2007 年 2 月 26 日 星期一 【晴】

成個新年都無打日記....實在又忙又累........
原本估計依家番工都無乜幾何會打牌，點知呢個新年(初一至初八)都打左四場
成績一般吧......
成日都打邊爐、食盤菜....真係食到你嘔...嘔落你隻手......

上個週中曾經想去中旅社申請回鄉証........亦一早已經預約好....但去到比我感覺
好Q麻煩......年滿十八歲都要攪咁多野去証明你同你父母都係中國國籍身份......
所以係準備不足的情況下.....谷鬼氣走人..............
或者第一次申請真係要麻煩d, 如果我唔係有事要返上去辦，我一定唔會去申請....聽日再去過啦

恆少今日大壽....相信佢響25/2(日)的下午已經收到上天賜比佢的最好禮物....呢d福氣我都唔會有..
Happy Birthday ~

>>February 26, 2007 at 5:10:55 PM GMT+8

2007 年 2 月 16 日 星期五 【晴】

有一晚巡房，見到陳伯兩隻手伸入條褲度捽黎捽去，
見到佢打飛機，唔知點解個人好火滾，我行埋去話佢
"你做咩呀?!!!好痕呀!?!?!?" 唔知係咪我當時語氣重得滯，佢即時呆左.....

總之見到咁的情況都幾嬲下，話完佢之後響走廊度睇下佢點，佢又繼續........屌!!!

隔黎左右已經係d阿婆房，你張床係響個大門隔黎，好心你尊重下自己尊重下其他人啦!!
七十幾八十歲仲咁Q變態........佢的想像力都幾豐富~~~

再有下次比我見到我剪鬼你!

>>February 17, 2007 at 12:07:38 AM GMT+8

2007 年 2 月 13 日 星期二 【晴】

今日響屋企執野抹野，睇番一份"堂課", 題目係"寫你五十歲前的人生目標"
我就好求其咁寫交左比個阿sir,有d人寫一大篇野，我就五十六隻字攪掂
都話之佢pass 唔 pass....
「年輕時光過得快
努力工作莫怠懈
陋壞惡習盡快戒
準備同女友拉埋
三十零歲樓要買
仔女話咁快就大
夭心夭肺繼續捱
五十載環遊世界｣
有d句子都有比阿sir讚.....但有d就......xxxxx 但咁都有B+!!!
都唔知話個阿sir對我偏心，定係大家的心態都係求求其其.......諗番起果日都幾好笑....

兩年的ive生涯.....似玩似攝時間多過讀書~
但我地呢班攪屎棍居然都可以得到外界的賞識+認同.....
真係不可思議~
即管睇下可以呃得幾耐!!!!!!!

>>February 13, 2007 at 7:09:40 PM GMT+8

2007 年 2 月 12 日 星期一 【晴】

10/2 (六)

今日番九點至三點，主要係番去幫手協助中午團年飯的活動，響附近酒樓食....
其實都無咩特別需要我做，所以只係番去食餐便飯。
千祈唔好以為d阿婆唔食得，同佢地食飯你真係要迴避，
明知自己無牙...食唔到舊肉，死都要夾黎啜啜啜........真係核突到頂佢個肺.....
今日最高潮應該係班同事的歌唱表演，班工友伴舞直頭笑到我趴街.......

夜晚番去聖堂排櫈、開會兼司琴，完左彌撒之後就趕住同阿爸阿媽出去
借左神父架車，去Poly U 同阿媽果邊親戚食飯，響紅磡𠒇黎𠒇去，總於搵到個停車場入口.....
自從番工之後同佢地已經無以前見得咁密....除左孻舅父佢地....
阿晞又例牌走埋黎撩我玩......玩到個頭好似剛剛洗完頭咁.....食完飯揸車走人...時間比我預期快!

=================================================================
11/2 (日)
一連放幾日大假，星期三先番....今日就同聖母軍去張修士度打邊爐.....晏晝打邊爐....夠特別
同佢地落去坪石街市買野，低能完一餐之後就去搭巴士
一共九個人 : 我、業、肥+瘦hong、傻仔儀、晴、卓藍兩姊妹、同埋張修士
其實以前都去過呢個聖言會的"家", 果次係同輔祭去的...今次再去已經無乜印象
作全屋參觀，張修士有鬍鬚個樣超似恐怖分子，當然我一定唔會放過呢一點串足佢成日
響二樓一間房(小聖堂)開會，由於本人之前講得太多廢話，搞gag搞到好累，
所以開會呢段時間真係攤左響度唔想郁......

之後同埋另一個黎修士一齊打邊爐，都打左差唔多三粒鐘......期間周神父帶左聖家堂一班年青人
黎參觀........又多左幾個「恐怖分子｣........情況非常嚴重.........
玩到累.....飽到更累.....臨尾全場人仲一齊猜「剪刀石頭布｣ 黎清檯.....
張修士贏左一盤就不停挑釁繼續猜.....點知佢真係好似無輸過.........~_~

走果時分左兩批人，一批去唱k，另外一批走人，我真係頂唔到落去喇....所以做左第二批人..
大約五點半番到屋企，見到阿公阿婆響度，阿婆問我打唔打麻雀...其實我真係麻麻地想打...
因為真係好鬼累，好想訓.......但佢開到聲費事拒絕啦...加上佢地響度坐左咁耐就傾左咁耐
咪陪佢地同埋阿媽玩下.......打左四圈牌........都差唔多打左三粒鐘.......
初時二家姐頂左阿媽個位打一圈牌........結果點? 有待磨練的佢梗係要輸錢離場
其實同佢地三個老人家打真係唔知點好，輸又唔知點打好，贏又唔好意思.....
所以好多時候都係等自摸先至食.....打的過程好眼訓...... 直至最後一鋪比我自摸八番
先至成個精神番dd，終於打完!! 四圈牌就係贏呢一鋪錢......算係咁......
.好想躂落床訓，但又要差唔多開飯..........
呢兩日雖然放假，但一場波都無睇過
好耐無正正式式完全咁睇一場波......究竟好事定壞事?? 兩睇吧!
=============================================================================

12/2(一)

今朝早去左剪頭髮.......之前就去觀塘同crystal食飯.......
由地鐵站行上去.....其實都幾遠的路程......先剷入翠屏邨.......再直上堅樂中學
終於到達目的地 !! 一個鐘頭lunch.....一個鐘頭"面談", 期間佢d frd東一檯西一檯....
都有d唔係咁自然....... 食完就速閃.... 走去觀塘年宵市場..... 有幾個攤位都幾有特色
再見到一棵棵桃花.......全部都係好樣衰....... 阿媽仲好似話想過幾日買番棵花番屋企....
我個人黎講就麻麻地讚成.........盞到時拎黎攪~~~~~~~

>>February 12, 2007 at 7:15:24 PM GMT+8

2007 年 2 月 8 日 星期四 【晴】

過去呢幾日迷上左一個電腦遊戲......
情況非常嚴重...!

呢幾日番工時間經常唔定，攪到我成日爽約...........
sorry everybody~~~~~~

今日去左恆少屋企
由於大家的工作屬高度秘密
所以我今日的身份就係電腦維修師~
同佢屋企人講我上去整電腦........自己講完都笑左出黎.........

>>February 8, 2007 at 8:18:12 PM GMT+8

2007 年 2 月 3 日 星期六 【晴】

尋日返10:30至2:00pm, 轉登番去開一個一年一度的"全體職員會議"，即係d阿姐都有份
其實個會議係屬於輕輕鬆鬆果類，仲有一d分組遊戲......之後1:00pm就有大食會

全部同事響飯堂度開大食會，廚師整d野真係無得頂，有我最鐘意的蝦同雞翼!!
所有人都大放縱，大聲講大聲笑，連主任都放低平時的嚴肅，個個都食到笑到唔停得

中途又有抽獎，抽到一支neutrogena hand cream.....成班人就即刻向我大迫供
叫我送比女朋友，又叫我要拎女友的相比佢地睇，玩得非常癲喪!!
不過呢日都算係我番左咁耐第一次同佢地呢班人玩得咁盡興，未試過一日內笑咁多次~

其實最好笑都係見到一個二個有唔夾的同事，大家笑笑口咁你串我我串你，
真係好睇過棟篤笑!!

>>February 3, 2007 at 2:40:32 PM GMT+8

2007 年 1 月 30 日 星期二 【晴】

今朝早起身睇NBA, 好耐未正正式式睇過，對上一次已經係中學時期，
睇完之後再睇金玉滿堂，沖埋涼就起程.........約左恆少食飯~

響將軍澳食，第一次去呢間"壹麵館"，但其實都幾多飯比你揀.....
食物都幾好味架，值得再去~
坐低吹水，一齊笑談過去、現在、一d攪鬼經歷....未來?!?!?!
我唔敢同佢講，咩都無問佢，因為我已經估到佢大概已有決定，無謂再攪煩佢~

記得以前聽專家講，女人平均一日講的字多男人幾千個，但我地兩條友響短短
兩個鐘頭把口幾乎係無停過咁滯....
食完之後打算行去補習社，但一開始我就知道將會行好多冤枉路，是但啦又唔趕時間.....

今日先知原來周圍整眼鏡係免費的........都幾抵戴!!

"" I don't know,食鬆糕
食完鬆糕變耶穌 "

" 講大話，甩大牙，
老師話你無擦牙，
擦完牙變劉德華 "

估唔到依家d小朋友拎埋耶穌出黎玩，響我面前玩耶穌，簡直找屎~~

師生戀..........!?!?!? 驚.................

>>January 30, 2007 at 8:16:25 PM GMT+8

2007 年 1 月 27 日 星期六 【颳風】

今日放假....原本下午出去同班親戚飲茶...不過因為有野攪所以無去到
結果下午成三點幾先落街食野，見到商場堆滿晒人，原來又有function..
仲比我見番一班上年實習的一個centre 的老人家，一眼就認得佢係芳芳....
其他人就唔多記得個名，無計啦，我同芳芳最熟~~~
原來佢地又有份表演....唱粵曲....唔多識欣賞呢d歌，好似唱到死下死下咁...
成日呀黎呀去....哎鴾]也咁....都唔知想點..........

其實都真係幾有緣呀，咁都可以撞番佢地，仲要係一大班......
臨走果陣先可以同佢地吹一陣水.......不過都好滿足喇....

今晚個彌撒一大班親戚都響度....我四點九去到...見到卓藍攪部琴......響度彈........
其實都無問題的.....但我見到佢將歌書裡面d歌紙拎到一張二張.....真係淆底喇

完左之後黃太竟然叫我教eunice用部電子琴，初時係完全唔知咩事
傾落先知原來佢阿媽想佢試下彈，可能佢見有時星期六台彌撒無人彈掛.....
不過真係好突然囉...不過最後我都係將個波拋比老豆..........咪攪我........~~!!

今晚同二叔姑姐佢地食飯，據聞當團年飯食!??! 唔清楚...........有得食就算~
聽日死期到了............

>>January 27, 2007 at 10:48:41 PM GMT+8

2007 年 1 月 25 日 星期四 【晴】

半年出一次的院訊.....終於印刷好~
第一次做呢類工作，著緊實是正常，睇到最後出黎的成果，真係輕鬆晒

製作過程不易，經常需要修改，花左我好多個晚上，次次都攪到第二日無晒精神...

未來仲有好多挑戰，好多好多野要煩，成日都響度唸，
如果有個人知我諗乜，明白我的環境、需要，甚至會同我一齊分擔的話，
個包伏一定輕好多，心情亦都必定好好多.....
有誰可以分享我既喜怒哀樂....

恆少今日出冊~~~~~!! 要搵時間會一會佢~

>>January 25, 2007 at 3:57:31 PM GMT+8

2007 年 1 月 22 日 星期一 【颳風】

康復中...

>>January 22, 2007 at 11:27:18 PM GMT+8