扎後，都係請左，因為真係頂唔順吧．．．一直訓，訓到十二點先起身，A仔佢十一點幾出左門口了，我一個人在家，先做了點家務，之後都唔係好頂得順了，再吃了我的美味飯盒，跟住原本想繼續打掃，不過都係唔得，好喘好喘．．．可能太多毛塵了，最終放棄！

跟住，就獨自回屯門了．．．回到家，遇到媽媽，媽媽話過陣同我去睇醫生，所以我就在家訓左一陣，book左六點先至再睇醫生！睇完醫生，佢話我大傷風，所以引致我鼻塞同喘．．．唉，都唔知點解？我已經著好夠衫架啦，都可以病？唯一既可能，就係比病緊既妹妹傳染左囉，唉！今日成日既情況都反反覆覆咁，時好時壞！唉．．．今晚一定要好好的訓一覺，明天要返工了，唔可以懶吧！

>>November 4, 2009 at 5:00:07 AM GMT+8

2009 年 11 月 1 日 星期日 【微冷】

唉~ 今日都好唔舒服，可能係藥房配d藥唔得啦，個人好似成日都好wing咁，個胃又好唔舒服喎，可能d藥勁得滯卦．．．總知十分唔舒服！

不過，感恩的是．．．今日可以有時間處理左一點結婚的事，真係十分之好！係太好了．．．哈．．．又可以放下d工作喇，good~

唯一而家急於要快d買到廿五張美心餅卡，是關今日去問過美心，佢話如果我用八折既餅卡買結婚蛋糕會抵d．．．又係喎，佢真係識做生意喇，哈．．．最欣賞既係，佢唔係一味昆人囉，仲幫人諗下點樣先至至抵．．．但係，而家要急於搵人幫手用八折買廿五張餅卡呢．．．因為真係抵好多，平成二百蚊喎！急急呀．．．

而花球方面，已經處理好，好期待當日見到個花球既樣呀！係我至愛既白色同紫色花，主要用桔梗同繡球去整，愛佢地特別優雅，哈．．．加多$120可以當日朝早送埋貨上門，果然係”以金錢換取時間”！

另外，媽媽好好，已經幫我買左一套新既粉紅色睡衣，for我前一晚上頭時用的，而且仲買左一套全新的紅色床上套裝比我地，係一套頗傳統feel的，我都幾喜歡，希望A仔都同樣喜歡啦，因為係媽媽的一番心意吧．．．哈，記得要提醒A仔，鋪好新床單那一晚，不要訓上去，唔吉利架，當晚要佢在客房訓了，辛苦佢喇．．．哈！

姨媽近日從美國回來了，佢都好好，為了我結婚既事都協助左媽媽好多好多．．．而且佢特別為了我，訂造左一個鑽石十字架吊咀比我，因為佢一向都知道我想著婚紗時帶十字架，所以就有咁既安排．．．真係好感謝佢呀！我知佢一向都好錫我既．．．收到貨喇，個十字架真係好靚呀！而且都唔平呢，hehe~　我一定會在著婚紗時帶住佢的．．．

另外，媽媽都提議在佢保險箱內加埋我個名上去，方便第時我可以放我將收到既貴重飾物．．．因為要開一個都幾貴，個個月成千蚊，而家可以慳番了，呵！感激媽媽的安排！

總知，今天一整日都好感恩，除了．．．自己唔舒服以外吧，哈．．．

今晚去了元朗新居，見到好似成間屋反轉左咁，因為是關昨晚太大風了，吹到周圍都係塵，可怕到極點呢．．．今晚我都拎左好多野過去，主要係我d珍藏品啦，哈．．．剛擺放好了，太正吧．．．明天返三節，頂！

>>November 4, 2009 at 5:01:53 AM GMT+8

2009 年 10 月 31 日 星期六 【晴】

今日本來想訓多點架，不過最後都係比妹妹八點半個鬧鐘嘈醒左我，真係激氣．．．琴晚真係訓得唔好，可能同個雪梨有關吧，吃完就開始氣管唔太妥，唉．．．成晚都咳同喘，頂！最後都係八點九食左藥，之後再訓，一訓就九點九，比媽媽叫醒左，叫我落街食早餐．．．

今朝同左媽媽食左個幾heavy既早餐，有楓糖雞扒，蛋，多士．．．好飽！食完野，去左寵物店，幫波波貓買貓沙同貓糧．．．在寵物店內不斷聽到有貓貓叫，我一轉頭看，有隻大貓貓，應該是名種的，我聽到佢把聲好似好驚咁唔舒服咁，後來，發現佢原來左邊面傷左，仲不斷流出血水，一滴一滴咁．．．我當刻好心痛，見佢個樣好可憐，突然心知不妙，貓貓傷了，無理由去寵物店的，因為這裡唔可以醫到佢．．．唔通？佢主人帶佢黎要寵物店"bak"左佢？我當刻心中一寒，好擔心，好心痛．．．個寵物店職員聽到我同媽媽講話好心up，佢都唔回應我地，仲唔係擺明有點問題？唉．．．好為貓貓心傷，點解個主人要咁對佢？我覺得，只要願意去醫貓貓，貓貓一定冇事架，點解佢主人要咁樣對佢？我真係好嬲，點解會有d咁不負責任既主人架？呢d人係咪真係咁冷血架呢？唉．．．好心痛心up，我同媽媽都話好唔舒服！

之後返左屋企，我上網係咁睇d結婚花球，真係頭痛，我睇黎要搵一日出處理花球既事了，但係，真係唔知如何抽出時間囉，唉，好煩．．．點解咁忙？跟住爹地回來了，妹妹出左街，我地就去左飲茶，今餐我請，都幾抵，百三蚊三個人，ok丫．．．跟住，我地四圍行，買送睇野．．．本來想去美心買個魔鬼蛋糕食，因為媽媽話好想食，點知又賣晒．．．點解咁好賣架，都唔知係唔係架！

今日，妹妹提起佢同d朋友想夾份攪年宵．．．不過，我問多幾問，發現呢班小朋友一d marketing sense都冇，都唔知點可以做生意？佢地真係太天真了，咩都好似冇諗清楚，一心就話要衝，要試．．．唉！而家既青年人就係咁囉，真係冇眼睇．．．

今晚終於的起左心肝，去執左好多野，pack定一點準備拎去新居既野．．．執左好耐呀，好累！後來，妹妹突然提起問我有冇拎走埋我至愛既歌星既CD同casette時，我突然發現d帶好似唔見晒囉，其中仲要有鄭伊健第一隻出既帶囉，唉．．．好心傷呀，即時喊左出黎，因為真係我既珍藏，點解會唔見左．．．後來知道，原來係之前換電視櫃時，應該唔知係爹地定係媽咪佢掉左．．．我當刻真係想打人，好唔開心！爹地仲要話我小朋友！喂，大佬，如果我整唔見佢一d好珍惜既野時，佢又會點呀？所以，今日心情到而家都唔太好，唉．．．好嬲呀！

>>November 1, 2009 at 2:52:26 PM GMT+8

2009 年 10 月 30 日 星期五 【晴】

今日係萬聖節，不過一點氣氛都感受唔到．．．可能真係冇時間去感受吧．．．過往都會有時出去玩下，承機可以癲番一晚．．．不過而家可能人大左卦，所以都冇話特別咁在意呢d節日囉！

今日返工都幾忙，因為好多case要見呀，仲見到去兩點二添．．．今日原本係上兩點堂，但係我都放兩點啦，都預左遲到，最後，三點先去到上堂地點，是關我見完case，仲要陪個同事攪掂埋d手尾，再一齊去上堂．．．今日，同事講左一個唔應該比我知既秘密我知，件事係關乎於公司對於我既看法同地位問題．．．其實，我對於件事都唔係覺太shock，亦唔覺真係太唔fair，不過，都有點唔太開心咁啦．．．但係，算吧，我呢類既短期合約員工，有冇得繼續都未知知數，人地點會咁重點去栽培我丫．．．唉！明白既．．．

上完堂都已經六點半了，真係好累，望出去，天都黑晒喇．．．之後打比好姊妹，佢都話剛收工，不過，因為當刻我仲係筲箕灣，所以大家都決定今晚唔整野住喇，因為大家都好累了，所以再約下星期日吧！唉，時間已經越來越迫近了，好似好多野都未做咁，好忙好忙呀．．．點解架？！就死喇．．．唉．．．而且，考試又迫近了，要開始溫習了，要開始同同學夾夾練習了，真係唔知點夾，大家都咁忙，唉．．．想死呀！今次考試並唔簡單．．真係希望可以成功同順利啦．．．

之後，帶住疲累既我返屋企．．．最後決定唔搭962，搭左港鐵港島線再轉東涌線再轉荃灣線，跟住係荃灣輕輕行左一陣，再搭巴士走．．．好似轉來轉去，不過，都感覺幾好．．．有時為自己生活帶點不同都係一個唔錯既感覺，可能真係搭得太多962了，哈．．．

今晚在家吃飯，得我同爸媽．．．食完飯太累了，最後都十一點幾決定訓了．．．明天偷懶，不返教會了，好想好好抖下吧．．．明天要什麼都唔做呢，哈．．．

>>November 1, 2009 at 2:38:18 PM GMT+8

2009 年 10 月 29 日 星期四 【晴】

今日係學校工作，叫做可以鬆一鬆吧．．．不過，都沒有做過什麼特別野，哈，都係relax當中！可能近日太多野做了，而且個人好累，所以真係想比自己停一停先，如果唔係，我真係會崩潰的吧，哈．．．

食完lunch之後，出左去行左一陣，順手去買番之前唔見左既花邊橡筋，用作將襟花改為手花之用．．．跟住下午就有兩個畢左業既學生返黎探我，都幾開心呀！之後就趕住去上堂，班中七這科都有問起我關於佢地12月會做功展會，唔知賣乜野好？！發覺近排好多人都打算做什麼年宵呢類既野，好想有所發揮下咁．．．都好既，拎下經驗都係好事．．．我有錢既都想玩囉！

放工之後，即時趕返屋企，之後好快咁食左個麥記，就趕住出門口去灣仔返學．．．真係激死，我本來等962，遠遠已經見到佢黎緊，咁佢前面有另一架九巴埋站，照理佢係會係架九巴後面等埋站，點知我一望，突然唔見左架962，幾秒間，見到佢係架九巴隔離走左出黎，係完全冇埋站既意思咁囉．．．我當時好激氣，睇住佢走左．．．我果刻真係好想打去城巴度投訴，有乜理由可以咁樣架？我最後要等多15分鐘，而且仲要係962x，頂．．．最後遲左15分鐘到囉！

今日上堂終於試左用英文去講，其實講方面問題不太大既，不過真係一定要熟練囉．．．真係要加把勁喇．．．

返到屋企十一點半了，好累好累．．．想起明天又要返工，之後仲要返學，跟住再要入青衣去好姊妹度，我真係有點想死既感覺．．．願主祝福我吧！

>>November 1, 2009 at 2:26:06 PM GMT+8

2009 年 10 月 28 日 星期三 【晴】

今日工作比之前再清閒一點，真係感恩，哈．．．不過就唔可以好似以前係學校咁，輕鬆去做自己既野．．．哈．．．

今日食lunch既時間，用左半個鐘去做左一件事，就係幫親左中心既按摩服務！半個鐘頭頸肩，$59．．．我覺都值，因為真係唔錯，個師傅叫阿得姐，佢都幾有經驗，而且都幾快了解到我既狀況！唯一係．．．佢會無啦啦做做下會停左手，同隔離既阿姐傾計，哈．．．佢雖然係多野講，不過氣氛就會好點囉，我都覺可以接受既！當幫自己中心撐下檔啦，哈．．．最重要係，我做完係覺d硬到爆既骨頭係鬆了一點，只係一點，不過已經好好了，哈．．．因為我真係玟到好似機械人咁，佢幫我做時都話我真係雯到爆！我都打算之後可以再做，都係搵番呢個阿姐，希望可以整番好個頸肩位去．．．

做完之後真係好relax，真係想唔返工呢，哈．．．不過當然唔可以啦！好在下午工作清閒，哈，冇咩做，可以抖下，hea下．．．不過見到同事多野做到飛起時，好似有點無奈！

放工就走人回元朗，今日原來A仔交樓了，舊樓正式交比新屋主了！正所謂，舊既唔去，新既唔黎架嘛，所以係值得高興既事．．．之後我地去左食飯，去左泰國人海南雞．．．我第一次食咋，都OK好食，而且都抵食既，係個椰青汁唔抵囉．．．都可以同屋企人去試下食！

跟住同A仔係惠康運左2次吉，哈，發生咩事？唔好提了．．．不過最後都係惠康完成任務，明天會送貨黎喇．．．是關跟住幾個星期都會有朋友黎新居度玩，所以要準備好多野．．．買完野就回家了！今晚難得可以早點訓，應該12點前可以訓了，太好喇．．．GOOD~

>>October 30, 2009 at 2:54:46 AM GMT+8

2009 年 10 月 27 日 星期二 【晴】

今日好眼訓呀，琴日太夜訓了，唉．．．個眼圈同眼袋大到丫，哈．．．真係好多野要做，尤其係私人事，結婚既野真係多到嘔．．．點解仲有咁多野要做？

今日係中心繼續忙，不過已經冇之前咁忙，都係好事！尤其琴日因為發生左一件事，而令我工作又可以做少一點，真係．．．可以講一句感恩！但係確實又係我個人既疏忽而導致，所以都好矛盾！因為實在有點吃不消，唔推咁點野做真係唔得呢．．．

wedding卡果度決定左間printing公司，而家好貴，要成$3700，唉．．．一世人一次，真係想做得好好地，又唔想太求其，不過又知道d人通常收到卡後都會掉埋一邊，所以好矛盾！但係A仔又話OK，所以我都OK啦．．．

今日放工之後就繼續忙，真係唔知點解？我先去荔枝角等妹妹，佢因為未放得工，所以就比左D菲林我，之後我就一個人去左深水步，去左東昇晒相，順手睇下HOLGA既配件！最後幾百蚊落樓，好傷好傷．．．係東昇晒相真係貴，不過，因為人地會幫我執相，所以都值既．．．而且，個FISH EYE好期待可以用，同埋以後都唔再用120，晒相太貴了．．．跟住JOIN番妹妹，一齊去左葵芳，妹妹想睇衫，所以陪左佢去．．．我地去左食米線，食完就行，大家都冇咩收獲，我只係買左一件好平既衫同耳環！

十點半就返到去了，跟住衫都未換，就比媽媽吹住要我整部電腦，話已經兩日冇機用咁話．．．唉，真係可憐！已經累到要死，都仲要整野．．．好在，過程十分順利，電腦好乖仔比我重裝番個WINDOW，而家上得番網喇，太好了，好感恩！終於可以訓了．．．

>>October 30, 2009 at 2:38:36 AM GMT+8

2009 年 10 月 26 日 星期一 【晴】

wow，今日返三節，而且真係忙到飛起，由朝到晚，好似冇停過咁呀．．．幸好，夜晚時間真係可以靜到一靜，做番自己野．．．

今日終於firm到print我地張wedding卡既事喇，真係感恩．．．時間計計下真係好迫，希望真係可以在預期內完成啦．．．是關我14/11要派第一批卡了，真係令人擔心呀！不過，真係要讚一讚妹妹，佢都算係跟進得不錯，我相信呢次都係對佢一個好好既訓練！哈．．．

放工都即時走人，因為真係太累了，好像係行屍走肉咁．．．返到去，發現部電腦死左，應該係中左毒了．．．唉．．．又要搵時間整了，好痛苦呢．．．點解要呢個時間壞架？！

>>October 30, 2009 at 2:28:55 AM GMT+8

2009 年 10 月 25 日 星期日 【晴】

哈，今日係重陽，但係我地冇選擇到登高，反而係下海．．．我地舉家去左大澳，由屯門出發，都要一粒鐘零四個字船程，係慢船．．．不過，過程好正！我地今早搭十點八船，去到十二點，時間真係好！

我地周圍行，仲食出名既茶果，good~ 我地今次行程行左好多平日我都冇行過既地方，因為以往黎親都總係走馬看花咁，都係行下d主要既大街，好少行到咁深入．．．今次唔同了，時間十分充足，可以行到好多地方！爹地今日都要帶相機去映相，今次係一個好好機會比我地跟下爹地佢偷下師了，呵．．．妹妹同我都帶左好多相機黎，我帶左我部holga同埋一部菲林傻瓜機；妹妹帶左佢部diana mini同G10．．．真係好論盡，用菲林相機唯一一樣就係麻煩在要轉菲林，哈．．．不過都係好enjoy既．．．

我地最後搭五點船走，走之前都去左食個豆花，好正．．．幸好，今日天氣都好好，唔太熱，又有太陽，唔錯！唯一係都多煙霞！好期待出黎既相係好呀．．．有排都未有時間去晒相，好想快d睇到．．．映菲林相就係有樣咁既期待既感覺，所以對於我呢d一向都急進既人就好慘，要等了又等，哈．．．都好既，要學習等待同忍耐！係一個好好既磨練！

返到屯門，大家都覺肚餓，索性食埋野先返家．．．去左滾滾紅茶度食，好正．．．之後大家都帶住疲乏既身體回家！想起明天還要返工，真係還未回魂似的，呵．．．明天仲係三節，how come？！

>>October 30, 2009 at 2:22:10 AM GMT+8

2009 年 10 月 24 日 星期六 【晴】

今日好乖，好早就起左身，準備出發返教會．．．我今日要負責做司事呀，所以一定要早返去啦．．．我九點鐘就出門口喇，點知十點鬆d就出到去銅鑼灣，真係快呀！我今朝都係先搭小巴出去元朗市中心，之後再轉968咋．．．不過968就冇位坐，而我剛好今天又姨媽到妨第二天，所以累到爆，個肚又痛喎，最後都係核核突突咁坐左係樓梯囉，哈．．．不過都好既，可以坐下，食下我既早餐，哈．．．去到上環終於先至有位可以坐下，真係pat都平埋，哈．．．

因為見太早返到去，所以就去左watson's行左陣，點知就差點忘了時間，十點半先返到去，哈．．．但係妹妹同爹地都未到囉，又係妹妹遲大到，唉．．．今日我同妹妹都有份做司事呢！完左崇拜之後，幫手數完錢，我地就去左我地既飯堂，別府，度食野．．．今餐又係好豐富，因為有$50既coupon嘛，哈．．．之後，我同妹妹同爹地分手，佢有佢去ikea買野，我同妹妹就行街街．．．

同妹妹行左好多地方，又銅鑼灣，又尖沙咀，又深水步．．．傻架．．．為左就係陪妹妹係去旅行既裝備而行囉．．．真係辛苦！已經好累，條腰累到爆，仲要行．．．真係想死！不過，係好開心既．．．本來去深水步，就係想為左我部holga裝身，想買個fish eye同120轉135既adpater，點知東昇呢間野原來係咁寸既，逢星期日同公眾假係唔開架，所以即係明天都唔會開！真係失望．．．仲想聽日可以玩添．．．

我地全家決定，明天一齊去大澳一日遊，而我同妹妹都裝備十足，打算去黎個攝影日！yeah~ 真係好期待呢．．．明天要早船呀，真係覺得放假都係好累下！

>>October 30, 2009 at 2:14:37 AM GMT+8