2004 年 2 月 14 日 星期六 【晴】

晨咁早就要上高街training，學用DC同DV，都幾有用，但係我又邊會有錢買呢o的o野用呢？

遲晒先開始，足足等佐半粒鐘，仲要簽到表係唔駛簽時間…早知遲o的先到啦…

一點收工，兩點落到銅鑼灣，唔知做乜今日又試唔可以o係約定o既地方見倒您… @_@ 見倒面之後我o地就去佐「卒碟」車仔麵食碗麵先，再去o個個結婚用品展。雖然一切都係言之尚早，不過廿蚊消磨一個下晝都幾抵玩，您又可以發o下新娘夢… @_@ 不過結婚呢味o野，真係唔係我o地呢o的窮人玩得起…唉…

去完結婚展再去佐分域碼頭麥當當坐佐陣，口痕痕仲食佐個雞翼餐添…之後再坐船過海，撞正o個個乜q「幻彩詠香江」，只係見幾廿條laser唔知射去邊，仲有o的放得幾秒o既煙花…完全唔知有乜咁好睇，可以引到o的人去晒隻船o既一邊睇，真係幾鬼驚隻船會沉呀！到時真係香港版Titanic喇！

最後去佐Oliver食o野，o岩o岩去到o個時都唔係勁多人，但係因為東方送coupon，搞到食食o下o的人多到咩咁，冇一個位係空o既，仲要吹到連o的o野食都要等…我o地就趁佢亂走佢數…ccc…結果連coupon都慳返食佐餐霸王餐！ccc…

食完飯再去尖東吹吹風，再送您返屋企。搞到一點八先出到旺角，今晚第一次搭泥孟的，三個字就返到柴灣，都只係廿蚊，真係抵！落佐車先發覺個司機找多佐錢畀我，我畀一百蚊佢，佢找佐兩張五十蚊紙同一個十蚊銀畀我，結果有人送埋錢畀我返屋企！不過如果我下次再見倒個司機，我都會畀返三十蚊佢o既…

真係吹到囉…今日頭尾夾埋賺佐一舊水，真係唔知行乜運…

聽日就要送別我o既愛車Bianchi喇！因為佢將要去美國陪郵差走每一段路…嗚…保重喇，我o既寶貝！

>>February 15, 2004 at 3:56:18 AM GMT+8

2004 年 2 月 13 日 星期五 【晴】

今朝西環超塞車，就咁畀佢硬屈佐三、四個字！

返到去都冇乜o野做，係要佢o地做埋個壁佈先，但係最後都係要搞到下晝先做完。Super Draw o的車錢終於都有得出喇！今日呀嫻叫佐呀澤去旅發局拿，真係跨張。

放工又塞車，煩。

學友社o個度收佐我做電話熱線輔導員喇！好o野！二月廿二號開始training，弊喇，好似有o的撞期添…

>>February 13, 2004 at 8:52:27 PM GMT+8

2004 年 2 月 12 日 星期四 【晴】

懶一懶，用佐四個鐘補假，朝早冇返工。仲有四個鐘，下個禮拜放埋去！ccc！

下晝搞個壁佈，搞得一半，因為冇資料做。我o地係咁拿後巷o的廢物出o黎利用，玩得好開心。

放工返屋企，好悶好悶呀…

又上網睇o下o的工咁…打o下機…又一個夜晚。

>>February 13, 2004 at 2:02:39 AM GMT+8

2004 年 2 月 11 日 星期三 【晴】

星期三喇，今日係最後一次上山頂喇！

今日唯有實行佐遲返早走戰術啦，中段時間仲走佐去行山，我o地死都唔肯問人路，幾個人o係個山頭度亂咁摸，好彩最後都憑住一包麥當當而搵倒出路！山頂有好多地方都好靚，尤其係可以望落山o既地方…

一日上山八個鐘仲要企戶外確係幾辛苦o既，唯有偷o地雞啦…太陽一落山就開始凍，加上來自四方八面o既寒風…都幾惡頂o下…

落返山同您食飯，食完飯行街，您買佐條褲畀我做情人節禮物…mmm…咁貴… @_@

>>February 13, 2004 at 1:51:17 AM GMT+8

2004 年 2 月 10 日 星期二 【晴】

今日返中心又無聊，慘。

朝早搞晒o的未做o既行政o野，仲出埋糧添！再做埋晒o的supervision先食飯。爽，真係冇工一身輕！

下晝就慘喇，冇乜o野做。佢o地班友大大聲傾偈，搞到畀人話…都話佐唔好咁嘈o架啦…最後仲搞到畀人叫佐落街派傳單，但係又冇個肯郁！都係呀堅最有義氣，帶頭落去！好兄弟！

放工又等佐好耐先有車，搞到七點半先返到去…食飯、洗碗、打機…訓…

>>February 11, 2004 at 11:07:58 AM GMT+8

2004 年 2 月 9 日 星期一 【晴】

今朝天文台話錄倒打破今年入冬以o黎最低溫度o既攝氏七點七度…好可惜…今日都係要落區。

朝早首先同班友仔去佐葵青o個個唔知乜鬼青年就業展，十點四個字開始排隊，十一點八先入到個會場，真係企到傻囉。入到佢又唔係個個都有心機睇，即使有即場面試機會，佢o地一於好少理，話做完呢份工要抖返一頭半個月先，真係吹脹。只係得靜o個五個o係度排隊interview…唉…心態唔同，始終每個人都有唔同諗法，各有各好。

不過我都有得著喎！初時睇佢好似係o的只係畀十幾歲o既青年o既工，人工得o個五、六千蚊，但係又畀我發現佐九鐵請司機同埋站務員，人工仲過萬添！即刻填表同埋仲有得簡單面試。冇心理準備之下猛講自己有興趣但未準備好…亂講一大輪…希望有得真係去九鐵in啦…

睇完就食飯，食大快活，佢xy o丫，o個o的咁o既死人服務態度同改革之前一模一樣，真係抵佢成為三大快餐店之中最差o既，以後唔駛旨意我再去。

食完之後就急急腳趕返中心，為要拿o的postcards上山頂派。而佢o地就自己上山派住書簽先。頂…今日居然o係山頂都會塞車，搞到四點先上到山…不過始終佢o地都係快手快腳o既一班，個半鐘頭就已經o係山頂派晒920張postcards，真係勁。

收工，返屋企，休息。您唔開心，因為有o的o野憂慮…船到橋頭自然直，都唔驚得咁多o架喇…

>>February 9, 2004 at 10:01:53 PM GMT+8

2004 年 2 月 8 日 星期日 【陰】

全日訓！訓到下晝一點，畀郵差o既話叫醒。原來佢又入佐廠…唔該您愛惜o下身邊愛您o既人好唔好？唔係個個都可以頂得您順唔走o架！既然人o地願意留低，就請您努力o的珍惜身邊愛您o既人，唔好令佢o地傷心好唔好？我對您有信心，但請您都要對您自己有信心，您一定要贏，戰勝您o既「心魔」！我會為您禱告直至您好返為止。

之後食完飯又訓，訓佐一陣您家姐就打畀我，叫我勸o下您…

講完之後我又訓過，一直訓到食晚飯。食飯前又同您女朋友icq，我叫佢畀o的耐性對您。

食完晚飯我又訓，訓到十二點左右，您女朋友打畀我，了解多佐您而家o既情況，我再提醒佢叫佢唔好灰心，其實您係個好人，只不過係鐘意拒絕人o地對您o既關心。佢再叫我勸您唔好成日都鑽牛角尖…

郵差，請您乖乖o地，您睇o下，好多人愛您o既，您要堅強、壯膽、不要懼怕！我從來都唔覺得佢o地所講o既心理病係病，我認為呢種所謂「病」，其實只係需要人幫助。我對您有信心，您要克服佢，唔好令自己再跌入黑暗之中，您要努力，愛您自己！

王菲講得好o岩，佢話︰「自己都不愛，怎麼相愛，怎麼可給愛人好處…」《給自己的情書》

>>February 9, 2004 at 9:47:30 PM GMT+8

2004 年 2 月 7 日 星期六 【雨】

由琴晚十一點，一直打牌打到下晝四點幾。

頭八圈同Marco、聰同Gary打一二八，輸佐成六百蚊，今日o的手氣好差…打到朝頭早，o的人又要走，就等Mandy上到o黎再由堅、澤接力打六十四，居然畀我贏返五百蚊！雖然淨輸一舊，但係總算執返身彩…

請佢o地食埋車仔麵先返屋企食晚飯，o係架巴士度幾乎訓到唔識落車…

累死，好早就訓佐，訓…zzz

>>February 9, 2004 at 2:06:41 AM GMT+8

2004 年 2 月 6 日 星期五 【雨】

今日無無聊十點要返中心，聽唔知乜q體適能講座，想班人畀千二蚊上堂，學多門手藝，話晒而家好多Fitness Centres都請呢o的人，但係要佢o地班低工資人士報o的咁o野，真係話咁易咩！

灰囉，而家呀嫻話唔計山頂同地面溫差，總之高過十度就要上山…政府班無良人真係好賤格囉！唔係佢企就緊係唔知辛苦啦！咁o既政府真係豬狗不如，遲早要打畀大班！

o係乜都冇帶o既情況下上山頂，初時冇落雨，但係都好大風，凍到死。我唯有同佢o地講︰如果派晒手頭上o既o野，就可以長期留o係室內，成班人即係變得積極晒，通山走，直頭係追住人o係派…後尾都落大雨，仲要凍o的，四點三左右兩組人都全部派晒o的o野，就畀佢o地自由活動，留到五點鐘先落山走。冇法子…唉…

返屋企食飯，食完飯再出去，因為我o地今晚約佐Gary打牌。

>>February 9, 2004 at 2:01:47 AM GMT+8

2004 年 2 月 5 日 星期四 【陰】

今日有遮都唔駛開，因為冇落雨。

放上晝，下晝先返去，做佐個supervision，好無聊。

真係返工等放工，好麻煩地要補填返好多好多份簽到記錄，好煩好煩！學敏敏話齋，完全唔明點解呢度咁少o野做，但係偏偏行政上o既o野就要做咁多…

今日送佐份禮物畀敏敏，我o地食完飯將份禮物放o係台面，佢問都唔問就拆喇！抵死到囉！於是又畀o的同事玩佐一輪。四點幾食蛋糕，畀多個意外驚喜佢，大家都玩得好開心，最後仲吹到呀澤用o的雙面膠紙將敏敏縛o係張凳上面，班友真係玩到冇o野好玩喇…不過又係o既，份工咁悶又冇o野做…

唉…快o的完啦份約…

>>February 9, 2004 at 1:54:07 AM GMT+8