2004 年 1 月 15 日 星期四 【晴】

蔡博士，一路順風…有錢o既話，希望我可以去美國時順路o黎探你… @_@

朝早又要去個咩指導員training，都唔知佢想做乜，好無聊。奇怪o既係o的人分享話好忙好辛苦好多o野做，但係我、Terry同Kitty都唔係咁諗，我o地想好多好多o野做，唔駛好似而家咁無聊。佢o地o的人猛話manage十四個TDA好難，但係我就完全唔覺得係咁。心諗，只係咁小o既事，咁少o既工作量，都覺得辛苦o既話，第日點出o黎撈？唉…

仲有個A乜lan，係咁o係度同個計劃幹事講呢個計劃點失敗…我x！收皮啦唔該！呢o的o野係政府搞出o黎o既，你同機構講都冇用啦！咁巴閉就去同董伯伯講啦，戇居到爆，一路o係度講o的政策上冇辦法改變o既問題…咁大個人都仲唔化…唉…

下晝又返中心無聊，個A乜lan又唔知做乜坐埋落我組度做o野，九成係因為Kitty都坐佐o係我o地組度啦！頂佢啦！無無謂咁坐埋o黎扮熟！我o地冇理佢，佢仲o係度自己答爹，勁無聊。

放佐工就好眼訓…

>>January 15, 2004 at 9:42:12 PM GMT+8

2004 年 1 月 14 日 星期三 【晴】

因為星期四上晝要去一畀指導員o既training，所以今日我要先去彩雲學Powerpoint，唔可以同班細o既一齊學…慘！

好鬼早就去到喇，足足早佐半個鐘，原來o係地鐵站行上去五分鐘就到，等我仲以為好遠添。上到去都未開門，就走佐過去彩雲老麥買薯餅食。

好眼訓呀，o的o野雖然大部分都學過，但係都畀我學倒o的新o野喎！呢個中心o的先生都教得幾好。

五點放學，搭606返屋企，原來都只係要一個鐘就返到去，等我仲以為真係要好耐添，畀媽媽呃佐。

>>January 15, 2004 at 12:44:47 AM GMT+8

2004 年 1 月 13 日 星期二 【微冷】

唉…今日上朝off，下晝又繼續返公司悶，真係…頂！

我o地呢班TDA，已經成為女青西環I. T. o既庶務組喇！所有大小庶務都唔知點解交晒畀我o地，寄信、做信差、搬搬抬抬、執後巷、佈置、釘裝、派傳單…一切一切，通通都係我o地包辦！真係豈有此理呀！咁搞法，跟本冇人可以有得著！

下晝好慢咁過，無無聊聊咁…

放佐工，慢慢咁落到銅鑼灣，原來您掛住訓，遲佐先出o黎，不過冇所謂啦，橫掂我搭車出o黎塞塞o下都差唔幾。

今晚睇佐《德州電鋸大屠殺》(Texas Chainsaw Massacre)，超得人驚，雖然唔係好血腥，但係已經令我o地成晚都只係諗起個殺人狂把電鋸同把鋸o既「o野o野」聲… @_@

>>January 15, 2004 at 9:03:16 AM GMT+8

2004 年 1 月 12 日 星期一 【微雨】

嘩…今日真係冇得頂呀…

琴日o係公司，Jamie無端端話聽朝要返九點，就返個導師。唔係嘛…咁早…

八點出門口，你真係諗都諗唔到八點九都未夠就已經到佐西環…蝕鐘。

話就話返九點，好多友仔都遲晒大到，不過好彩，我o個組九點二就齊晒人，雖然話九點三就要離開中心，但係個導師居然又遲到！！！頂佢o丫！全村人等佢等到九點五，之後上佐旅遊巴仲要等到九點九先開車，頂…o徙晒我o地o的時間！好眼訓o架嘛！

一車就車佐去香港公園，條友帶我o地行佐一個圈… @_@ 呢度我o地企佐差唔多成個月啦，仲要o黎呢度… @_@ 第二站就一o野上佐山頂，山頂呢個鬼地方，一月尾就要開始守，到時唔凍死都吹死…

上完山就去佐司徒拔道個觀景台…頂！原來條友要我o地落車就係話我o地知呢度有地方痾尿…吹脹！跟住就去文武廟。頂…企佐成半個月喇！！完全唔知佢組架車帶我o地去o的咁o既地方仲乜…

一點幾先返到中心，真係悶到嘔，眼訓到嘔…今朝真係好無聊。下晝仲慘，o係公司度都唔知做乜…好在今朝返九點，五點就收工。返屋企…累…

食完飯八點幾就訓佐… @_@

>>January 15, 2004 at 12:21:07 AM GMT+8

2004 年 1 月 11 日 星期日 【陰】

一起身，郵差就話我個日記畀人搞破壞。係喎，有個無名士留佐兩個全部都係粗口o既留言喎。

雖然唔知係邊個，但係我都冇興趣知，因為我都唔在乎。仲有，十分之睇唔起呢o的藏頭露尾o既偽君子。我行不改名，坐不改姓。Dominic，李宇軒。

今日落區又係非常之悶，都冇乜遊客…悶…

>>January 11, 2004 at 7:34:07 PM GMT+8

2004 年 1 月 10 日 星期六 【陰】

今日係女青o既《廿一世紀健康家庭生活嘉年華》舉行o既大日子，基本上都幾悶。

今朝返十點，一返到去就見倒班友成班都o係度睇報紙…唉！冇得救o架喇！

搞埋個攤位o的手尾就出發，今日果然係大function，有飯派，叫做好過冇啦…

無聊地居然被派去做全場攝影，呢個就話影盡去，o個個就話唔好影咁多，你話叫我聽邊個講？

我o地個拋波遊戲都幾受歡迎，不過係班細o既執波要執餐死嗟…

好累呀…

>>January 10, 2004 at 10:32:36 PM GMT+8

2004 年 1 月 9 日 星期五 【微冷】

寶寶病佐，聽日仲要考公務員試，擔心…

今朝九點半先起身呀，搞到十一點先出門口，今日要幫郵差買書，條友臨急臨忙又叫我買咩400隻CD盒同一大堆零食，真係…頂…

今日條司機粉米係咁碌車（慢駛也。），搞到我十二點先去到旺角，真係火！即刻就仆去買書啦，去佐平時去開o個間，點知佢話冇我要o個本，但係有個國際版，我冇要到，見仲有時間，就去埋商務問，點知商務真係好廢，全線都冇。

我就見順路走佐上旺電先，睇o下有冇郵差所講o既400隻CD盒，點知畀人當傻仔咁玩！原來係條粉腸畀唔夠資料！！！所謂o既400隻CD盒其實係放208隻CD再加埋208張CD紙！頂！又唔早響！搞到我畀人笑呢個世界上冇一個盒可以裝咁多，我仲要死撐話有！結果都係買佐，又大、又笨、又重，畀著我就一定唔會買o黎用，但係呢個size又確實襯返郵差o既身型o既…

之後證實佐國際版係一樣，就走返去買書喇。買完書都只係十二點半，真係快手。搭返車返西環寄o野，就幾乎出事…

因為太多o野拎，搞到我漏佐個銀包o係巴士上面！！！ @_@ 我仲要返到公司先發現，就即刻跑去總站睇o下個銀包仲o係唔o係度。真係好好彩，因為我坐得後，o架車又冇乜人，個銀包先仲o係張凳上面咋！

執返個銀包之後，就飛去買零食，順便拿個紙箱（個箱係賣酒o架，希望海關唔會特別懷疑啦…mmm…），用o黎寄o野。去郵局之前，仲要特登買雞皮紙，搞郅去到郵局都一點九喇！！個郵局仲要x咁多人！包佐個箱，又空郵又平郵，搞搞搞，搞到兩點二先走得人… @_@

返到去，冇乜o野做，又做書簽。之後要落區，同呀嫻講佢o地唔出糧唔走，點知呀嫻反問我佢o地平時訓覺又點計…佢話雖然係兩件事，公司遲出糧係唔o岩，但係佢話主任要正視呢個問題，仲話我好畀佢o地訓覺，又話受人工唔應該咁之類。最後佢叫我o地落區早o的走返中心出糧…嘩…咁煩o架…

話分兩頭啦，又係o個句，佢o地根本就冇o野做呀大佬！我o地班人做o野咁快手，o個o的咁o既低能o野真係唔駛三兩下手腳就做完啦！老實講，你班人成日畀o的豬頭骨o野我o地做，我o地又有邊次唔係快快手手同你「擦」掂佢o架？！做埋晒o的無厘頭同旅遊冇關o既o野，成日又搬又抬，我o地又有邊次出過聲托手掙o架！睇o野睇得公平o的好！真係…失望。所謂社工，不外如是。

放佐工就落尖咀同家姐呀Ben食飯，食完飯就落bar飲酒傾偈。佢o地係咁叫我唔好咁頽，係咁叫我做人要有大o的野心，要趁後生搵多o的錢同令自己生活安定。唉…不過呢o的o野又談何容易呢…而且而家講埋晒o的結婚生仔o野，係咪又早得滯呀？！

十一點鐘散水，搭o架死人118中途又塞車，搞到我去埋地鐵站入票之後都要成十二點幾先返到屋企。沖涼，一點即訓。

但係又因為飲佐酒o既關係，搞到成晚都訓得唔好。五點正起佐身…而家都六點半喇… @_@

>>January 10, 2004 at 6:29:16 AM GMT+8

2004 年 1 月 8 日 星期四 【微冷】

嘩，今日好悶呀！

上晝好悶好悶，搞o下書簽咁，另外有o的就整攤位。

下晝就玩o個個紙板遊戲，都幾好玩，知道佐好多關於香港旅遊業o既o野。

放工，返屋企。今日仲未有糧出…唉…不過呀嫻同Jamie都唔o係度，今日真係free。

>>January 8, 2004 at 9:25:58 PM GMT+8

2004 年 1 月 7 日 星期三 【晴】

恭喜晒！蔡博士！

琴晚都係十二點鬆o的就訓，唔知做乜死今朝八點一起身就好似畀人打佐一身咁，累到嘔茄…

早佐三個字返到去，返到去又冇o野做，為o既係等到十點半搭車出去落區，好無聊。不過又係因為呢個無聊，搞到呀嫻話如果係咁以後閒日朝頭早落區就由十點開始，企多一個鐘，唔好o徙車錢… @_@ 頂…

今日係第一次落西港城同咸魚街，o的遊客真係少到呢…根本企呢度係多餘，旅遊發展局同旅遊事務處o個班全部都係廢o既。

下晝返到去又冇乜o野好做，做攤位o既依然做攤位，其他人就訓晒…呀嫻同Jamie分別入過o黎一次，唉…真係好人難做…叫佢o地唔好訓，佢o地又一定照訓，唔叫佢o地，又要自己揹鍋…唉…

今日份問卷又彈返轉頭，要大改。火火o地o架喇！之前又叫我o地諗o的general o的o既大路問題，而家轉頭又話我o地o的問題唔夠specific，真係吹脹囉。不過受人二分四，冇法，又要改…煩死！

之前Jamie又偷偷o地搵多佐我o個組三個人去搞o個個咩「o係電影裡面搵題材介紹香港景點」，真係火，係都單聲先啦，佢xy！而家算係乜呀，單都唔單聲就摷我幾件靚走！不過都抵佢死o架喇，又係唔急唔開坑！原來o個壇o野要月尾搞掂！好！又睇o下你點死！

>>January 7, 2004 at 9:29:39 PM GMT+8

2004 年 1 月 6 日 星期二 【晴】

星期二，好鬼死火！

佢xyo丫！話說個Jamie琴日無端端畀返份我o地o個組之前設計o既問卷我改，又冇話幾時要改好喎。咁o岩我琴晚又唔o係屋企，冇個soft copy o係手，條友仔今日下晝突然之間打電話畀我話份o野Elsa好急住1要，叫我即刻改畀佢，我話我冇個copy o係手，佢就叫我搵人打過一份，我真係啋佢都傻囉！就同佢講今日放佐工返到屋企先改，改完先send畀佢…頂佢個臭肺o丫！一x日做o野都係咁，真係幾把火！

琴日Jamie又無端端要我o地佈置西環村個老人中心喎，咁我見我o地組呢期都冇乜o野做，咪是但應承啦…點知今日下晝一上到去，發現原來o個度真係乜佈置飾物都冇… @_@ 頂！

仲要o徙我o地o的時間，走上走落，o係o的廢物堆裡面摷，結果都係乜都搵唔倒，仲幾乎要我o地用o的聖誕o既o野佈置新年…擾攘一輪之後，由我o地兩點半上去，搞到三點佢先叫我o地去買，真係…過份！我即時同呀聰走返落中心拿錢，即刻o係西環度走來走去，之後呀澤仲打o黎話老人中心收五點鐘！@_@!!! 搞到我o地走佐幾檔買完晒o野之後仲要頻頻撲撲咁仆返上去西環村，聽講話唔知聽日有個乜q高層會上去睇喎，所以一定要今日內整好…火！

結果我o地用佐一個鐘好快手咁是鬼但搞掂佐就算。咁搞法真係死佐好多粒細胞…硬係o的o野唔急唔做，搞到我o地一係就要做o野做到好似打仗咁，一係就成班悶到死狗咁…咩公司呀！ @_@

今日發現中心又屈清潔o既英姐上HQ拿支票，唔知係咪我o地o的糧票添呀…係就真係於心不忍喇…

>>January 6, 2004 at 10:13:21 PM GMT+8