2009 年 2 月 23 日 星期一 【晴】

今日返灣仔，起身果陣個頭痛好，係車度都訓著左，訓到唔想落車．．．出到灣仔，見精神唔好，所以就決定買個豐富既早餐，令自己精神好一點！去左買個腸粉加燒賣同一杯熱朱古力，都係$12，係ok買架，都抵丫！返到中心都係九點九，用左三個字時間ko個早餐，食完又真係個人爽d喎，哈！

朝早係咁入case recording，是關呢個星期都冇時間好好做下野！之後lunch同左同學兼同事阿mark兩條友去食飯撐台腳，阿mark佢請我食飯兼請我食生果，當多謝我上次幫佢頂左個talk．．．聽聞，我地中心會四月財政年度開始時會有個新既架構出現，我將會分派去第二個team度，會同而家部分合作開既同事分離，包括阿mark．．．其實，都冇話擔心既，是關我初初黎都係預左要適應，只不過而家適應左三個月之後又再要適應咁解．．．坦白講，我除左而家team既同事之外，其他team既同事我係完全唔認識，因為大家真係冇咩機會見同合作！而且而家既上司同同事都好，我都有點唔捨得架，唉！好無奈囉．．．不過冇計，呢個係上頭既決定！

下午就開左team mtg，我諗呢個會係我做咁耐野以來開得最快既一個，只係用左一粒鐘時間就完成左．．．我真係覺有點兒戲！點解可以連mintues都冇呢？好奇怪！算吧，不同地方有不同文化，我呢類新同事都係唔太方便比太多意見．．．跟住落黎我三月都會好忙，好pack，我都唔知自己到時可以點分身了．．．不過，有野做都好過冇！

放工後好累，上左車就訓，又塞左好耐車，返到屋企都七點八了，頂！好累好餓！．．．好想早點訓．．．但係鼻敏感卻成為了我訓唔到既其中一個原因．．．頂！好辛苦呀！

>>February 24, 2009 at 3:01:35 PM GMT+8

2009 年 2 月 22 日 星期日 【微雨】

唉~ 今朝起身時周身骨痛，同埋個頭好痛呀，都唔知咩事．．．唔通呢d叫做"濕重"？，哈！成日個人都好累好累咁，唉．．．

朝早又有d學生放左飛機，所以一時見下一時又冇見咁，真係亂鬼晒，好激氣！最後決定下午點名時間入左去課室鬧佢地，係班主任面前都係咁話．．．阿sir話幫我喎，不過死在之前都多得佢唔少，唔記得提d同學囉，頂！不過算啦，我都唔理我咁多，盡做啦唯有！

下午繼續見case，個頭好痛，所以都真係冇咩心機同精神對住d細路．．．後來臨放工都一腳踢，唉．．．放工之後就回家，一個人在家，媽媽又去左旅行，一日遊，妹妹就出左街，唔返黎食飯，得我一條友，於是食公仔面算．．．

今日美國既表姐回來了，真係開心，又好幾年冇見了，好興奮！而家約左星期三晚食飯，好期待呢．．．仲約埋表哥仔出黎，好開心呀！

>>February 23, 2009 at 3:11:40 PM GMT+8

2009 年 2 月 21 日 星期六 【晴】

哈，我最後今朝本來要七點同A仔一齊起身的，但係A仔因為太錫我了，都係比我再訓，佢就一個人返工先．．．我最後九點半先至起身，都仲係比妹妹打黎個電話嘈醒左囉，哈！之後約左妹妹一齊係山景間麥記等，一齊買早餐，再去左A仔間中心，跟住再去幫手！

其實因為我地太遲去到喇，成十一點半，所以都好多準備上既野都唔洗我地做，已經係好好喇，我覺有點衰添．．．HEHE~ 我同妹妹主要協助攤位遊戲同禮物換領處，都唔係十分忙，因為人流一般，唔太多！本來今日去嘉年華係另有目的既，不過．．．最後做唔到要做既目的，唉．．．可能妹妹會失望點吧，呵呵．．．

完左之後，妹妹太累，先一個人回家，我就陪多A仔一陣，本來想陪佢一齊出去深水步，因為佢要去換D野，不過後來A仔叫我返屋企抖下先，夜晚再過佢度．．．於是我都返左屋企，抖下食下飯，屋企人睇BATMAN 2，我就不大興趣了，最後九點出了門口入元朗．．．

其實我都好累，因為訓得唔好，個頭好痛．．．唉！今晚希望早到少少訓啦！

>>February 23, 2009 at 1:37:25 AM GMT+8

2009 年 2 月 20 日 星期五 【晴】

今日返灣仔，好早返到去囉，今日夾埋我只係得三個人返，其中一個就梗係我既好戰友兼好同學阿mark啦，仲有一個就係s4既同事．．．所以今日十分free呀！食完個早餐就同同事邊做野邊傾計，好開心！直接黎講，真係冇點正經咁做下野囉，哈哈！

放工之後，我一個人去旺角，A仔佢係深水步買野，我就先去旺角一個人食左個車仔面先，之後再去弼街pccw果度join佢，因為要去拎h/d，無錯，之前期待以久送既h/d終於有得拎喇，等pccw真係等到short左．．．鬧又鬧左好多次，投訴都講左唔少，最後終於等左三個月！頂！不過算啦，送既係差唔多架喇！之後，我地先做左重要既野，就係去金都，處理左BOOK攝影果度改日子．．．我初時好擔心會塌訂，點知間公司好好人，又比我地再改期．．．真係感謝神了！可以慳番D$$$$$．．．．

跟住，我地周圍去行街，是關今晚要係旺角食飯，要捱到七點！不過，我地都行左好多地方！中途行到去油麻地果頭，發現開左間新既食店，係專食台灣水餃的，所以走左入去試！真係唔錯，我地叫左個餐，佢有十隻咖哩鍋貼，同埋一碗酸辣湯！我雖然唔係好食得辣，不過都覺好味喎，正架！有機會都想再食．．．

我地都行到七點先至行番去金都果頭間春夏秋冬度打邊邊，join班天使社群既朋友．．．真係太耐冇見了，所以什麼話題都會傾餐飽！其實同一班冇機心既朋友一齊真係開心架！因為大家唔會因為利益關係而結合，真係好真誠既關係！呢班朋友真係唔可以失去呢！完左就同A仔返元朗了，今晚既天氣好似突變咁，突然好大風，今朝我出門口時都仲有陽光，但係一夜左就好凍！我都著少左衫呢，真係衰！明天要一早起身呢，因為明早A仔攪嘉年華，我會去幫手！好驚起唔到身！

>>February 23, 2009 at 1:32:40 AM GMT+8

2009 年 2 月 19 日 星期四 【陰】

wow~ 今朝個天好陰，真係睇住佢黑架，都有點兒恐怖的，我係自己個office度睇住佢越來越灰，真係個心都寒一寒呀！

今日見case十分不順，d細路個個都放飛機，最後見得果三隻，頂！真係好氣餒呀！成日都係度空等著，真係唔開心！心諗，死啦，成日同d細路講佢地仲有三個幾月就畢業了，我自己都寒一寒，因為我仲有好少時間咋，我仲要追多六十隻case囉，頂！點做呀？！好驚，唔想因為咁而續唔到約，好唔抵呀！執人二攤真係唔好彩喇．．．唉！

放工後去左行一陣，之後約左媽媽一齊返屋企，同左佢去街市買送，之後一齊回家！今晚媽媽煮左好好味既送，好開心！本來，A仔約我食完飯之後去佢度，不過後來佢話好累，所以都放過佢啦，等佢好好休息！橫掂聽日都見啦！

明早，A仔要帶貓仔妹妹去睇醫生呀，因為隻眼仍然發炎，真係麻煩，又要洗錢，真係唔知講乜好？！

>>February 20, 2009 at 2:28:14 PM GMT+8

2009 年 2 月 18 日 星期三 【雷雨】

今朝本來約左d細路見既，不過中途小息期間因為老師要映大合照，咁當然我都有份啦，所以小息果陣都去埋一份，咁就攪左成個小息，攪到有部份學生搵唔到我，我而家又賴低左兩件未見了，好煩呢．．．

攪掂晒朝早既約見，我下午十二點八就出門口去食飯，是關今日約左梁芬同學lunch呢，好開心，因為大家好耐冇食飯飯了，好難得既約會呀！我地約左係市中心食，去左讚歧烏冬食啦．．．食物質數都ok既，我覺得都係普通日本料理一間囉．．．大家又食又傾，真係好開心！仲過晒時都唔知添，哈．．．返到去學校，時間好似過得好快咁，因為下午冇case見，可以輕鬆一下，抖一抖啦．．．之後四點幾打比媽媽，佢又剛好係市中心呢頭，於是乎佢好好走左過黎置樂呢邊，等埋我放工，一齊行左陣呢頭再返左屋企．．．

今日好忙呀！朝早約完梁芬，今晚又約左兩個好友吃飯，哈．．．本來係約明晚，但係後來改左今晚！唔打緊啦，最緊要大家夾到時間丫嘛！我地係荃灣食飯，去左稻草人度食．．．食左個焗蜜桃雞扒飯，well，都好味既，再飲左杯荔枝蘆薈綠茶！跟住我地出左去行，行黎行去，最終決定行去球場果邊，因為大家本想去食甜品，但係又飽飽地，於是乎去球場坐下傾下計先好過．．．到左九點幾先去食沛公！好正呀，我第一次去食，大家share左一個rum酒葡萄果凍，一個青檸芝士千層pancake，同埋一個榴槤千層pancake．．．嘩，超好味呀！仲同老闆傾開計，佢成日都會研制d新野出黎架，佢話而家研究緊用日本清酒整果凍，真係好期待再黎食呢，呵呵．．．太好味了！每人都係食左廿蚊，好ok丫．．．下次要帶A仔黎試先至得！

返到屋企都十一點了，好累，已經好累．．．但係仲要沖涼洗頭呢，最後都要一點先有得訓架喇．．．剛才十二點幾時同A仔傾電話，講起個朋友！唉，其實我都知個朋友係好傷心，不過，又真係唔知點安慰佢好，是關佢自己選擇得行呢條路，都真係預左！唯有既係為佢祈禱，希望佢快點收拾好心情啦！仲有，A仔話貓貓妹妹佢又隻眼發炎，唉，又要晒錢睇醫生，真係好煩！真係唔知係咩原因，不過我估係同D貓沙有關囉，真係衰呀！

>>February 20, 2009 at 1:26:31 AM GMT+8

2009 年 2 月 17 日 星期二 【雷雨】

今日d天氣真係睇住佢轉，由朝早有太陽，到下午開始有雲，再到夜晚有雨．．．真係好可怕！今朝真係玩死，比一個有強迫症既case玩左一個早上，攪到我原本要做既工作亂鬼晒，最慘既係，要好辛苦先至可以再夾過時間見d同學仔呀．．．天呀！個強迫症case其實係應該由學校社工跟既，而我都同學校夾好左，我只係負責跟佢升學及就業既問題！但係好景不常，琴日個學校社工唔係學校，所以，有事果陣阿sir唯有都係搵我幫手．．．其實都冇所謂，幫到手既都可以幫，而且我都明白當時只有我一個社工在場，我點都要出手架喇，邊可以再分你我他丫！

攪左個上午，我下午要見既同學時間表又亂晒，因為有d原本上午黎既就無啦啦下午黎左，問我點解上午唔見左人，我都同佢地解釋，亦都表明而家個時間表亂左，所以希望佢地會把握時間去搵我，唔好再推三推四．．．部分同學仔都好諒解，都好彩！不過衰在，要趕住27/2前要識晒兩班小毅進既同學仔囉，而家plan落去都仲可以係果日prog前見晒佢地，不過真係趕到爆，係prog前兩粒鐘見晒果隻，超pack．．．如果過程中再有任何突發事發生，我真係死得架喇！今日攪到我一頭煙咁，想死！

本來臨放工前半粒鐘希望鬆下，冇case要見，點知又撞番個ocd(強迫症)既同學仔，又比佢擾攘左我好幾個字，因為佢賴死唔肯返屋企，又話好驚咁．．．唉，好在當刻有其他老師係度幫下手，如果唔係死果個係我！

放工後，好快手走左去市中心join阿A仔，因為約左佢出去旺角，好開心，終於可以輕鬆下！我地出左去後就去左五月花度食，又係我請客，因為出左糧就請下客啦，呵呵．．．我都冇所謂既，最緊要大家食得開心丫嘛！之後我地周圍行街，A仔好好，陪我行左好耐旺中同聯合！反而我陪佢行左好少時間！真係辛苦佢了，悶到呆豬咁呢，哈哈．．．

之後十點就回元朗了，返到去仲有重要事務要商量，就係我地個big day日子喇．．．夾來來去，睇黎睇去，最重要係要夾番A仔既工作，佢真係好忙，我真係擔心佢到時真係又忙工作，又就黎結婚，真係人都癲！所以，最後都係決定係2/1/10年．．．係，又遲左好多，都好無奈！不過冇計，佢唔通放低晒工作去結婚咩？冇可能！而家定左都好，希望星期六去攝影公司度改期佢比啦，最怕佢塌訂，冇左一千蚊呀！唉．．．仲有酒樓果度呢，唉．．．頭痛！呀，仲要再填過FORM入教堂果度呀．．．嘩，好多野一下子要做，驚驚．．．

>>February 19, 2009 at 1:31:23 AM GMT+8

2009 年 2 月 16 日 星期一 【微冷】

嘩~ 由琴晚開始d天氣開始涼番，真係感覺到d風吹吹下果種令人打震震的感覺，好討厭！突然由著少左衫，變左又要著番多d衫．．．真麻煩！

今日返學校，因為同上司講左轉今日返學校，一來要補之前個同事頂番夠數比學校，二來我一心諗住見多d case，想快點做好d野，點知，我就係攪左個烏龍，記唔起d細路今日小息之後係要出去上堂．．．哈！所以今朝只係見左一隻case囉．．．真係唔知講乜好，我個見case既schedule又亂晒喇，好激氣！

之後放學去做左件事，就係去整左個頭髮，好想改變下形象，亦都因為忍住一段長時間冇去剪頭髮，因為一直諗住四月會結婚，所以一直都留住把頭髮嘛！咁而家又改左期囉，咪順手去剪下同改變下形象先啦，到時年尾再電番個頭囉！於是我決定去整左個負離子，仲染左深啡色個頭．．．唔，希望大家可以接受我的新形象吧！其實都唔算新形象，因為以前都有整過類似既髮型，不過今次比起之前好似頭髮短d，不過又唔好短，只係過膊三寸左右！

今晚整頭髮整到好晏，坐到腰都直埋，因為真係坐左好耐．．．返到屋企食完個飯上左陣網，有個朋友打比我，confirm我地星期四晚既dinner聚會．．．好期待呢！

>>February 17, 2009 at 2:19:14 PM GMT+8

2009 年 2 月 15 日 星期日 【陰】

今日朝早唔太願起身，可能琴晚訓得唔係太好啦，所以好唔想起身囉．．．今朝成朝本來要見case，點知完全比d細路放晒飛機囉，問題在於係個班主任既問題，佢冇幫我通知d學生．．．激死我，令我白等左一個早上！到左下午，我本來以為阿sir都冇通知d學生，點知就有其中兩個黎左喎，真係吹到bear晒！而家仲麻煩，黎d唔黎d咁，攪到我個schedule亂晒，頂！

放工之後返左屋企，返到去，媽媽又同佢班朋友係度唱k．．．唉，想休息下都唔得呀！後來，佢地六點半走左，我就同左媽媽落街買送．．．買完送行番屋企果陣，經過兆山苑門牌附近，又見到一隻花貓女，佢又比人攪大左個肚喇，唉．．．真係可憐！佢又係好似之前咁，死跟住我地，又係我面前"表演"，又反肚又叫又dair．．．真係心都軟晒！不過見佢大住個肚要奔波，真係好心痛佢呀！希望佢唔好再比人攪大個肚啦．．．

聽日會繼續返學校，因為近日好急於要見case，唔可以返中心浪費時間喇！要加油呀！

>>February 16, 2009 at 2:02:43 PM GMT+8

2009 年 2 月 14 日 星期六 【晴】

琴晚好早已經訓覺了，今朝訓到差不多十一點先起身，所以精神十分充足，真係開心．．．朝早起身後同A仔食完早餐，就趕住同佢一齊出門口，送佢返工了，呵呵．．．去到佢中心，我仲流連左一陣，陪多佢一陣丫嘛，哈哈．．．

跟住我就返左屋企，好努力咁執左一陣野，主要係度執下D衫咁啦，因為近排成日返工都冇時間執過．．．之後，就同左媽媽爹地去左飲茶，當然今餐係我請啦，因為出左上個月份糧，都要請下屋企人飲茶既，我呢D野又好識做架．．．飲完茶同左兩老去行街買送，我自己就買左兩件衫，而家親特價梗係執平貨啦．．．

今日，媽媽去左中藥店度執左制藥比我，佢話係佢朋友介紹架喎，什麼有感冒就醫感冒，冇感冒就可以強身．．．哈，有冇咁掂呀？我就今晚即管飲左一制！本來，今晚計劃食完個飯去接A仔放工之後一齊返元朗，不過屋企遲遲都未食飯，所以D時間真係控制唔到，最後都係爽左約，真係衰．．．所以決定明晚會再去佢度，因為應承左唔可以甩底的，呵呵．．．

今日A仔帶左我整比佢食既情人節曲奇返中心食，仲好似話請左幾塊比同事．．．我咁既傑作都比人食，真係失禮喇．．．下次真係要再整好D先至得．．．

今晚比A仔寸我，話佢琴日咁精心咁去計劃既情人節行程都未被我欣賞！我唔係唔欣賞架，我知佢有放心機落去計劃架，我亦都好開心收到佢張卡仔！只不過係．．．我有點貪心，我期望可以再多點O者，呵呵．．．例如可以再行多點地方，去多點景點，映多點相咁啦．．．HEHE~ 希望佢唔好介意我話"一丁點的回憶"啦．．．

>>February 16, 2009 at 1:13:26 AM GMT+8