2009 年 7 月 29 日 星期三 【綿綿細雨】

嘩．．今日既天氣好可怕．．．朝早起身時仲見到下太陽，轉個頭就好似倒水咁喇，我出門口時係最大雨，我下半身濕晒囉，唉．．．好可憐！返到學校，好似水人咁，對鞋濕到想死，好慘！攪左好耐對鞋同條褲先可以乾番少少．．．

lunch去左買車仔面食，之後去左藥房買野，藥房個男仔sales係咁聊我傾計，我都唔多想睬佢，佢就係咁講野，我唯有應酬下佢咁啦．．．好黑仔，出去買野時冇帶遮，所以．．．又濕晒，唉．．．好討厭！食完野，本來想出去行下，但係天氣都好唔穩定，所以冇出去．．．最後，早左少少係學校走，行左陣市中心，不過．．．已經覺好悶了，唔想再行市中心了，冇野好買冇野好行．．．

返到屋企，覺好肚餓，唔知點解，明明食左lunch架，不過．．．食唔晒囉，食晒d送，d米粉食剩好多，可能姨媽到個肚谷住，所以冇胃口食野卦！之後好累，訓左覺，醒果陣已經係八點半了，咁就食飯．．．今餐好唔健康，食咖哩，白菜同燒肉．．．好肥好肥．．．而且呢排都做唔到gym住，姨媽到唔舒服嘛，而且又唔方便呢．．．點死？！

>>July 31, 2009 at 3:45:18 AM GMT+8

2009 年 7 月 28 日 星期二 【綿綿細雨】

今日返到學校，唉，原來打蠟問題仲未完成．．．近日學校都裝修，仲有打蠟d地板，好幾日前已經話要幫社工室打蠟，我仲以為星期二會做左啦，點知今日返黎初時又話會做，之後又話唔做住喎．．．想點？！好煩．．．一係就快手攪啦，唔好阻住我嘛．．．而且我又要執開晒d野比d工友打蠟，好煩囉．．．快d攪掂啦．．．唔知喇，唉．．．

下午去左做kick-boxing，今日去個阿sir都冇咩心機教，是關裡面師奶仲多過乜，好嘈好煩，無啦啦大叫大笑，好憎囉，又成日電阿sir，阿sir都唔知點回應好，唉．．．我隔離有個阿婆添呀，真係起碼我估60歲，成堂係咁話今日第一堂黎，跟唔上，做唔到，唔知點好咁．．．好死煩！我心諗，跟唔上就唔好玩啦，咁玩發玩死自己架咋．．．唉！所以，今堂阿sir好求其，冇上次咁落力同咁親力親為去做．．．上堂都會親身行過黎要我地揮拳打佢，但係今堂一來多人，二來我估阿sir都唔想走埋d師奶度啦，蝕抵晒，係靚既後生女行埋d就冇所謂，哈．．．所以，我今堂有點失望咁啦．．．不過算啦，我求既係可以出一身汗，好好keep fit，都做到，因為真係出得超多汗，d汗多到一粒粒咁從額頭流落黎，仲澀眼添，好誇！！所以決定都係星期二上會好點，不過最衰我唔可以成日星期二上啦．．．唉！

完左之後約埋媽媽一齊走人，因為佢都剛食完野．．．好餓，一次過食左一個雞尾一個菠蘿包，shit，好肥好肥．．．但係好好食，好耐冇食過．．．真係莫非餓得太耐變左餓狼？哈．．．

今日好累，kick-boxing真係可以令人死去活來咁．．．食飯前訓左係梳化，之後食完個飯，訓左係度，好累，睇電視only，有點掛住A仔，因為知佢病左，好擔心．．．唉！佢今晚終於去到鳳凰古城了，辛苦左好幾日，終於有得輕鬆下喇佢．．．之前日日都帶住d鴨仔團，真係想死．．．不過好似話d細路既義工服務都做得唔錯．．．係架，要相信當中神係從中落左恩典係度，透過佢地雙手去幫助有需要既人，所以真係．．．哈利路也呀！聽日佢就會去埋最後一個景點，就係去個朋友係東莞間廠度參觀，之後就會搭火車走人喇．．．唔知星期五我可唔可以見到A仔呢？

>>July 30, 2009 at 3:01:33 AM GMT+8

2009 年 7 月 27 日 星期一 【綿綿細雨】

wow~ 今日又係返三節既日子，好痛苦！一早七點起身就返工了，天呀！食lunch時同左同事去左supersandwich度買野食，原因係初時同事話近排有promotions，一個焗薯set只係$29．．．咁先至推動到我去試下，其實焗薯都好肥下架，真係犧牲大架！去到supersandwich激死，話個promotion無限期擱置．．．how come？咁都去左，都買啦，都係食一個焗薯set，total要$44，不過，佢送左一張$5既coupon，兩星期內lunch時間可以用番．．．咁都好似感覺抵番d．．．

食完真係好飽，份量真係唔少，一個凱撒沙律，一個忌廉湯，一個吞拿魚沙律焗薯．．．飽死我！仲要係，返中心有樣唔好，就係唔可以食完行番一陣先繼續工作！食完之後又係中心內，好肥好肥．．．仲有一朝早食左個蘋果，一塊不能不食，由阿姐請既餅，同埋半個麥包．．．我冇眼睇了．．．好經辛苦捱到去6點半了，因為9點就放工，唔食飯都唔得，飽飽地都要死左個飯去．．．食完，有個同事拎左盒剛由澳門新鮮到達既龍鬚糖，我半推半就咁食左兩粒，其實係好好食既，不過真係推唔到人地一番心意．．．唉！好肥好肥．．．天呀！！！

回家搭西鐵，好累，訓了覺．．．返到屋企已經10點8了，好累．．．

>>July 30, 2009 at 2:46:41 AM GMT+8

2009 年 7 月 26 日 星期日 【綿綿細雨】

o希，呢幾日既天氣都係時雨時晴咁，不過通常都係朝早落雨後，過陣出太陽！都可以接受既天氣啦，哈．．．

今日學校佢裝修同幫我地社工房地板打蠟，所以返唔到去，成朝都係白等，好可憐！到左下午再返去，都係仍然未得，成個教員室既野都搬晒出黎，好亂，所以，都係走左人！好早出左去市中心，行左一陣，之後三點零入左去gym了，做到4點9就去沖涼，5點幾走了．．．行經馬拉松，諗諗下次次去做gym都好論盡要拎好多野，所以索性平平地買個cheap既背囊用住先啦，起碼可以放晒d野，唔洗一揪二能咁丫．．．好慘好辛苦架！

返到屋企，媽媽同左兩個朋友係度唱k，係粵曲啦，哈．．．波波貓就避佢地避到上左我床，哈．．．近排，熱愛左玩facebook既fish a fish，瘋狂程度有果時初初玩義氣仔女時咁，哈，好好笑，無時無刻都會走去玩，想快d升呢．．．哈！完全係addicted左囉．．．

A仔SMS我話帶呢團比上一團吃力，唉，鬼咩，呢班係鴨仔團，唔洗好似阿爸阿媽咁照顧，冇扭你計，已經好好了，真係要感謝主喇．．．唉！而且知道天氣麻麻．．．希望神可以眷顧佢地啦，佢地聽日要去農村度服務同過一晚夜，希望神可以給予佢地一個良好既天氣，可以第二日去田度有一個深既體驗啦．．．

>>July 27, 2009 at 1:44:54 PM GMT+8

2009 年 7 月 25 日 星期六 【綿綿細雨】

今朝好早就醒左，八點唔夠，不過就要等爹地用完個toliet先至得．．．今朝同左爹地妹妹三個一齊出去教會，今日係敬長崇拜，由牧師主講．．．當中牧師講到既野，令我想起身邊既爹地，唉．．．佢真係老喇，連個人既性格脾氣都變晒，越來越難同佢相處．．．好怕，真係好怕佢，成日無啦啦要聊交嘈囉，唉．．．

完左之後，同左牧師傾佢本身想約我同A仔27/9傾結婚既野，原來牧師想一次過gp埋成班人一次過講，咁佢唔洗好係播帶咁慘，點知我地兩個就果日唔得．．．我約左牧師前一個星期，不過佢未firm我啦，我要過後再打比佢先得喇．．．之後，妹妹約左朋友去書展，咁我同爹地回屯門啦．．．媽媽佢病左，有點感冒，我地去左食滾滾紅茶，由我請客啦，見出左糧就要請下屋企人食野喇．．．之後，迫左好耐先迫左媽媽去配左個藥食，唉．．．成個大細路咁，死人都唔睇醫生？！

今晚食意粉，好飽，好好味，仲有好多野食，好肥．．．再磅左磅，又肥番．．．頂！唔知點好了？！．．．好想飛番去之前95磅既美夢度．．．唔得，要努力攸運動減番，同埋要引口先至得喇．．．因為．．．今日忍唔到口，妹妹引我去左么鳳，最後買左五兩齋脆雞粒囉，又肥又熱氣呀！shit．．．

A仔SMS我話佢地班火車遲左，真係麻煩，有排都去唔到花垣．．．唉，今日都有為佢地成團去代禱，真係希望神會保守佢地順利平安啦．．．因為我知道當地既天氣麻麻地呀，真係令人擔心！

>>July 27, 2009 at 1:36:31 PM GMT+8

2009 年 7 月 24 日 星期五 【綿綿細雨】

琴晚可能早訓，所以今朝起身時都精神．．．出門口果陣，曾經好爭扎，因為真係諗番起琴晚確實係有點嬲，都唔知咩事，唉．．．不過，後來都同自己講，或許佢真係太累了，所以當我係透明？！．．．我同叫一叫醒左佢，同佢講左佢幾叫佢小心D，順風等既說話，跟住就出門口返工．．．

今日放灣仔，比平日晏左少少，九點十先返到去．．．之後慢慢嘆我既早餐．．．今朝同個同事傾開計，佢問我會否繼續打算入學校．．．其實，咁近，而且工作內容又FREE，我自己都想繼續架，哈．．．同事咁問我，其實係因為遲D會BID左個ERB既PROJECT番黎做，同事睇下我有冇興趣咁啦，哈．．．唔喇，學校果度如果可以長做，我都想長做落去．．．不過，真係要睇機遇喇．．．我相信天父爸爸會有一個好既安排比我既．．．我要相信佢，依靠佢！

放工後，約左妹妹返屯門去睇戲，我地買左殺人犯既飛．．．去到屯門三點零，跟住去左食吉野家，食下午茶，好抵，十幾蚊有個餐，抵食！食完就去買定爆谷入場！好在一早係網上訂左飛，如果返到先買一定買唔到，因為成場爆晒！

殺人犯呢套戲都好特別，冇一D朋友講到話要界凳咁差囉．．．我覺得個題材唔錯丫，真係幾好，係估佢唔到，哈．．．好多人話D場面太恐怖嚇人，不過．．．我可能自己一向都唔怕睇D核突恐怖野既，所以．．．我覺OK喎！唔知，如果外國片商買左版權再拍會否更好呢？我覺得裡面個細路主角，如果搵到個仲陰沉少少既，可能會仲好少少．．．不過，我都比呢套戲有80分啦，因為．．．城城做會高分D，呵．．．

睇完戲，同左妹妹行左陣街，我買左對波鞋，FOR我跳舞用，因為而家果對太重太大對，跳舞時唔夠靈活，好易扭親．．．買左對NIKE，特價品，平平地著就算，唔洗買咁靚啦！

今晚晚餐係食粥同腸粉，哈，因為媽媽病了，有點流感卦．．．希望佢冇事！收到A仔SMS話好遲先開火車，嘩，可能聽日好遲先去到目的地喇，真係辛苦！之前睇天氣好似話會落雨添，希望天父神眷顧佢地，保守佢地，讓佢地個行程可以順利同平安．．．

>>July 26, 2009 at 10:36:26 AM GMT+8

2009 年 7 月 23 日 星期四 【綿綿細雨】

呢排d天氣都唔係好穩定，時落雨時出太陽咁．．．

今日係小毅進班學生派成績表既日子，所以我十二點就去到柏麗果頭，陪住佢地拎成績！班人既成績麻麻地．．．唉，同佢地傾開計，佢地都話好難搵工，唔係話佢地太細，就根本係冇工可以搵到．．．我都好擔心佢地個情況，所以跟住我都會好忙咁要同呢班人好好傾下喇．．．

今日放工之後，去到元朗，一心諗住比個驚喜A仔，一早去定板長定拎位，等佢黎到可以同佢食個豐富晚餐，因為佢聽日又要出發去湖南帶團了，又唔可以見到佢一個星期．．．點知，等左佢成粒鐘，最後換來既係一個唔好語氣既電話，同埋黑口黑面既樣．．．我唔知佢發生咩事，心想佢可能係太累了，近日疲於奔命咁準備去湖南既事．．．所以，我都就佢，即使仲有四個號碼到我地，我都放棄左，同佢上左百佳，我買左盒冷面同生菜，返去屋企煮．．．

返到屋企，自己一個人食飯，同得自己一個係屋企冇分別，佢走來走去執野整野，我都唔好意思走埋佢身邊．．．唯有問下佢有冇野幫手，佢又話冇，唉．．．好無奈！之後，我忍唔住了，出聲問佢一句我係咪阻住佢，如果係佢我可以返屯門！佢又話唔係．．．唔知佢想點？佢好早，十點就走左上床訓了，我唯有都係陪佢啦．．．

>>July 26, 2009 at 10:26:45 AM GMT+8

2009 年 7 月 22 日 星期三 【綿綿細雨】

今日都有點忙，因為明天小毅進班學生派成績表了，所以我都要做定準備，包括資料，安排約見既時間表等．．．一頭煙呢，哈！lunch時出左去同媽媽，仲有佢幾個朋友飲茶，媽媽既朋友無啦啦搵左個話題攻擊媽媽，媽媽今日好唔happy，係嬲到爆！我都唔知點好，不過，唯有做中間人啦！

放工後，約左妹妹一齊去physical度做gym，好累，今日上aerobic堂，妹妹完全係冇跳舞天份，d手腳好似打晒結咁，哈．．．而我就冇乜問題！今日又流左好多汗了，good~ 攪掂已經7點半了，A仔打過比我，本來佢想約我今晚去佢度，不過，太多野拎了，又唔太想聽日又拎住D野返學校，最後拒絕左，u_u．．．跟住同左妹妹行左一陣市中心，之後返屋企食飯了．．．

好肚餓，今晚又食多左野．．．次次做完運動都會食多左野，所以唯有狂食菜去代替啦，哈．．．

妹妹佢今日請左病假冇返，我都同意，佢應該好好休息，而且比時間自己好好去考慮路向！妹妹決定會向公司辭職．．．其實，佢咁大個人，佢應該為自己選擇既，我作為家姐既，只有支持佢啦．．．妹妹，加油呀！永遠支持你．．．"你知道嘛，你是最好的．．．"

>>July 24, 2009 at 2:17:30 AM GMT+8

2009 年 7 月 21 日 星期二 【晴】

hehe~ 今日好開心，先要錫一大啖送比A仔先，好多謝佢，因為佢近日都好忙好累，但係今日都特登抽時間去陪我，好多謝！．．．另外，今朝同左個好姊妹傾MSN，傾左好多關於減肥KEEP FIT既野，亦都好多謝佢．．．好期待之後同好姊妹一齊去做GYM，一齊努力去減肥呀！又係好開心呀！

不過，今日發生左件唔係好開心既事．．．妹妹公司之前裁員既事，今日終於發生係妹妹身上！唉，講真，全家人都為妹妹緊張同擔心，因為妹妹份人本身好單純，真係好驚佢會比人呃或者屈．．．哈，真係不出所料，佢公司真係出埋晒D賤招去迫我妹妹自己辭職，承機想慳番個遣散費！真係一間超賤既公司，我一定搵方法唱衰呢間公司架！太賤格喇．．．今個中午時間都係幫妹妹手攪佢件事，唉．．．好令人煩惱！攪到自己心情都唔好！

放工後，約左A仔係華都個961車站等，我就買定D麥記比A仔食．．．上左車，一路都好順，去到金鐘就開始塞了，SHIT．．．直至去到總站為止！我地今日去行書展呀！去到時六點半，一買左飛即刻開始今日既行程．．．都OK多人，不過相信冇日頭咁多人既．．．我地都買到書，我仲買左本"阿呢"送比妹妹，希望佢會開心下！而A仔可以執到三本弘兼憲史既書，真係開心，最緊要係買到心頭好嘛！而我？買左兩本$10本既KEEP FIT書，同埋一本日本雜誌．．．我地行到閂門呢．．．哈．．．

之後，我地決定係灣仔碼頭搭番960返屯門市中心，跟住，我地承機拍住拖去食甜品！哈！今日違左規，食左藍莓CHESSE CAKE，凍既蘆薈蜜，腸粉魚旦燒賣．．．哈，超肥既野入晒口喇！但係．．．A仔都冇阻住我，HEHE~ 任食唔嬲！之後，各自回家了．．．返到屋企，好激氣，同妹妹傾番佢今日件事睇下點．．．唉．．．算啦，妹妹都大個人啦，佢應該有自己既決定！希望佢可以早日搵到工啦．．．

>>July 24, 2009 at 2:10:33 AM GMT+8

2009 年 7 月 20 日 星期一 【晴】

yeah~ 今日放工之後，就開始我既第一次kick-boxing之旅．．．入到去，阿sir問一句："有邊個係今次第一次黎架”．．．嘩，點知成1/3班人舉手，好在有咁多人陪我，哈．．．呢個阿sir都幾好笑，成日都鬧人，又鍾意罰人．．．不過，我覺得佢都係認真同攪下氣氛咁o者．．．佢都好用心架，續個走黎我地度，要我地出拳打佢，同起腿踢佢，做得唔好，又要再做多次．．．所以，今日真係好累，出左好多力，出左好多汗．．．d汗好似粒豆咁，續粒續粒係額頭度流落黎，好辛苦！條氣好喘下添．．．好在，阿sir都會比我地break下，十幾秒啦，飲下水咁．．．我好鍾意上堂呀，不過，呢個阿sir只有星期二在屯門有堂，我平時星期二點上得丫，只係今日咁好彩係學校返工先黎到．．．所以，都係玩埋呢個七八月就冇得玩喇．．．

做完之後，真係感覺到有點腳軟，哈．．．證明我冇偷懶的，我係一個稱職既學生！之後因為媽媽今日又，係又去左澳門，加上妹妹今日又約左朋友做gym，得番我同媽媽食飯，所以去左山葵度食．．．其實我都唔太想去，因為都唔食得魚生，要做晒成個天灸先食得生冷野．．．不過，我有時都唔理得咁多，哈．．．媽媽係澳門賺左錢，就梗係佢請啦，哈．．．

>>July 22, 2009 at 2:11:21 AM GMT+8