2004 年 2 月 24 日 星期二 【晴】

今日係最後一日喇，女青，再見喇…不過你好似仲差我好多舟車費同人工喎…

上晝落區，今日屈倒只落四個鐘，last day賺佐，但係我o地都冇偷懶o架，雖然真正做o野o既時間只係三個鐘左右，但係我o地全組十三個人每人都派佐二百張postcards，哈，打破晒全公司紀錄喇o卦！

下晝返中心，為o既只係搞o個個反應欠佳o既「紙上縱橫」。但係食完飯返到中心居然吹到連位都冇要上西環村囉…個Jamie真係勁廢，而且乜都唔知頭唔知路，要佢帶住做o野就真係死硬，咪以為入佐o的福利機構就可以「un un腳」長嘆先得o架！

逼住帶埋o的o野上西環村做，四點半再落街派o的遊戲紙，都派佐百六張先收工。

功德完滿。終於完結佐人生之中第一份full time…

伍蚊返佐o黎，於是我o地成班九個人放佐工之後再落銅鑼灣沙爹王食飯，好唔掂，不知所謂，以後唔會再幫襯。

>>March 8, 2004 at 5:01:28 AM GMT+8

2004 年 2 月 23 日 星期一 【晴】

尾二一日返女青喇，不過今日都唔係特別多o野做。

上晝急急腳搞埋個「紙上縱橫」，再加印埋條例題上去，結果同一份o野足足o係影印機度出入佐三次，二百幾份o野印佐六百幾張次，都幾無聊，但係冇法。

下晝就繼續同佢o地傾o下o的出路問題，見倒佢o地咁迷惘，真係無奈，又唔係好幫倒手…而家先知原來學友社教o既o野係好有用。

下晝再派佐o的遊戲紙畀中心o的小朋友玩，佢o地好熱情咁問答案，我先發現原來係中心，最令我留戀o既，係呢一班咁鬼馬o既小朋友…鳴…聽日last day喇…

>>March 1, 2004 at 4:35:16 PM GMT+8

2004 年 2 月 22 日 星期日 【陰】

今日係第一次去學友社上堂，我參加佐個「學生專線」電話輔導員o既計劃。

一去到見好多人參加，簡直係坐滿晒成個房，好鬼死逼…

悶到嘔呀，係咁聽個講者講o野，真係好悶，又好似講極都講唔完咁，低能o架咩，足足坐足三個鐘咁滯先話break一break呀…陰公…個位逼成咁，辛苦死…

之後分開五組，每組由三個組長帶住，呢三個組長都幾搞笑，個Bobo仲係咁講o野講個唔停添，有o的咁o既組長都幾好，起碼唔會有dead air。

overrun晒，搞到六點半先有得走，趕返屋企食飯…好眼訓…

>>March 1, 2004 at 4:15:21 PM GMT+8

2004 年 2 月 21 日 星期六 【晴】

今日到成十一、二點先起身，之後就要即刻走落尖沙咀同您爸爸做生日。

同老人家慶祝生日，居然係去唱卡拉OK，都算係創新。見您o地好似玩得好開心咁喎，我就總係有o的格格不入咁，不過最後都唱佐兩首歌…

三點就要交房，搞到食蛋糕o個時都冇歌唱…唉，死人Neway又駛唔駛咁孤寒呀…

玩完之後就同您一家去行街、買鞋…嗯…好鬼悶…

五點幾就各自歸家，有o的累添…陪您icq都兩點先訓，聽日下晝要去學友社training！

>>March 1, 2004 at 4:04:56 PM GMT+8

2004 年 2 月 20 日 星期五 【陰】

星期五喇！聽日放埋補假，仲有兩days要返！

朝早返到去都冇乜特別o野做，係大家圍埋傾o下之後的出路咁…食飯之前仲有得出返十二月o的舟車費，但係九月super darw o個o的都係仲未有… @_@

下晝就去佐九龍會所參加o個個咩年終訓練，好無聊，又好hard sell佢自己女青o的courses…

放佐工就落旺角，買唔倒飛睇《大城小事》睇戲，食完飯就四圍行，順便買禮物畀您爸爸，因為聽日要去同佢做生日嘛…行行行，上佐新世紀，買飛睇佐套好搞笑o既戲︰《玩轉男人心》(Something's Gotta Give)，雖然兩個主角都係老鬼，但係o的戲好好，成套戲都幾好睇，睇完戲，好快又夠鐘訓覺喇…

>>February 26, 2004 at 12:25:38 PM GMT+8

2004 年 2 月 19 日 星期四 【晴】

今日係第一次落天星碼頭，亦係我尾二一次落區！

分配佐每人百五張postcards，但係都未企夠一半時間就派晒，成組總共派佐一千九百五十張，真係勁。

今日遇倒好多外國人，好開心。

好難先捱到七點半收工呢…又去「捽碟」食車仔麵，再上網吧打佐四個鐘機…玩CS玩到頭都暈… @_@

>>February 20, 2004 at 1:20:06 AM GMT+8

2004 年 2 月 18 日 星期三 【陰】

今日一切如常，上晝一返到去成個中心都係老人家，Jamie狂叫我o地上西環村，但係我冇理佢，一於等齊人先走，鬼叫你條x樣琴日咁樣「跣」我o地一鑊呀！

上到西環村都冇乜o野做，傾o下偈咁就一個上晝。下晝o係中心做埋返板，咁就一day。

夜晚因為屋企冇人開飯，就出佐旺角同您食飯，不過首先去佐花墟陪您揀花送畀恩兒。之後去佐間叫Strawberry Forever o既o野度。呢間o野都幾不知所謂，一開波就老點我去個老遠o既廁所，返到o黎又冇水飲，o的waiters跟單跟錯晒，o的o野食又出得慢，仲要上演一幕倒瀉水落客人身上o既好戲，真係笑x死朕…呢間咁o既o野，注定要被black-listed。

食完o野，去佐買佐CDR畀您燒，之後就陪您去睇o下o的電話，您話要買畀您爸爸做生日禮物，仲問我買乜畀佢…唉…煩死…要諗埋o的咁o既o野…

行佐一陣街，十點幾就各自歸家。

>>February 20, 2004 at 1:35:36 AM GMT+8

2004 年 2 月 17 日 星期二 【晴】

佢xy o丫！火到咩咁！

朝早去九龍灣展貿，諗住去聽一個唔知乜春o既o既物體，o係鐵站等到十點半都未齊人，結果差唔多成十一點先去到個場度，一去到，人o地就問我o地有冇報名…o下？！！乜要報名參加o既咩？冇人同我o地講過o既？！！萬分尷尬之下搞到要人o地特別安排位畀我o地坐… @_@

打電話畀條廢人Jamie，佢就乜都唔知，又幫唔倒手，又話o的返工時唔o岩，又話中心只expect我o地去一節（人o地個活動係由今日上晝九點搞到夜晚九點同埋聽日朝九午十二o架！）…火都o黎埋！鬼咩！我估所有關於呢個event o既資料都o係晒個email o既attachment file o個度囉，但係條廢人就話開唔倒個file，搞都我o地乜都唔知，白白痴痴咁以為walk-in就可以入去，十三個人就因為一條廢人o既錯失，戇xx咁做佐傻仔…我就即刻通知其他人唔好去，唔好做傻仔。

做社工做到好似佢咁，真係死x佐去算啦，不負責任，粗心大意，不x知所x謂！廿個火！

但係個主辦單位就非常好人，派晒o野畀我o地，又餅又水又零食，仲安排晒我o地入坐，但係呢個talk真係好悶，乜年紀o既人都有，大陸人都有…呢個乜春o野o黎o架？！個feel就好似保險或者傳銷o個o的「激勵大會」，做埋晒o的戇x o野，講埋晒o的x理論…o的人都不知幾enjoy，又唱又跳，極其戇x…

頂佢唔順，食埋佢畀o既「生米骨」米線午飯之後，半組人閃晒，淨低o個五個九龍友，話搭車返屋企方便o的廢事返西環。

返到公司，見倒Jamie，條x樣居然仲夠膽死問我o地點解會返o黎！哦。啋佢都戇x。

做埋塊板，下晝就係咁過。

>>February 17, 2004 at 11:02:45 PM GMT+8

2004 年 2 月 16 日 星期一 【陰】

朝早返工醒佐，特登唔搭行皇后大道o既車，改搭行德輔道o既車，仲早佐一個站落車行返去，避開晒o的塞車，準時返到去。

上晝冇乜o野做，搞埋o的無聊行政o野，佢o地又自由活動。而我就要搞埋中心個紙上遊戲，都幾無聊。

下晝Jamie同呀聲一齊好頹咁做佐個group supervision，解釋多多，話係因為個實習社工要有實際o既實習經驗，所以個新移民小學生旅行就畀佐佢搞。哦。咁就要犧牲我o地o架喇！好公平o丫！我o地成班都係一o的唔起眼，o係中心冇地位做庶務o既廢人o丫嘛！根本就係剝削佐我o地身為旅遊發展助理o既實習機會。講多無謂，佢o既所謂道歉我估無人會接受。但係我o地o係中心頹佢又吹我o地唔脹，因為係佢理虧在先！

今日再投佐塊展板o黎做，等佢o地有o的o野做，唔駛咁悶。而最後一個景點天星碼頭o既roster亦都出佐，唔錯唔錯，夾到o岩晒我、Kitty同Terry o既時間，其他o野話知佢喇…

今日個A乜lan開始正式提早自動離職，呀浩文就成個大佬咁款，佢即刻令我諗起楊修…唔係我話佢啦，搞到自己周身功夫唔得閒咁，覺得佢好不自量力囉，以為自己真係好做得o野好掂，其實我o地都只係當佢係戇x仔一名，咁鐘意做你咪做飽去囉，我o地冇人同你爭，我o地只會安份守己。做人，最緊要知道自己o既極限去到邊！

放佐工就即返屋企食飯再去踢波。今晚無端端有波踢，仲要係對返彩虹o個班廢蛋，結果我o地o係冇龍門輪流守o既情況之下，居然都大勝五比一。鬼咩，佢o地又係o個條友守龍呀！次次佢守龍就畀我o地大炒五球o架喇！上次佢仲慶到踢垃圾筒添呀，今次又係咁，好心佢就唔好再去踢啦…

走o個時用新方法，就係搭巴士落觀塘再轉亡命小巴，唔駛一粒鐘就返到屋企，快過地鐵好多。好憎搭地鐵，因為實在要轉太多次車喇！

好正！踢完波完全冇晒鼻敏感，方力申講得o岩︰「日日運動身體好…」

返到去居然都仲可以同郵差同埋郵差夫人icq同msn，再幫手去o的大陸網站摷隻歌，搞搞o下都成五點喇，要訓喇。

郵差要努力呀！

好掛住我架Bianchi呀…佢而家搭緊飛機喇！

>>February 17, 2004 at 4:57:40 AM GMT+8

2004 年 2 月 15 日 星期日 【晴】

十點起身，送佐我架愛車去西灣河，早佐半粒鐘十一點就到佐間單車舖，原來記錯佐時間，搞到嘈醒佐郵差家姐…最終十二點半送別我o既Bianchi。

下晝冇o野做。星期日，真係好。訓訓訓…

晚上就睇埋隻《鎗王》VCD，都幾一般，等我幾年前仲咁鬼想睇添…

愛您~~~

>>February 16, 2004 at 1:59:05 AM GMT+8