2009 年 8 月 18 日 星期二 【晴】

今日出門口返工時，好在d鼻敏感好番好多喇，不過返到學校，一入房，唉，又開始鼻痕了，好辛苦！都唔知點解架，學校社工房部冷氣好早前，即係學校一開始放暑假前已經洗左架喇，都係咁，所以完全唔知咩事？！好討厭！

十點幾收到A仔既電話，佢今日放假，不過都好早起身，因為一早要出去灣仔處理D天使社群既事務．．．到左12點，我就食琴日A仔買比我既烏冬杯面．．．好似麻麻地好食，而且份量真係唔太多，如果A仔一定係唔夠食！食過就算，唔會再買！一路食烏冬，我又一路睇還珠格格，哈！A仔佢呀，又話等埋我一齊睇，點知佢呀一次過睇晒第一集呀，而家已經睇緊第二集既頭兩集喇，衰到死．．．我唯有自己追番睇啦，今日快scan左第一集既第20集！之後1點就走人，快手出去灣仔，因為今日下午要返中心．．．我地邀請左A仔去我中心教我地同事玩一個棋"成功在望"．．．

出到去後，係中心hea左陣，A仔就到達喇．．．今次過程都順利，係互動較少，問題出於係我d同事而唔係我同A仔．．．唉！我D同事真係實在太fresh了，好無奈！完左之後，同A仔一齊走喇，我地本來打算去PACIFIC COFFEE度食TEA，不過後來決定去檀島度食．．．我好放肆呀，食左好多好FAT既野，包括，炸雞翼一隻，牛油TOAST一片，幾舊西多．．．好肥呀！走果時仲吃左件蛋糕添，有同事請的．．．好肥呀！！死未？今個星期仲要係完全冇時間去做gym喎，好無奈！完全冇運動既一個星期囉．．．下個星期都怕去唔到，一來知道好快有姨媽探親，二來下星期可能會忙，所以．．．真係冇眼睇呀！唯有食方面好好控制啦！嗚．．．

食完tea，我地行左陣，去左東方188，跟住見到萬寧派傳單話唯一呢間店買滿天$120可以有9折，所以就走左去睇野，咁又買左百六蚊野喇，不過都係日常用品，沐浴露，洗頭水呢d啦，哈！買完野，就搭丁丁去A仔家姐屋企，順手去痴餐同見下澄澄B啦．．．澄澄好似又大個左好多，而家成日要企係度，又好鍾意多手攪野，好攪笑好可愛！

食完飯，我地九點三走人了，我地決定試一試係尖東搭西鐵返去．．．發覺時間係快少少既，因為至少東涌線唔洗等好耐．．．好事！不過真係多左好多人搭西鐵呀，係尖東都已經冇咩位坐喇，去到南昌完全係冇添呀！A仔好快返到元朗，而我就去到屯門站就等左好耐先有506，我從來未見過等506條龍係長到轉彎，龍尾係上西鐵既電梯口囉，好可怕！所以返到去都成11點了，唉．．．

>>August 20, 2009 at 2:32:30 AM GMT+8

2009 年 8 月 17 日 星期一 【晴】

世上各種既生物都係有其生命力，有其生存既地位同權利，有得選擇，亦有其不同既需要同尊嚴．．．基本上，佢地應該係無分彼此，無分高低．．．

但係，我開始感覺到，我真係連動物都比不上，我．．．唔想再同d動物去爭，唔想再同d動物去鬥！根本我從來都唔想，亦都冇諗過要同佢地爭同鬥什麼？算吧，我投降喇！我並唔係唔愛動物，我很愛佢地，但係．．．有時就好似人與人之間咁，總會有”人夾人緣”，動物同人都一樣，我唔狠佢，我同佢有緣可以認識，但係偏偏有d野佢係會影響到我既生活，甚至生命，咁我可以點樣選擇？就正如，雖然波波都會影響到我，但我仍然堅持要養波波，就係因為一份對動物權利的堅持！但係無奈既係，我同動物之間就係有永不磨滅既前世因仇，佢既毛毛會令我敏感／氣喘發作．．．這個係無人想的，even係我或者動物．．．所以好無奈呀！

>>August 20, 2009 at 2:33:50 AM GMT+8

2009 年 8 月 16 日 星期日 【晴】

hehe~ 今日擺左個大烏龍囉，哈．．．算吧．．．係自己諗多左，會錯左意．．．o車，你唔講，我又點知喎．．．

嬲左個朝早，最後都攪番清楚件事，原來係自己擺左烏龍，o希．．．好樣衰呀！

食lunch時無啦啦去左youtube度睇還珠格格，哈，睇到唔識收．．．有點攪笑，估到估唔到無啦啦睇番呢套野，講比妹妹知，笑到訓地！

放工之後，返左屋企hea左陣，之後再出門口出去荃灣．．．因為約左兩個好友，老布同女神，哈！佢地兩隻小鬼神神秘秘咁，後來帶左我去深井，原來同我去左一間意大利餐廳．．．初時坐係露天，不過後來太熱，頂唔順，都係入室內．．．我地叫左兩碟墨汁面同一碟天使面，好good，我仲飲埋石榴汁，好fresh呢~ 最後仲食埋甜品，係芝士餅，好正呀！好開心．．．成程大家好多說不盡昸話，仲有好多笑話，哈．．．什麼”做暑期工冇帶頭盔入地盤扑穿左個頭．．．”，真係笑爆咀！

後來埋左單，仲繼續坐係度，係咁傾計，傾到人地差d要打烊！哈．．．不過，最開心既係，原來佢地神神秘秘就係想今餐係慶我生日，所以佢地爭住要請我，我都唔好意思，因為食得都好貴，百幾蚊一個人喎．．．所以，遲d佢地生日一定要請番佢地呀！

好感恩認識到呢兩個好朋友．．．老布，女神．．．我愛你地呀！

>>August 18, 2009 at 3:41:34 AM GMT+8

2009 年 8 月 15 日 星期六 【晴】

琴晚一直諗住今日返教會的，不過最後．．．睡魔急CALL，起唔到身呢，哈．．．最後訓到差不多十二點先識得醒．．．醒左後，係咁做左三十分鐘運動．．．難受自己的肥肚腩呢，見住佢一日比一日脹大既時候，真係好想一刀切走左佢呢，嗚．．．

之後，妹妹都成十二點九先至起身，跟住我地決定一齊執下房．．．掉左好多野，妹妹好多垃圾，成日都唔執野，好似垃圾婆咁，唉．．．執到咁上下，媽媽同爹地回來屯門了，叫左我地落去食野，食完野一齊買送，之後一齊回家，繼續我地未執完既野．．．

比妹妹激死，成日吹佢幫我整既結婚卡．．．唉．．．成日得個拖字，連爹地媽媽都話佢份人差，成日都拖，推三推四．．．真係好激氣！希望佢快手整啦，好煩呀！我都唔想成日鬧人架嘛，你估鬧人好受架咩？好勞氣架，都唔知會死幾多細胞．．．近日，可能成日脾氣同心情唔太好，所以出左好多粒粒，係晒額頭呀！自問又唔係食好多熱氣野，真係一星期都冇點食一次，真係連薯片都戒左好耐了．．．都唔知咩原因，好煩惱！唔想見到D粒粒呀．．．睇D雜誌講，我應該係好多毒素係身體內，所以先出粒粒，甩頭髮，出斑，有口氣，成日生飛滋．．．唉．．．我而家已經日日食蘋果架啦，仲食多左好多生果同蔬菜，仲要自己至少一日都要去一次便便．．．有乜理由仲係咁架？HOW COME？想死．．．

今日A仔去完CAMP，聽講十分順利，真係好事．．．知佢好累了，所以都特意唔去元朗嘈住佢了，讓佢好好的睡一覺好的吧．．．

>>August 17, 2009 at 3:20:36 AM GMT+8

2009 年 8 月 14 日 星期五 【晴】

嘩哈哈．．．今日訓到十一點先起身，太好了．．．起身後食粟米片，係琴日係百佳買的，超大盒既家樂氏，哈．．．之後睇電視，原來亞視而家重播”還珠格格”，我同A仔係咁追睇，完埋新聞，以為完啦，點知繼續有得做，哈，做到三點幾我地出門口時，我估會繼續做落去囉，哈．．．亞視而家慘到咁呀？冇節目到係咁播買番黎既片．．．唉！

之後同左A仔一齊出門口，直至去到屯門西鐵站就各行各路了．．．我就去左PHYSICAL，點知我記錯時間，唔係四點，係四點半先至入得，所以唯有去左超市度行左陣，買左盒麥皮，之後先再入去．．．見到MUM同佢個朋友，本來打算一齊走人，不過我剛入去想做多陣，所以又係各有各了．．．之後五點三媽媽打黎問我走未，咁我算啦，涼都唔沖走喇，JOIN埋媽媽一齊回家了．．．

近日媽媽在朋友的吹捧下開了FACEBOOK，好好笑．．．媽媽迷上了FB了，係咁玩裡面既遊戲．．．都好既，我都想媽媽既電腦知識可以廣D，同我地都溝通好D啦，哈．．．之後同左媽媽，爹地去左食飯，好飽，唔敢吃太多，不過實在太好味，近日真係吃得太多了，連我自己都接受唔到咁多．．．太有胃口，太有口福了，呵呵．．．好肥肥呀！！頂！

>>August 17, 2009 at 3:13:40 AM GMT+8

2009 年 8 月 13 日 星期四 【綿綿細雨】

今日終於有少少太陽，心情都點吧．．．．今朝同A仔一齊出門口返工，好開心呀！好享受咁樣既返工樂趣，哈哈．．．

今朝都冇咩特別，食lunch之前，同左學校升學就業輔導老師傾工作，講到來年既contract問題．．．學校可能想個約去到七月尾或者八月尾，因為毅進已經係最後一年了，未來既時間都唔知會點，而且學校亦再冇錢去繼續請我呢個位，所以我聽到時都有點灰，不過．．．盡力而為啦．．．所以都好落力同老師傾來年既工作，我會揹多好多工作，而係以前都唔洗做架！我會入埋課堂內，教書，係全年，哈．．．估都估唔到無啦啦做左老師！

到下午就準備展翅簡介會，最後都係得四個學生返左黎．．．學生話可能太遲出email通知了，所以可能好多人都唔知．．．故此我會星期一再攪多一次，希望都有學生返黎啦．．．

攪掂晒d野後，早左少少走人，返到屋企，執晒野，準備出發去元朗時，A仔打比我話佢同同事去左市中心食板長，於是我都走左去食埋一份，哈，又係板長呢．．．食完之後行左一陣，行到去屯門西鐵站，見到有雪榚車，A仔同事問我想唔想食，哈，簡直中左我心呀，好想食，於是走左去買．．．不過，我都係打算食一兩啖架咋，主力比A仔食啦，我怕咳同肥呢．．．呵呵~

返到元朗，可以睇埋烈火雄心，真係好緊張呢．．．王喜千祈唔好死呀！聽日我放假呀，而A仔就三點出門口要返中心，因為聽日要帶CAMP，希望天氣好啦．．．終於可以訓晏D了，good呀！

>>August 17, 2009 at 3:07:14 AM GMT+8

2009 年 8 月 12 日 星期三 【乍寒還暖】

唉~ 成日都係陰天，攪到個人都悶悶地咁，日日都要帶住把遮出街，真係好唔方便！今朝早都冇咩特別，lunch時約左A仔一齊去左市中心間板長度食，食之前去左行街，順手買埋好姊妹份生日禮物．．．．有時好怕諗要買咩禮物，因為好怕買左d唔o岩人地用既野．．．我送禮都有希望實用為主既，因為真係希望人地用得著，用果陣又會記起件野係annie送咁，哈．．．

我地食板長好平，叫晒平既三文魚quota，兩個人都係唔洗$60，好good呀！食完之後，A仔就趕住返工，而我自己慢慢行番學校．．．放工之後，趕住出去沙田，因為約左班好朋友食飯，其中個好朋友佢去左外國工作，已經有成三個月了，今次因為路經香港去上海繼續工作，先至偷到d時間出黎同大家食個飯．．．

去到沙田，我梗係唔會放過行街既機會啦，我去左行uniquolo，買左條legging同背心，而家有特價，所以都ok平．．．之後去左行city super，比我又執左兩對特價既耳環，真係好開心．．．行city super時，見到我一直想買既玩具相機，新出長方型，上下鏡頭的那個，好似叫blackberry．．．要$890個，粉紅色系列仲可以配埋個真皮套添，不過成set要$1280囉，好貴！之後，又睇左lomo系列，嘩，佢近排出左25周年系列，要成二千幾蚊部囉，痴線架．．．真係好想好想有人送比我囉．．．哈！

今晚去左麗都總廚度食，我一向都唔熟沙田d路，所以都問左好耐人先去得到去．．．今晚都幾多人食，仲叫左好多野食，有龍蝦，有乳鴿，有雞，有魚，有帶子，有鱔．．．好豐富呀！我都食多左自己既quota喇，唉．．．見到個大肚腩脹到丫，嚇死自己呢．．．不過，過程十分開心，亦都聽左好多關於希臘呢個地方既事．．．希臘呢個地方對於我黎講真係好陌生，細個果陣曾經諗過大個無論如何都要去地中海一次，因為細個學跳舞時，個miss話過我知佢去過地中海，仲比過d相同手信我，所以令我對希臘呢個咁神秘既地方打左個問號，好想去一次去感受一下．．．當然而家大個左，有機會既我都去想去，不過．．．知道係要好多錢囉，哈．．．不過朋友話佢租果間屋有兩間房係度，如果我地去，可以住佢果度，咁又可以慳番d．．．朋友係咁叫我同A仔諗下honeymoon去希臘，哈．．．

食完飯，再同A仔行左陣，A仔好衰，引左我入agnes b行，叫我估佢買左咩比我做生日禮物．．．其實，我都唔expect佢買咁貴既野比我架啦，所以我估佢都係買d最平既什麼keychain，電話繩果類架o者．．．貴既野，都係等自己買比自己啦，哈．．．我都唔捨得洗佢咁多錢．．．

行完街就搭巴士一齊返元朗了．．．返到去11點鬆d．．．唉，今日成日都係鼻敏感，真想死．．．希望今晚唔好又發作就好了，都係時候要食藥呢．．．另外，希望之後天氣好d啦，今日下午都冇點落過雨了，仲曾經出過下太陽添．．．希望聽日唔好再落雨啦．．．尤其係星期六日呀，A仔佢要帶camp呢．．．

>>August 14, 2009 at 2:17:06 AM GMT+8

2009 年 8 月 11 日 星期二 【颱風】

wow~ 今天仍然天氣唔好，成日都落雨，真係討厭！今日上午都冇乜特別，只係十二點時準時去左貼埋今年最後一次既天灸．．．醫師話我呢三個月要紀錄番我鼻敏感同氣喘既發病情況，到左十一月中，我要再去覆診，等醫師再同我跟進番個情況！下午就之後去左做gym，本來打算就咁做器械算，因為已經成個星期冇做過運動，唔想太heavy，但後來望一望個時間，原來今日有kick-boxing，仲係要henry sir教，所以最後決定都去左玩！

好累，今日又流左好多汗，yo~ 要努力減呀減．．．好經辛苦，體重終於回落番早前既最低點了，即係九十五磅幾．．．太好了，而家可以積極繼續減落去！真係最重要既係，要忍口囉，同埋做運動囉，一d都唔可以鬆懈同偷懶呀！

之後返左屋企，跟住接到A仔電話，佢話要出去深水步買電腦野，順手叫我出去同佢一齊食晚飯，咁我實OK既，可以出下街，同埋同佢過下二人世界食下飯，真係賞心樂事啦！出到去深水步時，A仔打比我話已經買左佢要買既野，跟住就接住我架車，截住左我唔比我落車，直接去到太子先落，哈，好好笑．．．

去到太子，行左去始創搵食，最後去左一間叫紅葱頭既餐廳食，佢話明有八五折，我地就入左去，點知一問，佢先至話要七點前囉．．．頂，佢都冇寫明七點前，真係想媽叉佢架，不過算．．．後來，我地想調位，因為隔離有兩個男人同台，真係食得唔順暢，講野都唔夠FREE，點知個WAITER話今日好爆，好多人訂左位！我心諗，係咪真係咁好生意呀？點知，食到差不多到尾聲，叫餐飲時，佢先至黎叫我地調位，唔係因為我地之前既REQUEST，而係因為有客係好多人，要泊埋幾張台先至夠，所以先叫我地走．．．真係好激氣！所以最後，我只係比左$1 tips咁大把．．．真係想$1都唔比架，哼！

之後，我地係咁易行左陣，A仔走先，我就繼續行多陣聯合．．．比我買左兩件衫！好慘，好窮，今個月好似又買多左野咁囉．．．WELL~

有件開心事，就係食飯果陣，A仔話我知已經買左我生日份禮物，同埋會果晚同我去AGNES B間餐廳度食野，HEHE~ 好開心呀！真係冇試過去AGNES B度食，連佢既朱古力都未試過添，所以好期待！A仔之前仲話過，我生日果日請我飲杯我成日想飲好耐既GODIVA既朱加力．．．YEAH~ 好開心呀！佢真係錫我．．．雖然係咁，其實可以既我都唔想佢洗咁多錢既．．．不過，又真係好開心喎，哈．．．真係矛盾！

>>August 13, 2009 at 7:09:32 AM GMT+8

2009 年 8 月 10 日 星期一 【颱風】

嘩~ 今日好大雨呀，出門口返工果陣真係好論盡呢，唔鍾意落雨天呀！今朝返工仲要有點塞車，不過好在我一向都預早左時間既，所以返到中心都係剛好九點，準時！不過返到去都好多人未返到，可能塞車塞得太勁啦．．．

今朝一早就開會，好眼訓，好累．．．唔鍾意開會！明明可以好快講完既野，係都要用多一倍時間去傾？唉．．．最後十二點前開完會！已經好累好眼訓了．．．幸好今日唔洗做文書，如果唔係死得！

之後LUNCH同左同事出去買野食，都唔知食乜好，樣樣都好肥，又好貴，唉．．．最後揀左北菇雞蒸飯，同埋買左一盒雜生果！盒飯唔好食，盒生果太甜，擺明浸左糖水！所以，食得唔開心！下午不過做PROPOSAL，因為黎緊我要負責一個同學會！真係煩，最麻煩好纏身既野就要我做？我成日係學校，都唔知點攪？好丫，睇下點囉．．．

六點半就叮飯食了，唉，好可憐的感覺，其實唔太餓的，不過總係要食啦，唔可以唔食飯的．．．食完飯就開始打電話比D青見CASE，因為31號前要CLOSE CASE喇，要約人簽名永遠都係最艱巨既日子．．．唉！終於等到九點放工，即時走人喇，太眼訓了，真係訓得著喇，成間房得我同另一個師奶級既同事，一句說話都冇講過啦！唉．．．

諗左一陣搭咩車，最終決定搭962，諗住一上車就訓覺．．．真係一上車就訓，訓到落車．．．落車時，突然覺好腳軟，唔知咩事，成個人軟晒，仲要行上天橋，行樓梯．．．想死．．．好辛苦！好在真係冇遇到壞人咋，如果唔係死梗！返到屋企已經累到要死，食左少少野就快手訓覺了．．．

聽日會貼埋今年最後一次既天灸治療貼了．．．希望真係有用處啦．．．唉！不過暫時真係唔多覺有用囉！

>>August 12, 2009 at 3:13:38 AM GMT+8

2009 年 8 月 9 日 星期日 【乍寒還暖】

wow~ 今日d天氣好差，落雨呢．．．真係睇住佢無啦啦打雷，幾驚呀！

今日朝早都冇咩特別，食lunch時出左去買盒油菜食，仲有食左個滋味杯，已經好飽了．．．發覺近日既胃口比以前應該係細了少少咁多啦，哈．．．琴日朝磅過黎，哈，得果九十四磅幾，真係奇蹟！不過，我相信好快又會回升架喇，唉．．．買完lunch返黎時，KG SIR佢搵我，問我早點開始中六個迎新得唔得，咁我都無所謂，好快手食兩啖野，就過左隔離房做野了．．．直至攪掂先至食埋個LUNCH，哈．．．都好既，快手攪掂，輕鬆完成嘛！

之後放工就回家了，因為覺好累．．．發覺已經足足一星期冇做過運動了，所以回家後都在家積極運動，運動左三十分鐘有多，好累．．．但係，真係要努力，發覺今日個肚仔又脹番少少喇，唉．．．好慘！日日都磅住，我覺自己真係有點神經質喇，天呀！

>>August 12, 2009 at 2:49:07 AM GMT+8