2009 年 3 月 26 日 星期四 【綿綿細雨】

今日係媽咪生日呀，在此祝佢生日快樂！身體健康！青春常駐！恭喜恭喜．．．

今日係學校都冇咩特別野做，都係做埋d無聊野咁，呵呵．．．放工之後，就即時回家了，因為今日係媽咪生日，想早點回家陪佢嘛．．．回到家，等左一陣，我地就一齊落樓，去左商場買左野，跟住再去山葵度食日本野．．．我地七點就去到，好彩仲有好多位，唔洗等咋！即是叫左野食，妹妹就七點半先黎到！今餐好豐富，好飽呀，都食唔晒，所以順手打包番去比爹地食！

頭先收到A仔既電話，知道佢唔係好舒服，可能凍親喇，真係肉痛死我喇．．．希望佢冇事啦，快點好番呀！豬豬．．．

>>March 27, 2009 at 3:29:32 PM GMT+8

2009 年 3 月 25 日 星期三 【陰】

今日係學校都好free，因為冇咩特別野做．．．主要都係做私人野啦，呵呵．．．今日好努力呀，係咁計來計去，都係計緊我結婚既野．．．例如，想邀請既人數啦，餅卡啦，邀請卡數目啦，派既利是數目同數額啦．．．好煩呀！頭都痛埋呢．．．一整日係學校都攪唔掂，最後返到屋企都繼續努埋佢，而家終於完成左喇，good~

放工之後去左東海堂買蛋糕，是關明天係媽媽生日，而妹妹就後日生日！咁妹妹又話聽晚唔得閒喎，後晚又話正日約左人喎，所以今晚應該係最齊人架喇，特登買蛋糕去佢地慶祝啦！買左個芒果流沙蛋糕，希望好味啦，因為知媽媽愛芒果丫嘛！返來屋企之後同左阿哥傾msn，之後佢又話今晚入埋黎切蛋糕，話比媽咪一個驚喜咁話．．．．我就唔係唔驚喜係蒼嚇喇，哈哈！

A仔就好啦，聽日同後日都放假，好羨慕呀！今日我好煩惱，一來計自己既野煩，二來因為公司發生左一點事，而令到我好麻煩．．．今次比個上司"線"左一鑊喇．．．唉！唔憤氣！不過算啦，揹鑊都係我呢D細既黎啦．．．一個講A一個講B，想知呀？咁即係無論咩答案，我都係死路一條囉！簡單！不過幸好，頂頭上司十分明白同體諒，佢話唔洗我補鑊架，不過，我自己都唔好意思，亦都唔想比人有話柄啦，所以我都會光明正大的補鑊！

>>March 26, 2009 at 4:10:09 PM GMT+8

2009 年 3 月 24 日 星期二 【乍寒還暖】

今日係學校度都冇咩特別野做，都係做好多私人既工作，哈哈．．．放工後就去左接A仔放工．．．見到佢一笑輕鬆的走出來，都知道應該是心情好了一點，我都安樂d啦．．．真係如我所料，佢話琴晚成晚都囉囉luen咁，個腦轉來轉去都係工作，又訓唔到覺，最後訓左兩個鐘！今朝返到中心就即刻做野，點知出奇地好順利，好多野都可以迎刃而解！當然，我都恭喜佢啦，因為本來佢以為今晚放早都仲要開ot架嘛，而家可以有時間陪我喇，我梗係高興架啦，呵呵．．．

而我都話比A仔知，即使佢幾唔順利都好，背後都總會有個人支持佢，幫助佢．．．當然，呢個就係我地既主！真係感謝主，我知佢一直都係在我地身邊，我知道主一直都安排我地一切，讓我地在當中感受同學習，感謝你．．．

本來打算同A仔返元朗出街食飯既，不過後來都決定回家吃飯．．．今餐由A仔主理．．．好味！食完之後都知道A仔好累了，因為佢琴晚冇點訓過．．．所以．．．今晚大家都早點訓啦，哈哈．．．

>>March 26, 2009 at 1:50:07 AM GMT+8

2009 年 3 月 23 日 星期一 【颱風】

wow~ 今朝十分恐怕，一朝早起身望出個窗，只係見到黑黑一片，我仲以為當時係夜晚八點添呀，真係黑到丫！起身之後唔洗十分鐘就落起大雨黎，仲行雷閃電添，好可怕！我正正係正最大雨既時間出門口！一上車，已經心知不妙，因為架車未入屯門公路口已經開始塞．．．頂！最後咪返到去中心十點一囉，遲左五分鐘！好在，我平時搭呢班車返到灣仔都係九點七八度，今次就塞左半粒鐘，所以都失手遲到！

今朝得我同另一位ya同事工作，所以好輕鬆！大家有講有笑咁．．．我就準備下午去筲箕灣教展翅既教材．．．本來今朝約左個青見case見，但係呢個人又再次失約，真係有點討厭！計劃下次打比佢時會話佢再唔黎我就當佢自動放棄參加青見！十二點半就食lunch了，因為趕時間，好在今日有帶飯，時間好掌握d．．．食完飯都係十二點十，好快，所以執好野都計劃出門口了，因為怕落雨同埋要買定d小禮物比一陣d展翅學生！因為聽聞今次呢班唔好教！

去到筲箕灣中心，我發現果度既同事對於電腦既認識真係唔多，幫我set機都set左好耐，又唔多helpful，真係．．．唔知講咩好！好在後來有個比較幫到手既女仔出現，佢都幾nice！呢班又冇同事今朝講得咁差丫，我覺得一班or仔黎講算係唔差，真係架喎，我覺佢地都算比面我，都算幾聽話丫．．．唔知點解同事講到咁差？哈．．．可能我見慣呢類型既細路卦！

今日四點十就完左個堂了，真係好，承機可以早少少．．．去埋個廁所都走人了，當時只係剛好五點鬆d．．．不過筲箕灣都咪話唔遠，我後來搭地鐵去到金鐘再轉962x返屋企，去到金鐘時太肚餓了，之後好放縱地比自己食左個火腿芝士包同shake雞扒．．．肥死喇！所以返到屋企，hea左陣，飯都唔敢食得太多，哈．．．

今晚接到A仔既電話，知道佢工作上十分唔順利同如意！我知佢而家好心煩！但係．．．有時候我地都要知道，神要安排我地唔順利，或許其實都想話我地知，我地諗得好ideal既野，或者一路做緊既野係唔work或者唔好的．．．冇既，從失敗中學習吧！只要你知道，失敗是成功的其中一環，亦都係必經既時候，失敗又是什麼一回事？無可否認，我都好擔心A仔近日既情況．．．唯有的是．．．為佢祈禱！

我知道，A仔而家係好需要有人係佢身邊支持佢，為佢打氣加油的．．．我願意做呢個角色！．．．

>>March 25, 2009 at 5:42:47 AM GMT+8

2009 年 3 月 22 日 星期日 【微雨】

今日d天氣都係同樣古古怪怪咁，一朝早就好大霧，之後我返到去學校門口無啦啦有少少毛毛雨，過後唔洗五分鐘就無啦啦落雨，落完雨之後竟然出太陽．．．唔知個天想點？攪到人既心情都大起大落咁．．．

今朝好眼訓呀，因為琴晚夜訓呀，所以今朝都做野唔起勁！到左十二點幾接到A仔電話後，先至好少少精神，哈．．．今日我既LUNCH好豐富，分別有琴日係十蚊店買既烏冬，仲有麥記既SHAKE SHAKE雞扒，同埋一盒腐乳通菜．．．好飽呀，仲好味！我今日決定左，由今日開始，要好好實行我既減肥行動！先係朝早食一個紅蘋果做早餐，之後再飲一杯麥皮！每日亦都KEEP住做運動，包括專門減手臂同肚腩既運動！同埋，回家後要做呼拉圈，不過就唔係日日做！仲有，好想KEEP住一個星期去做一次GYM，不過唔知得唔得？！不過．．．今次要努力同堅持！為左靚，為左身體好，一定要做得到！！

放工之後好累呀，好在五點半就回到家，吃了個龜零膏，係許留山的，之後買野飲時送左張COUPON話$12個細既，所以咪試下囉，點知．．．嘩，超苦，味道怪怪的！好似麻麻地，未必再食了！都係海天堂果D正常少少，哈！跟住好眼訓呀，上左床訓，訓到食飯先起身．．．真係正！

>>March 23, 2009 at 2:50:00 PM GMT+8

2009 年 3 月 21 日 星期六 【陰】

今日d天氣怪怪咁，一時落毛毛雨，一時又熱到死死下．．．好鬼死辛苦！今朝十二點幾出門口，搭西鐵去到荃灣西，之後沿住公園行過去海濱花園，點知，爹地媽咪二舅舅佢地都未到，所以我一個人上左去商場諗住搵廁所同行下，點知未搵到廁所前就去左"屈銀紙"度行，買左盒平野，好立克營與美五包裝，只係$9.9．．．跟住出番黎竟然撞到ed文表哥，所以同左佢一齊搵廁所，跟住d大人先至到．．．

好經辛苦行到上去墳場，嘩．．．今日都唔少人黎，仲要撞正我地隔離黎左一個大家庭，果度有成廿人，佢地點d香又多又大枝，真係煙到丫．．．想死！佢地仲衰到好似開大食會咁，一人一枝牙籤，擺晒d什麼燒肉呀雞呀，個個係咁輪住吉黎食．．．但係佢地又冇諗過呢個行為係好阻住人囉！攪掂之後，我地行左去悅來，即係熊貓酒店果頭飲茶！果酒樓既服務好差，真係唔怪之得佢又細間左！食完之後同屋企人四圍行，之後約左好姊妹愛麗斯！

我地係十蚊店度行，買左好多野，好開心！之後一齊返去青衣佢屋企！原來佢男友小強已經回到家喇，我地就諗食乜好，之後就決定屋企有乜就整乜．．．小強負責做大廚，我同好姊妹就係度計劃我婚禮既裝飾物資如何運用！好開心，大概都已經定到可以點運用d材料喇，真係多謝好姊妹！佢真係幫左我唔少！所以，佢封大利是一定唔可以少！

跟住食飯，小強整左個魚片粥，好正好鮮！好勁呀！男仔識煮野食真係好勁！勁我好多好多呢，呵呵！大家邊食邊傾計，仲同moc moc玩，moc moc佢好痴纏，成日都傻左咁，好攪笑！好好笑！妹妹話我做乜唔同moc映相，因為佢都好掛住moc！十點走人了，回到屯門已是十一點二，好累了．．．明天仲要返早呢．．．

>>March 23, 2009 at 2:49:38 AM GMT+8

2009 年 3 月 20 日 星期五 【晴】

真好，今朝係A仔度出發，可以晏少少先至出門口，又可以訓多少少喇，所以今日都精神D既，YEAH~

今日忙呀，主要見青見既CASE，見完仲要做個展翅教班既POWERPOINT呀，所以時間過得好快！今日突然間知道左有兩個同事將要離職，感覺好古怪！一個就你已經係度做左五六年既人，原本係我TEAM LEADER；一個係DEGREE既同事因唔想再做SWA而轉工．．．其實，對我黎講唔太大感覺，可能．．．其實大家根本都唔太認識吧！好像有點冷淡，不過卻是事實！

放工後一個人去了旺角．．．先係油麻地落車，去左吉野家度食，好似好耐冇食過了，本來想食下午茶，點知今日要三點先至有，所以無奈要食正餐！食完之後就開始今日既任務，就係買生日禮物比媽媽同妹妹喇．．．媽媽果份唔難諗呀，反而係妹妹果份先麻煩，因為佢份人比較奄尖！好在，最後我都買齊兩份禮物，可以成功五點半前完成！跟住就回屯門了．．．

回到去即時送左份禮物比媽媽同妹妹，佢地都好鍾意，真係好喇！我買左個羊仔皮手袋比媽媽，成千蚊架！而妹妹就送左一個京皮袋同一條SCRAF．．．佢地都喜歡，真係好！

之後夜晚出去食飯，爹地佢病到死死下，我地個個都怕比佢傳染呢，哈哈．．．食完飯，我就過左A仔度！明天要一個人出去荃灣JOIN屋企人，因為明天會去拜山呢！跟住夜晚就去好姊妹愛麗斯度喇，好開心呀！

>>March 21, 2009 at 5:29:28 PM GMT+8

2009 年 3 月 19 日 星期四 【晴】

今日係學校都幾忙，因為要準備定下星期展翅課程內容．．．咁就攪左一日喇！幸好都好順利完成！

lunch今日同左媽咪and妹妹食，又係去左上海婆婆食．．．因為妹妹今日要去醫院做檢查，所以完左就黎搵我食飯啦，食得好飽好豐富呢！跟住大家就行左陣街，之後我都要返學校了！返到去．．．hehe，2點半了，好似有點過份呢！

放工後都即時回家了，因為都好想快回家！我食完飯之後，又去左A仔度了，因為佢近日放假，所以多左時間可以陪下大家啦．．．

>>March 21, 2009 at 5:21:56 PM GMT+8

2009 年 3 月 18 日 星期三 【微雨】

琴日發生左一d不愉快既事，所以．．．唔想再提了，決定唔再寫琴日既事！總知就係，老朋友再來探我，每次我忍一忍尿佢就會出現既．．．尿道炎！唔喜歡呢個朋友，因為佢，令我發生左件唔開心既事，攪到大家都好唔開心，影響實在太多了！好討厭這個老朋友，希望佢快點離我而去．．．

今日工作都尚算幾順利，下午攪個活動好在有個好有經驗既阿sir係度，又認識左一個勁人，真係幸福！

放工後都好累，因為食左藥既關係．．．今朝，一個人係房度，食左藥之後真係好眼訓，所以偷偷訓左半粒鐘，hehe~ 頭先，同A仔有爭執黎，唉，為左一件我做得好錯既事．．．不過算啦，大家答應再唔會再提，唔想再令大家唔開心！

點都好，多謝A仔原諒，亦都感謝神！

>>March 19, 2009 at 2:47:35 PM GMT+8

2009 年 3 月 16 日 星期一 【晴】

今日因為有野要做，所以返學校而唔洗返灣仔，真係good呀~ 今朝都唔太願起身，好累呀！不過幸好琴晚都訓得唔錯啦！空氣流通d，真係人都精神d架！

今朝都係度準備今日下午中四活動既野，不過都好快攪掂喇，因為都已經係架輕就熟了，呵呵！下午食完飯，快手去市中心，因為琴日同媽媽去買衫時，返到屋企發現有件衫冇拆個防盜器喎，但係唔知點解走果陣個防盜冇叫囉，好奇怪！唔通係假既，哈哈？所以就拎番件衫去拆個防盜！攪掂之後去左萬寧行，終於買得番之前買比A仔盒朱古力喇，我呢兩日係置樂搵極都搵唔到呢，真係好賣呀！哈．．．

下午個活動算係順利啦，呢班友仔係我預期之內咁曳，所以都已經估計到個情況，所以．．．都會覺得尚算順利，至少佢地都有比下面，留晒全場！哈．．．完左之後好累，因為冇咪用，要同佢地鬥大聲，真係聲都沙埋．．．星期四仲有一次活動，諗緊用唔用咪好，是關同個阿SIR傾開計都話，用咪同佢地鬥大聲都未必有用，其實我都好同意呀！

放工之後即時回家了，因為累了，好想快點回到家中！明晚會約A仔，同佢一齊去探佢個阿公，因為佢早前入左醫院！希望佢早日康復啦！

>>March 17, 2009 at 2:26:25 PM GMT+8