2009 年 7 月 19 日 星期日 【晴】

今日好慘，因為琴晚成晚都喘，無啦啦的，今朝都繼續喘，所以辛苦左一日，想死．．．最後，連本來計劃既gym都冇去做了，因為怕做做下發作嘛，所以都係在家自行運動了．．．

今朝起身磅一磅，真係天大既喜訊，我只得95磅，嘩哈哈．．．我真係冇眼花，磅左兩次都係！真係感恩囉．．．我辛苦左一個月有多，終於有點成果！不過，衰在，今日食左個好豐富既早餐，我估都有成800有多既卡路里，下午果餐又食得好多，所以．．．真係冇眼睇，睇黎呢個95磅應該都只係過眼雲煙罷了．．．哈．．．七點幾時再磅一磅，重左磅幾，不過當時仲未食晚餐，所以．．．好灰了，呵．．．

到左晚餐，我都唔敢食太多，d飯只有一啖仔，唯有食菜，另外食了好多魚．．．希望．．．聽朝仍然會有奇蹟出現，可以回復番去95磅啦．．．嗚！我要加油努力！而家食左藥，氣喘問題好了好多了，真係感恩！決定明天要去玩一堂kick-boxing．．．好激氣，唯一星期二可以在5:30上既kick-boxing，我都好難先可以上，因為幸好明天在學校返，如果在中心，跟本係冇可能既事，更加既係，我而家隔個星期二返三節囉，所以．．．好失望．．．明天，只係試玩人生的第一次，可能亦會係最後一次．．．嗚！一向好想學kick-boxing，仲以為今次join左physical就有機會添，點知．．．激死！

我要呢餘下既時間都要努力keep，唔可以氣餒！要加油呀！

>>July 20, 2009 at 1:47:18 PM GMT+8

2009 年 7 月 18 日 星期六 【綿綿細雨】

哈，琴晚真係吹到彭彭聲呀，我成晚唔係好訓度，因為1) A仔佢訓正係床中間，仲要D鼻寒好勁，我比佢騷擾左好耐都訓唔到；2) 鼻敏感發作，令氣喘有點都同時發作；3) 琴晚D風吹得好勁，A仔屋企仲吹到正，西北丫嘛，所以成晚都好嘈，訓唔到．．．唉！

今朝都九點幾十點醒左了，A仔都九點幾起左身了，話我唔記得拉廉光醒左佢！我都唔想架，我點知今日會個天光番冇雨落呢．．．之後，成個朝早同上半下午時間都係屋企渡過，到左四點幾先同左A仔出去行左街，買左D野．．．我地琴日難得係屋企，可以一次過傾左好多結婚既野，定左好多時間同日子，仲睇定身體檢查既資料等．．．所以今日特登出去買d物資咁啦，真係好開心，又可以同A仔一齊做多左少少野喇．．．

行完我就回屯門了，今餐爹地煮飯，因為媽媽今日先至旅行返黎，妹妹琴日又去左深圳玩，哈．．．所以爹地呢兩日家中冇人，十分梳乎．．．

今晚睇果超級巨聲，哈，媽媽話，我應該去參加．．．哈，我都曾經諗過，不過算吧啦，歌聲條路唔係咁易行既，都係安安份份做番社工好喇，呵．．．A仔都有個clt去左參加，仲差d入到圍，進身30名內，唉．．．都係太緊張了！希望佢可以繼續加油，走佢歌唱既路啦．．．

>>July 20, 2009 at 1:38:17 PM GMT+8

2009 年 7 月 17 日 星期五 【驟雨】

唉~ 今晚有8號同9號風球囉．．．今朝訓到十一點幾起身，之後都係整日留在家中陪住A仔，加上初時怕天氣差，所以取消了往中大遊遊既節目，唉，好失望呀！悶左一日．．．

不過，我都冇浪費時間架，承著時間就去傾結婚既野．．．同A仔傾左好多野，仲定左好多野，真係好事呀．．．聽日仲會去買D物資添．．．今日我地仲決定去家計會度婚前檢查，我可能都會打埋子宮頸癌疫苗！因為家計會平好多呀！我仲點左好多婚禮用物資既數目，好在好多野都應該夠數，真係感恩！同時，都感謝神，在過程中，我地好能夠互相配合，好順利咁計劃同傾好我地既工作，感謝主呀！

到左夜晚，A仔有個男同事入左黎同佢傾工事，本來都仲有個女同事既，不過後來佢有點事黎唔到．．．我就負責整野比佢地食，我炒左米粉過佢地食，好在都食得落肚，哈．．．傾完都已經係十點零了，送了朋友走，因為怕太夜掛更高風球時走唔到切．．．點知，就係十一點半掛左八號了．．．

妹妹今日同左D朋友上深圳玩2日，都唔知佢點呢，佢份人，一講玩，就算地球會爆炸佢都會去．．．唉．．．好似大唔透咁，真係令人擔心！不過，有時候都要放佢出去碰下釘先得既，做家姐真係好無奈！

>>July 20, 2009 at 1:40:59 PM GMT+8

2009 年 7 月 16 日 星期四 【微雨】

嘩~ 今日係學校都冇咩特別，放工後回了屋企，安頓好波波後，就入元朗，係西鐵站join左A仔．．．返到去元朗，叫左外賣返黎食，A仔就好努力咁執野，佢真係好多野，嚇死！

媽媽今朝一早出發，開始佢三日兩夜既旅行．．．今次佢又去潮汕了．．．我都興趣不大，曾去過一次，我覺都已經夠了．．．聽A仔講佢今次個交流團都好順利，而且D人都好好，其中有幾個仲係佢師妹添，哈．．．佢順順利利就好了，而且病左果位同事都好番好多，真係感謝主！腸番佢映既相同短片，真係羨慕，因為，我都好想好想好想．．．去旅行呀！！HOW COME？冇假放既日子好苦呢！．．．．

跟座日兩日都會有雨有打風，咁就冇左個假期，好灰！

>>July 20, 2009 at 1:34:46 PM GMT+8

2009 年 7 月 15 日 星期三 【晴】

嘩~ 好熱呀，今日收到消息話，星期日可能會打風．．．唉，真係衰．．．星期一先打唔得既，係要星期日！難得既假期冇左喇．．．頂！

今日放工早左15分鐘走人，哈．．．因為要趕去physical上跳aerobic．．．佢5:30開堂，但係知道一定唔夠d師奶爭拎籌，所以要早點去到．．．5點唔夠就去到，拎籌已經係第28個位了，痴線架，一班好似得30個位囉，都唔知點解咁快冇晒．．．都唔知係咪d人一早拎定架？！拎左籌之後，就去左換衫，係更衣室坐下睇下野咁．．．5點15分就出左去"拉登"(拉筋)，拉到去5點28分就等入場．．．

個aerobic阿sir都幾好，佢身型都好fit，而且好識攪氣氛，佢都有好多師奶fans的，哈．．．個班裡面有一半以上都係師奶，不過佢地都跟得好貼架，可能都跟得個阿sir耐啦．．．我呢d第一次去既，都係企係最後o岩架喇，嘩，如果跟唔上都唔會咁樣衰丫嘛！哈．．．嘩，真係好氣喘，今日學左一隻舞，完整一隻，係用aaron kwok既"對你愛不完"既音樂！當然，大部分舞步係阿sir自己再編過，而小部分就跟番原裝既跳．．．哈．．．不過係用aaron既歌，所以跳得特別起勁！一開頭仲用左MJ既歌做warm up，好high，因為近排自己愛上聽MJ既歌，而且食飯剛聽完黎，YEAH~ 好HIGH！

跳完都流左好多汗，不過始終唔及玩跑步機／AIR-WALKER呢d流得多．．．但係都已經跳到成面係汗囉，哈．．．不過，跳完唔記得"拉登"，係當我入左更衣室，入左浴室除左衫時先記得，哈．．．所以算吧！返屋企先自己拉啦！好爽，steam埋同敷埋mask，good~

返到屋企好肚餓了．．．狂食！食啦，發覺唔多掂，因為去做運動前，我諗住食定d野一陣先有力做運動，而且唔洗之後食咁多野，點知發覺係唔work的，我呢2日做運動前都會食個朱仔包，今日仲死，仲飲多盒豆漿添．．．返到屋企同樣好餓，狂食．．．返到屋企磅，頂，好似仲重番囉．．．唔得，之後唔可以運動前食野，同埋運動後都唔可以食太多！運動完胃口好左，而且吸收一定好左，所以．．．要切記注意！！

>>July 17, 2009 at 3:06:15 AM GMT+8

2009 年 7 月 15 日 星期三 【綿綿細雨】

yo~ 今日放工終於去左做第一次既gym喇，哈．．．初時去到都有點戰戰兢兢咁架，因為估唔到有咁多人．．．

我今日主要係做器械，包括air-walker，跑步機，蛙船機，扭腰機，一d鍛鍊手臂既機．．．我好鍾意拉筋部機，因為真係拉完個人好舒服！對於我呢d長期都係肌肉崩緊既人黎講，真係拉一拉即時舒筋活血呀，哈．．．當然做運動前後都要做先至有效．．．做完運動去左steam同沖涼，好爽呀．．．攪掂都成七點了．．．我今日足足做左一粒鐘運動，由五點三做到六點三．．．跑步時承機望埋入面學basic steps既堂，好似有點低能，係咁踩板做簡單動作，真係興趣不大，o岩d師奶多d囉，哈．．．

返去屋企，誤上賊車k52，足足坐左五個字有多，想死．．．返到屋企都成七點九有多．．．今晚食左好多野，可能做完運動關係，加上朝早至午餐都冇食過肉，見到今晚有雞翼同午餐肉，真係忍不住口喇，呵呵．．．今晚諗住早點訓的，因為近日真係超級唔夠訓，個黑眼圈真係見到都嚇親人，好恐怖，好似真係比人打瘀左咁，好可憐！how come？

今日A仔話我知佢隨團既同事發高燒，仲成40度．．．情況令人擔心！雖已入院，吊左針，仲打左兩枝針，不過仍未退燒．．．唉！希望A仔同整團人都可以平安啦．．．為佢地祈禱呀，願天父神可以眷顧佢地，保守佢地，尤其係屎屎，希望佢快D冇事啦．．．

>>July 16, 2009 at 4:09:02 AM GMT+8

2009 年 7 月 13 日 星期一 【晴】

wow~ 今日要返三節呢，真係．．．人都癲呀！！

今朝七點就起身了，好眼訓，應該話係超級眼訓至真．．．好累呀！訓得唔好，因為無啦啦夜晚有點喘，唔知咩事？明明做左天灸，都可以繼續喘既？證明d藥力未發揮效用，哈．．．

返到中心，遲左少少，九點半就話開會了，真係魂魄都未返齊就要開會，好苦呢．．．足足開左三粒鐘，how come？點解有咁多既野傾．．．今日冇出聲關於琴日唔開心同激氣件事，唔知點解唔係好想講囉．．．唉！好無奈！

開完會，同左離職同事兼好友，阿雲，吃lunch，同行仲有另外兩個同事．．．同阿雲真係好多野傾，哈，始終大家係女仔嘛，總有點少女心事要傾既，呵．．．返到中心，都冇咩心情做野，同阿雲傾下佢前景問題，希望佢早日找到自己要行既路，同埋可以計劃好一切啦！加油呀，阿雲，願神保守你，帶領你．．．好開心，阿雲送左份預早既生日禮物比我，當中有一條裙，一個頭飾，同埋一條手lin．．．多謝你呀，阿雲，我好鍾意d禮物．．．真心的！只要係你送既就會喜歡！仲有，發生左件好攪笑既事．．．話說，三點幾時，阿雲叫我陪佢去toilet換衫，因為佢今晚約左男友，佢話我知剛才買左對新鞋，係union度買的．．．當大家一打開個鞋盒時，哈．．．原來阿雲買左對同我一樣既鞋．．．話說先幾天我都去左union度買左對鞋，哈．．．真係有緣了！估唔到大家買埋同一對鞋，仲有係對鞋有三隻色，我地都買埋同一隻色囉，真好笑．．．笑左好耐！再次證明我地係有緣的！好感恩，感謝主比我可以認識到阿雲呢個女仔！佢係一個好好既人，希望天父爸爸可以好好保守住佢啦！

好快hea到去六點，今晚得番我同另一位文職同事返夜，真係．．．好古怪，但係又冇話好似同事講到咁驚！因為我一向都係膽生毛的，呵．．．六點半先至叮飯食，好快食完，就係度開facebook，哈．．．之後上左網睇左d關於婚前身體檢查，以及預防子宮頸癌疫苗既資料．．．原來都唔平囉d疫苗，阿sa做代言果隻最貴，半年打三支要$5000，余安安代言果隻就@$1200，真係好鬼貴．．．而且，好多人話阿sa代言果隻唔好，雖然佢係四合一，可以預防埋陰道癌同椰菜花，但係就好多副作用，係美國已經好多打左既人出現問題，有d仲入左院添，所以有d人唔建議打呢隻；話余安安果隻係專於子宮頸癌，會好d．．．不過，好似話保五年半咋！我而家都有點動搖，唔知打唔打好？！好煩．．．因為太貴了，三支要成$3600囉．．．唉！

而body check真係有平有貴，我諗要睇下個口碑了！都係問問朋友好d喇．．．

A仔話我知佢唔舒服，真係擔心死．．．佢次次帶親團都係咁架，總係要病一病先安樂，真係唔知比佢激死，定係想擔心死我喇．．．唉．．．不過真係心痛同擔心佢架，又唔係佢身邊，真係好唔安心！佢又話會自己照顧自己喎，照鬼照馬咩，就係唔識先至病，唉．．．激死我喇！！希望佢只係熱親啦，希望佢冇事啦．．．願神可以保守住ALAN．．．

>>July 15, 2009 at 7:00:17 AM GMT+8

2009 年 7 月 12 日 星期日 【晴】

今日繼續好天有陽光，真係好．．．今日係A仔上了江西第3日喇，有點掛住佢，因為今日佢冇SEND過SMS比我，唔知點解？有點擔心呢．．．／

今朝同個同事講開一D公司既事，知道左我上司無啦啦將我部電腦轉左比其他同事用．．．其實我覺得唔係問題，問題在於，佢冇通知我一聲．．．已經足足一星期了，都冇講過比我知，想點？算點？有冇一丁點尊重？真係有點嬲．．．打算明天要做一點事去反擊！

之後三點就去左仁愛分科中醫診所度，做我今年第一次既天灸治療喇．．．好在媽媽陪我，心情好緊張，呵呵．．．去到先做左個評估，見個醫師，個醫師係一個好後生既男醫師，哈，令人精神為之一震！之後等左陣，就入去貼野喇，好似共貼左六貼，哈．．．要等成粒鐘呀，之後即時掰番先走得．．．好在媽媽陪我咋，真係悶死．．．等果陣個幾個位有點熱，都冇咩特別，唯一擔心既係會有疤痕，因為個後生醫師係我貼之前提過我有D人可能會有疤．．．掰果陣，真係．．．完全只係想講，好似脫毛咁呀，哈，好鬼痛，HEHE~

攪掂之後同左媽媽去食TEA，食完之後買貓糧，跟住就回家了．．．好累，好眼訓！所以訓左陣．．．到而家都仲未收到A仔既SMS．．．我諗冇事卦？！

>>July 13, 2009 at 2:28:10 PM GMT+8

2009 年 7 月 11 日 星期六 【晴】

哈~ 今日出奇地，明明天文台話今日會落雨，但係就一點雨都冇之外，仲周不時見到有太陽，真係奇怪喇，呵．．．

今日成日都留在家中，連教會都冇返，真係．．．訓醒已經係十一點半了，於是先睇了陣報紙，再做了半小時運動，好累，出了好多汗．．．跟住沖完個涼，就同媽媽妹妹去左食飯，又去左七福神食壽司，係，又係壽司．．．近排真係狂食，食到有點悶了．．．哈！食完行左陣就回家！

今日妹妹動手整木糠布甸比我地食．．．頭一杯失敗了，是我的錯，掛住講野，d忌廉打耐左，唉，唯有我食啦呢杯．．．而其他三杯都十分成功！下次我會整比A仔食的．．．談起A仔，真係有點掛住佢，今日佢話我知江西成40度，嘩，好熱呀，真係會容架呢．．．不過知道暫時都平安順利，我都安心點．．．

今日教會文職打比我話牧師想約我同A仔27/9面見，傾我地婚禮既事．．．我剛好果日中心有活動，所以去唔到．．．本來我呢日都要讀經的，就係因為唔得先同左爹地調，點知個文職又傻傻地，又同我約左牧師呢一日．．．唉，都唔知佢點做野，比牧師知道又會話佢了！激死！

今晚食西餐，十分美味．．．今日食左好多野同好高卡既野，唉．．．朝早磅過只係96.4磅，不過頭先磅一磅．．．唉，去番99.8磅囉，how come？今日食得太多了，本來聽日想放工去做gym，但係睇左一d關於做天灸治療法既資料，話貼完之後最好唔好做劇烈運動喎，所以，泡湯的約會！冇計啦，唯有星期三先至去喇．．．聽日第一次去做天灸治療，有點心情緊張，所以叫左媽媽陪我去，哈．．．唔知會點架呢？睇番d資料，好似真係遘到好勁好有效咁．．．我都希望係咁啦，我都好想將鼻敏感同哮喘可以斷到尾．．．．

>>July 12, 2009 at 4:08:23 PM GMT+8

2009 年 7 月 10 日 星期五 【寒冷】

哈，今日無啦啦一號風球喎，唉．．．希望天氣唔好差啦，好擔心A仔既旅程呢．．今朝同A仔訓到十點幾起身，不過八點幾九點時比個電話嘈醒左，好慘．．．好似佢有個參加者發燒去唔到，所以佢都早點起身去處理事件！唉．．．

之後陪住A仔，十二點出門口，同佢去到元朗廣場搭車，送埋佢上車添，好唔捨得佢．．．想起一件好笑事，係我地搭村巴出去元廣時，車上有個小朋友無啦啦係度唱味分高下首歌，好好笑．．．初時都唔知佢唱緊歌架，以為佢係度講緊野，後來我聽清楚知道佢係唱緊味分高下，好好笑，隔離位個男仔都笑到死死下，哈．．．好鬼意既小朋友！

送左A仔上車後，我一個人係元廣行左陣，買左杯HAPPYLEMON既野飲，今次係第一次買呢D野，飲左杯熱情果蘆薈優化(youhurt)．．．唔錯，都係$10杯，ok啦．．．行左冇耐，未到一點時，妹妹打黎話剛起身，話唔知出唔出黎好？！後來攪左好耐，都叫左佢同媽媽一齊出去葵芳，今日約左媽媽去葵芳行！

點知，我兩點唔夠出到葵芳喇，但係佢地都未出門口，我真係激到生蝦咁跳．．．唉！等到佢地兩點九囉，我當時已經行左一層多葵涌廣場了，仲買了一點東西！後來，我地過左新都城間嚐越度食，幾好味，不過唔平，三個人食左$130蚊，只係兩碗撈檬同一碟飯．．．之後繼續去行街，妹妹上左去haco果度拎coupon．．．我地今日買左好多野，我同妹妹每人都用左成六百蚊囉．．．頂！真係好死窮，但係又忍唔住手買野，而且都好鍾意d野．．．哈！比A仔知道又會話我買野了，hehe~

回去屯門，再join爹地，去左食新星，唔錯，不過．．．因為今晚冇食飯，所以個肚都好似空空咁．．．不過，堅持唔食野．．．但係，媽媽係百佳買左兩盒雪榚，好抵，$58兩盒，其中一盒仲要係我好愛食既mint choc，唔食唔得囉，都食左四匙咁多啦．．．忍呀忍．．．

媽媽同妹妹今晚係咁追supernatural，我都唔理佢地了，好眼訓呢．．．

>>July 12, 2009 at 12:11:30 PM GMT+8