2009 年 8 月 28 日 星期五 【綿綿細雨】

今朝可以晏少少先起身，都好．．．因為琴晚都夜訓，雖然半路中途都訓左陣，不過好快又被嘈醒左了．．．今日返工決定早點出門口，都係搭968出去，有得坐，同埋唔洗行咁遠水路．．．見去到都係九點九，所以就去左麥記買左個包，好耐冇食過麥記早餐，不過始終都怕太heavy，都係食個火腿扒芝士漢堡算喇，應該夠我捱到三點幾都唔再肚餓住既．．．

今日係office都係忙於做文件，其實今日自己傻左，醒唔起今日係約左d青見case返黎，自己又唔記得左早兩日打定比佢地提佢地，攪到今日最後得一個黎左．．．哈！真係大既烏龍囉！一個都好啦，見得一個得一個丫嘛．．．

放工之後搭962返屯門，同左媽媽仲有佢d朋友食野，去左滾滾紅茶，我又係食我既例牌，鹽酥雞扒面．．．媽媽叫左個棺材板又食唔晒，比埋我食，真係肥死我喇．．．今個月已經係肥仔月啦，而家變埋肥仔喇．．．今日返到屋企磅一磅．．．shit，重番幾磅囉，想點呀？頂！幾經辛苦返黎既，又雙倍回贈比我喇，好討厭！黎緊個星期又m緊，做唔到運動，咁我可以點？又繼續儲肥自己落去？

今次黎m真係特別累，一返到屋企，我就走左上床係咁訓，訓到七點半先起身．．．真係越訓越累，唔知想點．．．只知道好澎湃．．．好辛苦！唉．．．

本來今晚食完飯過去A仔度架，點知A仔又話唔好了，因為太夜．．．算啦，我係擔心佢唔開心啦，因為我應承左佢去佢度嘛，點知而家又冇去到．．．不過唔緊要啦，大家明天見面了，一齊去深圳行街街．．．YEAH~

>>August 29, 2009 at 4:22:23 PM GMT+8

2009 年 8 月 27 日 星期四 【晴】

今日個肚好痛，每月一次果D囉，但係谷極都谷唔到黎，咁樣就如是者谷左好幾日了．．．今日下午終於黎料．．．真係想死！好辛苦呀！做女人就係又煩又慘呀！！！攪到個人成日好累好眼訓呀．．．好辛苦呀！個頭又痛．．．唉！

六點幾再係屋企出發，入元朗，因為A仔今日約左班同事入佢屋企玩，叫埋我，順手同佢同事一齊慶祝埋生日啦．．．佢有個同事，MAJOR，同我同日生日，好攪笑．．．佢成為左我人生之中認識既第三個人同我同日生日既．．．YEAH~ 今日買左個魔鬼蛋糕，係好經辛苦叫媽媽爭返黎架，哈．．．係爭架，因為好多人一早訂左，好慘先搵到個冇人訂既，真係勁囉．．．不過，真係超超超好味囉．．．魔鬼蛋糕果然係魔鬼，會令人著迷，而且，佢已經係我今年生日第三個蛋糕了．．．仲唔係魔鬼？今個月又成為左我既肥仔月了，食左好多野，好多好味野，好多蛋糕．．．點死？下個月睇黎要努力減呀減喇．．．雖然，A仔話比我呢個月肥番5磅，不過我唔想呢．．．好慘架！

>>August 29, 2009 at 3:29:50 AM GMT+8

2009 年 8 月 26 日 星期三 【晴】

yo~ 今日係我生日呀，祝自己生日快樂先．．．．其實真係好感恩，這三十個年頭裡面，我真係一直蒙在主既恩典當中，佢讓我有個溫暖既家，有愛我既屋企人，A仔，朋友．．．我每天起身，仍可以呼吸到空氣，可以食到好美味既食物，見到好美麗既風景，做到自己好喜歡做既事．．．所以，真係好感謝神，係神你讓我感受到這一切一切．．．

今日照樣要返工，真係好想"東主有喜，是日休息"，可惜係唔得囉．．．本來一早計劃左今晚去AGNES B度食晚飯，因為太貴問題而取消，當初係有點失望，不過都明白的，實在太貴了．．最終決定去黃金海岸酒店度食BUFFET．．．

A仔佢一早去到學校門口等我放工，之後一齊行左陣置樂，之後就搭車去黃金海岸．．．已經好耐冇去過呢度了，好似多了點新鮮感．．．狂映相囉，哈．．．好白痴，不過好開心！之後就去左酒店，嘩，好多野食呀！我地坐係露天位，因為今日好多人呀，人山人海，可能因為暑假PROMOTE就完啦，個個都黎食．．．明明平日變左好似星期六日咁．．．不過，都不失我地既雅興．．．我地食得好開心，有好多好野食，尤其甜品，好正！

食完野，行左陣去車站，嘩，熱死，今日實在太熱了，哈．．．A仔送到我返屋企門口，感謝你呀！今日好開心，真係好感謝你．．．尤其係D禮物！我好喜歡D禮物呀，agnes b頸項，耳環．．．好多謝你呀！哈，攪到我都唔知A仔生日送咩比佢好．．．

>>August 29, 2009 at 3:24:28 AM GMT+8

2009 年 8 月 25 日 星期二 【晴】

yeah~ 今日係爹爹生日，在此，祝爹爹佢生日快樂！身體健康！主恩常在！．．．

今日返工都要忙於處理文件，唉，好煩呀！真係好怕做文件．．．諗起都好驚呀！放工之後，急急腳去商場度，因為要拎番星期日映既相呀！好心急．．．一收到相，睇番個index．．．well．．．真係映得．．．．太差了！唔知自己映乜？！唉．．．冇技巧可言！希望下次可以映得再好d啦．．．後來，同媽媽決定再買多個蛋糕，今晚同爹爹，仲有自己，加埋叫埋阿哥黎，仲有波波貓，四個一齊慶生！yeah~好開心！

A仔琴日咪發生左件支票失蹤事件既，今日終於真相大白了．．．幸好可以冇事咋！不過當中完全係感受到恩典既降臨呀．．．真係感謝主呀！好感恩呢．．．今晚媽媽特別整左上海年榚比我地食，喻意係步步高升．．．媽媽真係有心思喇．．．今日特別肚餓，食多左好多野呀！不過，近排都唔太十分重磅，反而輕左少少咁多，試過輕到得94磅幾都有，哈．．．GOOD~ 今晚阿哥帶埋芝麻狗入黎，波波好唔歡迎佢，係咁鬧佢，最後仲自己匿埋算，哈！

芝麻狗狗好乖，同佢玩左兩個遊戲添，仲放左個VIDEO上FB，好攪笑．．．好可愛呢！

話咁快，過左12點了，到自己生日喇．．．祝自己生日快樂！唔知，我第一句聽到既"生日快樂"係邊個人同我講架呢？

>>August 27, 2009 at 2:38:12 AM GMT+8

2009 年 8 月 24 日 星期一 【微雨】

今日返灣仔中心，點知記錯左自己返九點，其實應該係返十點囉．．．早左起身，索性博大霧返九點，諗住可以放五點！

今朝無啦啦開左個小組會議，真係麻煩，為左近日轉來轉去既返工制度，真係學阿姐話齋："煩到痴晒筋呀！！！"，哈！！而且近排發現好多人事上既問題事，真係唔明點解，女人，尤其係上左年紀既女人，真係特別麻煩，特別多小動作架．．．好討厭！不過，"天下烏鴉一樣黑"呢個道理真係永遠都唔會錯架！

食完lunch之後，諗住出去行下，順手幫A仔佢唱下D散紙，佢要大量散紙呢．．．行到去街市既物體，見到$10有5個布林，本來想買架，點知拎上手真係覺好唔靚，之後見到隔離有$8磅西梅，2磅仲係$15添，所以買左2磅，諗住買番去請同事食．．．同事都好開心，唯一係那個老女人，大聲問我D梅酸唔酸？我心諗，我都未食鬼知咩，一句食定唔食咪算囉，咁多野講．．．仲要話做乜咁好請食西梅．．．痴線架，有得食你咪食啦，買左咪有囉，SHORT架．．．超唔想請佢食囉當刻，不過，費時做咁多負面動作喇，唉．．．

下午同左阿頭傾左來年我學校既情況，同埋之後我要負責一個全年計劃！真係．．．唔知點分身呀！不過．．．都好，起碼係中心可以拉住D工作係度，到時都仲有話有籌碼留係中心繼續工作！因為來年學校個約會去到八月尾／七月尾完架喇，所以．．．好灰呢．．．

今日好奔波，電話來來去去，就係為左妹妹同NOEL，幫佢地買部LOMO機，DIANA MINI．．．最後係我出發去幫佢地買之前CONFIRM左人地已經售完了，唔洗去之餘，大家都好失望，唉．．．點解會咁搶手架？！一係唯有上網買啦！唉．．．

放工返到屋企，搭村巴好快，雖然要五點半先有車！好眼訓，今日太早起身．．．食完飯，去左山景接A仔放工．．．點知，A仔話佢地唔見左張五位數字既支票，真係令人擔心！希望佢地可以搵得番啦，唉！願主協助佢地搵得番張支票啦！成十點八先離開山景中心，A仔話肚餓，去左M記食野，仲同佢同事同CASE一齊食，之後我同A仔返元朗．．．途中，見到A仔冇晒心機咁，我都唔知點好，唉．．．唯有陪住佢唔出聲啦！後來，好在佢都叫自己唔好再諗再擔心，先至見佢好少少，有講番野．．．我都放心D．．．

>>August 26, 2009 at 3:03:26 AM GMT+8

2009 年 8 月 23 日 星期日 【微雨】

今日成日都落唔出雨，令人感到好難受，尤其係那種悶熱呀，唉．．．我琴晚訓得唔好，成日訓下醒下，都唔知咩事？！所以今朝超超超累．．．唉．．．

今日係學校埋埋個proposal既尾去，仲有，要開始整理因為合約完結既文件了，好煩呢．．．想死！！lunch時食左個滋味杯，再買左盒油菜食就算．．．一d肉都冇食過．．．今日社工房出邊地板大清洗，又打蠟囉．．．攪到出入都唔可以隨時，好慘！最死係d打蠟水既味，好難頂！

放工了，去左做gym，已經足足一星期多冇做了，都唔太敢太博，真係怕死！因為做之前覺有點唔妥，好似個人好累咁，跑步時都冇咩力水咁，所以唔敢跑太快同跑太耐，跑左15分鐘就算，之後就玩其他器械！玩左45分鐘就完喇，好累．．．累到都唔記得左要拉番筋呢．．．去steam時好似個人有點暈，個人有點浮，唔知係咪就m，唔夠血卦？！

做完gym去左山景，要去A仔度拎d野返屋企．．．可能個人太累，冇咩力水，好辛苦先至返到屋企，好似總係覺d野好q重咁，唉！本來想今晚去A仔度可以探下金仔，點知真係太累了，個人冇咩力，所以都係決定唔去喇．．．真係有點失望呢．．．總知琴晚就去啦！真係有總知冇乞衣！

>>August 24, 2009 at 1:15:06 PM GMT+8

2009 年 8 月 22 日 星期六 【微雨】

嘩~ 今日超超超熱呀．．．一朝早九點就起身了，感覺好熱好熱．．．睇一睇電視，原來成34度囉，傻架！本來今日計劃去好姊妹屋企度一齊開工場整我結婚既裝飾，點知姊妹愛麗斯佢病左呀．．．希望佢冇事啦，要快d好番呀！！所以，無啦啦冇左節目．．．於是，妹妹就提議左一個十分好既節目，就係．．．去玩映相！是關，我買左部holga返黎都未試過機，都係時候要試玩下喇．．．yeah~

於是我帶左我部holga，妹妹帶左佢部G10，爹地就帶左部普通CANON ixus DC，我地一行三人就落左去海檳長廊同蝴蝶灣果頭映相相了．．．是關我部機得果16張相，所以成日都就住就住咁，唔可以好似DC咁映得咁順暢．．．不過，咁樣又係正正一個磨練，要自己分析判斷清楚個景象先好去映，都係一個好好既訓練！good~ 我當然又得閒拎下妹妹部G10映下玩下啦，哈！

映完相超超熱呀，D汗好似唔洗錢咁係咁流，成身臭汗味，好難頂！12點9就唔映喇，入左商場涼下冷氣啦，之後決定同屋企人去飲茶．．．今餐我請啦，好似又好耐冇請屋企人飲茶了！今餐好豐富，好似貪心過頭叫多左野！所以大家都食得好飽！食完野，同左屋企人去買送，我就順手去搵晒相舖晒相．．．我先去左快圖美， 點知要等成9個工作天先至有得拎，嘩，傻架咩？所以唔啦，再去一間叫天天，佢都係等3-4天，而且沖費一筒$18，晒相每張$1.5．．．咁我諗住轉做JGP，佢就加多$30，所以TOTAL都係$48！其實比起晒相出黎貴$6．．．咪當呢$6係隻CD啦，哈．．．好期待D相出世呀！雖然．．．我D攝影技術唔係好叻，不過，都始終有第一次架嘛，哈．．．終於感受到男人係產房門口等緊既心情呀！攪笑．．．

今晚，A仔放工之後就過左我屋企，因為佢黎同我地食飯，順手幫我同爹地一齊慶生日！下星期三就係爹地生日了，而我就係星期四，哈．．．又要大一歲了，有點無奈！不過都好開心．．．媽媽買左個天使蛋糕比我地食．．．我本來想食魔鬼蛋糕架，不過媽媽話未試過天使，想遲D先試魔鬼！

今日天氣睇住佢轉，初時都有太陽，之後開始有點陰天，黃昏時個天仲黃黃橙橙地咁既色添．．．睇黎之後會狠狠地落好多場大雨喇．．．

PS, 發現自己誤會了一件事，只希望人地諒解會原諒我啦．．．

>>August 24, 2009 at 3:09:16 AM GMT+8

2009 年 8 月 21 日 星期五 【晴】

今日一早起身出去小西灣，真係．．．"小西"．．．好累，簡直你一個港島東，一個新界西囉，想死呀！好在，車程都順利，又唔難搵，可以準備十點前去到目的地．．．

retreat開始了，一早就係咁開會，之後就同同事一齊食到會，我都唔敢食太多野，因為真係太肥了．．．之後下午就係遊戲時間，大家都好投入，又唱詩歌，又祈禱，好愉快呀！玩到開始好肚餓，笑到牙交都軟晒，肚都痛埋，哈哈．．．六點完了，可以走人．．．得番我同阿姐兩個同車，搭789去金鐘．．．車程同阿姐傾左好多計，從來冇同阿姐傾咁多野，我都特登比佢知道我多d野，認識我多點，真係感謝神給我地一個咁既機會，感謝你．．．．

A仔今日話我知兩個消息，一係關於佢媽媽會搬走了；二係佢今日執左隻貓B返來，想幫貓B佢RE-HOME．．．對於第一個消息．．．其實我知沒有什麼可以阻止或改變到的了，只不過係當聽到消息時覺得，這樣急的決定，是否帶點衝動同不太適時o者，在決定之前，是否已經作詳細的考慮及計劃呢，尤其是日後既經濟同生活問題．．．仲有既係．．．我覺得自己會被封為"千古罪人"或"神台貓屎"或"犯眾憎"等名譽．．．我已被TOTALLY擺上台了，感到好無奈，好難堪，不知如何面對所有當事人．．．可以的話，我唔想人地為左我呢個咁渺小既人，就影響左佢地咁大囉．．．我唔想自己有咁大影響力囉！而家只係好擔心彼此既關係，因為一向都未見到太好，而家就更加可能從此就更破裂了，可能．．．永遠都沒法修補！

至於第二個消息，其實我都覺貓b十分可愛，有點小me以前既影子．．．哈．．．希望神可以眷顧貓b金仔，可以早日找到個幸福溫暖既家，可以一生平安快樂！

所以．．．今日既心情都有點大起大落，有點無奈．．．唉！不過．．．我知道這些都係神既安排，我會好好在當中好好了解神既旨意，好好的走神為我安排既路，我相信當中必有意思同神要我有所領會的道理．．．

>>August 22, 2009 at 2:36:48 PM GMT+8

2009 年 8 月 20 日 星期四 【晴】

今日去左好姊妹屋企度，一來大家慶生日，二來為左要搵佢幫手整我結婚裝飾既事宜．．．真係好感謝佢既幫助！如果冇左佢，我真係唔知點算．．．真係好感恩，識左呢個好姊妹足十年了，一直都好感恩認識到佢．．．好感謝神對我既恩典呀！我地已初步諗左禮堂內裝飾做法，同埋車既裝飾，可以準備好後開始開設廠房去做了，哈．．．好感動，真係辛苦左個好姊妹，因為都知佢本身都忙，但係仲要幫我手整野，真係辛苦佢喇．．．所以，到時佢封特大利是一定唔少得！PROMISE．．．

仲有，我一直夢寐以求既FILM CAMERA已經達到手，終於買左部橙紅色 HOLGA 120GCFN...yeah~好感謝媽媽，係媽媽送比我今年既生日禮物！好心急，好想快D試下玩呢．．．亦都好感謝布生，係我揀買咩相機時佢比左好多意見我，而且佢介紹左我兩個新朋友，係兩個攝影高人同高高人，阿JOHN哥同NOEL表弟．．．好開心認識到你地，希望日後可以多多交流，我要向你地好好請教喇，呵呵．．．

>>August 22, 2009 at 1:56:22 PM GMT+8

2009 年 8 月 19 日 星期三 【晴】

今日係好姊妹，愛麗斯，既生日，我在此，祝佢生日快樂！身體健康！創業成功！日日靚爆鏡！．．．恭喜恭喜．．．

今日都係學校裡工作，開始整明天要交比老細個proposal，不過確實冇咩心機去做．．．諗番起仲有成幢文件未做，真係有點驚！！

今日A仔佢返下午兩點，所以就約左我一齊係市中心食飯，哈，我地當然又去左飯堂，板長，度食啦．．．放工後，難得A仔佢都可以放早，所以梗係要又約約啦．．．我地去到元朗，又去左飯堂吃晚飯，不過當然就食D唔同既野啦，如果唔係真係會食到傻，哈哈．．．

>>August 22, 2009 at 1:49:23 PM GMT+8