2009 年 3 月 15 日 星期日 【晴】

今日成日係學校都好free，因為都只係準備聽日中四班既活動，都唔係太多野要攪，所以突然都空左好多時間出黎．．．係無聊之制，我開番以前同A仔以前由未開始拍拖，到初初拍拖時既ICQ內容．．．哈，睇番真係覺以前好攪笑，有點天真同有點傻（做左阿嬌）！不過，當中又有好SWEET既一面，尤其係初初拍拖時既對話，反而而家真係好難再可以聽到A仔親口同我講既說話囉，當然係一D好死肉麻既說話啦，呵呵．．．睇完個心都甜晒呀！之後又成為左動力去工作之餘，又SEND左個SMS比A仔話佢知好掛住佢，HEHE~ 真係冤氣，哈！

放工前，媽媽打比我話叫我去市中心度搵佢，因為佢一個人行緊街睇緊衫．．．所以我都走左去陪佢啦，之後一齊返屋企喇．．．估唔到A仔就打比我叫我今晚去接佢放工，呵呵．．．所以今晚食完個飯就出左門口去接佢了．．．

今晚終於知道左近日A仔心情唔好既原因．．．佢講得O岩既，有時講左比我聽都冇用，因為我真係幫唔到佢．．．唉，好似覺自己有點無用處咁，身邊既男友唔開心，又幫唔到佢，佢又好似唔洗我去幫咁，真係有點無奈！

>>March 17, 2009 at 1:59:25 AM GMT+8

2009 年 3 月 14 日 星期六 【晴】

今日天氣好好呀~ 起碼已經有番太陽，感覺好好，好溫暖，冇晒早前幾日天陰陰咁，又濕又悶又凍．．．心情都好好多呢，yeah~

今朝一早出門口返教會了，但係好景不常，miss左一班962，之後架死人車仲係好似螞咁行，係屯門公路睇住附近既車一架又一架離自己架車而去，感覺真係好差，唉．．．最後，我落車後跑到返去，好彩剛剛開始！唉，趕到我丫，氣來氣喘咁呀！今日要做事奉讀經，感覺好好，因為今次第一次係新聖殿度讀經，好好feel呢！而且今次準備充足，牧師都讚我做得好，hehe~ 完左之後，爹地有緊急會議要開，所以等到佢一點幾先至走得人．．．跟住同爹地媽咪去左別府度食，食左好多野，因為別府碟碟野都鬼死咁細，點夠飽喎！跟住都晏喇，所以都搭車返去，又係坐左架螞行既死人車，唉！算啦，今次當好好訓一覺！

返到屯門，同左爹地媽咪去買送，返到屋企，妹妹同佢d朋友仲係度開緊p，我其實都冇所謂，因為都識佢d朋友，不過就悶左少少．．．又唔想同佢地玩uno同janga，哈！跟住都係一個人攬住波波一齊大被同眠左一陣！七點九就食飯，今餐好豐富，有好多好送，有蝦啦，有魚，有乳鴒．．．不過妹妹都冇份食，因為佢同朋友出左街食，哈．．．之後八點半就走人了，因為今日有任務，就係要去接A仔豬放工．．．

見到佢之後，唔知點解好感受到佢好似好有心事咁，心情又好似麻麻，所以，我都唔特別打擾佢了，只係希望讓佢知道，我永遠都會係佢身邊支持佢既．．．我會企係佢果邊架！傻豬，記住，工作並唔係我地人生既全部，身邊仲有好多野值得我地去享受架！所以，工作雖不如意，但你身邊仲有好多如意既事呢．．．仲有，神永遠都會在你身邊架，不時祈禱啦，神一定會比啟示你架！加油呀！

>>March 16, 2009 at 2:51:20 AM GMT+8

2009 年 3 月 13 日 星期五 【微雨】

今朝好忙，上半時間都係準備工夫，之後下半時間都係見青見既case．．．講起青見case真係激氣！原本今日約左個女仔十一點見，點知等左好耐都唔見人，所以十二點半再打去問佢．．．點知個女仔話佢係準備黎左，佢去到counter同同事講搵黎小姐，個文職同事就問佢關於咩事，個傻妹就話係關於美容班既野，所以同事又傻傻地咁搵左另一個黎小姐，而呢個都係姓黎既女同事係負責再培訓計劃的．．．哈，點知個再培訓既同事同個女仔講冇約過佢，所以，個女仔最後走左！

我知道左件事之後即時約個女仔上返黎啦，之後打去問個文職同事係咪有件咁既事，個文職同事就好輕輕咁帶過話：”哦，可能我太忙卦，我冇留意到喎！咁我問佢關於咩事佢又話係咩美容班，我以為係搵joyce丫嘛(即另一位姓黎既同事)，仲有，我覺個女仔都怪怪地，有問題咁囉！可能我太忙喇，唔好意思喎！”嘩，果刻我幾慶呀，一句話你好忙就冇事呀？我一早托同事同佢講清楚晒有咩人今日會黎搵我見，佢知道晒架喎，有乜理由咁樣就可以推得一乾二淨呀？但係無奈既係，我都係新同事，又唔想同佢攪到咁差關係，所以我都係回應一句話：”哦，我唔係話你咩，只係怕個細路會好似好奇怪咁，點解我地呢解既同事咁論盡o者，令人印象唔好o者！”．．．哈，個文職同事仲可以無件事咁，同我哦左一句就算．．．頂！

之後，我見個細路見到兩點先完，剛好比我上司個上司見到，我就好不經意講左件事比佢知，佢都話個文職同事有問題，是關係．．．係佢幫我同個文職同事講左今日會有人黎見我囉！哈！

放工後，一個人去左旺角，剛好好姊妹都係果頭行街，所以約左佢行左一陣旺角．．．之後，再去左朗豪坊join表姐，表哥同妹妹．．．食同表姐在香港最後既一餐．．．我地去左食italain totmato，食蛋糕，好好味．．．我地傾左好多野呀！之後仲周圍行街．．．行到六點半，就要同表姐分別了，大家都感到好唔捨得！

在此，祝表姐一路順風啦！返到去就生活美滿！

>>March 15, 2009 at 11:38:17 AM GMT+8

2009 年 3 月 12 日 星期四 【陰晴不定】

嘩~ 今日d天氣真係恐怖．．．朝早返工時都仲好暖下，下午出街食飯時我估都有廿幾度，但係放工果陣一出學校門口，見到個天黑晒，跟住好大風，仲係要彭彭聲果隻添，又凍左好多好多，而且慢慢仲開始落微微雨．．．好可怕！

今日朝早見左兩隻case，小息時仲有個女走左入黎問我野，真係愛鬼死d自動波既學生，會自動走黎問野，真係乖．．．哈！lunch時諗左好耐食乜好，後來決定去kfc度食，不過食之前都承機行左陣市中心．．．行完先去買野食，kfc超多人，等左好耐先到我！我買左個新既公司家鄉雞卷，兩隻巴辣雞翼，同埋一個葡達添．．．太豐富了！近呢兩日都係食肥仔餐，琴晚係公仔面，今日係炸雞．．．唔死？唔得，要開始我既瘦身行動了，但係又唔敢食少野令到身體唔好！所以．．．決定要開始做運動了！要有決心呀！先在家日日做呼拉圈先，因為要減個肚dum．．．仲有，可以得閒係office做下d減手臂既運動，一定要有決心呀！加油！

聽日表姐去完旅行返黎香港喇，亦都代表佢好快要返去美國了．．．真係快樂不知時日過！大家好不容易先可以幾年見一次，真係令人懷念以前細個時既快樂時光！聽日要約表姐食最後的下午茶．．．哈！當係送別佢啦！所以，都特別叫埋A仔呢個特別嘉賓去啦，哈．．．希望聽日大家有個歡樂時光！

>>March 13, 2009 at 3:04:57 PM GMT+8

2009 年 3 月 11 日 星期三 【微雨】

今日病情好轉了少少，心情從而都好了不少！真係感恩！今日返工出門口前，接到A仔既電話，真係好開心，好少一朝早會收到佢既電話，呵呵．．．不過就係因為咁遲左少少出門口，跟住就遲左少少先返到學校喇，SHIT！

今日成日係學校都好FREE，因為今日冇約實CASE呀！不過小息時就走左兩個妹黎，同佢地咁就傾左半粒鐘喇，真係好！好開心D學生會自動波走黎，哈！佢地太可愛了，愛死佢地．．．

之後下午食飯後一個人去左市中心行，行到去2%，見到佢有兩折，所以入左去睇．．．比我買左件褸，件野原價要$1200囉，我真係唔會買啦．．．不過而家兩折，只係$240，好抵！所以買左！仲要係細碼，真係冇咩人著得架喇，哈．．．非我莫屬！

放工之後返左屋企，一個人在家好舒服，所以選擇訓覺，一訓訓到六點幾七點，媽媽才回來！媽媽整左野比我食，今晚食公仔面囉，好耐冇試過晚餐係食公仔面喇，哈．．．

>>March 12, 2009 at 2:54:55 PM GMT+8

2009 年 3 月 10 日 星期二 【陰】

唉~ 今日終於頂唔順了，要去睇醫生喇．．．去左睇一個女西醫呀！比佢檢查時有點兒尷尬，不過，佢話都係發炎o者，初時佢想同我做詳細少少既檢查，不過比我拒絕左，因為太恐怖了，哈哈．．．

於是成日都係屋企度休息同訓覺，訓到好飽呀！多謝好姊妹同A仔既關心，後來同好姊妹傾左好耐電話，知道佢近日都為左自己既問題而努力去工作，去補救．．．我最擔心佢係唔夠休息，好怕佢太辛苦，捱壞左自己就唔好啦．．．愛麗斯，你要加油呀！永遠支持你的．．．

我知今次A仔佢好擔心我．．．又要佢再一次為我而擔心，真係過意唔去．．．我決定應承佢，要對自己好一點，要好好咁調理好身體去，第日做個好乖乖！

>>March 12, 2009 at 6:32:39 AM GMT+8

2009 年 3 月 9 日 星期一 【陰】

今日心情仍然一般，不過幸好回到灣仔，同事們都好好，大家有說不盡的東西，亦有笑不盡的笑話．．．下午仲一齊去飲茶，雖然食左七十幾蚊一個人，不過好開心既時間．．．多謝佢地！

身體某部分位置情況開始惡化，越來越擔心個情況，又唔知點算，好心煩！已經努力搽藥，希望早日好番，但係見佢又紅又腫又痛．．．好唔知點咁！心情越來越差！加上，今日係中心食完一粒朱古力後，唔知咩事就係咁咳，仲好多痰添，真係無啦啦多達"啦"．．．跟住，近呢兩日又唔知咩事，個心口無啦啦好痛，我差D以為自己心臟病！不過，以前都已經試過，所以都唔太擔心真係有心臟病既，只係好奇怪，已經有好耐冇發生過心口痛，點解無啦啦又痛番？仲有，近日心口同背脊既粒粒越來越多，都唔知想點，好想搵個方法處理左佢．．．好想睇中醫，唔知有邊個中醫又好又唔DUM症呢？有冇好介紹？總知一句講晒，今日心情超超超．．．．差！好唔開心，好唔耐煩！

其實，今日收到A仔打電話來，心情真係好左好多，因為從來都冇試過一朝早收到佢既電話，仲會話好想今晚見到我．．．當刻心好甜架！後來，返左工都忘記左唔開心既，不過一放工，幫表嫂去左旺中睇佢叫我幫佢睇既野，行左一半粒鐘都睇唔O岩時，心情又差番，直至返到屋企，見到身體部位情況仲差左時．．．頂！除左講粗口，什麼都唔想講了．．．

之後去左接A仔放工，等左佢一陣，個人都好累好累，心情唔多好，不過應承左接佢就一定會去！因為我都想見佢嘛！跟住同佢一齊返元朗，因為好想睇下佢隻腳仔點丫嘛，幫佢按摩下啦，希望佢快點好番！

>>March 10, 2009 at 3:58:13 PM GMT+8

2009 年 3 月 8 日 星期日 【陰】

今日忙個不停，又係不斷在見case．．．有時真係覺得唔知係度做乜咁，好傻咁，日日都係做同一件事！哈！近日發生左件我覺幾不可思意既事，就係我係facebook度遇番一個中學同學，而呢個同學大大話話都起碼十年冇見喇，竟然可以透過facebook比佢搵番我，真係好奇妙，哈．．．我地近日係facebook度都傾計，傾左好多野，而對方亦已經係兩個小朋友既媽咪喇，真係失覺晒！最估唔到既係，佢而家竟然唔係香港住，反而搬左係澳門住，真係特別！我地都相約左過後會一齊出黎食飯聚下，真係好期待呢！

放工之後都回家了，本來打算今晚去A仔度睇下佢隻腳點既，不過佢又話呢個星期會幾咁忙，忙到日日都冇時間，忙到好似連要同我傾電話既時間都冇咁，其實．．．我聽落真係有黠失落同好唔開心！我唔係怪佢忙，而係．．．真係忙到連我把聲或者我個人都唔想見唔想聽咩？我真係咁唔重要？！好唔開心．．．真係有點心UP，自己又鬼死咁擔心同緊張佢身體狀況，反而比人一腳踢過黎話比你知你係佢心目中有幾唔重要．．．唉！不過，我唔會放棄！因為．．．神教毫我，無論如何都要愛我身邊既人，即使佢怎樣對自己！

明天要返灣仔，真係有點唔開心！心情已經唔好，加上自己近日身體某個部位突然有事，唉，心情差上加差，完全係唔想見人，又唔想做任何野．．．好想話比人知自己咩事，但係，又好唔想比人知，即使媽咪都麻麻地想比佢知！好煩呀．．．有咩人我可以分享到架？

>>March 10, 2009 at 3:49:35 PM GMT+8

2009 年 3 月 7 日 星期六 【陰】

今朝九點半起左身喇，沖完個涼洗完個頭先叫媽媽起身，之後準備出發去深圳，最後十一點半才出門口，哈！上到深圳已經係十二點零了！

我地唱好錢之後，先搭地鐵去科學館站，去深圳購書中心行．．．我買左三本書，但係就買唔到A仔托我買果本．．．失望！冇得買本正書添！之後，媽媽話見累，所以我地去左食LUNCH，果時已經係兩點了，哈．．．我地去左食韓國野，食石頭鍋飯，好好味！跟住，我地去行附近既吉之島，買左D食物．．．再跟住去左窕街站行東門，買左共三條牛仔褲同兩件衫，但係．．．返到屋企先發覺比人呃左，果三條褲當中，有兩條係唔o岩碼架囉，頂！好激氣！雖則只係三十五蚊條，但係都真係好唔憤氣！真係想拎番去換囉，好有呢個衝動！但係，最怕係拎番去又換唔番囉，頂！好討厭！係大陸買野真係要小心d呀！唔開心！

行完東門都返家了，好累好累．．．回到屯門屋企已經係七黠多了，真係累！中途曾經發生一個小插曲！話說我地係老街站搭地鐵時，我地從電梯落去月台時，我見到前面有人行快幾步，於是我都行快幾步，諗住睇下係咪有車．．．當我落到去地面時，我聽到背後有d咯咯聲，其實係媽媽走落黎既鞋聲，我當刻打算轉頭同佢講唔好追喇，點知，我一轉頭想講野時，媽媽就一個不留神跪左係電梯上，我當時呆左，唔識反應，連走去扶都唔識，直至兩秒後，我先識走去扶佢，真係嚇死我囉！唉．．．最後，返到屋企睇番，兩隻腳擦損左，好在冇扭到咋，唉．．．真係論盡！

係我剛係羅湖上火車時A仔打比我，佢問我會否去元朗！其實．．．真係一來夜了，二來真係累了，都唔太想去，太奔波呢．．．不過，我知A仔佢唔開心！我都好掛住佢呢，不過，我真係好累呢，而且又冇可能唔理媽媽！希望佢明白我啦．．．最多．．．聽日接佢放工補數啦！

>>March 8, 2009 at 1:20:33 PM GMT+8

2009 年 3 月 6 日 星期五 【陰】

今日起身好累，因為琴晚訓得唔太好，訓覺之前無啦啦聽到D怪聲，但係A仔又話聽唔到喎，真係唔知喇．．．跟住半夜又鼻塞，塞到我丫，唉．．．半夜又起左身，好累好累．．．而家周身骨痛，可以去DUP下骨就好了！

今日比平日遲出門口，因為今日返十點，今次係第一次星期六係元朗出發返工，所以都要測試下D出門口時間！今日八點半就出門口，點知要八點九先至有村巴搭，所以好慘咁食住風係留下等左三個字，SHIT~ 架村巴好快，八點十一到左西鐵站，初時諗緊搭西鐵好定巴士好，係我諗耿之制見住架968走左，於是都係決定搭西鐵，因為怕落雨塞車！搭西鐵都好快，九點七已經去到灣仔，都唔錯！比起平日係自己屋企出門口仲要快同可以遲出門口！係轉車麻煩O者，同埋冇坐同得訓覺囉，基本上都係一個唔錯既趕時間選擇！

返到去成日都係度做野，不過真係好累，個頭好痛，周身骨痛，好辛苦！好經辛苦放工，一放工就回家，睇住架962走左，好唔開心，跟住見到有架961，唔理三七廿一就上左車喇，去左豐景園再轉小巴返屯碼！約左媽媽去食野，去左滾滾紅茶，真係唔錯！跟住行左陣，果間CASIO又執喇，聽佢講而家開始縮分店，真係慘！買左條平裙，$100！跟住同媽媽返家了！

回到屋企好累，決定睡一睡，訓到七點半先起身，之後同媽媽去左同爹地吃飯，食左個豐富晚餐！之後仲買左DRYERS雪榚，好味！返到屋企，爹地急不及待去整佢琴日買番黎既高清機頂盒喇，不過而家好似都未整好，唔知點解出唔到聲囉，好奇！

原本計劃同個好姊妹聽日上深圳既，不過對方話見天氣唔好唔想好，最後，媽媽話陪我上去．．．都好，因為我都想去買下書，行下咁．．．有人陪都唔錯，如果唔係真係想過一條友上去，不過A仔一定唔比！

A仔今晚去左荃錦坳度WILD CAMP，好可憐！天氣咁凍，真係為佢擔心！希望唔好太凍啦，願主保守佢啦！好想晚晚有佢攬住訓，因為真係暖好多架，HEHE~

>>March 7, 2009 at 3:29:48 PM GMT+8