2004 年 1 月 25 日 星期日 【晴】

星期日，繼琴日去完沙田同粉嶺之後，今日要去屯門。

十一點幾畀您叫佐起身之後，搞搞o下就差多一點，好在都o係兩點左右入到屯門。

入到去同您搞完個電話之後，就四圍搵新年禮物。都唔知買乜好，又唔想買佐o的冇乜用o既o野去您屋企，問您又冇乜意見，問您媽媽又話收乜都咁鐘意… @_@ 您個妹個男朋友無厘頭地玩送雞精添…不過好在我有秘密武器！ccc…

最後買佐美心臘腸…有o的核突咁添…mmm…不過我仲有底蘿蔔糕喎！

之後去佐開位飲茶，過程都有講有笑。見二百蚊茶錢又唔係貴，就埋埋張單添。之後同您屋企去佐元朗睇YOHO Town o既示範單位，再食埋個打邊爐晚飯，就同您返屋企，坐佐陣先返屋企。

返到屋企都十二點喇…放佐四日假聽日又要返工…

>>January 31, 2004 at 10:30:50 PM GMT+8

2004 年 1 月 24 日 星期六 【微雨】

初三，充實咁過。

十一點幾先畀超人個電話叫醒，因為今日約佐佢同大鴻入馬場，結果去到都成點半喇…

唉，最後o個場條單T差o的中，都唔明點解隻十二號臨過終於前先跑個第四…

完場就順路上埋健健度拜年同食飯，跟住去踢波。

今晚好凍，而且對方又唔係善男信女，結果大敗而回…比數係幾多都唔係好記得喇…因為輸到要人o地同我o地換兩隻o黎打…唉…

累累o地…返到屋企成點幾鐘喇，但係見郵差今晚想傾偈咁，就同佢玩o下棋同icq，結果搞到四點先訓… @_@

>>January 31, 2004 at 9:09:11 PM GMT+8

2004 年 1 月 23 日 星期五 【陰】

初二，訓得好晏。

五點先出去，同Joseph吹吹水，交換近況，佢好似又唔會過加拿大讀書，我就順便叫佢幫我搵o下o的物業管理o既工。

之後就去婆婆度食飯，又逗佐o的利是。

返到屋企，「的」起心肝做埋份會議紀錄，三點終於有得訓。

>>January 31, 2004 at 8:49:46 PM GMT+8

2004 年 1 月 22 日 星期四 【乍雨乍晴】

又年初一。凍檸水…

過佐四嬸度食飯，再去姨婆度。逗佐o的利是咁。

之後同姑媽食佐o的o野，聽o下佢講o野咁…唉…生活艱難。

出佐去一陣又返屋企，實在係有o的凍到頭痛。

>>January 22, 2004 at 6:35:53 PM GMT+8

2004 年 1 月 21 日 星期三 【乍雨乍晴】

今日無無聊，返工冇o野做。

年三十，中心冇乜邊個要返工，我o地就成組齊晒人。朝早冇o野做，好難先等到十二點半，今日係我o地組食團年飯o既日子，幾個女仔都整佐o的o野返o黎，有菠蘿腸、炒飯、意粉、鹵水蛋雞翼芝士腸、o者喱，再買佐o的薯片同外賣pizza，叫做用埋o個一百蚊公益金啦…

我o地特登唔話畀Raymond聽我o地今日大食會，因為依照上次去Pizza Hut食飯o既經驗，佢係唔會理人o地食佐幾多而只顧自己個肚飽唔飽。為佐等佢可以食少o的，特登等佢今日帶飯，等佢食飽佐先join我o地。

不過咁樣安排好似唔係幾好，好似isolate佢咁，不過真係冇法子啦…見佢一個人食佢個飯盒咁慘，都特登留o的正o野畀佢…不過…

食完之後成組急急上佐西環村，其實上到去都冇o野做，大家研究o下摺紙咁。每人只係夾返三十蚊左右，唔係太貴。但係死就死在呀Raymond有份食（雖然唔算太多），唔肯夾，搞到班友仔o係度係咁講…煩死人！唉…唔夾咪算囉，又可必睇到咁嚴重？！尤其是係欣欣，特別多口，搞到唔話佢都唔得。煩死。

>>January 22, 2004 at 6:33:23 PM GMT+8

2004 年 1 月 20 日 星期二 【乍雨乍晴】

嘩…凍檸水呀…

今朝本來落區，但係見o的雨勢大佐，就決定返中心喇…搞到有o的人白走一趟添…真係對唔住。

好凍呀今日，好似真係得十度左右，唔落區都係正路。整埋o的書簽，以後都唔再整喇！真係好。

下晝o係西環村渡過，陰風陣陣咁，寒到爆！個Jamie想逼我o地聽日返少一節留返下個禮拜返，又或者返九點放五點不過要o係西環村，我o地全組人死都唔肯啦。鬼咩！中心聽日下晝冇人返，如果我o地要留o係中心，佢o地聽日就要搵個人留o係中心開門閂門，o個個人就係佢喇！條x樣o係度諗縮數，賤格！要十四個人就佢一個？痴線。

今晚放工返屋企又大塞車！中環要填海呀！日日咁塞法真係好唔掂！多多時間都唔夠畀佢！

>>January 21, 2004 at 12:30:11 AM GMT+8

2004 年 1 月 19 日 星期一 【雨】

放佐一日假又返工…

一返到去就要準備開會，十點半開到一點鐘。頂佢喇…呀嫻叫我o地做返之前冇做o既一o的行政工作同埋交返之前所有o既活動檢討報告…嘩！你唔好十年之後先講！仲有呀，個Halloween活動你o地都仲未同我o地開會檢討呀！講鬼咩…

之後再反映埋太少o野做同埋我o地淪為庶務組o既問題…唉…o徙氣。

下晝就即刻做埋o的行政o野去，不過o的report有排搞…仲要搞埋下個禮拜o既roster…好煩…因為要開始上山頂… @_@

放佐工就急住返屋企，不過都急唔o黎…因為今日超塞車…所以我係絕對支持填海！

食個飯之後又即刻衝落尖咀，因為約佐您睇《鬼馬狂想曲》。套戲係典型港產無聊戲，仲有我最憎o既Twins同張柏芝…好鬼悶，不過係買一送一飛，算罷啦…我估唔係買一送一都冇乜人睇。

>>January 20, 2004 at 11:49:13 PM GMT+8

2004 年 1 月 18 日 星期日 【雨】

休息日。

訓到十二點起身，急醒。痾個尿之後又訓，訓訓訓，訓到四點半起身…正！

起佐身出去剪頭髮，條友唔多掂咁，剪到個頭好似o岩o岩訓醒咁，好在我一定會gel起佢先出街嗟…

今晚食團年飯，真係好。

>>January 18, 2004 at 8:47:25 PM GMT+8

2004 年 1 月 17 日 星期六 【陰】

今日係寶寶第一日返PCCW，畀心機呀！

今朝八點四先起身，一起身就仆出去…本來順利o既話，半個鐘係有可能返到去o既，可惜等去西環架車足足等佐兩個字，結果…唉…

返去一陣，又要落區。好悶，因為好少遊客，只係間唔中一、兩個…唉…

放佐工，終於都過佐觀塘喇！食個飯之後，首先就去佐o的運動服裝同鞋倉，結果我o地一人買佐對波襪，我就買多件紅色Lotto外套，都幾好睇，襯埋對金色鞋，新年一定成個利是封咁… @_@

之後再上埋個Bauhaus倉度…嘩…多人到呢…好似唔駛錢咁…o的o野係好平，之但係大部分都係女裝嗟…唉…行佐一個圈，完全冇收鑊，失望而回。

原來您今日返工o既地方咁衰o架，咁以後有得揀有得換咪唔好再去囉！辛苦晒喇寶寶！錫返…啜啜~~~

>>January 17, 2004 at 10:01:41 PM GMT+8

2004 年 1 月 16 日 星期五 【乍寒還暖】

嘩…晨早就要仆過去彩雲上電腦…本來自己一個人可以o岩o岩好準時到，但係等埋o的人就遲佐…

今日係另一個先生教，呢個先生好差，問佢o的o野可以話唔記得佐，而且進度比我星期三學o個堂慢佐好多…嗯…呢條友都係呃飯食o架喇…

十二點上完堂，跟住去食飯，點知又落雨。雖然落雨對我o地冇乜影響，但係我o地去佐搭巴士返中心就出晒事…原來o係彩虹搭101返西環係要個半鐘有多！！！真係坐到我o地pat pat都爛…

返中心其實都冇乜o野做，最重要o既係要返去搞清楚o的單據。頂佢o丫！個Jamie話有張單上面唔知o的英文寫乜，唔知買佐乜o野用佐三十蚊，話係我o地組用o既。我記得我o地冇去過日本城買o野，更加冇買佐o的三十蚊o既o野，因為我o地個攤位好慳，用佐六十幾蚊咋！

頂佢囉，我返到去，見倒張單上面用筆寫佐我名（心諗︰咁快入晒我數？），我再睇一睇…「HOOK」，hook？！唔係即係「鉤」咩？！你唔係唔識呀嘛？證實佐張單唔係我o地組o既，再坐到五點就收工。

收佐工，決定同超人食飯，本來仲想去埋觀塘，因為睇報紙話Bauhaus開倉，諗住去執平o野，不過最後唔夠時間，聽日先去啦唯有。

夜晚再執一執個CV，上o下網搵工。要開始搵工喇…因為可以續約o既機會微乎其微，甚至續到3月14號個project完o既機會都好低…同事們，2月24日之後，你o地就要靠自己喇…嗚~

>>January 17, 2004 at 9:46:59 PM GMT+8