2009 年 3 月 5 日 星期四 【乍寒還暖】

唉~ 近日d天氣成日都係陰陰濕濕咁，好令人煩悶，好唔想做野，成日個人都好累好累咁，冇晒心機！今日日頭繼續見case，真係車輪轉咁，好辛苦！之後下午繼續要攪活動，班人正一係生番，真係好煩．．．不過，已經好比面，起碼冇中途出左課室走左去，話晒都由頭留到落尾．．．

完左個活動，個人真係累到想死，真係好似冇晒力咁，好累！再做多一個鐘之後，即時走人放工了，因為真係好累，唔想再留係度了！飛奔的走去市中心，等待可愛既A仔既電話，HEHE~ 因為今日約左佢係市中心行，之後一齊返元朗！JOIN佢之後，我地四圍行，但係因為大家都本身拎住好多野，所以都唔敢買野了，行到七點半就走人回元朗！

返到去元朗西鐵站，見到2%有兩折，所以都想入去行個圈．．．當時，A仔好好，佢話我係度行下先，佢就去新明皇拎定位等我，因為怕星期五多人等位，佢想我可以行完街就可以開定位有得食咁話！真係甜到爆呀，哈哈．．．行左陣佢都打黎話有位喇，今日都唔係好多人去食．．．見到成行台既人都係叫十蚊碟既壽司多，冇計啦，而家經濟咁樣，都係食平野架喇，我地都唔另外啦．．．食完就回家了！

今晚電視冇野好睇，而家同A仔狂過學警，今晚又冇得睇，好失望！好累呀今日，要早點訓喇，好在聽日可以晏少少起身O者．．．

>>March 7, 2009 at 3:08:42 PM GMT+8

2009 年 3 月 4 日 星期三 【颱風】

今日d天氣真係恐怖．．．朝早出門口時仲見到有太陽，點知到左十一二點開始，個天就好黑，到左一點幾時，仲好死大雨，簡直係倒水咁，好恐怖！我仲要係最大雨果陣係街度，真係好狼狽，成對鞋濕晒，褲腳都好濕，好可憐！返到office唯有赤住腳，咁先至可以乾番少少．．．

今日冇約學生見呀，所以輕鬆點，可以承機抖一抖，哈．．．不過都有做野架，成日都係準備明天既活動內容，又整ppt又整工作紙同教材，好努力架！仲同左個老師傾左d工作添，我都好努力為中心去搵真銀的，hehe~

放工之後，好趕咁幫妹妹買左一d佢叫我幫佢買既野，之後點知miss左班車，攪到五點八先返到屋企！本來約左A仔接佢放工，點知無啦啦又落好大雨，而且見A仔今日工作好忙，我唔敢吹佢快點走呀，所以索性話唔去佢度喇，等佢好好比心機工作啦！喧　就留番係屋企喇，雖然一早已準備好晒換晒衫諗住出門口，不過都唔緊要啦，因為工作要緊嘛！我知道A仔跟住既工作都會好忙，我唔係擔心咩，最擔心既係佢一忙呢就會成日休息食飯既時間都會亂晒，有時就連飯都冇時間食．．．我擔心就係呢樣野！我好怕咁樣影響佢身體．．．唉！希望佢會好好安排跟住佢既時間啦！我都唔想長氣咁成日提住佢呢，HEHE~ 驚佢怕左我呀，哈．．．

最後A仔佢開OT開到十點先放工，出邊而家係咁閃住電，真係好可怕！相信聽日又係會狂風大雨了，好討厭！

>>March 5, 2009 at 3:20:32 PM GMT+8

2009 年 3 月 3 日 星期二 【暴雨】

唉~ 今日既心情就如天氣一樣，好沉．．．一朝早起身就死死下咁喇，因為超級鼻敏感，不過打噴嚏同流鼻水，個鼻鼻好痕好痕．．．就黎死喇！真係勁唔鍾意春天，因為春天太多花粉飛來飛去喇，而且加上波波都係呢個時間做甩毛怪，佢而家係換毛期呀，所以，唉．．．d毛毛成日一卷卷咁飛來飛去，我唔死就其喇．．．

總知今日成日都個人好唔舒服啦，個頭又尺喎，因為一鼻敏感就係咁，伸鼻水伸到鼻都損埋，個頭又痛又尺，個鼻同眼又痕到爆，真係不如殺左我算喇．．．嗚！

之後約左A仔，等左佢成粒鐘，一個人係市中心行來行去，真係好悶，行都行到厭喇，好悶好無聊．．．所以一D收獲都冇就去西鐵度JOIN左佢喇．．．知道近日A仔成日成為左佢老細既針對對象，真係好激氣，佢老細根本就係一個細路，成日都屎忽痕咁，得閒就扭下屎忽花，好討厭！幸好，我而家既老細唔係咁既人，不過，遲D轉左新架構時我都唔知咩既景象了，有待再重新了解同適應喇．．．

>>March 5, 2009 at 1:58:00 AM GMT+8

2009 年 3 月 2 日 星期一 【陰】

今朝好累呀，因為今朝七點盲　起身了，真係好耐冇試過咁早起身，今朝七點九出門口，就係平時起身既時間，真係唔習慣呢，呵呵．．．好早，未夠九點就出到去油麻地了，約左個同事係九點呢度等，好在同事都準時，我果時仲咬住個飽呢，哈！跟住就同同事一齊上地面搵下楊震係邊，因為真係唔識去．．．好在，好快就搵到，仲好順利添！去到都係黎左小貓三兩隻，我地算好早一批人啦．．．

朝早既課程好悶，好眼訓，因為都係理論性既野，下午去同同事食burger king，好開心，好好味！我地傾左好多野，又可以認識一位好同事，真係開心喇．．．食完我地慢慢行番去！下午課筐較開心，因為係實戰d既野，就係要我地分組做討論，所以時間過得好快，好易過！五點半就完場了，真係好！之後同同事一齊行去旺角，跟住再各散東西！

今日約左表姐同妹妹食飯，仲有表姐兩個朋友！我地去左食和民，表姐請，真係好！我地傾左好多野．．．之後，就去左滿記食甜品，好好味，食左我至愛既榴槤pancake，good~ 跟住就同佢地分手了，表姐明天就出發去十天旅行，要1€4號才回港，之後15號兩點又上機返美國了，所以，如果14號再唔見多次，今日可能係最後一次見面了，所以大家都有點唔捨得囉．．．

所以，而家希望14號會再約食個tea都好，不過．．．最死我果日約左人，而家都要睇睇再點安排啦．．．當然，都係要表姐先架喇．．．因為真係唔知幾時先可以再見了．．．

>>March 3, 2009 at 4:14:01 PM GMT+8

2009 年 3 月 1 日 星期日 【陰】

今朝返工好眼訓，因為琴晚無啦啦四點幾喘過黎，真係衰！唉．．．今朝起身時好累，真係唔多掂咁，不過都頂住返工！

今日都忙架，車輪轉咁見case，真係想死．．．終於捱到放工，之後就拎左個公事包比A仔，拎去山景比佢，之後就陪佢左一陣去左買野食，跟住就返屋企了！返到去好累，所以就訓左陣，之後再食飯！

明天要一早起身，七點起囉，因為要一早九點去到油麻地上堂．．．要訓了！

>>March 3, 2009 at 3:57:45 PM GMT+8

2009 年 2 月 28 日 星期六 【暴雨】

今日十萬個感恩，因為今日終於可以自上年三月教會裝修至今日，第一次可以返番上去崇拜了，好感動！新聖殿真係好靚，個感覺好光猛，好SHARP，好好感覺，哈．．．好鍾意呀！我同A仔都覺得，結婚時都應該唔洗再有太大的裝飾都已經好靚了，呵呵．．．

我地早左返到去，就梗係四圍行下，映下相啦，真係好開心呀！今日崇拜都好似有點唔同左咁，因為儀式上有少少改變！都好好的感覺．．．今日除左係第一次返黎崇拜，亦都係我地聖光堂五十年前擺放時間囊的日子，今日終於要將五十年前放既時間囊拎出黎，同埋再擺過一D新既野落去．．．好正的感覺！而且，我相信A仔感受會大一點，因為上年既同一個時間，佢剛好第一次由我帶回來教會，果時小ME剛去世，於是我決定帶A仔回教會，同牧師傾下計，聽日道咁．．．我仲記得第一次黎果陣，A仔崇拜時仲喊到收唔到聲，佢話感覺好舒服，好感動．．．我當時都好感動呢！今日，A仔係返教會既一周年時間喇，而且剛好係回新聖殿既第一個崇拜，又加上今日咁多特別儀式，所以，我相信A仔真係會好多感受．．．我地都好開心呀！因為可以見證住一個咁重要既時刻！A仔今日就係知今日會好特別，所以請假都要黎呀！我都好感動佢咁做！

完左崇拜，我地有聚餐，食完之後就等埋封個時間囊，都已經二點幾四點了，我同A仔再同爹地媽咪佢地分別，我地自己去行街，之後決定一齊回屯門，我執左好多冬天既衫同一點東西，一次過搭的士去元朗，好累呀！我執左好多好耐野，哈．．．A仔佢就負責煮野食啦，哈．．．好累，不過終於叫做執好左先！不過最慘係個鼻．．．又超級超級鼻敏感了．．．好慘呀！

>>March 1, 2009 at 3:51:00 PM GMT+8

2009 年 2 月 27 日 星期五 【暴雨】

今日返灣仔，但係全朝都係開會．．．今日開兩個月一次既職員會．．．今日好開心，因為．．．在會中，中心大阿姐佢係咁多人面前讚我，佢話我身邊無論係同事，上司，同埋學校既校長都有讚我工作表現好好．．．我真係好開心，發覺原來自己既成功係有人見到的．．．好感恩呀！其實，某程度上，比人讚真係好開心，亦都對於我日後架構轉時有一點幫助，因為至少讓新既上司都知道我係做得野既人，唔係得個樣！不過，同時都有點壓力，因為我唔可以有任何差錯！當然，開心多過壓力既，HEHE~

開完會都係一點，之後同左同事一齊去飲茶．．．始終唔太多機會見同事，而家到今日為止都唔識得晒同認得晒D同事，所以最後都有去飲，而且．．．又唔洗留係中心做野，當然去啦，呵呵．．．飲完茶打比個朋友，本來今日約左佢TEA，點知比人放左飛機．．．算啦，佢都唔想既，我唯有回屯門啦．．．回到屯門唔夠一個鐘，A仔就打比我了，佢想約我早點入元朗陪佢．．．我當然即刻出門口啦．．．入到元朗，我地行左陣，跟住都回家了，A仔又煮野過我食，雖然係家常便飯，不過已經好開心了，呵呵．．．

聽日會同A仔一齊返教會，因為聽日係由上年三月開始裝修後，第一日可以返去新聖殿崇拜，真係好感恩呀！

>>March 1, 2009 at 3:40:28 PM GMT+8

2009 年 2 月 26 日 星期四 【晴】

今日返工都好忙，因為琴日有d學生約埋係今日見，朝早本來約左好早前失左約既學生，點知最後都係得兩個黎左，於是乎我再搵佢地黎搵我．．．下午要趕準備下午個活動內容，好在之前已經準備好多，所以都唔係太急！下午個活動我覺得d學生唔太得，太唔留心，成日都掛住玩，始終兩班唔同既人group埋一齊上堂真係難d控制．．．死左下星期再有囉，都唔知點攪？！

完左個活動，仲要見多兩隻case，係朝早失左約既兩隻．．．真係好，最後成班5D班已經見晒喇，太好了！而家要努力埋個5E班喇．．．見完人都已經四點半有多了，因為放工趕住起，所以早了五分鐘走人！放工返左屋企，放低晒野，換左件衫，再出街了，因為表姐佢今日十二點幾打比我話今晚冇節目，於是我就話同佢地去唱K啦．．．今晚去左尖咀間REDBOX唱，因為琴日起全線加洲紅都有7折，所以都好抵！今晚狂唱歌，不過係歌D舊歌多，因為表姐果兩個朋友唔太識D新歌，點知佢地都係唔太識唱．．．最後我本來諗住玩下野唱下男歌星既歌，我點左林峰，點知表姐其中一個朋友係識唱架，原來發現D劇集歌佢地會識多點，因為係美國佢地都有睇香港既劇集，哈哈．．．真係好好笑！

唱完我地行左陣UNIQUOLO，佢地又執到平野．．．之後十點半了，我都要走，因為聽日仲要返工．．．希望下星期可以再同佢地見面啦．．．今晚玩得好開心呢．．．

>>March 1, 2009 at 3:32:04 PM GMT+8

2009 年 2 月 25 日 星期三 【晴】

因為琴晚夜返，所以今朝好好好累．．．遲左出門口，不過都準時返到學校！返到去好趕，是闔今朝約左d學生9:30就見，點知個學生我一見由9:30見到11點，因為佢太多問題要問喇，攪到原本見10點果個都要調到聽日見，哈．．．

之後11點我就超趕執野，趕到死死下，因為要趕時間出去沙田講talk．．．上到263時已經係11點30分了，幾驚呀，因為個talk要12:25開始囉，去到沙田市中心仲要轉架282上新田圍，呢個地方我完全未去過，都要時間搵架，所以十分擔心．．．好在，去到沙田市中心係12點10分，即時去到車站又有架282，而學校剛好係落車個站附近，所以12點20分就入到學校，都好好彩！班學生太乖了，乖到我有點覺悶！哈．．．可能對得多曳仔啦，好怕對住乖仔，好似太叻同冇咩反應咁囉！

完左個talk大約1點10分，我就再搭番架282返去沙田市中心，之後承機四周圍行下啦，跟住就見兩點，就走左去triple' o 度買個餐食．．．好鬼貴，成$66囉個餐，有一個煙肉芝士漢堡，薯條，同埋一杯雀檸．．．個包好大個，我d薯條都食唔晒，最後拎左返學校後再拎埋返屋企，哈！返到去學校，已經係三點半了！繼續好忙，因為聽日有個talk比班毅進仔，所以係咁準備d野，攪到五點先知已經係放工既時間，當時好在已經攪好，真開心．．．可以走人！

返到屋企本來好想訓陣，不過又唔敢訓，怕今晚訓唔到，於是死忍．．．好辛苦！今晚得我同妹妹食飯，因為媽媽又去左澳門，係，又．．．去左澳門！唉！好無奈！澳門有咩咁多玩？都係莫過於去賭場！唉．．．唔明囉！

今日聽妹妹講，d日本yen又低左，而家終於回番去$8．．．如果可以繼續跌就好啦，跌番去$6,7就好喇，咁我就好有衝動想去日本了，哈．．．好想好想去旅行呢．．．好想好好relax同休息！或者一個short trip都唔錯，再唔係．．．去深圳一次dup個骨都好丫，因為真係好累好累，我d骨好似老左十年咁，硬到好似機械人咁，好辛苦呀！我都唔知係個人既問題，定係張床既問題，定係個枕頭個問題囉．．．總知係，條頸，膊頭，條腰，手臂．．．成個人都好痛好累好硬蹦蹦咁啦．．．想死呀！我想黎個終極按摩呀．．．

>>February 26, 2009 at 2:21:57 PM GMT+8

2009 年 2 月 24 日 星期二 【晴】

今日朝早約左d學生見，全部放晒飛機．．．不過，唔代表我呢個朝早冇野做，是關又有case攪攪震．．．咪就係果隻有強迫症果隻囉！個細路一朝早係我返工果陣，大約八點十度，已經係校務處度流連，我仲話佢仲乜企正係路中心，阻住老師出入！個細路又話好驚喇，唉．．．都唔知點攪好！佢個情況好似惡化左，於是過陣同事都帶左佢去搵學校社工！好在咋，平時呢個逢星期三個ssw都係非駐校架，唔知點解今日又係度喎，我幾驚又要我去handle，因為真係好浪費時間．．．

十點幾度，個ssw本來同個clt傾緊，之後走左過我房問我意見，應該點攪好？！我心諗：你隻case黎架，你問番我轉頭？．．．不過，我都好好人咁同佢講番上星期三既情況，同埋都講左句”唔知點解個case總係喜歡在星期三你唔係度時發作的？”，想”鼓勵”下佢逢星期三留意下啦！之後，我都講番上次同個case傾過d乜，都介紹左個計劃比個ssw知．．．不過，個ssw好似完全冇聽過囉．．．唉，點做社工架？我之前個同事話呢個ssw成日唔做野，又鍾意瀉膊，我而家信喇！之後，個ssw話case個媽媽黎左，佢想我幫佢手同個阿媽介紹番個計劃！我同佢講其實兩星期前已經講過，不過今次係想比個仔知多少少．．．佢即刻 O 左咀．．．

十一點度，個阿媽同細路去左我度，我就同佢地傾左個計劃內容，亦都了解下個仔想點！但係都係預料之內，個仔都係呆呆地，我於是都係比左時間佢返屋企同爹地媽咪商量．．．個阿媽好似比上次軟化左，可能都見到個仔係學校真係唔太穩定，加上我都再三介紹個計劃係有幾適合啦，或者阿媽真係會考慮！如果係既我就要做野喇．．．

十二點，終於有個case自動過黎，真係thanks god，仲以為今朝會放晒飛機．．．見完個case就已經食lunch了，好似時間過得好快咁！下午學生返黎點名果陣，我就走左去鬧人，是關d學生太衰，連續放左我好幾次飛機喇，我直頭匈佢地話見我係學校既要求，佢地唔見我，我唯有同學校報告番佢地係冇黎．．．即時，阿sir都尾尾笑，d學生都驚驚地，呵．．．原來都有效！殺一警百嘛！

下午繼續見case，不過有隻放左飛機，都好，見得幾多得幾多，密d黎密d手啦．．．唉，臨放工前都要趕埋明天出去沙田循道衛理中學講talk既野，真係煩！好忙好趕！仲要問同事點樣去，因為真係唔熟沙田！放工早左五分鐘走，因為今晚約左表姐佢地七點係尖咀，想早點回家放低野先走．．．

今晚去左鼎泰豐度食，真係好豐富，好味！我第一次食香港呢間！佢入邊既職員會同你講國語，都幾特別！我地都食得好開心，表姐帶埋兩個朋友黎一齊玩，都好開心！食完飯，我地行左去加連威老道果頭，入左龍成之後就瘋狂咁購物，我都買左兩盒美麗日記mask，因為太抵了，只係$52．．．我諗都係香港最抵係佢！我會再去龍成買野囉，太抵喇，又多野揀，正！行完之後大家行埋個b+ab，我地就各散東西了．．．希望星期一或二可以再約啦．．．

>>February 26, 2009 at 1:32:05 AM GMT+8