2009 年 6 月 9 日 星期二 【綿綿細雨】

今日大天氣都係時好時壞咁，真係令人煩惱！今朝早A仔打電話比我，話佢返工途中經過馬路，見到有隻小貓被車車死了，頭部被車壓扁了，十分可憐！唉，當刻聽到都心中痛了一痛，覺得為什麼要這樣待這隻可憐既小貓，已經成為流浪貓，仲要遇著咁既遭遇．．．我唯有的是，為貓貓佢祈禱，希望佢去到天父神的旁邊，可以是快快樂樂的，不會再被人欺負，亦會有飽足，得到天父神既愛．．．我知道A仔為了此事心情都變得不好了，希望佢都可以快點平復！事情都已發生了，唯有的是希望避免日後再有同類事件發生，我們真係要多加努力去做多一點，可以做到的都要去做．．．

整天在學校都沒什麼特別！學校今日畢業典禮，朝早我亦有參與．．．朝早返到去，見到我中心送的花籃，放左係校務處旁，而且都整得幾靚．．．呀，想起星期六要CLAIM番d$先，呵呵．．．

放工後，去左元朗屋企下面做gym，因為要積極鍛鍊身體，同埋要好好keep fit了．．．見到自己的樣子，真係有點不堪的感覺呢．．．唉．．．天呀！

頭先做gym時，我阿頭打比我，要我星期六開OT，帶班學生去攀登．．．冇既，當自己玩埋一份囉，都得架，哈哈！不過星期六晚就趕D囉，因為約左屋企人去市中心食飯呢．．．

>>June 10, 2009 at 1:10:30 PM GMT+8

2009 年 6 月 8 日 星期一 【乍寒還暖】

嘩，今朝一早出到去灣仔，因為成日都要教展翅，感覺有點死．．．今次個班有成十幾人，而且仲有點OR仔，不過都可以處理得到．．．上午完左堂，就出中心門口，見到有吉野家人派coupon，所以去左買黎食，買左個海苔菇泡飯，幾正！之後行緊返中心時，無啦啦落大雨，真係好論盡呢，成個人濕晒呀，有遮都冇用呀！可憐！

返到中心快手食野，之後聽番同事講出左事，今日班展翅同隔離班既人有衝突，同事已經處理緊，真係麻煩！後來，我去上堂時都再提醒同學，希望佢地明白問題，亦都可以從中學習！

完左展翅返左中心，好無聊咁hea埋個大半粒鐘去．．．之後，有個好同事加朋友發生左事，都知佢好唔開心．．．希望佢唔好唔開心啦，我會支持佢的．．．

返到屋企，同事再打比我傾左一陣電話．．．唉！我知佢而家好矛盾，唔知點處理好！希望神可以給予佢勇氣同清醒既頭腦，好好為自己既問題去找出解決方法啦．．．

>>June 10, 2009 at 7:49:04 AM GMT+8

2009 年 6 月 7 日 星期日 【乍寒還暖】

wow~ 今日落雨呢，真係令人心情都唔多好喇．．．今日係學校都係準備明天返灣仔教展翅既野，不過都好快攪掂啦，哈！

放工後都好累，回左家，個頭好痛，有點想嘔咁，唔知咩事？！之後收到妹妹既電話，佢話想去市中心買野，叫我陪佢去，後來都去陪左佢買野．．．自己都買左一套運動裝，希望可以推使到自己更加努力做運動！著住靚衫做運動，人都醒神d架！

今日傾左好多電話，分鐘好似用左好多咁，哈．．．唔知點解咁多野傾啦．．．yeah~

>>June 10, 2009 at 7:17:02 AM GMT+8

2009 年 6 月 6 日 星期六 【綿綿細雨】

今日好早起呀，真係開始有點吃不消的感覺．．．好累好眼訓！今日係聖光堂既83周年堂慶，其實係指在東院道呢度83周年咋，之前聖光堂係燈籠洲果邊架，哈．．．完左崇拜，就梗係我地堂慶聚會啦，有好多野食呀，不過我都唔敢食太多同食太heavy既野，都係食下菜，食下少少甜品，仲有2隻雞翼咁啦．．．不過，確實唔太飽架，唉．．．真係唔敢食太多肥野呢！之後，同左妹妹出去行街，因為妹妹話要睇一d做運動用既衫．．．佢同朋友join左physical呀，又唔預我份，真係．．．睇完都係發覺addias果d係最靚，不過就幾貴下囉，睇中左一條褲，要成二百幾三百蚊囉．．．

因為今晚要去city同學，珍妮花個wedding，其實都唔係太想去，因為真係唔熟，不過逃不過這一次，所以就要由朝捱到六點佢簽紙先可以入場．．．跟住，因為我有太多時間，所以陪左妹妹搭港鐵去到南昌．．．激死，原來妹妹係唔識得搭車架，我同佢由銅鑼灣搭到去中環，之後妹妹就唔知點樣轉車去東涌線．．．好啦，上左東涌線去到南昌站，佢又唔識得要落車轉西鐵．．．真係．．．暈左！我去到南昌站出車，之後唔見佢，就係咁好似傻婆咁叫佢落車，佢又唔理我，最後都係上車拉佢出車．．．人地見到以為我痴線架！．．．好無奈！

係南昌分別後，我就再搭702去旺角，哈，真係浪費車錢，不過我太多時間了！去到旺角，係花園街落左車，所以就行左陣花園街，不過真係d衫好唔o岩心水，所以一d都睇唔上眼！跟住行左去聯合，先至有少少心機睇下，始終真係唔同質數！不過都只係行左一層咋，因為唔太多時間！最後係聯合買左一件衫！跟住就搭地鐵過九龍灣了．．．

去到九龍灣上到德福平台，完全唔知德藝會係邊，所以打比個朋友！好在佢都係附近了，所以一齊上去！其實有點後悔太早去到，因為最後都係得我，cyan同士丹尼，飛安同阿mark傻4個人我識既人一齊觀禮，其他人初時又話六點到最後都係八點先至到．．．原來律師簽紙結婚個儀式真係好簡單，又快手，係咁易講兩句就禮成，真係．．．

今晚呢餐我覺得真係麻麻．．．頭盤乳豬，個個都彈到不堪，又韌又肥，真係食到．．．xyz)%*#)%，其他送都係普通野，我估佢地一圍都係大約四千蚊貨仔！服務又差，又乸西，唉．．．而且，個新娘個妝又化得唔靚，d衫又差（個女仔皮膚係偏黑架嘛，有乜理由著橙黃色既裙？仲有著紅色裙時，背脊穿左崩，見到有膠紙！都唔知個化妝師點攪架．．．）係最後佢送客果條褀袍唔錯，我都幾喜歡！仲有激氣既係，佢d攝影師都幾唔識做，仲有主人家都係，我地成圍幾city同學，都冇叫過我地去映過一張大合照，點安排架！等我地一心諗住會有機會映相，點知．．．真係有點唔識做囉！攝影師又係，我地都係自己圍內捉住珍妮花映相，自己人做番camera man咋，真係．．．點攪架？！

今次呢五百蚊入場費，我覺得不太值了，哈，食已經唔好，連服務同起碼連至少有靚人靚衫都冇囉，真係．．．我都好明白，到我果時，人地都必會有野彈，所以，真係先要做好安排同所以野，唔可以有出錯同比人彈既空間呀！同飛安傾開我婚禮既事，佢都話我真係時候要安排下個rundown，要好好準備下．．．我都知，但係自己真係完全一頭霧水呢，唉！可能真係遲d要各飛安請教下喇．．．

我最後11點走，頂唔順了，其實已經捱左一整日，真係疲於奔命！返到屋企，12點3，都算早了，唉．．．好累好眼訓喇．．．

>>June 8, 2009 at 3:03:42 AM GMT+8

2009 年 6 月 5 日 星期五 【晴】

好在琴晚都不是太夜訓，都叫做可以多少少時間訓下．．．今日食左個好豐富既早餐，唉．．．不斷在計算著卡路里．．．真係．．．唔敢望！今日得一個人在office，因為一個同事去左教班，另一個就SL左．．．所以十分free咁一個人在office度hea，哈．．．

放工了，回了屯門！同左媽媽去海趣坊新開果間赤丸面度食．．．佢係專食烏冬的，都有好幾間分店，之前以我所知就係九龍灣有囉，不過都冇試過，今日終於試左，都幾ok，d烏冬都好味，今餐我請媽媽啦，因為係我話黎呢度食既，兩個都係食左唔洗一百蚊，ok丫！之後返左屋企，好累，走左上床訓，點知都係同媽媽係度傾計，傾到七點幾都係起身喇，都基本上冇訓過，哈．．．

夜晚同左屋企人去食飯，食完飯就買雪榚食．．．唉，卡路里呢．．．不過，又好想食喎！聽朝要一早起身呢，仲要捱一日，好可憐！

>>June 8, 2009 at 2:08:18 AM GMT+8

2009 年 6 月 4 日 星期四 【晴】

嘩，今日好眼訓，因為琴晚都好夜先至返到屋企啦．．．不過，都值得既一晚．．．今日睇報紙講番琴晚晚會既消息，心中不免有點震奮！真係好感動！自己身為香港人，可以成為15萬份之1，真係好驕傲！！要加油！繼續堅持平反六四．．．

今朝因為好眼訓，所以成日個人都好遊魂．．．放工後，去左A仔度，佢今日放假，真係開心！好羨慕呀！返到元朗，一個人都冇，原來佢同媽媽落左街買野．．．我就同貓貓妹妹玩，好攪笑．．．

今晚A仔又煮野比我食了，係豐富既煙三文魚加魚柳漢堡！係好味，不過．．．肥肥呀！死啦，都完全無從入手如何減肥了．．．好慘！

>>June 8, 2009 at 2:01:13 AM GMT+8

2009 年 6 月 3 日 星期三 【晴】

真係好感恩，琴晚十一點幾落完果場超大雷雨之後，今日就成日都冇落過雨喇，真係好感謝神！今日係學校好急咁準備黎緊暑假既工作，因為班細路考埋聽日就考完個試喇，所以好急好急．．．因為太多野要confirm！係學校離開後，就準備出去參加6.4晚會．．．

我先搭西鐵去到元朗，同A仔一齊食左個早既dinner先，食完之後先再出去銅鑼灣．．．嘩，去到地鐵站超多人囉，真伙嚇親．．．我今日做左一件好魚既事，真係未發生過．．．話說我買左張西鐵既全日通用，我出到去南昌站時我係應該先出西鐵閘，之後再入番地鐵閘，點知我係忘記左囉，出到去銅鑼灣時突然一醒，唔知要拎八達通定全日通出黎出閘，哈，咁先至發現左自己傻左．．．之後走左去詢問處，個姐姐幫我整番張全日通，之後要用cash補番八達通呢程地鐵，之後再比左佢臨時出閘票我，哈，好魚皮囉．．．

出到地鐵，超多人，我地仲要等埋幾個朋友，朋友遲到，攪到我地好晏先入到維園，都差不多八點半．．．其實一路行入去，迫入去時，都感到今次應該會係超多人參加．．．我地入唔到足球場呀，激氣，只可以入到草地．．．唉，真係從來未試過坐草地咁後囉，唔開心！冇晒氣氛同氣勢！今次可以成為十五萬份之一，真係好驕傲呢．．．香港係永遠不會忘記6.4的！要堅持到底呀．．．抗戰20年！

今次晚會，發覺多左好多年輕人同小朋友出席．．．其實真係好事，因為後一代真係要清楚了解事實真相，唔可以再咁樣比政府蒙蔽落去囉．．．真係好感動，見到好多父母都帶埋自己小朋友黎，教導佢地6.4既真相，讓佢地知道佢地未來係有一個使命，就係要平反6.4！要加油呀！難得既係，見到一班而家既所謂Y世代既人都有黎，真係感動．．．要薪火相傳呢！

十點零完左個晚會，我地都仲留多一陣，行番去足球場果邊睇下個舞台同其他野．．．A仔今日帶左部新DV去，映左好多相同片．．．好期待去睇呀！跟住搭西鐵回屯門，好在有位坐咋，去到屯門站，因為又唔知仲有冇巴士返屋企，所以都係走左去市中心搭小巴返，唉，真係老土，等左好耐，攪到成12點4先返到屋企，已經好累好夜了．．．不過多謝A仔，佢一路陪住我傾住電話返到屋企，等我唔洗咁悶，同埋佢都擔心我太夜了．．．錫晒佢！

>>June 5, 2009 at 4:05:58 AM GMT+8

2009 年 6 月 2 日 星期二 【乍寒還暖】

今朝返工先黎落雨，真係．．．麻煩呀！一出門口就落出，早少少果陣又唔見佢落喎，真係．．．攪到d車既時間都遲晒，今日遲左少少先返到學校囉，唉．．．

唉，今日同個朋友講開減肥既問題．．．朋友佢而家join左個活動，可以免費減肥，仲有營養師跟進，真係正！我好想減呀，因為肥左太多了，真係好怕會著唔番件婚紗呢，好怕好怕．．．決要減肥，所以向朋友取了好多心得呀，希望可以減到啦．．．離正式結婚日子淨番唔太多時間咋，好似好多野都未去做，例如要開始去做番facial，要開始keep fit，要好好改善身體狀況，要處理好皮膚問題，例如想搵方法去除面上的雀斑，去除黑眼圈，豆豆同暗瘡印等．．．好煩呀，點解我咁多問題架，唉．．．想要做一個超靚超完美既新娘子真係一d都唔易呀！唔止要花心機，時間，堅持，決心，精神，仲有係金錢．．．唉，又想靚，但係又唔想花太多既錢，真係好頭痕架．．．唉，黎緊呢半年，我相信真係會有一定壓力，因為好多野要做，而且都辰做到有效果添，頭痛呀．．．

有時發覺自己實在係太胃食了，所以就係咁肥落去，即使自己已好懂得點樣去選擇食物，好多都係少油少鹽少甜低卡，但係都唔知點解會肥囉，真係唔明白．．．人地話食少d飯，我就餐餐都食唔夠半碗的，人地話多菜少肉呢，我其實都係架喎，我阿媽煮野又係少油少鹽既，我都係食果d野架，而且果d好甜既飲品我都極甜飲既，咁點解．．．．．？？？？？短時間內會肥左咁多磅呢？how come？

放工後去左接A仔放工，點知佢超多野做，我等左佢粒幾鐘先走人．．．不過明白既，做野要緊嘛．．．跟住返元朗，A仔煮左個好好味既雞堡我食，真係肥死，呵呵．．．不過真係好好味，hehe~ 本來今日打算早返黎可以去做一個鐘頭gym，不過今日太夜了．．．決定之後一個星期去做一次gym，我今日又叫過個同事遲d一星期去跑步或者打波一次，真係要做運動keep fit呀！！聽日開始，要再食少d野，將所有零食都拎走去，唔可以再見到喇，放工返到屋企都唔食零食，唔再食雪榚，朱古力．．．不過，好似好慘咁．．．嗚！要靚就要決心呀！！堅持！！！

頭先玩左A仔新買部DV，好好玩，好期待聽日拎出去參加6.4燭光晚會時用呢．．．當然最好可以快點有機會去玩玩可以拍野啦．．．

>>June 3, 2009 at 2:32:52 PM GMT+8

2009 年 6 月 1 日 星期一 【微雨】

今日返到中心個人好累，可能因為琴晚食左藥訓，所以個人仲係wing wing地咁．．．今朝一早八點九A仔就打電話比我喇，我初時以為佢返早添，所以咁早打比我，點知原來佢成晚都失眠，所以冇訓過，真係好可憐呀！唉．．．

今朝早都係準備下午做apprasial份野，其實，真係冇乜野寫，於是都係做下無聊野咁．．．好快到左下午，原本兩點半約左阿姐做apprasial，點知阿姐要見interviewee，所以攪到三點先有時間見我．．．我地好快傾完喇，三點五傾完，超快，只係用左二十分鐘，哈．．．其實都冇咩特別野傾．．．哈，同事話因為我太好所以冇咩野要講．．．都唔係既，其實係我時間太短啦，要講既野都唔多囉，而且事實又真係冇咩特別野呢，哈．．．

下午繼續hea落去，上網，傾msn咁．．．後來A仔話我知佢今日買左部DV機，哈，好野，又有新野玩了，GOOD~ 第日去旅行去玩玩可以拍片片了，好開心呢．．．YEAH~ 之後，有個同事約我話想放工搵我陪佢行街，咁我又見A仔話眼訓要訓了，所以我都邀左約．．．

放工後同同事一齊去左旺角，原來我個同事佢買起野黎可以仲瘋狂過我呢，哈哈．．．而且發覺大家好夾，原來都係傻婆一個，所以好開心！又識多個朋友加同事了．．．好感恩！不過呢個同事黎緊六月尾就完CONTRACT了，真係唔捨得佢．．．不過，呢個人可以繼續成為朋友的！呢個同事就買左好多野呀，我都要阻止佢呢．．．我地係旺中行時，見到有果D撈野買，其實我未食過架，不過個同事話食，就一於試下，$5有三包，同事話藍田果度仲平喎，今次佢請我食，我食左帶子裙邊加冷面同青瓜，感覺都唔錯丫！跟住繼續行呀行，我最後買左一件外套同兩條頭飾．．．

行完旺中，我地見九點，於是去左食野，去左平日成日同A仔去食果間平野，食魚旦粉．．．今餐就我請同事啦，一來都係好平O者，二來知佢人工都唔高架喇，買左咁多野，我都請下佢啦，朋友仔冇計架啦．．．哈！十點零鐘走人了，我回程屯門時，覺得好急急，好可憐，忍左成程車，好在冇賴咋，哈哈．．．

>>June 3, 2009 at 2:48:29 AM GMT+8

2009 年 5 月 31 日 星期日 【晴】

今朝6點零鐘就醒左喇，其實琴晚都訓得麻麻地，唉．．．呢兩日都係咁，可能d空氣指數太差喇，成日都係鼻敏感咁，攪到d鼻水係咁倒流，成晚都好多痰，又咳又有點喘！好討厭！

朝早起身都唔太妥了，唉，個頭好痛，個鼻好塞，個喉嚨好多痰，辛苦！今朝同左學校傾15/6個camp既野，傾傾下學校都係話唔攪，哈，好事，唔洗煩啦．．．

下午去左食車仔面，盡量想食得少d同清啖d，因為唔想再肥喇，琴日磅過黎，已經100 lb.喇，唔可以再肥，唔係，應該係話要減囉，唉．．．唔可以再係咁，因為已經苔唔番條婚紗了！要努力減減呀！一定要！

放工返左屋企，個頭好痛，個人好累，個頭尺到爆．．．所以走左去訓，訓醒都係咁，好辛苦！都唔知咩事？唔想病呀．．．

>>June 1, 2009 at 2:30:33 PM GMT+8