2008 年 1 月 28 日 星期一 【晴】

27/1 (Sun)
練完歌又係同左佢地去食野，不過今次加入左宅善同葆姿，一共七人
我發覺大家坐得呢一檯的人，都係低能兼白痴
連團長似乎都開始比我地影響緊....
宅善就唔洗講，一向大細路一名...
傻仔儀就升級就白痴仔...就黎到達智障的境界.......
==========================================================
28/1 (Mon)
今朝早我地呢team人要開會，開到成兩點鐘，廚房無留飯但比主任話番轉頭.....
話我應該提早出聲......算了....我唔想同佢嘈
結果我地三個人(阿yan同阿ling)落樓下茶餐廳叫左三碟炒粉麵飯
食完之後就要返去繼續捱....

各位如有好工推介請馬上聯絡本人!!

>>January 28, 2008 at 9:39:23 PM GMT+8

2008 年 1 月 22 日 星期二 【晴】

20/1 (Sun)
今日下午老豆果邊的親戚黎左，今晚當食埋團年飯
打牌贏左百幾蚊...但無補於事.....
初一初二晚孻叔會響台灣番黎過年，帶埋女友番黎訓我間房...
姑姐話要收番佢五佰蚊一日房租...
計落我張床真係咩類型的人都有訓過...
男女老幼...連神父都有....唉~~
====================================================
21/1 (Mon)
今日以為番兩點半，點知原來番兩點
趕頭趕命咁搭車.....
其實今日下午係要去穗禾苑一間中心度聽talk當工返
個title係 "<3力。專業風采>策略形象培訓工作坊"，
由國際認證專業形象顧問、國際形象顧問協會主席---藍婷小姐
三個半鐘頭大部份時間都係教人點樣裝扮、襯衫、化妝、根據個人特徵去買衫....
我覺得都幾無聊，其實主任係咪應該問下我地想唔想上呢個工作坊先同我地報名?
抑或連佢自己都誤會左今日的性質?! god knows~
黎緊又將會好忙....轉做差人好嗎?

>>January 22, 2008 at 10:55:19 AM GMT+8

2008 年 1 月 13 日 星期日 【晴】

今日開始，黎緊七日內我要入三次call...真係痴線....
師傳們暫時約左我星期六打牌，佢地話打"大陸牌",我都未打過...
但真係幾有興趣，不過是否落實都係未知之數

今晚蘇金響床上睇緊娛樂版報紙，跟住好似好認真咁指住張相講:
"呢個係官恩奶..."
"=.= 佢唔係奶，係娜..."
"鍾生，佢幾好人架，又靚女，你試下追下佢啦.."
吹鬼漲.....

又有個患有dementia的陸才....佢同我講....
"我想除褲..."
"唔好呀，除褲凍死你"
"我唔怕!你幫我除啦...."
"我係男人黎的，我怕羞"
"咁你擰轉面啦，我而家除...."
又一個吹鬼漲....

早幾日出左旺角買野，真係大大大出血.....
我而家只係祈求恆指快d上番兩萬八，我就功成身退了....
否則，一切都變成廢紙一堆........

>>January 13, 2008 at 9:44:47 PM GMT+8

2008 年 1 月 9 日 星期三 【晴】

今日farewell cowdy...老實講一定有唔捨得, 佢真係好玩得可以好癲，
同佢傾計永遠無壓力，加上大家某程度上的遭遇一樣，所以好似特別好傾

尋晚佢地成班共19人去左東海食飯，可惜我要開夜去唔到
但佢地真係勁賤格，用3G打黎不斷挑釁我，猛咁影d鮑魚叫我食....
背後一班人的笑聲，相信是我有史以黎聽到最pk最賤格的笑聲吧!!!

雖然佢只係做左短短七個月，好感激呢段期間佢帶比我地好多歡樂，
佢的專業知識亦令我非常敬佩，總之佢的離開我諗真係我地的損失...
不過我都替她能脫離呢個惡劣的工作環境感到高興
希望那份新工會是更加適合佢的工作

>>January 10, 2008 at 5:11:05 PM GMT+8

2008 年 1 月 4 日 星期五 【晴】

好少聽鬼故...
估唔到一黎就打孖上.....
都係唔理，信師傳講我份人殺氣大，
應該唔會見到果d野......

但事實是....
而家成間院都充斥著令人發寒的氣氛...

只有耶穌才可以給我心靈上的慰藉吧...

>>January 4, 2008 at 6:55:10 PM GMT+8

2008 年 1 月 1 日 星期二 【晴】

過去幾日好凍....好懶....攪到唔想打日記
早幾日睇恆少個日記寫番我地點相識，那個情景真係歷歷在目...
我想一切都是天意的安排，要不是唔知邊個的介紹，(子強?)
都唔會踏出我的第一步主動去認識到呢位老死

上星期六屋企發生水災，事緣阿媽半夜去完廁所無關水喉，
結果六點鐘比老豆發現時，屋企五分二的地方都飽受水浸影響，
比老豆狂拍門叫我起身幫手，我一開門隻腳一踏出去果下，
果時真係想唱番句.......:
"滔滔裡...假使一個..是我...問我怎麼過..."
最後一家五口由六點鐘攪到七點半鐘，要番工的番工，訓覺的繼續訓覺...
這項全家有份出席的運動，如此齊心及分工合作，不知可怒還是可笑...

死人傻儀，我好明顯救左你一命!! 你仲成日講話驚賺得少....
記得同我問輝爺，我唔想無錢過年呀!!

>>January 1, 2008 at 6:10:28 PM GMT+8

2007 年 12 月 28 日 星期五 【晴】

今朝番到去知道三妹唔響度，都幾突然...
但估唔到咁麻煩竟然攪到警察要上門...

放工番到屋企收到一張"遲來的聖誕卡"，
老實講真係好surprise~
其實睇個信封d字跡已經估到係佢架喇...
其實你唔洗講到我咁好咁，
你都可以做到的!!
究竟點解佢會知道我個詳細地址!? 真係一個....謎~

>>December 28, 2007 at 10:46:45 PM GMT+8

2007 年 12 月 23 日 星期日 【晴】

22/12 (Sat)
呢日全日響度埋頭整攤位的野，希望唔好要我再整過...
半夜有個阿婆又要送急症，只係訓得四粒鐘...真係好眼訓
=======================================================
23/12(Sun)
所以放工果陣都忍唔住要買番罐red bull黎頂住，番到聖堂竟然只係去到
"互祝平安"...又會咁遲...所以彈左三首歌，之後練多陣歌就同佢地去左食野

下午去左舅父家，每一年都例牌會有個christmas party,一班親戚響度食下野傾下計交換禮物
共有五家人出席，其餘三家唔知去左邊，nvm....
下午同阿晞+舅父打左陣機，之後就要背負住"麻雀王"的名銜同佢地打牌，
最多輸過三百蚊，幸好最後發揮後勁本色收復失地咋，倒贏百幾蚊...
老豆臨尾黎到以為我仲輸緊錢，忍唔住帶點串我成份講左句...:麻雀王冠軍..!
跟住佢知道我贏佢就無聲出喇~

夜晚個氣氛幾好呀，好多野食，魚生八爪魚沙律鴨胸意粉甜品，
仲有一d熟食，咁多人都係食唔晒...
因為阿媽就快生日，開左兩枝香檳賀賀佢，爭d拆左舅父盞燈...
又射左兩枝"大炮", 攪到成屋都係紙碎....笑鬼死
最後到抽獎交換禮物，我同健仔響房睇緊曼聯對愛華頓比佢地叫左出去領獎，
原來我老豆抽到我...=.= 之後影張相，真係難得的合照!

咁到我抽下一個啦，點知抽到果張紙寫住大獎...帶點突然咁接過一封所謂大獎的禮物
之後要再抽過，又抽到一張寫住"特獎"...!! 真係so funny~~又一封所謂特獎禮物
跟住佢地十幾廿人個個都話我再抽到大獎特獎就比人打....!! (原來只有大約共6份大獎+特獎)
最後比佢地詛咒之下抽到阿婆...又係難得的合照....

基本上成晚個個都好high...我亦都唔知係咪真係飲左 RED BULL的關係，
竟然奇蹟地一點眼訓感覺都無....不過，呢d飲品我絕對唔會當汽水飲...

番到屋企覆番alice電話，要再次扮演心理輔導角色... Cheer up!!

>>December 24, 2007 at 5:19:42 PM GMT+8

2007 年 12 月 21 日 星期五 【晴】

20/12 (Thurs)

呢日朝早要負責攪個慶祝聖誕活動，唔知係咪自己要求高，
對整體的情況及氣氛硬係覺得爭咁d野...
但同事的feedback就話唔錯...是但啦
下午同副主任退庭商議傾左好耐野先至放工，
唉...我發覺我地都幾"命苦"....
番緊工果陣黎偉哥不斷咁打黎，原來佢想問我股票的野...大家研究下又無妨的...
佢買左隻中材...唔錯啦，佢真係有眼光....勁升!
========================================
21/12(Fri)

今晚竟然因為一早應承左同肥潮佢地食飯，
而無去到聖堂個修和聖事(其實我都係尋日先知道有彌撒..)
又係例牌同肥潮、Leo, doris, yan 五人食，去左佐敦北京酒樓
叫左七樣菜八百幾蚊，幾抵幾好食，不過最衰就係要預早book檯的
你想walk in 入去食都無乜可能....
每次食飯傾計，個個講d野真係幾pk...pk得好抵死，
無他的...大家只係為左低能下開心下...
食飯之前響永安買左樣野比阿媽，希望佢用得著...
聽日又要番工...一諗起要攤位的野就好頭痛....

>>December 22, 2007 at 12:48:03 AM GMT+8

2007 年 12 月 17 日 星期一 【晴】

16/12(Sun)
尋日打比瀅瀅叫佢記得響琴椅入面拎果兩隻碟，
點知sa姐今日又奇蹟又落到去聖堂....
其實長期訓得咁少，而家可能無野姐，但身體難免會起左變化而你係唔知...

今日見到個新的替假同事叫小莉...d阿婆見到個個以為阿yan唔做...
講真，我地唔做係遲早的事，咁的工無可能同你打一世....
最好笑係主任之前竟然話留左個HW位比我...你都傻的~~咪玩啦!

嘩今晚餐飯師傳留左成15隻沙薑雞翼比我，最後成功KO左13隻...成績不俗吧
============================================================
17/12(Mon)

唉....今朝訓到唔知醒呀!!! 師傳一開門我即刻有反應望住門口，
但當時我仍訓在床上，最後打發佢出左以極速時間梳洗....
*其實響六點半果陣已經醒左，但又諗住訓多五分鐘....咁就出事
以後傾電話都係唔傾到咁夜喇!!!! 都已經唔係第一次~~~~~

今日同阿yan同埋其他同事錄音，大家都笑死左...

阿康同我講話想買輪問我有咩好介紹....
我以過來人身份同你講，
有d野你唔好立亂試...
我自己衰我都唔想人地衰...真的...

>>December 17, 2007 at 7:53:52 PM GMT+8