2009 年 8 月 8 日 星期六 【晴】

今日沒有返教會，因為與A仔有個約會，就係．．．去馬灣．．．今次係我第一次去！呢個地方比我感覺好好，真係唔錯，有點寧靜再帶點興旺，OK喎．．．

今日A仔心情唔多好，可能我呢幾日冇理到佢，令到佢唔開心卦？！我都盡量希望做點事，去令佢開心番，笑番．．．真係花左好多力氣先可以讓佢願意開口說話！我唔介意去花力氣去做令佢開心既任何事．．．去到一落船，見到有個COUNTER係度做PROMOTE，原來係SALE一部空氣殺菌機，係由三星出既，完全韓國製造，我地聽完個男仔SALES講完後，都有點意思想買，不過$2108部，都唔係平，而且又擔心個係咪有效．．．所以，我地去左一間食上海野既餐廳食我地既TEA，就研究好唔好買喇．．．食野過程中，我地發現我附近有個男人有個怪現象，就係．．．佢成身都好多隻烏蠅係度，望晒四周既人，都唔會有同樣情況出現．．．A仔話可能果個男人身上有種氣味令到D烏蠅"嬲"晒係佢度卦．．．好恐怖！

食完野，就開始我地既旅程．．．其實今日都好熱，成三十幾度，都幾辛苦！不過，我就當出汗運動減肥啦，哈！雖然都攪到有點花容失色咁，呵．．．發覺成個行程最正既，就係中途行經一個有冷氣既廁所，實在太正了，唔捨得出黎啦，太涼快了，哈．．．當然，又唔係話佢真係無野好睇好行既．．．只係．．．沒有去挪亞方舟，總係覺有點失色咁啦．．．唔得，希望聖光堂快d攪去挪亞方舟啦，我等緊參加架！我要入去好好徹底地參觀同玩呢．．．

之後，我地去左百佳廣場行，點知買左好多平野，拎到A仔傻呀！買左16盒鮮奶呢，仲有好多盒餅餅，哈．．．跟住，都係決定買果部空氣殺菌機，即時買，要左部紫色的，哈，我喜歡紫色呢．．．希望有效啦．．．返到元朗，即時回家了，因為太重喇，太多野要拎喇！食完野，順手睇埋王老虎大結局，好好笑，好白痴．．．

>>August 10, 2009 at 7:17:25 AM GMT+8

2009 年 8 月 7 日 星期五 【晴】

先要大聲說一句對唔住呀！！！因為自己做錯事，激嬲左A仔添，嗚．．．希望佢原諒我啦，我冇心架，完全自己唔知道係衰左，唉．．．好難堪呢．．．希望佢原諒我啦．．．

今日返工都好平靜，沒有什麼特別．．．放工後，去左旺角，因為媽媽叫我陪佢食野，食完野，就同左佢行花墟，之後就不知時間過，直接返左屋企，同埋屋企人出左去食飯，完全記唔起要打比A仔．．．嗚．．．直至佢打比我先知道佢一直在等緊我電話！好對唔住呀！我真係痴左線呀，無啦啦失憶咁，唉．．．我真係抵比人嬲既，係我做錯事，嗚．．．令到佢嬲同唔開心，仲有要自己一個人，我真係好冇用呀！唉．．．

明天約左A仔去馬灣，希望唔好因為呢件事而令大家玩得唔開心啦，因為，我只想佢知道，我唔係有意去唔記得佢架．．．嗚．．．真係想喊呢．．．而家仲未等到佢電話，真係唔知點算好？又唔敢打比佢喎，唉．．．原來理虧後真係好難受架．．．嗚！

>>August 8, 2009 at 3:05:19 PM GMT+8

2009 年 8 月 6 日 星期四 【微雨】

今日都好，可以見到下太陽，心情都好一點．．．不過琴晚訓得唔太好，今日起身覺頭痛，唔知咩事呢，唉．．．個頭痛到而家呢！

今日係學校，朝早都冇咩特別，到左四點幾，無啦啦走左四個女學生黎搵我傾計，一傾傾到差不多六點了．．．好開心佢地走黎探我，哈！同佢地真係有傾不盡既話題，好喜歡呢班乖學生！明天要返中心灣仔了，真係唔喜歡返中心，日子很難捱呢．．．

今日本來打電話去家計會，原本想打去預約婚前檢查，點知打黎打去都打唔到，咁就嘗試左網上預約啦，不過佢又好似冇reply過我，個預約好似只係填左超少資料，又冇時間日子選擇，所以完全係唔知可以點做？唉，好煩！

A仔話星期日同我去馬灣行一轉呀，好開心！因為之前佢本來應承左我15/8同我去，點知後來佢既活動改左期去呢日做，所以我地既約會就要取消．．．但係，佢特登為我再安排番，我好開心，真係好多謝佢，不至令我失望冇得去，HEHE~ A仔，多謝你！要錫晒你呀．．．

>>August 7, 2009 at 1:42:16 PM GMT+8

2009 年 8 月 5 日 星期三 【綿綿細雨】

今日天氣好了一點，至少會見到下太陽．．．今日下午要去展翅簡介會，一早約好左A仔一齊出發去，點知A仔臨時有事，最後我一個人去到荃灣西．．．好在，之後佢都追得番上D時間，可以同我係荃灣廣場間元氣一齊食LUNCH．．．好開心！回想起我地一齊去聽展翅簡介會都已經好幾年前既事黎囉，哈．．．所以感覺很好！

不過個簡介會真係好悶，D所謂社工問埋晒D不知所謂既問題，好灰，好無奈！唔明點解而家既社工係咁既樣？好失望．．．中途有成差不多半小時既BREAK，我同A仔好攪笑地，行左去對面CITIWALK度行，哈，仲比我去左M&S買到野，好攪笑．．．完左之後，同左同事分別，我就同A仔一齊行左去荃灣廣場，之後決定係珊瑚堡食埋個TEA，其實係A仔既DINNER．．．好似食物質數麻麻，價錢又麻麻，可能未必會再食喇．．．之後一齊搭西鐵返去屯門，我陪埋佢返山景啦，一盡女友責任嘛！

返到屋企食完飯，又再繼續出門口去山景接A仔放工，點知就出事了．．．話說A仔班細路話完左個組之後想叫A仔一齊去打邊邊喎，咁當時坦白講，我又食飽左飯，而且佢又係計人頭既，雖然A仔叫我去，但係我都覺唔抵啦，所以我拒絕左佢，叫佢同D細路去玩．．．其實我真心叫佢去玩的，我唔係什麼悔氣，因為我知道機會是十分難逢的．．．A仔送到我去輕鐵站，其實，我當刻又唔係嬲既，只係覺有點掃興同無奈吧．．．返到屋企，我特登唔打比佢，睇下佢有冇關心我安全，點知係冇囉，我自己再打番比佢又冇人聽，當刻真係開始有點嬲喇，我覺好不被關注呀！嗚．．．傷心地SEND左個SMS比佢，仲關埋手提．．．後來幾分鐘後，佢就打左去我屋企搵我．．．之後知道佢原來個袋拎開左．．．我知，我又再嬲唔落了！我太心軟了！我反而嬲既係，A仔既同事同佢講話見到我係輕鐵站度黑面？！嘩，真係要澄清囉，我冇呀，唔好屈我機呀！我當刻只係覺好無癮同無奈咋，OK？

其實講到尾，我都係盡量唔好做到我份人咁霸王同自私咁，A仔唔係我完全擁有架，佢身邊仲有好多朋友同佢關心既人．．．而且，真係可以成廿個人一齊去打邊邊喎，真係好難得既事．．．我都好想親熱鬧架，不過我個肚唔爭氣呢，而且明天又要早返工，唔通嚷住要早走咩，咁樣又好唔合理呢．．．所以，我唔會做一個"動L"(霸王)的人架！我知道，兩個人，尤其係第日成為兩夫妻，凡是都要互相體諒同磨合，如果連呢D小事都處理得唔好，仲點可以過到人世呢？所以．．．我要努力，學做一個好老婆，做好一個男人背後既女人．．．！

>>August 7, 2009 at 5:26:02 AM GMT+8

2009 年 8 月 4 日 星期二 【颱風】

今日天氣唔好，好大雨，真係難為左d學生，因為今日會考放榜．．．今年學校成績都係麻麻地，同樣地主攻收外來生啦．．．我基本上都冇咩特別野做，是關學校社工係度，我都係幫手做下支援性質咁，費時搶人野做啦．．．

本來琴晚話今晚唔去A仔度既，點知後來都決定左去，所以放工就去左元朗搵佢．．．A仔又放假喇，真係令人羨慕！入到去，約左你元朗廣場等，因為佢爸爸媽媽都一齊出黎食飯，去左"潮館"，真係麻麻地好食，D野又肥又唔好味．．．食完飯，去左行超市，順手去電器店睇下D洗衣機．．．真係花多眼亂！之後行完DSC直銷，無啦啦落好大雨，好似倒水咁，所以走左去麥記到避一避．．．之後都等得太長時間了，決定走頭．．．嘩，D雨大到嚇死人，我最後係條褲濕到上大腿囉．．．好慘！好在都有把直遮咋，如果唔係兩個人點死？！

返到屋企同A仔嘈左一個小交，唉．．．好無奈！我知佢係錫我，對我好，凡是都會以我為先，但係，我都係想比D建議咁o者，冇諗過令佢有咁大感受同反應．．．或許我真係錯了！

>>August 7, 2009 at 5:08:11 AM GMT+8

2009 年 8 月 3 日 星期一 【驟雨】

嘩~ 又有風打喇，好似叫天鵝．．．希望唔好咁快飛走啦，好想聽日晏d先起身囉，哈．．．

今日全日都係蔡記，冇咩特別呀，返工等放工咁啦．．．放工之後，都係決定去做一做gym，見原本既kick-boxing堂換左第二個阿sir教，所以就試下，點知就出事．．．個阿sir原來係阿叔黎既，又老土，d衫"靚"到佢丫，全身都係紅色既運動衫囉，頂！個頭仲要係郭富城出道時既髮型囉！仲有，帶住副金絲眼鏡．．．成個咸濕既阿叔咁．．．而且，上堂一d氣氛都唔識，成日話："做得o岩，冇問題！”．．．你就有問題喇！傻架！好悶咁上左一堂，又冇點流汗囉，有點浪費，總知自己係出邊做機好過呀！好在，我星期二都冇幾何上堂既，應該下次唔會再見到佢，哈．．．

完左之後覺好似扭到隻大肶咁，有點痛囉，希望冇事！steam埋先至走人，返到屋企七點八！即時食飯．．．又食左好多野喇，頂！磅一磅．．．又重番，真想死！！！雖然，A仔成日話我已經有人要喇，唔洗成日將"減肥"掛在口邊，但係．．．我根本係接受唔到自己，而唔係要人去接受我囉．．．唉．．．太太太肥了．．．尤其係個肚，我頂自己唔順呀！好想唔食野，之但係又好餓喎，頂！

已經八號風球了，好似吹東南．．希望唔好吹正屋企，唔想半夜個窗漏水囉．．．

>>August 5, 2009 at 8:54:58 AM GMT+8

2009 年 8 月 2 日 星期日 【綿綿細雨】

嗚，好慘呀我．．．琴晚十一點就訓了，本來都好地地的，不過因為琴晚已經成晚開始鼻敏感，所以訓到四點幾醒左，條氣又好唔順了，唉．．．搵一搵個袋，頂！枝氣管噴噴唔知去左邊．．．心諗，可能今日換左個袋，所以冇帶到係身．．．唉，想死！咁走出廳啦，點知果陣狗除．．．嘩，當刻想嘔想死，即刻咳多幾錢重，所以飲左啖熱水，搵下有冇藥食，冇！頂！即刻走番入房．．．唉！坐左係度，係咁喘．．．A仔都知道我唔舒服，曾經拍過下我背脊，點知去到五點半，A仔起左身，因為我喘到喊起上黎，太辛苦了．．．曾經有種衝動，想即刻飛的返屋企噴野，但係，我同自己講，唔可以咁冇用，要頂落去，要堅強D．．．不過最後，A仔起身，決定同我去睇醫生！

我地落到樓諗住打的，剛好有的呀，真係好彩，我地六點度上到去博愛急症室．．．好在而家博愛有急症咋，唉．．．．好在時間關係，冇乜人，都係小貓幾隻咁，所以好快就到我入去，我入到去就要吸氧氣了，仲要坐輪椅！我個心好唔好受，因為好似好病人咁，而且仲要A仔陪住我，為我擔心！雖然，佢順手同自己睇埋D感冒．．．最後，我又要照X-RAY，又要觀察咁，咁就攪左幾粒鐘．．．去到八點就出左黎喇，之後話九點先至開藥房有藥拎，所以我地去左CANTEEN度食早餐，好飽，好豐富既早餐．．．食完就去拎藥！

九點幾十點走人，我上司打左個電話比我，我相信佢都係關心我既，知道我入左急症室，不過我估背後都係想CHK下我係咩事啦．．．算啦，唉．．．之後，同左A仔一齊返屯門，A仔佢返中心工作，我就回家了．．．

返到屋企換晒衫，本應打算上床訓架喇，點知訓左五分鐘後，A仔就打黎喇．．．原來A仔話佢老細叫佢走，而A仔諗住出一出去灣仔，所以，我就陪左佢出去啦．．．我地最後去左漫畫展！我地行左成三粒鐘呀，好累呢，哈．．．A仔好多收獲呀，又有漫畫，又有黃金戰士模型！幾開心！我就買左一本書同兩本雜誌，哈．．．

跟住，我地就返左屯門市中心啦，去左板長度食，哈，係，又係食壽司了．．．呵！好好味！不過，我好似已經唔記得我係唔可以食生冷野喇，呵．．．食完我地行左陣，之後就回家了．．．返到屋企已經好累好累了．．．A仔就好啦，明天可以返夜晚一節，又可以好好抖抖了．．．

>>August 4, 2009 at 3:24:20 AM GMT+8

2009 年 8 月 1 日 星期六 【綿綿細雨】

今日最終冇返教會，因為個個都唔返．．．爹地就話要留係屋企做野，因為佢要執定d書for佢之後映相用；而妹妹就話約左朋友去馬灣同挪亞方舟玩同映相；A仔就要返工；所以我都承機懶左冇返了．．．

所以可以訓到晏少少，不過都晏唔晒，是關A仔佢十點半就打比我喇，嘈醒左我兩次，所以都冇訓囉．．．起身後，曾經諗過想去做GYM，但係最後都冇去到，又係懶蟲上身啦！所以，都係在家虛渡了，呵．．．

不過，之後就幫媽媽手，同波波貓沖涼涼．．．可憐既波波豬，叫到不停，仲咬晒咁多個人；佢呢個小公主，要三個人幫手先可以幫佢剪毛毛，指甲，同埋沖涼涼．．．不過，沖完涼變左做香香公主，都值得既，哈．．．靚靚豬！

跟住，三點幾，同左爹地媽咪先落街食我地既LUNCH，去左滾滾紅茶度食TEA，真係好抵食！食完，我就過左山景接A仔放工．．．本來佢係放五點，不過最後都攪左好多工作既野，好晏先至走人！唉，知道佢之後忙到飛起，分分鐘連婚都結唔成呀，我真係好擔心！一方面擔心真係會結唔成婚；另方面又擔心佢既身體健康；好擔心呀．．．所以之後心情都唔太好了，都冇點出聲講野，因為知道佢都好累了，自己又心中有點擔心呢．．．唉！

返到元朗，我地去左新明皇度食，唉，可能平日食得好野多，都係覺新明皇既唔夠新鮮，真係差一點．．．不過算啦，大家都冇咩胃口食，求其食飽就算啦．．．

返到屋企，A仔話好累，所以佢都九點訓了．．．而我，晏D先啦．．．

>>August 4, 2009 at 3:07:06 AM GMT+8

2009 年 7 月 31 日 星期五 【晴】

本來諗住今日可以訓晏d架，點知最後九點就醒左，因為一早比媽媽同妹妹嘈醒左，唉．．．曾經諗過想過，不如去做gym啦，咁早起左身．．．不過後來先同左媽媽去左飲茶，嘩，一朝早食左好多野，仲係要叫多左野，食左好多好多，好肥呀！天呀！跟住，本來我想同媽媽出去旺角架，點知後來媽媽既朋友又話叫我地同佢地去葵芳，於是乎就下午出左去葵芳．．．

係葵芳行左好耐，都成差不多四粒鐘，我當然又有買到野啦，買左對涼鞋，好開心，因為想買對皮既涼鞋好耐，而且又唔貴，好good~ 另外，又有買到d衫咁啦，呵！

返到屯門，覺好累了，因為行左好耐嘛，好耐冇行過咁耐街喇．．．其實都開始覺行葵芳好悶了，諗番起，好似先個星期先行完葵芳，哈．．．

之後同左爹地媽咪去左食飯，去左山葵度食，但係，發生左件小插曲啦，令我對呢間餐廳既印象差左點啦．．．唉！話說食到半路，都差不多可以話係尾聲時，我無啦啦覺得隻腳好痕，我當刻係著左條七分牛仔褲同埋拖鞋的，所以雙腳自然會好敏感架！咁見痕，咪想伸手去抓下啦，點知一望．．．頂！見到有條george(鹽蛇)係我隻腳度，我果刻叫唔出聲，只係係咁指住隻腳，依依呀呀咁．．．爹地媽咪好奇怪，係咁問我咩事，我叫左幾秒後，就大力郁隻腳，整左阿george落地，先至同佢地講得出聲話有鹽蛇呀．．．當刻好驚，見到阿george佢仲眼碌碌咁望住我囉，我好無奈！後來都係同爹地調左位，好驚！

返到屋企話左件事比A仔聽，但係佢仲話我傻，咁都好驚！嘩，george喎？！妹妹話曱由仲驚喎！我就話咩都唔好啦，唉．．．返到屋企狂洗腳啦，皮都甩咁滯呢．．．天呀！之後，話左件事比個好姊妹聽，佢一向都好怕george的，所以佢好為我難過，嗚！

>>August 4, 2009 at 2:55:12 AM GMT+8

2009 年 7 月 30 日 星期四 【綿綿細雨】

今日A仔終於返左黎喇，知道佢平安，而且個旅程十分順利，都好感恩呀！不過，知道佢病病仲未好，都仲好擔心佢，而且知道佢既工作密麻麻咁落住去，將會忙到死，我都好肉痛佢，已經病緊，仲要忙到咁，唉．．．希望佢快點好番啦，亦希望天父神可以給予佢健康既身體去應付所有既工作啦．．．

今日個人好累，放工返左屋企都冇晒力咁，訓左係度，不過訓唔著．．．琴晚已經係訓得唔好架喇，D M十分澎湃，唉．．．好辛苦！不過，我仍然堅持在家做少許運動，因為今日LUNCH太豐富了，走左去食和民，食左個石頭鍋味曾牛肉飯定食，死未？唉．．．不過真係好好食呢，好耐冇對自己咁好了，真係餓得太耐，就變餓狼了．．．好想走番去93/94磅既時候．．．幾時先可以返番去家鄉呢？．．．

>>July 31, 2009 at 3:38:29 PM GMT+8