2009 年 5 月 20 日 星期三 【綿綿細雨】

今日仍然都係好hea下，哈哈，只係小息果陣同左兩個同學仔傾野，同埋之後幫左兩班就離學既小毅進同學映下相相咁．．．見到佢地咁開心，我都為佢地高興！希望佢地努力考埋個試去，之後可以拎到十科合格啦，加油呀！！

今日好累呀，放工返到屋企，眼見個衣櫃裡面既衫好多都要熨，所以就的起心機去熨衫喇，好似越熨越多件咁，哈哈．．．之後太累了，走上床訓著左覺！

發現自己肥左好多好多，真係要積極減肥了，唔得喇，真係時日冇多了，唔可以著唔落件婚紗架，頂．．．要努力減減減．．．

A仔今朝話我聽一件事，就係關於妹仔．．．話說妹仔姑姐，即係A仔家姐，佢買左包貓草比妹妹，妹妹試過一次之反後，就上左癮喇，成日都心思思，四圍去搵D貓草呀，點死？唔通妹妹要去戒毒？話說呢D貓草原來係大麻黎架，而家妹妹擺明係addicted左囉，點算？不過想起波波果時，都冇咁嚴重，真係試過番尋味咁既，因為之前我地都買過一隻小bear公仔，裡面係可以放貓草的，波波佢high左一排之後，都對隻bear冇咩反應了．．．點解妹妹咁大反應架呢？可能第一次卦！真係要想想辦法，而家妹妹唔肯食野，就係日日朝思暮想住d大麻，真係麻煩呀！

>>May 21, 2009 at 2:47:17 PM GMT+8

2009 年 5 月 19 日 星期二 【綿綿細雨】

wow~ 今日d天氣真係睇住佢轉，朝早時陰時晴啦，又熱到死，到左下午就睇住個天轉黑，好可怕，直至七點幾仲落出雨添．．．

今日送新雪櫃黎，所以本來打算出去旺角行都打消了，而且本來約了A仔的都同樣推掉了，因為要留在家中幫媽媽手執野同搬野，因為真係好大既工程嘛．．．

個雪櫃都唔太輕，我地兩個女人搬郁佢都唔係易事，不過都做到，哈！最後七點送左新雪櫃黎，兩個叔叔幫手搬走左個舊既，整左個新既係度，好開心，終於可以有新雪櫃用，呢幾日冇雪櫃用真係好麻煩，尤其係D雪榚容晒，D飲品唔凍，帶既飯都雪唔到而變壞等，真係唔開心！終於可以正常番喇，GOOD~

今日A仔佢都放早，不過因為下午有突發事要做，要取了OT放假去辦事．．．又加上我忙，佢都好累了，唔見住大家都好既，可以抖下嘛！

>>May 20, 2009 at 2:21:17 PM GMT+8

2009 年 5 月 18 日 星期一 【晴】

今日返左蔡記，所以工作十分輕鬆地渡過，如果今日返灣仔我可能死左．．．不過今日突然有點頭痛，唔知做乜，好在後來好一點，因為輕輕訓左一陣，hehe~

今日媽媽去左澳門玩，所以佢返到黎都好晏了，故此等埋妹妹放工就一齊落樓食飯．．．而家d野真係貴左好多，d快餐店以前$28一個既餐，而家要成三十幾蚊囉．．．好唔抵！不過味道就分分鐘比酒樓既好，好似今日食左個西檸雞，茄子煲，仲有芙蓉蛋，味道真係唔錯！仲有一杯野飲，算係ok啦！

今晚同妹妹討論開有關6.4既野，真係發覺佢呢班Y世代既細路，唔好話對於6.4，即使係社會時事，政治問題，都係一無所知，而且亦都係毫無見地同個人想法！真係令人好失望．．．唉！而我地呢班人反轉頭會比人覺得係無聊，係多事，係攪事分子？！真係唔知講咩好了．．．尤其我地做社工既，好多市民成日都用一個名黎形容我地，就係"攪屎棍"．．．講真，如果呢個社會真係冇左我地呢班人，點會仲有公義，公平，公正呢？

>>May 19, 2009 at 2:55:29 PM GMT+8

2009 年 5 月 17 日 星期日 【晴】

今日比起平日早左十分鐘起身，跟住轉搭左另一架既村巴，去左元朗廣場果頭落車，改搭968出灣仔，因為好想好想訓一覺．．．是關搭西鐵係快，不過冇位坐好辛苦！去到元朗廣場，見到架巴士走左，所以走左去美心買左個包，點知一出黎就見到有車上緊，嘩，趕到我丫！一上車就係喧訓，去到中環又塞左陣車，真係好好訓，直到去去溫莎落車，個人仲好似遊緊雲，哈！

今朝上職員會議，我地呢度好得意，有部門會議，職員會議，兩個分別既係．．．前者係所有部門同時開會，後者就只係我地內部中心會議！呢類既場合都要多點出現，因為真係好多人都唔識，好多野發生緊都唔知道發生緊囉．．．加上，今日出現都係要比總幹事同中心阿姐見一見我啦，要亮一亮相既．．．開會之後，機構邀請左一間保險公司黎講一d關於專for我地戈機構員工既保險，聽落又真係幾抵買，幾十蚊至一百蚊度供一個月，而且即使離左職都仲可以繼續生效，唔錯！所以都考慮緊會否投保？！想問下A仔意見．．．

開完會同左同事飲茶，因為都係同樣地要同同事聯誼下啦，仲要特別坐正係總幹事同阿姐同台，哈．．．承機親近佢地多點嘛！飲完茶都差不多兩點了，就搭巴士回屯門，架960好快，兩點九返到去了，返到學校都不到三點！今日冇咩心機做野，因為時間太短了，都係做左點私人野多．．．

放工後，媽媽幫我去醫生度配左之前食既，因為醫生話都係食多三日完全清晒會好點，所以都配左，之後同左媽媽去吉吉島睇雪櫃，屋企果個死左，而家屋企D野全部壞晒，真係好浪費！尤其係D雪榚，容晒，好唔開心！仲要等到星期三先送黎，媽媽好頭痛雪櫃裡面D野點可以咁短時間內清晒，仲有，送黎果日，仲要WARM UP左個雪櫃4個鐘先可以正式用，媽媽好頭痛點攪好！最後，幸好都買左個o岩心水同尺寸既雪櫃，媽媽好大頭蝦，記得度高同闊，就唔記得度其他．．．唉！好在返到屋企度清楚都ok！而家就只等新既黎！

食完飯就去左山景接A仔放工，好晏先至走人．．．佢有個好FD既女同事終於可以再發市，真係可喜可賀！希望佢會好好珍惜這段情啦．．．祝福佢！

>>May 18, 2009 at 4:07:36 PM GMT+8

2009 年 5 月 16 日 星期六 【晴】

yeah~ 今次既深圳之旅十分開心，琴日一放工，就搭車入元朗先，之後再join左A仔一齊搭車去落馬洲火車站果頭．．．我地四點鐘度已經去到了，而朋友又要晚點才到，所以我地兩枝公自己去行街街啦．．．我地先行左去福民果頭，其實係福田口岸站行過去都唔太遠架，十幾分鐘度，都算OK啦，好過無啦啦搭一個站咁攪笑，又上又落咁都唔知為乜？！

我地先行左去玩具文具批發中心，不過沒有什麼收獲，之後再去行左皇崗商業城，竟然係裡面間屈銀紙度買到野，哈哈！跟住，再行埋我地至愛行既"人人樂超市"，係果度都係主要A仔入貨啦，哈．．．跟住見累，我地去左附近既麥記坐，係，只係坐，冇買野食，因為要忍住口，是關晚餐要去食自助餐，所以一定要捱住，哈！坐係麥記，A仔同我玩左個遊戲，叫做"成功在望"，玩左一半度，朋友就CALL黎了，當然已經七點半了！真好，係時候要食野了！原來要去晚飯間野，就係之前我地之前行過既商場裡面．．．

我地今餐係去"大漁"度食，其實呢間野之前成日聽d同事朋友講好正，係佢地口中都聽左唔少話有幾好，今次終於到自己去一嘗喇．．．果然不錯！一個人$150人仔，可以任食任飲，而且食物質數幾好，服務態度就．．．一dd人啦，大家都知大陸人會乜人，服務態度有幾好都唔洗講，不過，有時總有d例外既，我地就遇到個好有服務態度既女仔，所以每次落order也好，什麼都好都係叫佢．．．個女仔好好笑容，亦都好明白我地作為客人既心理，真係為佢個僱主感恩，有個咁好既員工真係佢修到囉．．．我地食到飽飽，真係超超超．．．飽，捧住個肚囉！

之後，朋友話唔同我地去dup骨了，因為佢地唔打算過夜，所以我地分手了！今餐仲要係朋友請，真係開心！多謝金sir同阿sa啦．．．之後，我同A仔都打算去dup骨，又見時間尚早，所以就走左去東門行，當時係十點半了，好多地方都閂門了，唯一係太陽廣場11點閂，所以走左去行書店，我就買左本書送比個朋友仔．．．之後，我都竟然係白馬買左條裙，等人地閂門就梗係割人一頸血，要平平平！最後$40買到，good~

差不多時間就去左dup骨，本來想去瑪雅城，不過覺得好貴，所以走左去對面馬路間金色陽光，平差不多三份一，抵玩好多啦．．．我就做左個香薰按摩，係薰衣草，而A仔做左個港式！我地做之前A仔仲做左個腳底，而我就按肩！順手玩埋之前玩左一半個遊戲，哈哈．．．

第二朝，即係今日，起身時十一點半了，哈，本來想早d起身食埋佢provide既早餐，但係真係太累了，都係唔好！之後我地搭地鐵去左世界之窗果頭，行左個什麼"益田假日商場"，係一d好grand既商場，賣高價名牌野．．．不過，佢又有一間超市係類似香港city super果類專賣來佬貨既，所以走左入去掃貨，又買左好多野，仲係果度食埋我地既brunch！good~ 跟住，我地去左ikea行，其實係想去佢對面間專賣運動用品既mall，什麼廸x濃．．．果度之前黎過一次架喇，今次係呢度都買到野，我買左個之前好想買既fit ball，想好好減肥嘛，哈哈！而A仔買左件背心！行完就過番對面ikea度行，又去左食佢既煙三文魚，熱狗同新地雪榚．．．真係例行的事吧，哈．．．太正太抵了！yeah~ 之後就打的走人去深圳灣口岸回港！

真係快喎，係深圳灣過關之後返屯門都係三十分鐘左右，真係ok喎！返到屯門執埋野換左衫，同左A仔一齊返元朗．．．因為之前病病，已經有成個幾星期冇好好陪佢了，所以今日必定要一盡女友本色，好好陪佢啦，哈．．．

>>May 18, 2009 at 8:04:39 AM GMT+8

2009 年 5 月 14 日 星期四 【晴】

今日病情好了一點了，至少鼻水冇直流了，因為鼻水開始止了，但係自然的就係鼻塞開始多了！當然，我寧願鼻塞也唔想鼻水直流了，太辛苦喇．．．

今日十分輕鬆地過，因為都唔想自己太勞累吧，想好好養好身體，快點好番呢！琴晚同個同事傾完野後，一直都擔心佢既情況，幸好今日msn佢知道暫時都幾ok，希望會有好消息出現啦．．．祝福佢呀！

個咀之前比我咬親，之後就腫左喇，自然就再容易咬到喇．．．有冇人試過好似我咁，連續咬到同一個位置四，五次呢？真係痛苦不堪．．．同死冇咩分別？！唉．．．A仔就見過我同一時間連續咬到個咀同一個位置四五次喇，佢都怕左我，仲嚇親，點解我會咁"好彩"？

聽日會上深圳玩，約左朋友去，好期待呢！

>>May 15, 2009 at 1:48:27 PM GMT+8

2009 年 5 月 13 日 星期三 【晴】

今日病情仍然沒有太大的好轉，仍然都係鼻水直流，鼻塞，咳．．．最嚴重既係鼻水同鼻塞問題，真係好可憐！一鼻塞起來，氣都抖不到，真係好難受！無論用盡什麼方法，都係抖不到氣，好討厭！在學校的工作房內，如果唔開冷氣，開窗的話，真係唔太好，因為對住馬路，空氣污染，而且又嘈，真係唔太好，所以最終決定都係繼續開冷氣，所以鼻子繼續地塞落去，好慘慘．．．

今日幸好學校沒有特別工作，可以好好的休息！不過，從來沒有訓過覺，哈．．．下午食飯，食完仲出去左行左一陣，雖然好多連鎖店都有discount，不過真係冇咩購物慾，可能真係精神唔好有關吧，冇咩興趣！即使走左去ans，見到有d福袋既物體，真係好抵，一個袋內有兩三樣耳環或手飾，都只係$69，真係超值，從來買一件都唔止呢個價錢啦，不過都係冇咩心機去睇！

放工之後去左買個包，準備返到屋企食藥前食！食左藥，上左床訓左一陣，到左七點零，我個同事打電話比我，同我傾左好多佢既心事．．．其實近日已見到佢成日都心情唔好，所以都想開解下去．．．希望佢既問題可以得到解決！永遠支持佢架，加油！

本來聽日係我個女，妹妹，既1歲生日，不過，而家病都未好，雖然好想去，但係真怕自己頂唔順，唉．．．真係好想快點好番啦，d鼻水唔好再直流了，唔好再鼻塞了，唔好再咳咳了．．．

>>May 14, 2009 at 2:57:45 PM GMT+8

2009 年 5 月 12 日 星期二 【晴】

唉~ 今日個人同死冇咩分別．．．朝早起身時同樣係十分辛苦，d鼻水不斷向前同向後流，完全冇知覺地流，即係直流．．．個頭又痛到爆，真係想．．．切左佢落黎！本來，真係想睇完個醫生先返工，不過，因為11點要教班，又怕趕唔切，所以都係頂硬上．．．

返到學校，好似一條死屍咁，食左一粒一年前醫生開既鼻水藥，唔知係太耐定係咩問題，好似冇乜反應咁，d鼻水繼續流呀流．．．到左9點8真係頂唔順了，合埋眼訓著左．．．直至10點半，突然間有人敲門，原來係朱老師，即係一陣借用佢堂教班既老師，佢想同我夾一夾個課堂．．．不過，如果佢唔敲門，我都會識醒，因為我已經好醒咁之前交定個鬧鐘，哈！

橫掂醒左，於是就好好準備下一陣教班既ppt同教材，後來又怕時間不足，所以做左好多刪減工作．．．11點4就開第一班5D同學仔，反應比心想的OK，由初時大半班訓左，到最後有大半班聽書，唔錯架喇．．．完左12點半，因為好趕，1點半又開第二班，所以即時走出去買野食，都係買左$6腸粉同$5牛肉粒食．．．1點半好快到，又要教班喇！班5E同學仔都唔錯表現，比起5D就差左少少，不過都有半班人聽書，唔錯！係5E班個電腦器材比較煩，攪左好耐先WORK，浪費左唔少時間，所以一開始就起勢係咁講同飛SLIDE，好在都講得晒D內容！

完左兩班，個人好似死左咁，連聲都沙埋，出唔到聲仲走音添．．．後來三點幾媽媽打黎，我真係唔係好講到野．．．都係頂唔順，最後都係放工去睇醫生！醫生話我傷風，佢話我上次感冒未清得晒就應該番去覆診，就係冇就攪到而家嚴重左．．．唉！算吧啦，我都係一D唔聽話既病人黎既！

返到屋企，食左少少野即刻食藥，走左上床訓，但係D鼻水仍然如此．．．唉！起身食左個通粉，睇埋個老婆大人II，之後都去沖涼洗頭了．．．曾經有同事叫我感冒時唔好洗頭，嘩，我真係頂唔到囉，個頭咁污糟？！跟住十點幾食埋藥，同A仔傾埋個電話，都係要訓喇．．．多點休息才會好，豬流感既病者都係多休息同多飲水咁好番架．．．

>>May 14, 2009 at 1:33:00 AM GMT+8

2009 年 5 月 11 日 星期一 【晴】

今日你四川地震一周年，希望在此願過世既人可以得到安息，而仍生存的，可以得到主既恩典，可以繼續努力生存下去，直至一天與天上的家人重聚．．．

今日真係好可憐，一朝早七點幾就比A仔個電話嘈醒，之後佢起身又唔記得幫我閂埋對門，佢傾計，出出入入既聲音．．．真係．．．好可憐！已經係好病，好累，但係都冇得好好休息．．．唉！起身時已經覺得好病，個鼻塞晒，仲聲都開唔到，心想，死啦，今日仲要教班，SHIT！後來起身返工，本來A仔叫我今日踩佢單車出去，我都已經冇咩力同精神踩了，所以都係冇踩到．．．

返到工，點都要死頂啦，好在後來講講下野都開得番下聲，不過都先同D細路聲明今日自己病．．．佢地都乖好比面，真係好留心去聽我講野，因為我把聲真係唔太得！感謝佢地合作！錫晒你地．．．LUNCH都冇咩胃口，求其買左個熱狗同幾粒燒賣食算，食完就係OFFICE訓左15分鐘，呢15分鐘真係緊要，個人真係精神左少少．．．到左下午，繼續教班，好在班細路同樣合作！THX~ 4點7完左堂，有幾個細路仲繼續留係度問我問題．．．真係感謝佢地咁比面！

之後，拖住行番中心，捱埋餘下的差不多一小時時間！返去之前，買左杯感冒茶飲，都初時期望有效啦，因為都成$28杯！不過到而家為止，鼻水繼續流，仲越來越勁，喉嚨痛就好番左少少，不過鼻水真係止唔到了．．．好辛苦！仲諗住杯野咁黑，應該落足料架啦，點知都係唔掂！

一個人返到屋企，今日屋企冇人，媽媽去左聽胡美儀個福音音樂會，而妹妹同同事吃飯，所以一個人都係食左個面同包就算．．．唔知點解好似好餓咁，食極都唔飽，於是見到雪櫃有雪榚就走去食，點知．．．一打開，熔晒既，唔知發生咩事，成個冰箱裡面既雪榚都熔晒架囉，唔知點解！當刻好失望，不過亦都係證明天意唔要我食雪榚，哈！

最後頂唔順了，本來飲左苦茶都應該唔可以食西藥，不過真係唔得了，鼻水係咁流，冇停過，都係要食番粒鼻敏感藥止一止先得．．．希望可以止得到啦，聽日仲要教班呢，SHIT！！！！

>>May 12, 2009 at 2:51:36 PM GMT+8

2009 年 5 月 10 日 星期日 【晴】

今日好可憐，因為一朝早起身已經好唔妥，有少少流鼻水，同埋喉嚨痛．．．都唔知係咩原因，唔通係同A仔又交叉感染？唔好卦．．．好慘o者！今日食埋之前食淨既藥，但係似乎都冇咩效用咁，唉，點死？

今日係學校都係準備聽日教展翅既野，仲有星期三要教蔡記班小毅進面試技巧！雖則早已經有晒教材，不過都係想再準備好一點吧！

好辛苦先至捱到放工，成日都流鼻水，好想死！返到屋企，訓左一陣，之後再要起行去元朗，因為應承左A仔去陪佢．．．

入到元朗，A仔都知我唔多舒服，都快手叫我早D訓覺了．．．明天可以晏少少起身都係好事！

>>May 12, 2009 at 12:57:16 PM GMT+8