2008 年 5 月 18 日 星期日 【晴】

今朝早十點開始同班同事響大圍火車站開檔(其實應該叫港鐵，不過都係改唔到口)
主要為班災民籌款....
我的口號:"請支持下抗震救災丫"、"請支持下震災籌款丫"
我老細的口號:"請支持下東華三院救災工作丫"
大家認為有咩唔同? 唔知點解好唔鐘意呢句--東華三院救災工作
講左成日，我驚今晚發開口夢，成晚都響度唸口號.....

今日好深切咁體會到香港人的熱心，
儘管大家對中國有多少不滿，不論是政治、治安、衛生、人權等等，
但大家亦非常清楚知道他們畢竟是我們的同胞，
大家都是黃種人是中國人，這個身份你同我永遠都不能否認

大家對這次災情有實際行動嗎?

>>May 18, 2008 at 8:22:26 PM GMT+8

2008 年 5 月 14 日 星期三 【晴】

母親節
好疲累咁放工，但都返左去同阿公阿婆同埋成家人飲茶
印象中自己好少同佢地飲茶，所以今次仲要係我請，算係難得的一幕

七個人飲茶，有人一句話呢餐唔洗比錢...就博命要左五籠雞札、
兩碗粥等其他誇張的數目....最後咪又係要我執手尾食晒去，
家陣東華籌款表演大胃王嗎?

今日返工michelle突然一句話叫我幫佢作首歌比佢同班長者唱
那種突然就像地震一樣不能預知、一樣可怕
幸好只是一首兒歌，勉強寫了一點歌詞比佢交差

聽朝要入call，仲要返九點，coz要開會......
又有一個同事離開了....呢間院風水有問題麼
還是人事有問題??
個個都傳我會走，睇黎傳傳下都可能變成真都唔出奇.....

>>May 14, 2008 at 11:33:49 PM GMT+8

2008 年 5 月 5 日 星期一 【晴】

尋日入call,成日都無乜心機做野，完全好似番黎渡假咁....
今朝一出call就要仆去穗禾苑上堂-----音樂治療工作坊
好累，不過好彩內容唔算悶，否則一早訓左
況且成班老細坐隔黎，點敢亂訓

竟然撞到loki,都無乜點變,似乎越黎越多人加入TWGHs,
不過就估唔到佢原來佢響之前做過HW,其實HW好唔好做
而家佢又響沙田區做，如果大家繼續做的話實大把機會碰頭，
不過印象中好少人好似佢咁做左一個月就可以去上堂.....
對佢印象最深刻都係果次同佢+ting+唔知咩sir一齊出去旺角"開房"....

頂~~~ 主任一早已經"欽點"左我遲d要負責攪一個音樂治療小組!!有排忙!!

>>May 6, 2008 at 2:11:38 PM GMT+8

2008 年 4 月 27 日 星期日 【晴】

中午放左工之後同班frd入左長洲，小紅帽因病甩底...註定佢錯過精彩的一日

搭船去果陣個個都驚死我會嘔落去佢地度，講下笑姐，唔洗當我有sars咁的...
一共十人六男四女，由原居民阿鴻帶住我地走圍去，長洲好多單車、benz(三輪車)，
連輪椅也通街都係...同priscilla興之所致好無聊一人一句咁好快作左一首詩
"香港坐巴士，長洲坐benz，跌跛對腳就坐輪椅，單車un親你小弟弟..."夠白痴吧

睇完包山之後，就開始環曉長洲，行去張保仔洞，除左肥康，個個都落去
正當好有成功感咁保護各人出洞，惡運隨即降在我身上...
如果唔係大佬堅持話要行去墳場睇相...根本唔洗行果段路...
行到一個石灘邊，打算去洗下對手，點之果幾舊長滿海澡的石實在太跣，
結果成個人好似shur滑梯咁插落水，下半身濕鬼晒，對手都擦損埋...真係欺山莫欺水

大家繼續攀山涉水咁向住目的地進發，行到一個山頭有勁多仙人掌，我又賴野!!
隻左手只係輕輕high一high,前臂成十幾廿條黃色好短的刺插左響度，
我想講..high到同插到係無知覺的，但拔出黎就痛到你死，黑到爆!

五點半行番落"燒烤場", 大部份人負責去買野食，我同阿鴻去買對迷彩人字拖，
無計對鞋對襪嚴重水浸，再換埋條一早帶備的波褲，變成成個長洲仔咁款....
燒到九點半，去食埋糖水，再行左陣沙灘....因為對鞋同條褲依然十級水浸，
所以唯有繼續以長洲仔look搭船走人~~~~~ 番到屋企都成十二點半....

這次旅行的得著:
阿鴻真係好似周孝忠...
欺山莫欺水...
小心仙人掌...
做人不要太張保仔....

>>April 29, 2008 at 1:37:52 PM GMT+8

2008 年 4 月 26 日 星期六 【晴】

原來有d心理測驗心理問題 真係幾準....但係好事定壞事?

尋晚好幸運地可以得到一名"歌手"唱左三首歌比我聽, 難得佢情緒咁高漲....
把聲又真係幾甜wor....唔錯唔錯
kay果首一人之夏果句"提著白花登上山"...聽到我笑左出黎，
我相信並唔係個個都可以演繹到果種可愛的味道...

離人節，第一次聽，一路聽一路比佢的聲線所感動.....
我一定會學好彈呢首歌!

今朝攪左個積分獎勵換領計劃的活動，d禮物差唔多剛剛好換晒
忙左一個早上，下午出現疲憊....

我終於明白，創作人努力的創作假如被重新改頭換面係幾咁大打擊
我所講的並唔係我作的歌，而係我幫老細寫的一個小小的茶餐廳劇本
我真係覺得好唔受尊重，佢擺明就係玩野，無論我寫得幾好幾真實
佢根本一早都打算點都要改我的野......
算了，佢為人係點我都唔係而家先知....下次佢再叫我寫的話我唔會再寫...
費事再比機會佢糟榻我的心血、心思、精神、時間

>>April 26, 2008 at 5:11:55 PM GMT+8

2008 年 4 月 25 日 星期五 【晴】

沒有心情的一個星期
甚麼都不想做
又一天

上星期去過walk-in interview,感覺很差
同過班同事耍樂...感覺有點厭...
今日放假，下午落左去地鐵站搵teresa拎份歌譜,新歌..要練

學恆少話齋...我都開始懷疑自己有點抑鬱咁
事事都唔順利咁...
唉

>>April 25, 2008 at 5:45:04 PM GMT+8

2008 年 4 月 14 日 星期一 【晴】

呢個星期真係又忙又懶....
忙...是因為真的有很多野做，懶...亦都因為唔願做....
結果換來的是: 煩惱! 自作孽不作活!

6號去左長沙灣同鑽石山拜山，只係做左一程司機，其餘路線老豆揸番，因為好累
上星期一同今日都要去客串幫人補習，又發現了一名可愛又聰明到爆的女學生，無得頂!
李太不斷向我講之前tvb問佢借場拍劇的事，又比佢同蒙嘉慧姚嘉妮影的相大家睇，
據說tvb比左個offer佢，第一就係比番五百蚊佢，第二係果集會向最後鳴謝果度打上補習社的名
佢視錢財如米田共，揀左後者，但比著我一定會揀收佢五舊水，
最後鳴謝有鬼用咩，d字幕去得超快，又無人留意d人又唔會知你間野響邊!!
d字閃一集一秒咁就五舊水!!

13/4 (sun)
crystal 一早搵左我希望我可以教佢彈一d流行歌的技巧，其實最初真係好咢然，
話晒佢都八級啦，加上佢咁講我會有壓力，所以只好同佢強調這只是一次音樂的交流吧
兩個半小時內彈了數十首歌，猶如開了一個小型音樂會，
大家對音樂都係充滿熱誠、有要求，我覺得音樂同駕駛一樣係無永遠學完的路，
所以即使一d歌我以前彈過，又或者彈過好多次，但我總希望能不斷摸索最悅耳的彈法
能夠令到無論聽果位又或者彈緊的我都滿意的話，這才算是成功...

佢成日話我有甚麼 perfect pitch???.....究竟係咩黎?? 佢死都唔肯講
知道的人麻煩解釋我知

>>April 14, 2008 at 3:24:57 PM GMT+8

2008 年 4 月 5 日 星期六 【晴】

尋晚睇埋套賭場風雲先至訓覺，攪到自己今日勁眼訓，真係自己拎黎衰!
放工之後去左天佑屋企睇佢部腦，初步估計應該係個windows有事啦，
下次等我試下帶埋隻碟上去睇下得唔得....
當然，我絕對唔係咩專家，大哥才是專業的電腦高手，我以前有咩唔明都係搵佢....

之後就call左cindy落黎食tea~ 今日狂比人頂個肺..仲不停比人作狀想打...
基本上佢一開始已經不自覺咁打左我幾下...=.=
不知不覺咁坐下傾下都個幾兩個鐘~ 我今天學到的是..:
1. 在外不要吃雞翼...
2. 儀態大個天
3. 吃完的餐盤碗筷刀叉要盡快叫人收起，以避免不必要的危險
4. 遇上發瘋發傻的人，要給他們較長時間冷靜下來
5. 要絕對保持個人清潔衛生，確保身上任何毛髮不要出現於餐盤...!!!

anyway, 這是一個愉快的下午, thanks so much!
原本真係好累好眼訓，奇怪在下午竟然突然精神起來，
但現在又再次收到周公的呼喚，要訓

>>April 5, 2008 at 10:50:37 PM GMT+8

2008 年 4 月 4 日 星期五 【晴】

今日兒童節要番工...都係果句，真的好討厭放假後的日子..!!
比阿yan串我放咁多假，抵我成檯成tray都係野!!

楊護士今日笑騎騎咁同我講話有野益我，
佢的笑容實在令我心寒，因為佢次次都係搵我笨!!
點知佢原來送盒香口膠比我，只有在美國先至可以買到的
都唔知佢係咪響度晒命!! 又可能係佢良心發現啦，
見我成日咁幫佢而家先醒番一盒香港買唔到的香口膠比我

不過真係幾特別，形狀好似一粒粒骰仔咁
好軟熟，好好嚼.....anyway, 都多謝佢~

>>April 4, 2008 at 8:36:31 PM GMT+8

2008 年 3 月 31 日 星期一 【晴】

30/3 & 31/3 兩日都比廖sir叫左我去幫手彈琴同帶唱...
星期日一放工就要去到堅道大堂，呢日原來係叫做慈悲耶穌日
我只係負責彈幾首歌，其餘大部份時間都要唱，
原來帶唱真係好累好辛苦....唱足三個鐘頭耶!!!!
記得上一次帶唱已經係中學時代的事......

31/3 呢日就要去到荃灣聖母領報堂，又係要半彈半唱
其實呢兩日的所謂節日我從來未出席過...
今日廖sir同我講，話想幫佢呢個團體搵一個固定的琴手，
以後三個琴手之中想搵我為主力....司琴都有分踢正副選!! 厲害厲害....
我都同佢解釋主要係憂慮番工時間的問題，但佢話會預早兩個月通知我等我有時間作安排
只好應承佢，加上其實我係有私心，因為我知道佢一路都有寫歌比教區，
我都希望我好耐之前作果首歌可以比佢填詞，可以的話我真係希望終有一日，
我可以聽到一班分成四部的聲線演繹呢首歌...這是我五年前的夢....

>>April 1, 2008 at 11:11:26 AM GMT+8