2009 年 6 月 29 日 星期一 【晴】

今日係A-LEVEL既放榜，所以我晨早八點幾返到學校準備了．．．其實都預計到今年既成績會麻麻地，所以都驚D學生會情緒唔會太好．．．

九點正正式派成績表喇，有部份學生都已經有晒心理準備，預左係差，所以都冇咩反應，有好少部分既女仔就喊，因為係唔知點算好o者．．．其實班人仔經歷過中五，其實都冇咩話點架喇，我都見一個都同佢地傾幾句咁，只係有個要同我再入房傾，因為佢真係唔知自己既成績可以點攪．．．今次既成績都幾extreme呢，有d人成績唔錯，有d就衰得勁，哈．．．算吧，都要面對現實，唯有根據情況而行吧，必有出路既．．．

下午繼續輕鬆渡過，因為呢幾日好累，都想好好休息下．．．今日有兩個毅進細路去左見ive，聽佢地講都應該ok，所以我都放心．．．希望佢地成功啦！

放工之後回家了，感覺好累，而且有d暈同想嘔，可能係m卦，所以就咁樣喇．．．呢兩日都冇做運動了，因為好累同唔舒服．．．食完飯，就出發去元朗了，今晚陪A仔係中心做到11點半先至走，之後就打的返去，點知誤上賊車，原來個司機係唔識元朗同天水圍既路，佢又唔出聲，足足比佢狂兜路，我地估起步兜多左四，五十蚊囉．．．所以，最後唔理喇，話只係比一百蚊咋，因為個司機自己都認衰，真係話唔識．．．講真，你唔識咪出毐囉，我地帶你路嘛，問題在錢又要比多，同埋打得的都係想快，點知攪左成大半個鐘先返到屋企．．．好灰！返到屋企既時間同搭西鐵冇咩分別囉．．．我最心痛既係，A仔已經好頭痛喇，仲要佢周車勞頓，好心痛佢呀！

返到黎都好夜了，之後都冇咩力量再去做野了．．．明天本來打算去玩的，但係，咩都唔洗諗啦，要留在家陪A仔做野了．．．唉，咁就一日假期冇左喇．．．失望！

>>July 1, 2009 at 2:10:51 PM GMT+8

2009 年 6 月 28 日 星期日 【微雨】

唉~ 今日好黑仔呀．．．都唔知應該從何說起了．．．一早起身，發覺個肚好痛，唉，原來係一個月一次，發現時褲仔已經糟糟了，仲洗唔番乾淨，心情好煩躁呢．．．同A仔講，佢好好，話遲D買番，叫我唔好唔開心，合住對眼都要TUM番我開心，哈，傻豬！好啦，上左西鐵啦，好眼訓，所以訓左陣，去到天水圍，無啦啦有對母子梗硬坐落黎，我都算喇，繼續訓，點知無啦啦唔知咩事，隔離個女人成枝水潑左落我度，仲要係冰水，頂．．．我成身濕晒，仲要醒晒囉，太冰了！唉．．．好討厭！

返到中心，無啦啦老師同我講好趕住整一份野，希望我今日內比到佢，點知，我今日又要見CASE，而且由兩個變成見三個，突然來多左一個，唉．．．今日超超超忙．．．忙都唔緊要，無啦啦又比個阿頭玩低能玩死，真係好怕佢，唔知佢係真低能，真係轉數低，真係咁船尾驚鬼，船頭驚賊，真係好乞人憎，往往係要麻麻煩煩咁去做野，攪到我好火，當我見到佢，聽到佢把聲，知道佢點做野，我就好想打佢，真係好Q煩，好STUPID同STUBBORN．．．好討厭囉！

終於攪左好耐，而家有左結果，就係我隔個星期二返三節，返朝九晚九．．．佢仲叫我不如好似以前咁返星期六唔好放，我心諗，邊有D咁唔公平既事？我果D叫做SPECIAL CASE，咁冇得放星期六就唔算係SPECAIL呀？頂．．．好憎呢個人囉，好討厭！好唔想同佢合作！仲要比佢HEAD住，我而家好唔服囉．．．頂！

成日都好氣頂，好黑仔，好火呀！心情唔好，十萬個唔好．．．

返到屋企，A仔又打比我話佢中心有D麻煩野，又真係對佢黎講係好麻煩既事．．．不過我會幫佢手OVERCOME的，一定可以做到既，放心啦！

今晚要早點訓了，一來好累，二來聽日A-LEVEL放榜，我要早點返去READY定．．．老師話估到今年應該考得唔係太好，都擔心D學生既情緒唔好，所以我都要準備定喇．．．預左聽日會好唔得閒啦．．．

>>June 29, 2009 at 12:56:02 PM GMT+8

2009 年 6 月 27 日 星期六 【雨】

今日d雨仍然係落唔停，真係令人心煩，最怕就係落雨天．．．

今朝好乖，十點三就起身，其實係因為波波佢十點就已經係我房門口度係咁叫我起身，所以唔起都唔得喇．．．起身之後就做運動，一做就做左四十五分鐘，爽呀！而家熱愛做運動時出汗既感覺，真係好舒暢的．．．不過有時卻會上氣不接下氣，哈．．．做完運動，媽媽剛好去食完早餐回家，之後在家做點事野，下午就出左去同屋企人食野，去左海趣坊新開果間赤丸烏冬．．．其實味道真係麻麻地，不過叫做新屎坑就去試下咁啦．．．

食完之後成家人去左行左陣，去左百佳掃貨，買左好多野，跟住就返家了．．．媽媽買了我既至愛水果之一，榴槤，我都忍唔住口食左一粒，真係好想好想食，真係忍唔到口喇．．．不過，只限一粒咁多好了．．．之後，就去市中心join阿A仔，點知A仔未到，所以一個人四圍行住等佢．．．等到佢之後就去行街，本來想去板長食，點知去到要等成一百個位，於是拎左飛就走左去行街．．．行完一個鐘後，諗住碰下運，去到，仲有十張左右，所以決定等喇，終於等到，今次係我第一次係板長食，真係幾OK呀，今餐我作客，因為加左人工嘛！哈，都未請屋企人食飯添，hehe~

食完之後仲去左papagallo度食雪榚添，哈．．．肥死喇．．．食完就回元朗！點知途中肚痛，初時以為係雪榚出事，不過返到屋企就就大爆發了．．．想清楚，應該係海膽問題！因為一向我都對海膽有敏感的，一食即痾，好靈的，不過今次諗住食一片仔咁少應該冇時卦，點知都出事，唉．．．下次唔敢再食了！少少都唔食得呀！太辛苦了．．．

食飯時，同A仔講起好想去挪亞方舟，同佢夾一夾時間日子，起碼都要到八月．．．唉，要等兩個月了！真係好想去映相．．．講起映相，近日好心煩，又想買部netbook，又想買canon新出果部500D喎，唉．．．煩惱呢．．．同A仔諗來諗去，都係決定唔到，好心煩！心想，好想學映相，不過，又知好貴，好矛盾呀！

>>June 28, 2009 at 3:43:59 PM GMT+8

2009 年 6 月 26 日 星期五 【颱風】

嘩，今日D雨好似完全冇停過囉．．．八點九返到中心時，都曾經冇落過雨既，不過當我地一breifing完，要開始行動時，d雨就開始黎囉，唉．．．真係討厭！不過幸好，今日整個過程都好順利，呢個都要感謝主！

我今日主要負責既係．．．霸車位！因為在新office下邊冇乜位泊車，所以要三位靚女幫手霸車位！好慘，企足成日不得止，仲要拎住把遮沐雨先至慘嘛，唉．．．又悶又累，真係好可憐！由九點半企到十二點九，之後食飯，食完再繼續，直至四點終於搬晒所以野上office．．．跟住，就開始執野了．．．真係苦，苦在要搵番自己既野，苦在要自己set番晒d電話電腦，苦在仲要執阿公既野，仲要搵黎搵去．．．真係人都癲！最後，唔理了，同同事五點八就走了，落左大廈下邊間pacific coffee，呢樣野真係唯一最正，隨時一落去就可以嘆咖啡，同埋放工可以出去是但一間bar/pub去happy hour，哈．．．去左pacific同另外兩個同事係度傾密計，飲野，係同事請，我飲左一枝石榴汁，好正！飲完六點先至走人！好爽．．．

本來真係好想去元朗見A仔，因為真係．．．．好．．．．．掛住佢！不過，真係累到周身散晒，完全冇晒力咁，連返屋企既力都差點冇，要拖住個人行．．．所以，好無奈咁打左比佢話聽日先至見．．．我真係好掛住佢呢．．．好想見佢，好想錫佢幾啖，或者好多啖，好想比佢攬住，因為已經成個星期冇見呢．．．嗚．．．快D到聽日啦，可以見到佢嘛！！

>>June 27, 2009 at 1:09:58 PM GMT+8

2009 年 6 月 25 日 星期四 【乍寒還暖】

一朝早睇香港早晨，就知道左一日內死左兩個巨星，一個係MJ，一個係女視星．．．真係好可惜！希望佢地R.I.P啦．．．

其實細細個都有聽過MJ既歌，亦都有睇佢既MV，真係好欣賞佢既舞蹈！自己都有跳舞既，當然會好留意人地跳舞！真係覺佢好勁！不過唯一既係，佢近日既官非太多了，都令我質疑佢份人既本質係如何？！．．．不過，佢在我心目中，永遠都係一個不可代替既天王巨星！MJ，永遠懷念你！．．．

唉，天氣好差，今日有風球，仲係三號，不過講明唔會掛更高風球．．．風開始大了點，雨亦都開始多同密了，好唔喜歡！好似d雨冇點停過咁．．．今日下午約左個細路返黎見，傾左好耐，唔錯！星期一會再見一見佢！

之後放工，回了屋企，好累好累．．．不過，我仍然冇放棄去做運動，因為．．．真係好x肥！（請容許我講句粗口吧！）．．．哈！做運動前，我飲左一杯朱古力，呢杯朱古力就梗係唔係普通野啦，係有幫助減肥既作用既．．．希望真係有效啦，唉．．．今日同A仔傾開呢個減肥既問題，佢都知我好煩惱．．．不過確實真係好煩惱！

聽日中心搬家了，心情都有點新奇，亦有點唔捨得．．．都唔明點解聽朝要一早八點九返到中心？！咁死早？仲有總動員都係咁早？有點浪費人力物力吧．．．

好，要努力呀！預左聽日成日勞動喇，當好好減肥啦．．．OOPS!

>>June 27, 2009 at 1:12:33 PM GMT+8

2009 年 6 月 24 日 星期三 【綿綿細雨】

今日好累，學校琴日開始停課了，所以學校無晒學生，好靜，所以學校往往好喜歡在暑假期間裝修，今次仲可以比平時的快了開始添，所以成日係學校都好嘈，好騷擾，攪到個人好頭痛好心煩咁．．．討厭！

今日同個老師傾緊，想下學年有d其他野攪，而且都聽到有點點消息，學校方面都希望可以搵到其他既錢返黎，做多點有關career既野比學生．．．當然，呢個都係一個時機比我，要做好一點，從而希望可以同學校繼續有合作既機會啦．．．最好既係，學校完全地請我，唔洗比中心食水咁多嘛，呵．．．不過，而家最好先做好自己，表現超水準出黎先，樣樣同學校都say yes，做得既就做，幫得到既就幫囉，一定唔可以hea．．．要努力呀！

放工之後，因為今日約左同事出去油麻地打邊邊，所以放工就出發了．．．出到去太子，行左聯合一陣，本來係我去拎位，點知行行下不知時日過，個同事打比我果陣，已經係六點四，shit！即時走人，都要六點八先去到油麻地花園酒家！大家係約左六點半囉，不過去到都係得雲廸ms一個．．．今次第一次係呢度打邊邊，佢既服務態度好似比起上次旺角間倫敦酒樓好好多．．．食物質數都係差不多啦．．．不過最緊要係可以一班人一齊食野，聚下，同埋歡送個同事阿雲．．．最後找數$150位，ok啦，我地仲叫左個北京填鴨一食喎！飲品任飲，又有雪榚送呢．．．

今餐食飯之前，我阿頭先至聯絡我，話比我知佢星期六中心搬屋時唔係度，叫我幫手睇住一樓既物資．．．我心諗，你同大阿頭兩個自己就放假，我地班細既就要做到隻dog咁，頂！之後，就話我知佢"已經安排左"我新office既位．．．之前又話叫人自己揀，扮晒民主，而家咪又係你安排？！要我坐係你地前面，冇野講．．．真係thanks！辛苦晒！仲要我唔提起，佢都唔記得左要話果日既流程我知，我心諗，你做乜人地個阿頭？好在，有同事已經一早話左我知喇，我都係"裝"下佢會否講，點知佢都係衰左．．．雖然食飯前有咁既惡號，不過我都照常開心食野，冇影響我既心情，真係話知佢死．．．佢都唔知我同緊同事打邊邊咁開心，哈．．．

過程好開心，我都已經就住食，唔敢食多同食得太肥既野．．．但係．．．真係失左手，返到屋企磅，頂，重番晒．．．唉．．．．好心傷！卡路里同fat而家又再次好似信用卡積分咁雙倍回贈比我喇，開心死未？．．．好驚呀！完全見到自己個肥肚腩，真係好似人地有左幾個月身紀咁．．．死得未？好可怕．．．唔通我真係要去搵必瘦站？

食完後大家各散東西．．．真係feel到大家既唔捨得，大家仲講起下次既聚會要係去唱k添！真係好開心識到班好同事．．．感謝主呀！呢個大家庭我真係好喜歡．．．之後，本來見九點十，所以就打個電話比爹地睇下佢放工未，諗住等埋佢，點知佢冇聽，所以同左個好同事，阿雲，兩個一齊行到去旺角，一路行一邊傾．．．阿雲佢今日last day喇，但係d野都未做晒，明天仲要返，好可憐！行到去旺角，終於要分別了，唔捨得呢．．．

阿雲，你要努力呀！加油！大家保持聯絡啦．．．願主保守你平安，快樂．．．

>>June 26, 2009 at 4:09:11 AM GMT+8

2009 年 6 月 23 日 星期二 【綿綿細雨】

唉~ 今朝起身就似暈陀陀咁喇，都唔知咩事？！可能係琴日係街度局親卦，因為琴日出左幾次街，咁樣一冷一熱法，局親真係唔出奇呀！空氣好似好稀薄咁，好辛苦呢．．．d雨又落唔出喎，真係想死．．．又局又熱又悶既天氣幾時可以過左去？！

成日個人都好似好累咁，成日想訓，有時仲會無啦啦訓著左，哈哈．．．

今日中心開左會，講番星期六搬屋既流程同分工．．．嘩，果日要八點九返到中心呢，真係早喇．．．好可憐！要做一日添呢．．．不過，當減肥吧，哈．．．

>>June 24, 2009 at 2:02:47 PM GMT+8

2009 年 6 月 22 日 星期一 【晴】

嘩，計番起，真係好耐冇因為要返工既關係，而需要晨早六點半起身了，今日真係好累好累呢．．．朝早晨早起身，七點鬆就出門口，出到去炮台山剛好八點七，太好了．．．不過，果條咁既死人長命斜真係行死人，只係短短五分鐘，真係可以令人致命！上到去學校，成個汗人咁，真係又尷尬又失禮呀！係咁抺汗，哈！

好在個講座都好順利，我一d都冇出問題，我覺得完全係perfect呀！呵．．．d學生仲問我聽日邊個黎教，知道唔係我超失望囉，哈．．．不過d學生真係有d問題，都唔明點解我阿頭琴日去上完堂，都唔話番d學生既情況我知．．．d學生唔係曳，只係個本身好龍蛇混離！當中有slow learn既，有精神問題既，有自閉既，有attention seeking既，有輕度弱智既，正常既都唔知得幾個仔咁．．．真係幾麻煩！初時我阿頭只係好含糊咁話班人既智商唔係太高！嘩，大佬，智商唔高唔等如係咁既情況卦？真係．．．不過算啦，我今日都冇特登去話佢唔交代清楚，只係．．．比左說話佢聽，我好耐冇試過咁早起身了．．．

今日同事阿mark佢因為屋企冇人湊女，所以帶左個女返中心，我就係咁同佢個女玩，好似冇點做野咁，從中做左佢個保母咁，哈．．．要收番錢呀！不過個妹妹又幾好玩既，對眼又大隻，好可愛！不過有匿招積咁，四歲人仔，講野同脾氣真係成個大人咁，哈！好攪笑！個妹妹都不知幾鍾意我，食lunch時仲話要指明同我坐，連老豆都唔理了，哈，好好笑．．．我都唔知點解，我成日都咁受d細路仔歡迎，哈．．．

下午繼續執中心既物資，因為今個星期六就要搬喇，真係有點唔捨得呢度呢．．．雖然我只在這裡做左五個月度，不過都唔太捨得！今日我阿頭無啦啦請我飲左杯mocha，其實我都唔係太想受佢恩惠，嘩，大佬，真係出得黎行，有排你還呀！不過無奈都接受左！後來四點幾同左個星期四會離職既同事出左去買野返黎請同事食，嘩，天氣真係好局，好辛苦，好似抖唔到氣咁囉，好想死．．．出左去好長時間，又上又落咁，好辛苦！不過，幫朋友仔，沒計啦！

本來我今日係四點半放工的，不過因為要等個同事一齊放工去食飯，所以等到佢五點九先至走．．．我地出左太子，陪佢拎左證書先，再去行花園街，再去左朗豪坊食euro go go，好好味，今餐我請佢啦，因為佢都曾經幫我做過野，而且佢係我細post過我，我都應該請佢既．．．之後同佢去周圍行街，行左兆萬同家樂，都冇買到野，因為仲未出糧！頂！發生咩事？唔通搬屋所以未攪好？哈！

今日可能食d野太混亂了，朝早就完左talk先食左個包，lunch同同事出去食galaxy，我都係左個龍利柳薯菜，再飲左阿頭請杯咖啡，跟住再食埋同事請既蛋達同紙包飲品．．．太多野了，食dinner時無啦啦胃痛，唔知咩事．．．好在有胃藥係身，後來都買定一盒先，好怕胃痛！醫生講過，我可能個人緊張有壓力先會痛．．．唉，how come？

返到屋企十一點了，好累，個胃仲有點痛．．．想點？

>>June 24, 2009 at 6:54:53 AM GMT+8

2009 年 6 月 21 日 星期日 【晴】

今日都冇咩特別，不過，心中有一定壓力，因為明天要晨早去學校講talk，今次學校都睇得個小組好嚴重同緊張，又話會錄影咁，不過．．．我都唔係太擔心既，只係我老細成日比d無型既壓力我咁o者，驚死我整衰中心個名咁，真係好唔喜歡我既上司，好麻煩既一個女人囉．．．頂！

不過算啦，見人講人話，見鬼講鬼話．．．我都ok既，哈！

放工返到屋企好累咁，可以天氣好悶局，不過亦令自己流左唔少汗，順水握舟，當減肥啦，呵！

>>June 24, 2009 at 6:40:17 AM GMT+8

2009 年 6 月 20 日 星期六 【晴】

哈~ 今日曳曳，最後都冇返到教會，因為睡魔狂呼住我地．．．真係有點慚愧！

訓到十點半先醒，哈，之後就食早餐，本來同A仔想去馬灣映相行下，但係見到個天好伕天氣麻麻，而且傾傾下我先至想起今日係爸爸節，所以今晚一定要回家同爹地好好慶祝，雖然之後已經請左佢食飯，送左野比佢，不過都唔可以話今晚就唔陪佢架嘛，一定比佢鬧死．．．

所以索性今日同A仔一齊返屯門，我地一家人一齊去左商場間七福神度食壽司，又真係好抵，最平都係六蚊碟，質數都幾好，唔錯呀！我請客啦，五條友$215埋單，可接受喎．．．之後，我同A仔本想去市中心行既，點知最後都係番商場度行，跟住就返家了．．．

今晚好豐富呢，有帶子有魚有雞咁，正！又食左好多野喇今日．．．死得人喇．．．食完飯仲要食埋蛋糕呢，明天放工回家後要多加努力做運動先得喇．．．睇黎要做多起碼15分鐘運動先至減到D卡路里喇，嗚．．．

>>June 21, 2009 at 3:50:42 PM GMT+8