2004 年 4 月 24 日 星期六 【暴雨】

今日條腰右邊o的肌肉有o的痛，唔知做乜…

起身都成十點九，今日要去九龍灣幫樂施會做義工。十二點過o的先去到，但係居然比約我o既樂施人早到… @_@ 遲到大王都可以準時，真係勁。原來o的義工人手都唔多夠，因為張莪工memo話要差唔多12人，但係呢度只係得8個人… @_@

冇表態o既情況下，畀個leader編佐做賣波同賣書，仲有派o野。睇住個捐款箱o的錢係咁增加，再諗起琴日經過深水涉，見倒「前線」o個個空空如也o既捐款箱，就覺得好搞笑…o個班人只係識得玩政治show，即使連劉慧x都走埋出o黎嗌mic，但係都冇乜人支持…ccc…

搞到七點幾先走，有o的累，但係都走佐去睇波…搞到成點先返到屋企…累！

>>April 25, 2004 at 5:44:24 PM GMT+8

2004 年 4 月 23 日 星期五 【晴】

超級熱。夏天又o黎喇…討厭！

琴晚訓到四點幾五點發完個夢就醒佐訓唔返，我發夢放火燒佐成間Neway… @_@ 都唔知做乜同Neway咁大仇口。

見訓唔倒就打返呢排o的日記，發覺o的記憶冇晒…

打到六點幾o的抗敏葯發作先可以訓返，點知一訓就訓到十一點三！！！超趕急，因為約佐十二點三見工！

呢份工係社會福利署o既打雜，唔知乜鬼就業援助主任。一上到去就賺佐錢落袋喇！o個個對資料o既男人勁好人，我同佢講話張大學證書太大張，所以冇帶。佢對完資料後，就提我話︰「你下次見工唔好話張cert太大張所以冇帶喇！其實你份成績表都已經證明佐你讀完個學位。而家你見工呀，同人o地講話冇帶o野咁冇誠意…」係喎！點解我之前一直咁戇x o既呢？！

謝過呢位好好先生。

之後入房interview，居然玩一皇三后呀！一入到去就畀人問用佐幾多時間預備見呢份工，我就一開口就答冇預備過… @_@ 真係唔想撈喇…哈哈…真係頂唔順自己可以誠實得咁可愛…因為對呢份工一無所知，為免佢跟住繼續問我答唔出o野，所以都係誠實o的好…之後佢又問我有冇諗過自己點解冇人請，又問我有冇檢討過自己有乜缺點引致未搵倒工，再叫我用英文答o下有冇辦法可以降低失業率…

老實講，真係完全冇預備過，不過今次interview都學倒唔少o野。空槍上陣，即時爆肚，都可以講話係我interview o既寫照。

見完呢份就由北角搭車去旺角，等見另一份工。呢份係CS o既工，同個interviewer幾好傾呀，原來佢係幫地鐵請人，工作地點居然係IFC 2呀！！！勁驚喜！如果做倒呢份工就好喇！o係中環返工，好威呀！但係佢提我呢份工語言能力要求好高…mmm…隨緣啦…

見晒工後就落佐深水涉，o係西九龍睇書，等夠鐘返學友社當值。今晚係第一次返專線開工呀，不過一開波就食檸檬喇！有個女仔打o黎話一定要搵女仔傾… @_@ 之後又有兩次o的人打o黎玩電話…最後只係接佐一個問好簡單問題o既電話…今晚可能係星期五，電話比較少，成晚得十一個cases…大家都好悶，係咁等個電話響。（學友社規定唔可以講o的case內容畀人知o架，所以唔打咁多落去喇。）

完佐開檢討會開到十點半，之後食佐個好難食o既咖哩雞扒飯…頂！

>>April 24, 2004 at 3:24:46 AM GMT+8

2004 年 4 月 22 日 星期四 【晴】

睇完波琴晚成六點幾先訓，但係成朝就唔知做乜鬼咁多電話，印象中最多電話o既好似係媽媽，都係交帶今日同婆婆覆診o既事…結果最後訓到成一點半先起身…

好快咁沖涼出門口，兩點一上到東區，但係婆婆居然都仲未到！！！可以話係好彩啦，因為我咁都未遲到。好快咁睇完醫生，仲好快咁拿埋葯，搞掂晒都只係三點過o的，點知o個架「易達巴士」居然話唔可以早到，只係可以準時四點先可以接婆婆返屋企… @_@ mmm…雖然我都算係時間多，但係都係第一次唔可以提早走，所以話咁急咁趕做乜o丫，咪又係要等！婆婆同媽媽一樣係o的「衝鋒車」性格…

期間有電話打o黎叫我去interview呀，琴晚send o個o的信開始有回音… =)

送返婆婆返北角之後再去返小西灣剪頭髮，原來o的頭髮真係好長o下…剪短佐，人都開心o的，下一部係配過副眼鏡，改善一下o的心情。

食晚飯之際老死超人話佢聽日要上大陸三日，我就出去陪佢食飯吹水同買佐兩注波仔，雖然好有信心，但係呢期冇乜運，所以我估都唔中居多o架喇…比較早返到屋企…休息…

>>April 23, 2004 at 5:48:23 AM GMT+8

2004 年 4 月 21 日 星期三 【晴】

今日冇出街喇，本來諗住出去剪頭髮，但係因為今朝睇完波都未訓，o係度上網搵工搞到十一點先走佐上媽媽張床訓…zzz…訓到五點都唔願出去lu…

下晝開始send信，係咁send係咁send，超勤力。睇返o的mail，發覺我原來已經有成兩個幾禮拜一封信都冇send過喇，真係過份！不過呢兩個禮拜確係幾死去活來o既。唉…心情唔好就乜都唔想做o架啦…

不停咁send到今晚場歐冠盃開波，總共send佐31封信呀！

快o的有工做啦…我唔想再係咁hea落去喇… @_@

>>April 23, 2004 at 5:12:48 AM GMT+8

2004 年 4 月 20 日 星期二 【晴】

訓得唔好，畀個見工電話嘈醒佐添…

今晚係我同媚媚和好之後第一次約出o黎食晚飯。發掘佐條新路線由柴灣去葵芳，就係搭788再o係中環轉935，全程45分鐘，超快，但係我都係遲到。

我o地去佐食台灣o野，您揀佐泡飯，我叫佐米線。原來您係唔鐘意用湯撈飯o既，真係唔講唔知。我唔係好肚餓，亦對湯撈飯冇乜抗拒，所以就交換佐。

食完飯唔想留o係間o野度，因為坐得好唔舒，就去佐仙蹤林坐低傾偈。其實都冇乜o野講，因為我都唔知可以講乜。作為一個背叛者，面對被叛者，心情好予盾。另一方面，因為經歷過呢一次背叛，令到我一時三刻更加難投入返呢段「舊情」之中。我知道您好不滿，不滿在我對唔住都唔講句，亦都冇作出任何解釋同埋講任何討好您o既說話，但係我o既性格本身就係唔鐘意講o野（除佐實際工作有需要o個陣時），仲有您話我o既文字能力表達始終比較強嘛…我…唉…

只有講一句對唔住，但係我只可以好坦白咁o係度講，我對您o個份愛o既感覺，確係畀人偷走佐。對唔住。

心亂如麻。

----------------------------------------------------------------------------------------------------------------------------

一拍兩散
容祖兒

專一至今　竟會敢　避過你的吻
伏在你身　說找到　更喜愛的人
我也居然變心　不禁要承認我
像往日我恨透的罪人

當初的我　為了你　為瞞著好友
日夜怪你　愛不夠　還驚你風流
然後到我內疚　任旁人來認購
恨你沒有問情由便放我走

誰都會散　怎知一拍便會散
怪我自己作反　明明我不應再揀
忠貞怎可以貪　給拋棄亦已很慣
不慣去承認自私　移情別愛太奸

遲早要散　散得清脆未算慘
我卻要忠變奸　斗膽一腳踏兩船
想上岸時又晏　無面目再解釋
自廢了承諾是否太搗蛋

當初枉我未拍拖　曾這樣講過
外遇那些女主角　遲早惹出禍
誰料那個是我　又能如何恨我
沒法面對自我其實最痛楚

誰都會散　怎知一拍便會散
怪我自己作反　明明我不應再揀
忠貞怎可以貪　給拋棄亦已很慣
不慣去承認自私　移情別愛太奸

遲早要散　散得清脆未算慘
我卻要忠變奸　斗膽一腳踏兩船
想上岸時又晏　無面目再解釋
自廢了承諾是否太搗蛋

何苦再自命悽慘　你當我搗蛋
誓要去與他邂逅仍然從不怕被人話濫
從未做過玩家　但我卻誠實認真去玩

真心相愛　未見得為了他英俊
換掉角色　也許你　你都會包容
我到今天至懂　為情而淪落了
在背後確實有些苦衷　不可不信

>>November 10, 2005 at 10:25:01 PM GMT+8

2004 年 4 月 19 日 星期一 【晴】

今日係媚媚第一日返工，工作總算係順利罷…

但係我今日就全日玩失蹤！

但係「天大地大，居然冇我o既容身之所」…

琴晚同欣欣係咁傾係咁傾，大家都已經講到筋疲力盡，今日個電話仲要全日冇電添…都好o既，少佐其中一個煩惱o既來源，但係最擔心o既，係有人叫我去見工而搵我唔倒… @_@

夜晚一直o係元朗區流浪，仲幾乎畀條盲炳倒後車撞倒！火佢啦！o的人真係可以咁冇品o既！倒車都唔睇後面，撞完人之後仲想走佬！我即刻叫停佢，但係唔係自己地頭又唔好搞事，只係同佢講下次駕車要小心o的，同埋要求佢講返句對唔住就算。

搭最後一班968去中環轉最後一班788返屋企，o的時間真係夾到o岩o岩好。

當兩個女人同一時間對您講︰「為您，我甚麼都願意…」o既時候，您應該點做？

>>April 26, 2004 at 4:53:04 AM GMT+8

2004 年 4 月 18 日 星期日 【晴】

今日下晝係學友社學生專線o既「開線禮」，冇嘉賓，有乳豬，有o野食。但係我又遲到，好彩未開波。

我o地o個組都唔齊人，有邊個真係成功過倒exam我真係唔知，但係今個禮拜五就要開始返中心聽線，心情差差o地，都唔知到時係咪真係可以同人傾倒… @_@

勁無聊，居然咁都要切燒豬囉，吹到o丫，仲要一組派一個代表出去切，而o個個人居然仲會係我！搞完一大輪o野，又一要玩role play，完全冇mood，所以唔做。之後有好多o野食，但係以燒豬最好食，我係咁食係咁食…哈哈…都可算係近期最開心o既一件事喇！

欣欣出佐o黎深水涉，順手搵埋佢去「大家食」食「手絞麵」。十蚊碗四川擔擔麵，超抵食，勁開心，真係食一世都願啦…

之後又約佐老死超人，買完波仔再走返落觀塘，有間o野九點之後小菜特平，仲要生啤任飲，不過我o地冇乜飲，因為o的生啤好難飲，欣欣仲話o的o野好難食，我同超人都覺得ok，又或者係我同佢對食o既要求都唔係咁高啦…

食完飯各散西東，欣欣就話今晚無論如何都要講清楚我o地o既關係︰我對底揀邊個。對於我呢個o係感情問題上一直顯得優柔寡斷o既人o黎講，係一個極困難o既問題，如果唔係亦唔會將問題一拖再拖。

最後得出o既結果，係我同欣欣保持返好朋友、契哥妹關係。佢話我係佢o既奴隸獸一號… @_@

>>April 24, 2004 at 3:27:43 AM GMT+8

2004 年 4 月 17 日 星期六 【晴】

做過乜？

今朝搭車入佐機場，o係機場坐佐成晚，冇返屋企。

原來機場夜晚係冇飛機升降o架，我以為而家香港已經係廿四小時有航班o既添…

之後去佐麥當當食pancakes，用佐六舊牛油同兩兜糖漿，可算係o係苦中加上一o的甜啦…唉…

食完早餐返屋企訓覺。

>>April 28, 2004 at 4:44:00 AM GMT+8

2004 年 4 月 16 日 星期五 【陰】

返學友社re-exam，總算合格過關…

帶住一份沉重o既心情去重考，仲要遲到佐少少。都冇乜心機做個role play，或者係話冇乜特別o既感覺去做。但係話事o既Susanna話今次比上次有進步，雖然搵資料比較慢，但但要o的料準確先話畀client知。

完全唔可以認同，全世界o既人都話我唔知自己做緊乜，話我行錯路，點解？我廿五歲喇，你o地唔係我，又知我冇諗過先做？總乜總係認為我同欣欣o既開始只係基於一時衝動？

同欣欣一齊總係搵倒一份默契感，但係最唔鐘意佢一x日o係度發脾四…

>>April 26, 2004 at 1:52:15 AM GMT+8

2004 年 4 月 15 日 星期四 【陰】

死佐。身心都死佐。

今朝飲到死佐，亦都喊到死佐。醒返已經係夜晚o既八點。起身之後落街買o野飲，再落銅鑼灣食o野。返屋企，訓。

全世界o既人都係幫住受害人，有冇人會企o係犯人o個邊睇o下佢o地點解會有咁o既動機？

欣欣為佐我已經同佢男朋友分手。我可以點做，先可以唔傷害任何一個女人？兩個女人都咁愛我，我可以點做？

點解要畀選擇我？

----------------------------------------------------------------------------------------------------------------------------

一生不可自決
陳百強

我沒有自命灑脫
悲與喜無從識別
得與失重重疊疊
因此傷心亦覺不必

誰個又會並沒欠缺
曾心愛的為何分別
和不愛的年年月月
一生不可自決

誰人又知道我的心靈熾熱
誰人又知道再說已不必

仍然願一生一世的欠缺
不想再暴露我於他人前
妳會令誰人自覺生可戀
即使天天也在變

誰個又會並沒欠缺
曾心愛的為何分別
和不愛的年年月月
一生不可自決

誰人又知道我的心靈熾熱
誰人又知道再說已不必

仍然願一生一世的欠缺
不想再暴露我於他人前
妳會令誰人自覺生可戀
即使天天也在變

仍然願一生一世的欠缺
不想再暴露我於他人前
妳會令誰人自覺生可戀
即使天天也在變

>>November 10, 2005 at 10:24:09 PM GMT+8