2003 年 4 月 25 日 星期五 【晴】

尋晚4點幾先訓,今朝訓到11點零,俾abby打黎個電話叫醒,好辛苦..我一醒左就訓唔番,結果就欏住電話發呆,聽到好嘈,原來佢大廈又裝修..之後12點零買lunch,食埋1點幾梓為黎到,今日溫econ mc,我發現佢已經癲左..做番d past paper,49題(有題cancel左)佢岩43題..癲架,我既無奈同佢既幾乎岩晒成左好大對比.. 聽住903,溫到3點零..之後好累,就上左陣網,4點15分梓為因為要補習走左,我就溫中文..但係唔入腦,結果訓左陣.. 醒左都6點幾,阿妹星期一要開始番學,要print張form落黎填,結果佢同阿媽買printer d墨搞到就7點先番到黎,一番黎阿妹就叫我幫佢,我裝番個printer,跟住教埋佢用printer,printer埋d通告就食飯.食完飯番房聽左陣903,做緊饑饉音樂會..幾正.8點半,阿妹話電視有多啦A夢睇,結果我一睇就睇到10點半,再番房聽903,過多陣就online同打日記. 唔覺唔覺,今日又係一年一度既饑饉三十.今日,四月二十六號下午2點,香港世界宣明會同叱o宅903合作舉辦既第20屆饑饉三十正式開始.雖然今年個饑饉三十因為SARS既肆虐而改左做在家自行饑饉,雖然有d可惜,少左次發揮團結既力量..但係在家饑饉可以磨練意志,o係屋企呢個充滿誘惑既地方,更加叫人要自律,堅持.自行饑饉,佢既意義仲係存在,支持各位饑饉戰士撐落去. 唔知點解,年年我都好留意饑饉三十,可能因為年年饑饉三十舉行既日期都好近我生日,而且記得有年係o係落住雨之下進行,閉幕果晚,有個環節係分享晚會,俾人講下d饑饉左接近三十個鐘既感受..果刻落住大雨,我o係收音機旁邊聽到d人講心聲,講感想,又鼓勵大家,雖然冇食野20幾個鐘,仲落住大雨,d人唔去避..士氣仲好激昂咁,仲有d人講到喊,果剎那真係好感動..由果刻開始,年年聽住轉播,自己都好想可以去參加饑饉三十,去感受下一班人同自己一齊捱餓同大家互相勉勵既氣氛,呢個世界就係雖要愛.. 今晚聽住《森美移動》,森美播Joey Tang首《童謠》,每七秒就"do"一聲提醒,代表住o係第三世界國家就七秒就死一個小孩,聽住果陣,d "do""do"聲越聽越煩,不過諗真一層,森美想帶出d咩呢?佢想我地用聽d "do""do"去感受下貧困國家兒童既苦況,七秒就死一個小孩,播完一首歌,已經冇左三十四個..生命都係好脆弱,好多貧窮地區既孩童都受盡飢餓折磨,食得唔飽,而反觀物質豐富既香港..

>>April 26, 2003 at 4:48:54 PM GMT+8

2003 年 4 月 25 日 星期五 【晴】

溫文學見到句正野..要成大業就要經歷唔同處境,境界..大家努力..! 王國維《人間詞話》： 古今成大事業、大學問者，必經過三種境界：「昨夜西風凋碧樹，獨上高樓，望盡天涯路。」此第一境也。「衣帶漸寬終不悔，為伊消得人憔悴。」此第二境也。「眾裏尋他千百度。回頭驀見，那人正在，燈火闌珊處。」此第三境也。此等語皆非大詞人不能道，然遽以此意解釋諸詞，恐晏、歐諸公所不許也。

>>April 25, 2003 at 6:23:31 PM GMT+8

2003 年 4 月 24 日 星期四 【晴】

尋晚兩點幾就去左訓,今朝9點醒左醒,訓過..10點再醒,再醒過..直到11點見再訓唔得,就起身..沖完涼就拖埋個地佢,之後落樓買lunch,跟住1點左右就諗住出去..點知阿妹搞到部腦中毒,清一清d毒搞左我2個字..本來約左梓為1點半九龍城廣場門口等,去到都1點35分,佢上左cd鋪等,搵埋佢就去行左陣樂富同埋飲左杯野.2點零去到東頭村,佢住呢度..之後溫中史溫到5點..跟住就上左陣網,6點就走,同佢行去摩士果頭搭車走,番到屋企都就7點.之後聽陣903,食埋飯睇左陣帝女花,9點零又同abby吹陣水,10點睇秦始皇,11點番房聽903,過左陣abby打黎,又同佢傾到1點零,先上網打埋篇日記. 講起今日出黎都麻煩,尋晚講到我口水乾佢先"勉強"應承,結果今朝阿媽打左幾次電話黎叫我出去一定一定要戴口罩,呢樣我當然會啦..但係過多陣佢又打黎游說我不如留o係屋企,叫個fd黎喎..激都俾佢激死,好似出去就死梗咁..點知仲要今日新聞話東頭村開始有多戶受到感染..最弊就係梓為係住o係東頭村,阿媽嚇到叫我唔好再去,連出去都唔好..跟住又叫我吩咐梓為小心d,但係好明顯唔駛講梓為平時都緊張過我啦,叫佢個仔我小心d仲好啦.況且梓為住果度唔近中果棟樓..雖然我不斷強調,但係都冇用.. p.s.末~多謝你~同埋生日快樂啦~

>>April 25, 2003 at 6:05:09 PM GMT+8

2003 年 4 月 24 日 星期四 【晴】

我終於知點解少爺占果日會笑到停唔到..

>>April 24, 2003 at 5:56:35 PM GMT+8

2003 年 4 月 23 日 星期三 【晴】

尋晚chat到3,4點就同二佬研究d碼,之後4點幾去訓,今日又訓到1點幾..唔掂.. 醒左就開903,上左陣網,之後3點幾就溫書,4點左右梓為黎左,之後做maths,第一題我就做錯,好鬼頹,到時係咁就真係大鑊..之後5點半就溫geog,跟住6點上左陣網,睇梓為幫謝茜嘉整既網頁(佢係謝茜嘉fanz),後來又開我個icq黎玩,梓為先其求click,開左個message box,send左句野俾sally,點知就俾佢鬧..嚇到即刻停手.之後又溫左陣geog,溫到7點左右,佢又再叫我開個icq,今次抽中正正,其實可以話我介紹既,因為正正玩個903個dj選拔,梓為都有,大家都係想入商台做dj(其實都可以叫競敵..哈哈).. 話分兩頭,正正果然醒目,梓為只係send左句"hihi",正正一睇就好似已經知道果個唔係我咁..勁!正正d觀察力好掂!咁細微都睇到,因為我icq係唔用"hi"或者"hihi"咁滯..我通常一叫就係佢個名,例如"正~","二佬~"等等,一係就直接入肉..例如"做緊咩?","搞錯呀!又話xxxx....","你知唔知xxxx..." 同埋我都好少主動叫人,我上網個主角唔係icq,我成日會打機,睇討論區,搞到icq好慢先回到人..除非我有野想講,唔係既話我好少因為悶去撩人傾計(二佬例外,我無無聊聊就彈句野俾佢)..因為悶都係自己既事,何況hi完人又冇野好講仲無聊,同埋自己又最驚人一send黎句野就係嗌"好悶"或者"好無聊"之類,一時間點回叫我點回呢,仲要我諗埋話題去幫人解悶,殺左我好過..所以自己都唔會去"殺"人.. 講番今日,7點零梓為番屋企,聽多陣903就食飯,食埋飯睇左陣帝女花,9點零沖完涼一出黎俾阿媽叫去洗碗..出黎同abby吹陣水都10點,睇秦始皇,越黎越覺得佢殘暴..好可惜,佢係叻,不過就太殘暴..學下漢武帝既儒表法裏咪perfect囉! 睇完番房,發現房有好多塵同灰,宜家日頭出面就整外牆..嘈到死,d灰塵就算關窗都飛到入屋..好煩!我遲早死o係肺積塵下..聽日仲要俾阿媽點我拖地,抹窗台..唉..唔講喇.

>>April 24, 2003 at 5:31:50 PM GMT+8

2003 年 4 月 22 日 星期二 【晴】

首歌雖然派上台幾日,今日先真真正正去睇佢歌詞..個題材幾好,個mv都拍得好.. 兄妹 陳奕迅 作曲：徐偉賢 填詞：林夕 編曲：劉志遠 監製：J. Lee 對我好　對我好　好到無路可退 可是我也很想　有個人陪 才不願把你得罪　於是那麼迂迴 一時進　一時退　保持安全範圍 這個陰謀讓我好慚愧 享受被愛滋味　卻不讓你想入非非 就讓我們虛偽 有感情　別浪費 不能相愛的一對 親愛像兩兄妹 愛讓我們虛偽 我得到　於事無補的安慰 你也得到　模仿愛上一個人的機會 殘忍也不失慈悲 這樣的關係你說　多完美 眼看你　看著我　看得那麼曖昧 被愛愛人原來一樣可悲 為甚麼竟然防備　別人給我獻媚 不能推　不能要　要了怕你誤會 讓我想起曾經愛過誰 我所要的她不給　好像小偷一樣卑微 就讓我們虛偽 有感情　別浪費 不能相愛的一對 親愛像兩兄妹 愛讓我們虛偽 我得到　於事無補的安慰 你也得到　模仿愛上一個人的機會 殘忍也不失慈悲 這樣的關係你說　多完美

>>May 24, 2003 at 6:51:49 AM GMT+8

2003 年 4 月 22 日 星期二 【晴】

尋晚又傾到4點幾,之後去訓.今日1點幾先訓起身,醒左食埋lunch就開機同聽903..之後5點左右梓為黎左,同佢溫左陣geog,6點見餓一齊落左樓下間7仔睇佢入貨,佢冇野落過肚喎今日..我都欏左個杯麵,不過佢就好誇張,唔敢用果度d野,結果番屋企先算,一路都由我按lift d掣,番到去見佢一放低d野就先入廁所洗手同洗埋支叉,d衛生既程序做到好足,俾我笑佢誇..哈哈.原來6點幾阿媽都番左黎,之後就沖定d麵先,然後繼續溫geog,醫埋肚,溫到7點佢就走. 跟住我聽左陣903就食飯,食完飯勁睇電視,9點番房一個鐘聽903,又係10點出廳睇秦始皇..已經變晒做指定動作,亦都慳番我唔少打日記既功夫..10點半左右菌姐又打黎無聊,傾到12點半俾阿妹"啤",就online上網..阿妹就成功侵佔左個電話.

>>April 23, 2003 at 6:53:13 PM GMT+8

2003 年 4 月 22 日 星期二 【晴】

係喇..突然醒起.. 特別通告： 94263970呢個number已經俾偉大既阿媽殺左.由於佢勁換電話卡,我被迫接收左另一個number..不過我唔記得左個number..夜喇,唔理住~遲下先算..只不過提提有我number既人可以delete我啦..哈哈..

>>April 22, 2003 at 6:13:52 PM GMT+8

2003 年 4 月 21 日 星期一 【晴】

尋晚12點就收到鰻魚個電話,跟住傾左幾句就邊icq邊鋤dee,鋤到3點左右,之後就chat到4點幾,又幫二佬搵FF8既攻略,跟住二佬就send左個日文日記同個翻譯網,由於個網譯野係照直譯,所以出黎個結果係勁爆笑..笑到傻,玩到5點零先訓. 今日唔知係咪有病,訓唔著..o係床到碌到6點半,聽到阿媽醒左出廳開電視..之後訓左,但係7點20分又醒左,仲要一醒左就鬼咁精神..訓唔番,好鬼煩惱,勁驚,唔知係咪有病,訓一個鐘都冇,居然訓唔番,仲要好精神..唯有出廳睇新聞,睇到悶(朝早d新聞每15分鐘就重複又重複..)就番房開機同聽903,葛文輝同何國良幾好笑..果陣先8點..上網冇人,結果自己打機玩左fifa同cm,玩到11點零..之後abby打黎,又同佢連fifa,不過好頹,未郁就斷線..12點零就出去買lunch同交管理費,山長水遠去到幾條街既恆生,去到有個小姐竟然話電腦系統停左..咩都做唔到-__-,唔單止白行一場,仲要遲幾日去多次先煩.. 番到黎食埋lunch..下畫開始眼訓..聽住903溫左陣書,3點零訓著左..之後4點零俾梓為個電話嘈醒,佢話黎我度溫書,跟住正正又打黎,4點半就出廳睇邪流丸..哈哈,有人叫我睇-__-"..自從小學之後,都好耐冇睇過卡通片..都幾抵死既套野,之後4點45分梓為到左,就去溫書,溫到7點佢先走. 之後聽左陣903就食飯,食完飯番房聽903,跟住俾阿媽叫去洗碗,番到房阿妹用緊部腦,我就聽住903,一到10點就出去睇秦皇.10點半左右,菌姐打黎,跟住一傾就傾到12點20分,之後就online上網+聽三姑+打日記. 今日去903個網見到個叱o宅903留言板幾得意~

>>April 22, 2003 at 4:58:34 PM GMT+8

2003 年 4 月 21 日 星期一 【晴】

要好好看清明白《十九歲》，最好一面聽廣播劇的主題曲《十九》，一面從歌詞中慢慢感受體會。 《十九歲》的結局，把陳占和李香蘭分開，單純地想是件婉惜的事，但仔細想一想，硬要把兩個分隔兩地，只得十九歲的青年拉在一起一生一世，這樣不是更勉強他們嗎？這麼近那麼遠，就算心仍是鎖在一起，距離卻成了最大的障礙。 寧願做最好的朋友，守護在對方心靈，這樣不是一個更好的了斷嗎？ 只要心中有一個喜歡的人，他自然就會在自己的心裏面。雖然結局沒有點明誰和誰，但可以看得出李香蘭在陳占心目中的地位較高，就像陳占跟阿煩，只不過是過眼雲煙，陳占最後甚至連分手的原因也記不起來，但和李香蘭的感情，卻是如此細水長流... 被文字打動是極少有的，文字裏的情感不及言語，不能有感情的一字一句道出來，沒有表情，只能從那些平面地去看的文字去幻想。 亞占的文字利害，我被這本書打動，也被他填的這首《十九》的歌詞打動。 19 林一峰 編：林一峰　詞：少爺占 午飯前相聚 放學到公園去 喜愛狂追逐 同學笑我們登對 創世界之最 疼你永不減退 約定十九歲 可以到白頭 到老年去 搭膊頭 手牽手 愛字最怕說出口 信天長地久 別說曾經擁有 也許有天 一切都要變 身邊一切都要變 你我不見 總會發現 你在我背面 常在我心裏面 也許有天 一切都要變 身邊一切都會變 你我不見 街裏碰面 會令誰突發心軟 改天再遇見 一切繼續變 你活在 我心裏面 有試過恐懼 要如何親你的嘴 有試過恐懼 有一天你離開我 別要我面對 連偶像都引退 告別十九歲 世界總要我面對 也許有天 一切都要變 身邊一切都要變 你我不見 總會發現 你在我背面 常在我心裏面 也許有天 一切都要變 身邊一切都會變 你我不見 街裏碰面 會令誰突發心軟 不想繼續變 我會不要臉 走到你面前 像一切 從未變.. 「我會不要臉，走在你面前，像一切從未變..」 下一次，捉緊李香蘭時，我相信陳占一定會不要臉的告訴李香蘭：陳占會愛李香蘭一生一世。 也許，書中的結局就是他們最好的結局。 各有各的世界，就算不再見面，心裏仍會記掛對方。 最喜歡的人，總有一天會捉緊的。

>>April 21, 2003 at 6:42:18 PM GMT+8