2009 年 9 月 18 日 星期五 【晴】

今日放假，不過都冇話特別訓得晏d．．．其實都唔太需要一放假就訓到太晏既，因為訓得越來其實個人會越累，倒不如較番o岩個生理時鐘咪仲好啦．．．

今日做左一件我人生之中既第一次，哈．．．今日同左A仔再去睇番上星期去睇過既一間村屋，係頂樓連天台既．．．我地睇左好耐時間，最後都拍左板，決定左租呢間屋喇．．．一切一切都好似係神既安掛咁呀，首先係，我地遇著個好好既業主，佢唔單止又肯同我地加番一部冷氣，仲裝番晒D窗花，同埋補番廚房既問題；另外，租金又可以減左三百蚊，其實三百蚊幫到我地好多喇；仲有，我地個起租期足足遲成一個月呀，哈，太好了；而最令人驚喜既係，地產既佣金收少我地成千五蚊囉．．．哈！所以，真係超級感恩！呢一切都係神既安排，佢好似好知道我地既困難同需要咁，一切都係為我地而設咁．．．好感謝神呀！！

我地最終簽左合約喇，我咁大個女，都未試過拎住咁多CASH係身架，哈．．．真係好叻叻呢，哈．．．最後，我地決定左十月九日入伙，YEAH~ 跟住既時間，要加油呀，努力搬屋，末屋，執屋喇．．．OUSH~

忙完成日，返番屯門，好累呀！同左屋企人去食飯．．．今日已經好耐冇見過屯門咁多人喇，因２今晚屯門放煙花，好多人都慕名而黎．．．我返屋企時，連506都要改總站去到新屯中，所以我要行返屋企！我地食飯果陣，好多人睇完煙花先食飯，真係多人到嘔呀！我地都急急腳走人，一來太嘈，二來返屋企追睇古靈精探B大結局，哈．．．

>>September 23, 2009 at 1:14:14 PM GMT+8

2009 年 9 月 16 日 星期三 【綿綿細雨】

今日天氣都不錯，不時都見到太陽，真係唔錯．．．咁樣令人心情都好了一點啦．．．不過唯一既係，好似感到開始作病咁，好辛苦，個頭有點重，有時仲會暈暈地，鼻水流唔出，反而係倒後流．．．好辛苦呢．．．但係又唔想請病假喎，始終未做final apprasial，唔想又拎假啦，要頂住呀！

A仔最後都係係公司頂唔順，請左病假返去睇醫生．．．幸好都係普通感冒，感謝神！希望佢快點好番啦，願主保守住佢．．．

放工之後，雖然唔太舒服，不過都堅持去做GYM，因為想做做運動，順手去STEAM下，希望會好一點啦．．．聽妹妹講，PHYSICAL可能會執，因為佢有個朋友係香港四大會計師行度做，話佢公司幫PHYSICAL做緊清盤既程序．．．嘩，好彩我個會藉係唔洗錢架o者，妹妹就慘d，平時已經冇乜時間去玩，仲係要比錢，所以真係好蝕呢．．．今日親佢未完全執，都係玩多幾次先，唔好蝕丫嘛！

今日終於同A仔商量左一點關於搬屋既事，決定星期六再去睇多次樓，如果OK既就會決定租果間屋．．．希望可以順順利利啦，願主保守同帶領我地選擇！

做完GYM返到屋企好累，我越來越感到自己病重了．．．所以，今晚要早點訓，仲要食藥藥．．．唔可以病呀！！

>>September 18, 2009 at 4:02:05 AM GMT+8

2009 年 9 月 15 日 星期二 【綿綿細雨】

琴晚訓得唔好，成晚都心情唔好，唉．．．喊又喊過，又不斷咁祈禱．．．最後，都係爬左起身，寫左封信比A仔．．．但係去到今朝，覺得自己琴晚既態度好差，所以都係打比A仔同佢講SORRY啦．．．幸好A仔佢寬恕同體諒我近日實在太大壓力．．．感謝你呀，A仔．．．有天父神同你係我身邊，我一定要堅強起來呀！

今朝我個副經理入左黎學校同我做SUPERVISION加APPRASIAL，我地先做SUPERVISION，我就番CUT我位件事講左好多感受同想法比老細知，亦都令老細覺得我受到委屈，佢都聽到眼濕濕咁，都覺學校好唔o岩．．．而老細都安慰我話，其實中心係撐我既，而且認為學校既行為係唔o岩，中心會話比學校知佢既行為令同事好難堪．．．至於轉做p-t，中心表示會接受，而且仲話會續我一年約，在唔需要返學校做野既時間，會安排我係中心做其他既工作！其實，我都好爭扎，因為我知道過後係學校既日子會唔易過，不過，我一諗到d細路，我就覺得對佢地好唔公平，而且，對自己黎講，我又就黎結婚，而且又經濟有困難，橫掂中心都有咁好既安排，不如就做住先啦，到結婚之後，我再打算搵工都可以啦．．．跟住做apprasial，老細佢對我讚口不絕，佢話暫時未搵到我有咩問題．．．哈，其實係佢未發現到o者．．．不過，之後仲要同大老細阿姐做個final apprasial，始終，我都係想聽番阿姐講，我先至放心點既．．．

之後，送左老細走，跟住自己就食飯．．．開始感到有點作病，可能琴日冷親有關啦，加上訓得唔好，所以好累好辛苦．．．但係繼續支持住呀！直至放工返到屋企，就大覺索喇，因為好累呢，訓到食飯先起身．．．

今晚同A仔都傾左陣電話，講開琴日傾既內容．．．其實大家都想再商量商量下．．．我相信，凡是大家願意行一步，自然會找到一個大家都可以接受到既平台．．．我地要加油呀！亦都要將一切都交到神既手中，好讓佢為我地安排一切．．．A仔今晚突然病左，係咁流鼻水同打乞痴．．．希望佢冇事啦．．好可憐呀佢！願主保守佢快點好番．．．．

>>September 17, 2009 at 3:00:21 AM GMT+8

2009 年 9 月 14 日 星期一 【驟雨】

今朝仍然掛八號，所以由本來返三節，變左可以輕鬆一點，朝早十二點先至返到中心，承機可以訓多兩粒鐘，哈．．．今日心情都麻麻地，不過可以晏點起身，都可以令自己舒服D，至少返少一節丫．．．

今日下午好忙，先係教班，教班之後就趕返中心，陸續就見d青見case，見左兩隻，好累好累．．．直至七點先至可以抖抖．．．跟住同左個同事加同學既人傾左琴日發生件事．．．同事都十分關心件事，亦都嘗試向學校了解詳情．．．回來結果都係學校應該多數轉我做PART TIME．．．雖然，同事話佢近日有個PROJECT等人用，叫我考慮下，但係始終未知中心既反應係點，所以都未有決定．．．加上，今朝返到中心問過副經理，佢話聽日既SUPERVISION同APPRASIAL會繼續，咁我估中心都會有佢既立場，即管睇下聽日傾完點啦．．．

之後就好餓了，決定食飯．．．食完飯，有同事買左d好正既野返黎請我地食，係番石榴，但係有d叫話梅粉黎點，d粉係有少少辣，所以食落去個感覺好特別，又甜又辣咁，哈．．．唔錯！之後仲有火龍果食，話說係d學嘛請既，真係好多野食．．．食完野，心情好了一點，開始放鬆左點，加上同左個同事傾左陣計，講下貓經，哈，咁就放工了．．．

放工落好大雨，一上車覺好凍，其實，教班後返中心時都覺好凍，開始有點唔太妥．．．我估可能冷親了．．．shit！

同A仔傾左陣電話，大家都對搬屋有點意見．．．唉，好煩呀！心情又再次唔好，壓力好大，感覺好壞，已經好想COLLASPE喇．．．已經係份工作度有野煩，點知仲要煩埋呢件事，好頭痛呀！！！DAMN！

>>September 17, 2009 at 2:00:57 AM GMT+8

2009 年 9 月 13 日 星期日 【驟雨】

今日無啦啦打風，本來朝早仲係一號風球，之後個風就黎得好快，黃昏就掛左八號了．．．今日我既心情就好似個天氣咁，由本來一朝早心情好左點，A仔又一早打過電話比我同我傾計，返左中心開會，又渡過左一個愉快既早上，到下午返到學校，教完班小毅進，到見餓，整左個豆漿粟米片食到半途，心情都係幾OK的，但係，BAD NEWS就由這刻開始．．．

學校負責小毅進個老師無啦啦走黎同我講，話校長無啦啦話要CUT我個位喎，頂！其實而家都好頭痛，因為要我囉囉戀咁等消息，而家老師打左比中心阿姐，等阿姐比個RESULT我同學校！我估學校一係都係完全CUT我，一係轉我做PART TIME．．．講真，PART TIME我都未必會繼續；而中心都未必會揹我D人工，所以，我都預晒今次會係壞結果！唉，其實，我都不斷同自己講，我要接受，我要平靜，我要堅強．．．但係，真係好唔甘心，點解？我都想要一份平穩既工作同事業o者，點解好似咁難咁？唔通注定我呢一世事業都係浮浮沉沉？我唔想咁呀！！天呀！！！我好想好想穩定落黎架，點解仲要我浮浮沉沉架呢？好灰呀．．．

而家要我等，真係好辛苦，想起聽日仲要返三節，仲要繼續工作，真係好灰．．．唉．．．今日放工，雖然八號風球，但係都繼續努力，五點後，繼續留係學校，為左等消息，之後搭九走人，快手打的返屋企，之後即刻整定份CV，預定隨時用，仲上網睇下D工先，唉．．．而家真係好難搵工．．．．好灰．．．

A仔話叫我索性唔好做，等結婚後先搵工．．．講真，可以既我都想呀，不過，我經濟方面點都要安排同處理架，話咁易咩，唉．．．好灰．．．

心情真係好差，今晚打風，仲要吹正我屋企呢個風向，我間房就不斷漏水入房，真係煩到爆，睇住D水入房，真係論盡到爆．．．我估今晚都唔洗訓架喇，聽日仲要頂三節，HOW COME？點解咁多煩野架．．．SHIT！！！

我知道我要將一切交托係神手中，我知道神會為我安排，但係．．．而家超級唔甘心，仲要超級頭痛，超級煩惱．．．好DOWN呀．．．．DAMN！！！！WHAT A DEVIL！

>>September 14, 2009 at 2:13:10 PM GMT+8

2009 年 9 月 12 日 星期六 【綿綿細雨】

今日一早同左媽媽去飲茶，飲完茶就準備入元朗啦．．．我地今日要去睇大棠d村屋租盤呀．．．

入到大棠，其實感覺幾鄉下，因為好多草，見到好多石屋，不過，都係我預其之內．．．我地先去左A仔媽媽新居度參觀，都唔錯，我覺得幾好呀！坐左陣，跟住開始跟個地產睇盤，一去去左好幾間，質素好參差，有D勁好，有D勁差．．．

其實，都已經心中睇中一間，因為真係豪裝得好靚，不過．．．最後都泡湯左，確實係有點失望．．．不過，我知道，神比我地既恩典會係永遠會超出我所遇所想的，所以，我唔可以咁失望，因為更好的將會來臨！我相信只要依靠著神，將一切都交托在神手中，自然會有更好的安排．．．我要耐心等待，唔可以太心急，令自己太大壓力．．．無可否認，我近日真係太大壓力了，無論在工作上也好，私事也好，真係煩到要死．．．令我近日超樣衰，額頭狂爆瘡，唉．．．

A仔佢係好關心我既，不過．．．有時我煩既野佢又未必會明，亦都未必可以幫到我，所以得自己一個人一力承擔，我真係開始感到吃力．．．不過，點都係要努力撐下去的，因為我相信自己係做到的，我要努力，堅持呀！！！而且，經A仔安慰後，其實心情係好了一點．．．我知道，我真係要學懂放下．．．

>>September 14, 2009 at 1:57:14 PM GMT+8

2009 年 9 月 11 日 星期五 【晴】

工作繼續忙碌既同時，仲要忙碌住自己結婚既事，真係有點疲於奔命既感覺，好累好累．．．

放工後，約左媽媽同妹妹，本來係陪媽媽睇一D衫，FOR我結婚時著既，點知最後好似係陪妹妹睇野咁，冇幫媽媽睇到衫呀！

之後返番屋企，放低D野，就同左爹地媽咪妹妹出去食飯，食完飯先至同左媽媽行左去VEEKO度睇衫，本來之前上個月已經同媽媽睇o岩左幾套，點知而家有折，賣得好快，件件都話冇貨，試晒上身，得一件係好睇，但係係爛架，所以都係放棄左．．．冇計啦，睇下遲d先再睇啦．．．

明天一早要起身，因為媽媽會同我入元朗一齊去睇下d村屋盤呀，不過我地決定早點起身去食野先再出發，所以要早起身呢．．．嗚！

>>September 14, 2009 at 1:43:17 PM GMT+8

2009 年 9 月 10 日 星期四 【晴】

今日本來約左A仔繼續睇下D樓盤既，不過A仔好傻豬，今日唔記得自己原來係放假，點知返左工，之後下午就OFF左，同左佢媽媽上深圳入貨，買定D日用品咁話．．．所以今晚大家都各自各喇．．．

好累呀今日，有點感到莫明的疲於奔命感，唔識形容！明天要返工，有排住的工作要做，感到好乏力．．．

>>September 14, 2009 at 1:38:53 PM GMT+8

2009 年 9 月 9 日 星期三 【乍寒還暖】

今日無啦啦打風，一朝早由一號風球到下午至而家都係三號．．．不過睇黎個風好快走人架喇．．．

今日好慘，因為要再次同份report去博鬥，是關我阿頭佢太多要求，又太過執著，真係為改而改咁，好討厭！唔係佢睇開既用開既就係有問題？真係令人唔明白囉．．．算吧，不做不做還需做．．．死死氣今日一次過KO晒佢，even佢叫我聽日放工前比佢．．．講真，我都係要今日比佢架啦，聽日又一早返灣仔做野，下午先返學校，邊做得切丫，唉．．．

放工時join左A仔，想同佢伸下苦水，點知佢都唔係太明白我，又安慰唔到我，反之仲要話我態度唔好？唉，好灰．．．我只係想有人都明白下咁o者，有頭髮邊個想做呢呢丫．．．不過，有時我都知我份人係擺明蕊心蕊肺架喇，我份人就係咁，見有唔妥就會出聲，尤其同自己利益權利有關既事，咁都有錯嘛？我唔知呀！好矛盾！

返到元朗，已經好累好肚餓，點知，仲要同A仔上律師樓攪D野，之後仲要落晒雨咁，我地仲要去搵D地產舖去睇下村屋同樓盤．．．幸好，拜會左四間，有一間仲即時帶左我地去一幢叫益輝大廈度睇樓，係西菁街果頭，三百八十呎，不過．．．我麻麻地喜歡個間格．．．我都知，租得私樓預左係咁既樣，不過．．．我真係唔係太高要求架咋，我只希望D野用得番既用，唔好浪費，仲有，交通方便，我夜番都唔怕危險，附近環境清潔，唔好大塵污糟，同埋價錢合理，合乎我經濟原則．．．都唔係太多要求o者，係嘛？不過，星期日可能都有機會睇一睇間村屋盤，聽落價錢幾合理，不過係遠左少少，要入到大棠巴士總站果頭，我唔知呀，要睇過先知喇．．．

之後，同A仔傾下計下我地其實可以租到幾多錢既樓，預計大約六千蚊內啦．．．唉，其實我好心煩，好頭痛，因為自己經濟面臨好大困難，而家又要努力儲錢為結婚，我真係煩到爆，琴晚一傾到錢既問題，我真係煩到想喊出黎，因為根本冇一個人可以同我分享到，可以體會到我既感受同情況．．．好苦惱呀！！！

>>September 11, 2009 at 8:51:48 AM GMT+8

2009 年 9 月 8 日 星期二 【晴】

今日繼續係學校，不過就唔洗好似之前咁，要同report去博鬥．．．真係終於可以鬆一點氣了，唉．．．不過，其實仲有大把野要做，只係暫時可以鬆一鬆咁解．．．

放工之後，約左朋友上A仔度食野同傾計．．．朋友而家做既工作真係好有挑戰性，其實都幾正．．．我就冇佢果一種衝勁了，哈．．．並唔係年齡問題既，只係．．．可能係呢一行巳經有一段時間，係已經睇化左好多咁啦．．．．

今日同貓貓金金係咁玩，開始越來越唔捨得佢．．．不過，我知道佢將會有一個幸福溫暖既新家，所以，在此祝福佢呀！

>>September 11, 2009 at 8:41:22 AM GMT+8