2004 年 2 月 4 日 星期三 【雨】

又凍又有雨，冇帶遮…

一返到公司就開會，講二月尾個活動，分配工作，搞到食晏先傾完。臨開完會，個A乜lan居然問會唔會有o的工係公司內部可以調佢去做，我唔只心諗，口都講埋出o黎︰「有得做都唔會請你啦！」條友都可算天真，做人做到佢咁唔知醜，都係第一次見。真係話佢乜乜驚佢嬲！

食完晏返中心又冇乜o野做，講佐每個人有乜工作要做咁樣。今日o的人冇乜訓覺，摺o下紙咁渡日…慘！

放工約佐您，但係之前要買佐禮物畀敏敏先，為佐令佢忘記o個個令佢唔開心o既男人，所以我o地今日拿佐佢個散紙包，決定買個新o既畀佢。搵佐好耐都冇個o岩，最後o係舊大丸搵到個平靚正o既！ccc！

之後同o的同事分開，陪您食飯。凍冰冰唔想四圍走，於是去佐就近o既別府食o野，您就食到塊面紅晒咁，好鬼得意。之後同您行佐陣街就去睇戲喇，o係被籲為五星級戲院o既IFC Palace睇佐《真的戀愛了》(Love Actually)，雖然係要坐第一排，睇得有o的辛苦，但係套戲真係好好睇，最正就係兩個唔同語言背景o既人o個一段，好正，最後都可以走埋一齊。

睇完戲都十二點幾喇。今晚好纏綿呢~

>>February 9, 2004 at 1:50:06 AM GMT+8

2004 年 2 月 3 日 星期二 【乍寒還暖】

返九點，冇陰公。

又係去彩雲，學埋o個三個鐘o既Excel，今日總叫做remind返o的常用公式，總算冇o徙。

走o個時落雨，仲涼風陣陣添…兩點返到中心，又做佐四個supervisions，五點收工。

放工已經即刻返屋企，但係今日灣仔唔知做乜勁塞車，結果o係架788上面訓佐八個字先返到屋企…頂…快o的填海啦！咪理嘈o個班粉腸啦…再係咁塞法真係唔掂o架喇…

今晚終於都完成佐第五個report，仲差四個人o既supervisions，搞掂晒就可以完成晒o的無聊o既行政工作…要快手o的！

>>February 4, 2004 at 1:46:52 AM GMT+8

2004 年 2 月 2 日 星期一 【陰】

敏敏今日終於都出現返，真係好彩…

原來佢話佢咁o岩冇交電話費畀人cut佐… @_@ 搞到我o地成組人白白咁擔心佐佢兩日…

今日返到去都幾無聊，搞完o的應有o既行政o野之後，成組又冇乜o野做，我就趁住個下晝即刻做佐五個人o既supervisions，頹做，只因要交貨…其實到佐今時今日咁o既地步，仲可以做o的乜o丫？政府呢個計劃可以話係完完全全o既失敗！唉…

放工返到屋企，食完飯打佐半個活動檢討報告，就頂唔順太眼訓訓佐… @_@

>>February 4, 2004 at 1:40:45 AM GMT+8

2004 年 2 月 1 日 星期日 【陰】

第一次上山頂，終於走唔甩…

今朝好多電話搵我，九點半就畀人morning call佐，答完佢今日要返工之後，又訓返，結果要十一點先再畀人叫醒，出事…約佐十一點半，飛身去沖涼，出門口。

好在班友實遲，我十一點五出門口，三個字就到，但係班友仔居然仲遲過我…順利咁搭佐一架極慢o既小巴上山…

敏敏唔見佐！連手提都停埋…唔好有事呀唔該…

帶佐o的新postcards上去，十二點三開始工作，極多旅客，比以往所見o既星期日更多，o岩o岩又遇著佢有function搞，人數約為以前o既兩倍，真係勁！結果帶上去o既560張postcards，唔駛三個鐘就派晒，極受歡迎。仲見倒曾蔭權添呀！不過真係好多大陸x呀！

之後o個幾個鐘就係咁輪住放break，不過o的友仔一放佐出去就好似冇尾飛駝咁，過晒鐘都唔蒲頭，激死！

七點九收工，Marco請全部人食夾餅，多謝晒。

之後再落返銅鑼灣，大家都仲好飽，結果打佐陣機，先去食車仔麵。呢間車仔麵真係唔錯，可以話係處於車仔麵界之中o既高水平！

食完飯，散band。返到屋企，再同郵差傾電話，聽佢講o下上個禮拜佢o既經歷…唉，又何苦呢，搞到咁辛苦，唔好再有下次喇！睇o下您女人對您幾咁好！唔好令佢傷心喇！

幸運地，今晚終於都o係馬會身上贏錢，其實星期五晚只係差幾分鐘就收錢，今晚終於都搞掂佐！或者，郵差都有功勞…因為佢o係最後幾分鐘幫我嗌返o的錢返o黎… @_@

----------------------------------------------------------------------------------------------------------------------------

對佢o既三個要求︰
第一，希望佢成功畢業，可以send張佢o既畢業相畀我。因為我應承佐下個月還五千蚊畀個friend，所以未必有錢去美國。
第二，如果佢真係要死，可以畀我見佢最後一面，佢知我可能唔夠錢去美國，所以如果可以o既話，佢最好返香港先死；如果佢係要客死異鄉，就希望佢家姐可以準備少少錢借畀我搞visa同買機票去美國見佢最後一面。
第三，請佢死之前，打個電話話我知；又或者，死之後，有人會通知我。總之，我唔想主動親自去證實佢o既死，希望由其他人話我知。

>>November 10, 2005 at 9:11:54 PM GMT+8

2004 年 1 月 31 日 星期六 【陰】

今日要返全日先夠呢個禮拜o既十一節，全日都好悶，冇o野好做，今朝仲要因為幫Mandy拿o野而遲到，早知早十五分鐘出門口啦…唉…明明起佐身，都搞到咁遲先出門口…

好難先等到六點放工，半晝睇晒成本《全職殺手》，個結局真係好垃圾。

返到屋企，終於都可以補返成個禮拜o的日記…呢個禮拜唔係忙就係累…聽日仲要上山頂添…星期三走得甩，聽日天氣咁好冇雞走喇…

>>February 1, 2004 at 1:52:32 AM GMT+8

2004 年 1 月 30 日 星期五 【晴】

頂！琴晚成晚訓唔倒…個肚脹住咁，九成係琴日下晝食零食食得太多食到滯佐…

今日有三件冇返工，其他人都o係度無聊，我本來今日都唔想返工o架喇，因為真係成身散晒咁，不過都死死地氣咁返工，因為唔想o徙佐o的補假…

太累喇，頂唔順，下晏係咁訓…Jamie都見倒o架，不過講真老實，佢都知冇o野做o架喇，成班人訓佐大半，佢都冇乎。

好難先捱到六點收工，收佐工即返屋企，食完飯，八點左右就訓著佐… @_@

冇見郵差online幾日，原來真係出佐事…條友居然…唉！激死我喇！

>>February 1, 2004 at 1:43:34 AM GMT+8

2004 年 1 月 29 日 星期四 【陰】

累得滯，遲晒到！

今日返九點彩雲training，八點四先起身，八點半出門口，九點四先到…趕到嘔…

今日去佐學Excel，又係o個條廢蛋呀sir，超廢，問佢o的o野可以唔識，又成日做埋晒o的「反面教材」，真係「哦」晒。太累，學到十二點就訓著佐，訓到一點鐘食飯。

食完飯就去佐o個間好平o既士多買零食，買佐五十蚊，成個百佳膠袋咁大袋o野食… @_@ 下晝實行大食會！

雖然佢係教佐好多新o野，但係大部分都係一o的不切實際o既o野，同埋將o的明明有shortcut方法可以做到o既步驟教到幾個steps咁長…好廢。不過好在我都學佐o係Excel o的格仔裡面如果真分行係可以用「Alt + Enter」，總算學佐o的o野。

>>February 1, 2004 at 1:33:15 AM GMT+8

2004 年 1 月 28 日 星期三 【陰】

原來今日都係一個乜乜記念日…

訓到只係返下晝，不過其實係因為今朝班友仔都要去training，所以可以懶返o下…不過您仲懶，居然走晒堂咁… @_@

天氣太差，山頂都唔夠十度，好o野！唔駛上山，賺佐！

但係咁樣返到去都係hea，只可以扮o下摺紙咁…唉…灰！

>>February 1, 2004 at 1:55:14 AM GMT+8

2004 年 1 月 27 日 星期二 【陰】

下晝先返工，都幾爽。

返到去都係做o下o的report咁，要快手o的做，費事畀人話唔做o野。

放佐工就同您返我屋企食飯拜年，您仲要特登落車返屋企拿返o的澳門買返o黎o既手信，真係頂您不順。

食完飯就去佐睇《最後武士》(The Last Samurai)，嘩！勁好睇呀！可以話係暫時我覺得最好睇o既戲之二。唔好以為佢講打講殺，原來套戲都有好多感動位同搞笑位o架，仲有好多好大場面o既打仗戲，聽講話唔係用電腦畫o架，全部都係真人演出！勁！湯佬同個日本仔都做得好好，成日都係用眼神o係表達內心o既說話，超好睇呀！日本o既武士道精神原來係咁o既…雖然係有o的戇居，但係都有o的道理o既，有時對付敵人o既時候，又真係要做到「no mind」先得o既…睇佐兩個半鐘頭，一路睇一路要抖大氣，緊張又刺激。《最後武士》果然「最後冇事」，死淨佢一個都夠膽死…吹脹！

睇完戲都十二點半喇，又係時候覺豬…啜~~~

>>February 1, 2004 at 12:49:19 AM GMT+8

2004 年 1 月 26 日 星期一 【陰】

星期一，悶。

返到去都係摺o下紙咁，救命！悶到抽！

好在下晝都叫做有得落o下區。今次係最後一次去西港城喇，好o野！

放工之後就同班友仔落佐銅鑼灣，因為仲未夠鐘見o個份學友社輔導員，就索性去買定情人節禮物畀您，廢事您又話我冇您心。本來想買件衫，但係又睇唔o岩款，最後行來行去都係買佐支潤唇膏，以Anna Sui o既品牌，設計，價格，同實用情度，呢份禮物係最好o既，嗯，買完之後自己都好滿意。

急急腳咁去到長沙灣學友社，等佐好耐先有得in。兩個人in四個人，都幾好玩，當係之後見工o既熱身。不過今晚講講o下o野唔知自己講緊乜，可能係太累，又或者吹水吹得太勁，搞到唔知自己吹o的乜…

有得做就好喇，可以當多一個做義工o既經驗。冇得做都冇所謂，可以慳返三百蚊。食完個麥當當之後就返屋企。聽日佢o地去training，我可以返半晝，真係好。

>>January 31, 2004 at 11:16:56 PM GMT+8