2003 年 7 月 4 日 星期五 【晴】

尋晚同二佬同佢個fd約好左齊齊通頂今朝去荷李活飲早茶,點知去到最後一刻我落床扮下訓真係訓著左,一醒左12點幾,之後online已經見到二佬o係度,唉..又訓過籠累事,我都冇野講,係我既問題~ 之後叫左個外賣,個下晝見無聊就開個網黎整,篇《我的野蠻女友》開始睇到高潮,俾佢感動到..一口氣睇左8章,本黎想睇落去,不過阿舜打黎話玩cm就同左佢玩.玩到6點出左去幫阿媽欏送,番到黎睇左陣小新.跟住7點零上網搵game,最近流行隻BT(Bit Torrent)睇黎都會成為將來網上傳輸既大勢..因為下載速度實在太快喇! 食完飯番房聽住903繼續搵,搵到10點出去睇左陣勁歌季選,10點半就番左房訓,11點40分俾阿舜個電話嘈醒左,佢又搵緊game,跟住起身開機一齊研究.. 今日仲有d胃痛,不過好似好左少少.

>>July 5, 2003 at 6:12:06 PM GMT+8

2003 年 7 月 3 日 星期四 【晴】

今日訓到1點幾先醒,一醒就打俾阿寶,話好左去佢度幫佢整網,不過咁岩佢今日出街.之後我打俾阿舜傾左陣,就去刷牙洗臉,呢兩日入廁所都不禁望望個天光.跟住個胃又開始勁痛..2點左右叫左個外賣,就online幫阿舜搵隻game,過左冇耐個外賣到左,就邊食晏邊個阿舜傾,2點半左右玩cm,玩到4點幾阿妹話用一用,就俾左部機佢,我順便去拖個地.拖個地番黎阿妹話hang左機,我又冇save到,結果下晝白玩..唉. 之後冇咩心機,開隻fifa玩到7點,跟住我睇小新,8點零食飯,食完睇左陣電視.9點幾又俾阿爸阿媽圍鬧,佢地d思想好保守,有佢地講冇我講..應該係話唔聽我講,淨係覺得佢地岩晒,我出下聲就話我講得唔岩,駁嘴..一路坐o係廳聽左佢地講45分鐘,佢地鬧鬧下我自己嘈埋一份,我立即把握時機走去洗碗,當堂靜晒,突然覺得洗野既水聲都好好聽,可惜沖唔走d煩惱.. 洗完都10點,番到房,果陣阿妹用緊部腦,我就攤o係床度諗野,呢排又唔開心番,想諗下d開心野,不過就諗到唔開心都係因為有思想,思想由個腦控制..咁只要唔俾個腦去load d唔開心就得啦,但係呢d有時真係唔到自己控制,而唯一永遠有效既辦法就係..? 咩都唔理,我淨係知宜家又胃痛到想死.

>>July 4, 2003 at 9:54:21 PM GMT+8

2003 年 7 月 2 日 星期三 【晴】

今朝10點左右醒,阿so明明話7點半叫我同阿舜起身架,結果我10點半先叫醒阿舜,阿so俾我睇死左.之後阿舜話梳洗完轉頭打黎,等等下佢冇左件事(?),12點零諗住落街買飯,點知個胃勁痛..呢幾日個人都唔係好舒服,食咩都冇胃口,可能我個胃同《常在我心》裡面既小段一樣..坐左陣好番d就落樓買飯,食完都1點幾,開左個網黎整,整整下好有興致睇番篇《我的野蠻女友》小說,一口氣睇左8,9章.今日好熱,原來有成33.6度,2點半左右見部腦熱,我就熄機抖下..抖抖下我都訓著左,4點半阿舜打黎我先醒,佢聽到我開903開到好響,話我咁都訓到,係囉,咁嘈既環境我都訓得著..睇黎我已經將903 d聲當左生活一部分,話唔定聽唔到反而失眠呢! 之後同佢玩cm玩到7點,跟住online,upload多幾頁網上去geocities.之後同阿寶icq,先發現我今日話去佢度但係冇左件事..-__-".跟住上網四圍搵隻落雨路. 跟住成晚都胃痛,睇黎我都係時日無多..夜晚又食左好少飯.

>>July 3, 2003 at 7:54:56 PM GMT+8

2003 年 7 月 1 日 星期二 【晴】

今朝訓到11點幾,起身梳洗完就去完成阿媽交落既任務,抹到12點半終於"mission completed",之後落街剪頭髮,勁長lu.剪完買埋lunch番屋企食,食到2點幾,跟住開機整個網,開始upload番d野上geocities,跟住整到4點左右無啦啦好眼訓,一訓就訓到5點半,起身岩岩好聽得切少爺占個廣播劇,聽完同阿舜玩左陣fifa. 8點零食飯,今晚又冇咩胃口,食左少少飯冇番房,o係廳涼冷氣,呢兩日好熱..10點左右洗埋碗就番房睇小新,睇到11點就online打日記.

>>July 2, 2003 at 8:24:45 PM GMT+8

2003 年 6 月 30 日 星期一 【晴】

今朝訓到9點半醒,一起身就覺得個人有d唔妥,早餐食左個飽.食完番房開機同阿舜玩fifa,玩到12點零.下晝阿媽煮左晏,但係我唔知做咩冇胃口食,番房整個網,今日整左好多野,1點零,廳個掛牆風扇突然自己跌左落地粉身碎骨,阿媽岩岩企o係隔離,嚇到佢面都青埋,我開始覺得今日好不祥.. 2點零阿舜打黎,同佢傾到3點幾,跟住覺得好累,聽住903訓著左,訓到4點幾熱醒左,起身開始流鼻水,又發現屋企d電停晒.出廳見到阿媽為左慳錢而叫左個親戚上黎幫手整廁所同阿妹間房個天花板,因為個天花有d裂痕.個親戚熄左總掣先開始整,佢先整廁所,果然,佢輕輕一敲個天光板,就跌左好大舊石屎落黎,都幾恐怖,好彩冇dup中佢.跟住發現原來個範圍好大,成個廁所地下都係石屎碎,之後個親戚唔小心整爛左個廁所燈,阿媽落樓又買錯左個黃色既燈,屈左我落去換,原來佢冇晒白色既光管,白行一趟. 番到屋聽到阿媽勁躁,因為個親戚都係半桶水,整到間屋好多塵,果陣阿媽搵阿妹黎鬧,之後我番到去又冇啦啦俾佢鬧左餐..一路整到8點幾,間屋依然好亂好多灰塵,阿爸就岩岩番黎,佢去左澳門探佢d兄弟(我大伯同五叔).跟住8點半就食飯果陣,個親戚整親隻腳,係咁流血,呢個時候阿爸同阿媽鬧交,因為阿媽擔心緊間屋立立亂,叫個親戚整埋佢..阿爸見個親戚流晒血叫佢唔好再整,結果佢地就嘈一餐,之後佢地成晚都仲有嘈.. 阿媽份人不嬲都駛人唔駛本,好自私..佢只要覺得死唔去就係小事,整好個廁所緊要.果陣我俾佢地嘈到好頭暈,番到房一攤o係張床就唔知咩事(訓左?暈左?),醒左係5分鐘之後既事,仲聽到佢地嘈緊,果陣我諗如果我果刻死左都冇人知.. 搞到9點半先食飯,睇黎有d病病地,食左半碗飯就食唔落,番房訓左陣,10點零起身沖涼,沖完涼就幫佢執屋掃地,整到10點40分先番房online同打日記,阿媽又入房叫我聽日要抹d咩洗d咩,唉..收買人命..聽日唔好咁快黎住. 之於個廁所點?爛尾囉-__-"..睇黎要等多幾個禮拜.

>>July 1, 2003 at 9:32:44 PM GMT+8

2003 年 6 月 29 日 星期日 【陰】

今朝訓到10點半醒,起身去沖個涼就準備出去,今日約都左nat去睇千機變,前幾日問過二佬睇唔睇,不過二佬似乎冇咩興趣,我就冇再問佢.呢幾日同nat icq講開想睇千機變,佢話陪我睇,於是約左今日.12點10分左右到左又一城amc,打個電話俾佢果陣順便買定飛,原來佢都到左,見番佢既第一眼,我好亂..一年喇,本來佢個樣o係我心中開始模糊,今日又再次刻番落個心度. 買完飛見仲有時間就o係又一城四圍行,雖然企o係佢隔離,但係就好似隔左好遠好遠咁,好生疏..一年前同一年之後既今日..有好多野好想同講佢,但係去到咀邊又俾我吞番落肚..唉..原來我一路以為自己可以忘記到佢..一切都係假架,呃自己,我一見番佢我就咩都彈番晒出來.. 行到12點半入場,睇到2點幾,今日個1號院好熱,不過我睇得好開心,我真係好想將時間永永遠遠停o係果度.. 睇完2點半左右,散場果刻真係好唔想走,我知道我就黎要同佢分開,之後同佢去食左d野,見佢又病食藥好痛心..好想講句"小心d身體啦"又出唔到咀,淨係閒聊左幾句,3點左右就走,不過今日俾我見到佢我已經好滿足.. 之後搭2號van走,今日架van上同對上一次同佢黎又一城個情況好似,好似上年既翻版[舊日記板7月4日(星期四)果日有記低]..今日又係好好天氣,到上左van仔就落起雨黎,點解又係落雨既?心情好down,落車果陣好失魂落魄,跌左手機,執番果陣個司機已經開左車,我又同上年一樣搭多左個站先落車,一切都真係咁巧合? 落左車淋住雨行左陣,不過好快就冇左雨,一路行一路行,個心患得患失咁,不過我知道我應該要開心既.. 『談什麼戀愛 無需深愛 情非都不必急於痛改 難得到你的將來 誰會覺得意外 誰人都可愛 誰也可不愛 被我喜歡的都離開 但是沒有害 麻木的我與你暗中往來 殘酷的卻是我太喜歡戀愛』 p.s.少爺占年度愛情故事《四點水續集-落雨路》今日首播,留意下~

>>June 30, 2003 at 8:13:15 PM GMT+8

2003 年 6 月 28 日 星期六 【晴】

今朝訓到9點零聽到d聲醒左,擘大眼一睇,表弟妹黎左,原來佢地黎print野,我就俾print聲整醒左.幫佢地print埋d野,我都醒晒,跟住起身食早餐.食完早餐o係個腦同同人未能夠行動一致番果陣(即係仲好眼訓-__-"),阿媽叫我抹櫃,咁就半個鐘過去.下晝食埋lunch睇左陣電影,做緊《國產凌凌漆》,睇左陣就番房睇小新,睇睇下訓著左..醒左果陣3點50分,跟住4點零搵阿舜,佢又半訓半醒咁,於是我開個網黎整,整到5點就去沖涼,沖完涼出黎番房繼續,5點45分阿舜打黎就同佢玩左陣cm,玩到就7點我要食飯就quit左game.食完飯番房開機整左陣網,整到11點見累就熄機諗住訓,11點零聽住wasabi訓,之後訓訓下我俾個夢中夢嚇醒..個夢入面我又發緊夢,醒左俾人笑我發開口夢,跟住覺得好瘀之際我又醒左..聽到wasabi講緊野-__-",個夢最驚就係似層層,好真實..跟住我就有個奇想,我諗宜家既我其實係咪都o係個夢中夢入面呢?係咪有另一個我夢緊宜家呢個夢呢?宜家既我只不過o係其中一面夢境入面?係咪終有一日另一個我會醒左,呢個夢會結束,而另一個我會再進入另一個我既夢呢? 自己都覺得自己諗到好科幻,不過呢排我都冇睇衛斯理丫......人生如夢? 以上幻想純熟虛構,如有雷同,實熟巧合!

>>June 30, 2003 at 3:05:15 AM GMT+8

2003 年 6 月 27 日 星期五 【晴】

今日訓到2點先醒,起身食埋野就開機整網頁,整好左幾版,跟住就搵阿舜玩cm,見佢仲食緊飯,我就再整多陣,大約3點零就開cm玩,一路玩到7點.之後我去睇小新,睇左陣就食飯,食完飯發現今晚做《黑夜彩虹》既大結局,齣電視幾好睇,結果我睇到10點半,跟住番房聽903同睇小新,阿媽同阿爸就落樓去百佳執野.11點零,《森美移動》重播番個街車王廣播劇,再次聽番都覺得好好笑,聽到11點半左右聽到阿媽鬧緊阿妹,話佢亂買零食o徙錢,原來阿媽摷d膠袋搵到阿妹去百佳買野d單,就欏黎鬧,初初阿妹唔認,之後阿媽欏張單出黎阿妹就冇野講,不過我覺得阿媽成日摷野(然後黎鬧人)就唔係咁好囉..

>>June 29, 2003 at 5:35:40 AM GMT+8

2003 年 6 月 26 日 星期四 【晴】

今朝訓到10點零,菌姐打黎嘈醒左我,傾到10點45分左右去刷牙洗臉,跟住出去銀行交管理費.每次都唔太想去,因為本來o係樓下間銀行自從話裝修抵左之後就冇左,最近果間要特登行多幾個街口..結果見行咁行就順便o係銀行隔離間麥記買套做lunch.番到黎都11點45,睇左陣《雙面伊人》就番房online,之後成個下晝整個網,整到2點幾眼訓,開住903訓左,訓到3點幾醒左,今日個森美小儀山寨王幾熱鬧下,之後4點零同阿舜玩cm,聽住抵死既少爺占,俾佢笑死,佢呢個日都好有心思鋪佢個新廣播劇《四點水》續集. 食埋晚飯,番房睇小新,睇到10點半訓,訓到模模糊糊果陣阿舜打黎,同佢傾傾下結果就開機玩cm,玩到天光..-__-"

>>June 27, 2003 at 9:45:59 PM GMT+8

2003 年 6 月 25 日 星期三 【晴】

今日朝到1點幾醒,食埋野開機,跟住上網四圍睇網,之後開自己個爛網搞一輪,加左d野上去,不過仲差好多唔知自己想點整,簡直想剷晒佢..整到5點幾阿舜打黎,就同佢玩cm,玩到6半點.之後我就去睇小新,一路睇到食飯,食完飯洗埋碗又再番房睇小新同聽903,睇到10點半眼訓去訓,訓左陣菌姐打黎,同佢傾到就12點,跟住又唔眼訓,就online,之後又同阿舜阿so玩cm玩到5點先訓.

>>June 27, 2003 at 4:10:30 AM GMT+8