2007 年 1 月 1 日 星期一 【晴】

2007年了，恭喜發財，身體健康~~

尋日31/12，雖然係放假....但仲累過辛苦過番工....因為揸左成日車，係成日!!
朝早10:50響荔枝角極速車阿公出黎彩雲接阿婆，只係用左15分鐘....
其實又唔係開得好快, 只係條路我行到熟晒....
跟住車佢地兩老上順安飲茶....但我要番落去聖堂開會
見難得朝早有車用 ，所以問邵生黎唔黎遊車河.....番到去見到
邵生+ cynthia + felix 企左響路口.....開頭唔知去邊度遊架，
最後決定去車傻儀黎開會(當補償番上次甩底件事啦....)
期間cynthia不停影我相...我真係有d唔自然....不過都無乜點影響我揸車的.....下次唔好了...~
番到去彩雲大家落車果陣個個都話響架車出面問到一陣"燒焊味"，嚇到我成個彈起
不知幾驚"領野"..... 好彩經過我問三問四之後原來好多人都試過咁的情形...... 唉，嚇餐懵!
最後將架車泊落聖家堂......因為可以慳番停車場費....^^ `之後就行番上去開會....
今日張修士無黎....不過唔緊要...因為有我撐場!!!!
開會開到好晏....兩點半先食完飯.....要番去聖家堂拎車.....
準備下一站.....: 同老豆去婚禮....(司琴@聖德肋撒)

今次呢對新人好似好趕時間咁.....樣樣都好快，講野好快好短，戴戒指快，咀得更快....
完左之後車番老豆去聖家堂....我自己就響鑽石山不停遊花園，最後揸番去比舅父.....
點知揸到去長沙灣附近,隻右腳突然抽起筋來........!!!!!!!!!!!!!!!!!!!!!!!!!!! 他媽的痛!!!!!!!!!!!!!!!!!!!!!!!!!!!!!!!!!!!!!!!!
襯紅燈果陣不斷咁響度拉筋，隔黎兩面的司機又不停咁望過黎.....真係八掛!!!

去到差唔多五點半，原本打算搭地鐵走人，點知舅父話佢要去將軍澳
叫我揸到去藍田.......... 所以今日咁樣揸法真係累透，比平日付出更多體力及精神.....

今晚無出去，以前我對呢類日子好有興趣的，但近來卻有點怯......加上真係太累，訓了!
============================================================================

今日響聖堂見到老翻Ella(側面吧....加上又幾高....立一立眼有點像....又可能係個妝問題)

大家真係要好好受錫身體.....嚴重睡眠不足會嚴重影響各器官的工作能力
而家可能唔覺有問題........係正常的
但假如一個肝的良好運作可以有六十年.....
一次半次無所謂吧，但長期咁樣挨落去的話......不用我多說了

聽日又放假了.....響屋企睇電視+準備攪旅行同生日會的細節~~~~~~

>>January 2, 2007 at 1:18:57 AM GMT+8

2006 年 12 月 30 日 星期六 【晴】

放假放左兩日半........叉足電!! 今日要照常上班了........

28/12
星期四果日下午去左車舅父同表弟周圍去，
荃灣....荔景....深水�...... 如果唔係舅父帶路我一定唔知自己行左去邊~

自從番工之後好耐無見佢地喇，連阿婆都話"終於見到你聽到你把聲"
阿晞真係好纏我....只要我一停車佢就響我後面攪攪陣.....
最好笑係有時佢都識得幫我睇埋路....話我聽車速的限制....後面有咩車黎緊....=.=
之後我揸番去屋企，響麥記買左個餐，點知食完之後食唔落飯了......
夜晚11:00舅父黎接我，叫我今晚去佢屋企過夜，聽日一齊飲茶兼開檯....
就係咁...又揸車去佢屋企....途經深水鶡雀○蟆O24小時營業的，又落車買野食.....

29/12
今朝訓醒同舅父阿晞阿公阿婆飲茶，之後番去同阿晞做功課.....
大約下午兩點幾開檯打牌，黑仔到爆，頭四圈食得一鋪牌...
之後執位再打四圈.......情況差唔多....真係輸自摸八、九、十番都輸死
最後埋單輸三佰零蚊....跟住就食飯.....食完飯決定留響度訓聽朝響呢度番工.....
同阿晞打機.....打到九點半鐘阿婆想上訴......所以又打四圈....~_~(其實我都想上訴的 haha....)
終於....終於比我追番!! 呢四圈牌贏五佰幾(全靠食左鋪自摸十番翻身咋...)
全日成績: 贏二佰~~~~~~~~ YEAH~~~!!(拎番個彩)

30/12
今朝早七點四就起身，八點七就番到附近，見仲有時間剩走去大家樂食早餐~
今日好多野要做，特別係準備一月的野，我見到要負責的會議同活動真係喊晒救命!!!
期間有d frd打黎都無聽甚至無覆...覆左幾個....有好消息亦有壞的...
阿鄭xx兄弟!!! 你一係拿拿臨入過我個名啦，你已經打錯左都有差不多四次喇!!
有次仲要係朝早六點半~!!我仲記得果日難得我放假.....
( 次次你打黎我都以為你地有事.....唉.....)
阿Sa姐....請不要亂幫我改花名......~~~~~~~~~~~

<<今日睇食飯果陣，有個阿婆同我講:
"鍾生,你真係好多心架姐...."(係呀，我好八掛架!)
"唔係....我係話你好好...你又有愛心、關心、有心、
真心、專心、奮鬥心.....但係最緊要呢 ,都係要有女仔心......
男仔一定要有妻室!!"
成個飯堂d人都聽到.....無奈......又笑爆咀....講咁多就係叫我搵女!!>>>


聽日要去婚禮了`~~~~~

>>December 30, 2006 at 6:45:16 PM GMT+8

2006 年 12 月 27 日 星期三 【晴】

今日放工果陣又係選擇搭巴士.....
累得滯訓著左........到醒果陣已經身處觀塘...
好彩架巴士的總站都只係觀塘碼頭.......再遠d都嘔泡....

===============================================

比家用了..................應份的....
==============================================
呢幾晚真的唔係好慣......訓唔到訓唔好....
成日都聽到別人講,人應有自控自制的能力...
但有d野唔係話你想就控制到，
我需要時間.....時間需要我....需要我好好去珍惜...

>>December 27, 2006 at 10:53:59 PM GMT+8

2006 年 12 月 26 日 星期二 【晴】

今日阿媽正日生日，年年正日一家人都會一齊，但我今年例外..........

呢度d廚師對我真係好好，並唔似其他同事，大家有講有笑
佢地專登留番d 鹵水乳鴿 + 豉油皇大蝦 比我.........超好味......
成哥仲好抵笑咁入黎同我講: 鍾生，今日食魚wor~~!!
因為好多人都知道我唔係咁喜歡食魚， 有時明明果日唔係食魚都講到似層層咁玩野
但有時真係食魚的話佢地又會將另外果樣R整多d比我食.......萬分感激!!
=============================
今日得我一個響寫字樓.......爽~~!!
好放肆咁講電話同玩電腦...........
但今朝真係好麻煩，因為又有阿婆響度嗌交..........最憎人嘈的!!
======================================================

突然發覺呢度有個阿婆好似徐錦江............想死

=======================================================

番工食飯有好有唔好.........
唔好在時間方面，夜晚果餐六點半至七點半，太早了....
響屋企都成八點零九點先食....
好在有人服侍............唔想開檯唔駛執野
有人幫你裝好飯裝好湯......
食飽即閃又得，實在係高層式享受.......
======================================================
其實只有重視緊張一個人先至會有咁多擔心
所以請唔好再話我了.....我一定清楚自己想點做緊咩的

>>December 27, 2006 at 3:04:56 PM GMT+8

2006 年 12 月 25 日 星期一 【晴】

今朝早番聖堂彈琴，好耐未彈過朝早九點半的彌撒了
不過今朝大部份時間都似在魂遊太虛般，梗係啦，尋晚無乜點訓到..

今晚同家人食飯，正確黎講係請食飯，又係番彩雲幫襯好彩....
加上阿媽聽日生日，但我聽日要番工的關係，所以今晚攪埋去

去之前同自己講得好清楚: 點都好，今晚同佢地食飯一定要精精神神
唔好比其他野影響到個心情....... 但都係有點困難.......

今晚老豆唔知係咪high得滯，勁多野講同埋係勁串咀.......我而家先至發覺
原來我的串咀工夫來自佢的遺傳.......=.=

================================================================
尋晚番左聖堂報佳音，個氣氛都幾好，d人仲響度跳舞.......
我地choir亦難得地聚首一堂，有講有笑，見到佢地依家咁好傾我都安樂d......

尋晚我去左邊?! 阿媽今日問我咁夜番係咪去左尖東行...........~_~
其實呢晚我去左飲啤酒......我係絕少飲酒的......非常少......但今次例外
原來飲凍野或者比d凍野淋係會冷靜好多的........
===========================================================

呢個決定一d都唔易做，所花之勇氣實在太大....
感覺的野好奇怪....
有好多野都無得解釋，
但有好多野值得去反省 ;
如果一個答應係講左等於無講，我會憤怒 ;
如果一個決定係可以令到大家好過d，我會去做 ;
雖然係好難落手，但總好過這樣....

經過咁多分鐘的"洗滌"，我經已乾淨好多........
要識一個朋友唔難，
但要有一個知己唔容易.....
知己唔需要多，
只希望大家都可以做到好難得的知己好友

新的一年
希望大家都忘記過去一d唔開心的事，大家都應該各有大事要做
各有目標，各有方向
anyway, we are good friends~

聽日又要番工了....又要對住一大堆唔知點處理的東西........
聽日番去申請大假先
拎幾日.......放下假.....起碼我生日果日唔好要我做野呀大佬
或者去下旅行，maybe近近地去下澳門.......

>>December 25, 2006 at 10:43:33 PM GMT+8

2006 年 12 月 22 日 星期五 【晴】

因為今日放假關係，所以尋晚非常好訓，今朝訓醒打左陣機，
下午兩點幾就出去旺角做聖誕老人…買東西了。飯都未食，打算行一陣先至食…..
點知一出到去就買野比自己………….. 超無奈………. 同原本的財政預算即刻有出入….
行行下傻儀咁橋響附近，所以約佢叫佢一齊買，反正佢都要買比人啦!!
其實今日主要買d聖誕禮物同埋阿媽份生日禮物….. 好難揀…..
買燕窩……?!?! 分分鐘比家姐食……..
好彩最後都揀到…….. 總之今日真係多謝晒傻儀陪我逛…..
逛到成七點幾鐘先走人….
由於傻儀係傻的關係，你同佢講野永遠唔駛就住就住
有咩就照直講，唔O岩聽的話炳佢就得喇

期待24/12....

>>December 23, 2006 at 2:31:44 PM GMT+8

2006 年 12 月 18 日 星期一 【晴】

依家係半夜3:45a.m............身在院舍辦公室.........

今晚要響呢度訓，執頭執尾成十二點幾先至打卡......
番到房根本未訓到，肥潮打黎同佢傾左陣，又同sa姐閒聊一陣
一點幾鐘.........依然未能聯絡周公......亦都唔想阻佢太耐，
到我兩點鐘培養好情緒想訓果陣，
2:50a.m.突然有人狂拍門.....個阿姐話個阿婆好唔舒服.......
(其實佢今晚較早前曾經響廁所跌倒黎，撞親條腰有少少痛)
跟住即刻換衫出去睇下佢兼call白車，又要執齊所需文件........番左大約個幾兩個月，
今次係我第一次需要半夜起身....... 我實同佢拎 OT ~!!!!

依家個阿姐陪佢去左急症，我就要響度代佢當值，兼且等佢消息.........
其實今日都算多事發生，詳情不在這裡說了....
依家響度做乜?? 眼光光.....對住個Mon.... 等天光吧`!!!
(其實要寫報告的.........救命呀.........好想搵人呻....)

>>December 18, 2006 at 3:54:37 AM GMT+8

2006 年 12 月 15 日 星期五 【晴】

今晚又要去幫人補習......
不過今日好勞氣，仲發火tim.........
夜晚新黎果個仲難頂....
又係甚麼讀寫有障礙............我都已經抱住一個好體諒的心情教佢
但係佢真係無得救...........又話唔聽又無記性......攪到我好鬼燥.......

好彩只係代課一日.........比著以前要咁樣日日要對住佢的話，我諗我會發癲~~!
今日收到第一份聖誕禮物..........實在估唔到會係佢送

離開小時候　有了自己的生活
新鮮的歌　新鮮的念頭
任性和衝動　無法控制的時候
我忘記　還有這樣的歌

我愛上　讓我奮不顧身的一個人
我以為　這就是我所追求的世界
然而橫衝直撞　被誤解被騙
是否成人的世界背後　總有殘缺

我走在　每天必須面對的分岔路
我懷念　過去單純美好的小幸福
愛總是讓人哭　讓人覺得不滿足
天空很大卻看不清楚　好孤獨

天黑的時候　我又想起那首歌
突然期待　下起安靜的雨
原來外婆的道理　早就唱給我聽
下起雨也要勇敢前進
我相信　一切都會平息
我現在　好想回家去

***唔知發咩神經,突然諗起呢首歌...........

>>December 15, 2006 at 10:57:03 PM GMT+8

2006 年 12 月 14 日 星期四 【晴】

唉........呢兩日荷包超級大出血.......!!!

先係尋日，尋日放工搭巴士去到九龍灣，原本打算搵人食lunch,
點知無下文之後響德福度逛......行下行下就求求其其咁買左對鞋加件衫
咁就差唔多七舊........

夜晚就同個frd煲左陣粥....累 ~~~~ 一睡到天明 ~~
=============================================

今日開始轉涼，有時都幾大風，又突然間落下大雨，更添涼意......
食完飯入錢比個frd, 又大大大出血........我發覺用錢方面開始無乜節制......
不過點都要到2007年1月開始先可以回復正常.........

其實又係打算搵人食下飯，又或者睇下有d咩需要可以幫到手，點知都係無
最後兩點半鐘去左二家姐度幫手做義工，因為佢地中心今日有個外出的活動
呀.........有得食自助餐....正 !!

同班智障學員相處真係完全唔需要猜疑，一定無番工咁複雜
佢地當你係大哥哥大姐姐咁同你玩，好純好真~~~
相信今時今日的社會只有佢地先係最真最以心待人
佢地玩起遊戲上黎真係好鬼得意，十足十小朋友......
記住佢地只係思想比較單純的人，智商比一般人低，並唔係甚麼"低 B仔" !~~~

下午三點做到九點，六個鐘頭好快過，竟然唔覺得累.....
今日同KK佢老豆，楊生楊太傾計，大家都好耐無見，互相問候下，八掛下.....
不過佢地真係好耐都無返聖堂喇，唔好話佢地啦，我自從返工之後都少左
所以我好珍惜每一次同每一個人的見面，相處，
一見就會好多口水，因為都無乜幾何....

<今晚同老豆量度隻臭腳.......佢死都係要話我隻腳大過佢，我都話一樣架啦!!!>

>>December 14, 2006 at 11:01:17 PM GMT+8

2006 年 12 月 13 日 星期三 【晴】

心情又再慢慢跌落谷底.......
有好多人話男人不外乎為兩樣野煩，錢同愛情，
但我唔止兩樣，仲有好多好多......

有時我會響出面響朋友面前繼續嘻哈大癲大吠
大傻大笑咁就過左去....
但響屋企永遠又會打回原形.........
有時屋企人見到我咁的樣.....其實我都知佢地擔心......但同時間佢地又未必敢問我
當然，就算佢地問我我都未必會講，好多時候我都同佢地講話無野
唔係因為唔想同佢地講野，只係覺得自己煩就算

我係自閉青年?? 應該不是吧
希望黎緊新的一年真係可以轉轉運
今年實在好多野都唔太順利~

今年聖誕點過?! 唔知........不過就好肯定唔駛響工作中渡過......
或者個天安排我要番去彈彌撒掛.......

13/12............係我黑仔四週年紀念............
我永遠唔會忘記四年前果日的黑色星期五，前前後後發生過的事

>>December 13, 2006 at 9:35:40 AM GMT+8