2003 年 5 月 30 日 星期五 【晴】

今日9點幾醒,開住903聽,之後無無聊聊開番隻cm黎玩,一玩就唔停手..玩到12點幾食晏.下晝on左陣line,又係冇咩人,次次online都係咁,好鬼頹..之後開番隻cm玩,玩到3點零又同阿舜連diablo 2.玩到6點零就去左拖地,拖完地無無聊聊諗緊呢幾日既大計..6月1號完既深水埔電腦節啦;話同wilson睇,o係6月4日上既《六樓后座》啦;仲有二佬話睇既《廿二》啦,總之就好多好多好多好多好多好多好多......錢要駛啦..一但做齊呢d行動既話,不過冇所謂啦,呢兩個月儲儲埋埋既自閉(同金錢)係時候釋放喇. 食埋飯,諗住幫阿妹溫書,佢就係咁同我玩野,我費事理佢..就番房online,又係冇人,結果打番d日記,同埋四圍去人d日記放火搗亂,哇哈哈哈哈哈~

>>May 31, 2003 at 1:09:34 PM GMT+8

2003 年 5 月 29 日 星期四 【晴】

尋晚11點零訓左,今朝9點零阿舜打黎,傾左陣,之後食早餐.跟住又睇etv,越睇越吸引,好好睇,好懷念小學果陣.. 下晝食埋飯開左winning黎玩,用ps模擬器有好處,就係d save card可以無限有,玩到3點零又同阿舜玩diablo 2,玩到6點零7點整個網,開始的起心肝寫番d fd,先寫左幾個中五既同學仔..已經有好多回憶湧出黎..跟住諗埋小學d朋友,宜家九記d同學仔,net fd,加加埋埋都好多人..越諗越冇心機寫,覺得好難完成,不過最後都迫自己寫左6,7個fd..寫完都覺得自己犀利..夜晚聽埋《嘩嘩嘩!打到o黎》,又請左撻sir上黎,不過佢又幾風趣既,本來唔覺,不過今晚有個eric相比之下,佢搞氣氛係正d既,抵佢有得撈.

>>May 31, 2003 at 12:51:27 PM GMT+8

2003 年 5 月 28 日 星期三 【晴】

尋晚睇AC米蘭對祖雲達斯既歐冠杯決賽,激戰120分鐘0比0,要射12碼決勝,結果我愛既AC贏左,開心死.睇埋佢地拎獎杯都5點40分,就即刻去訓. 今朝就11點俾阿媽叫醒左..佢真係變態..唔理你幾點先訓佢實唔俾你朝早遲過11點起身..起身無無聊聊,online又冇人,就出廳開電視,勁轉左一輪既台,結果睇番小學同中一,二成日睇既etv,宜家d etv全部拍過晒,都幾好睇,起碼d人順眼左,佢地d說話都冇咁刻意高八度同講到"字正腔圓"..仲見到鄧健泓客串唔知小幾既中文科etv,做唔知咩咩小王子,好好笑..12點食埋飯,睇左陣新聞,1點零就番房online打日記. 2點零同阿舜又玩左陣diablo 2,同埋聽森美小儀.6點零睇新聞,食埋飯洗完碗見阿爸睇緊亞視慶祝台慶,今次又好似搞得幾大型咁..請左好多人,不過都係冇咩心機睇,番房自己玩diablo 2,11點零聽住三姑同on番line.

>>May 29, 2003 at 3:33:48 PM GMT+8

2003 年 5 月 27 日 星期二 【晴】

今朝10點幾醒,開機上左陣網,跟住出去廳睇電視,之後幫阿媽整野..12點零食晏,之後去拖地,拖完地下晝上左陣網,上到3點小虎話玩diablo 2,結果我叫埋阿舜玩,不過小虎條友仔改左game黎玩,搞到佢好無敵,我同阿舜都玩到冇咩癮.. 玩到6點零7點,之後熄腦睇左陣書,8點零食飯,食完睇報紙,9點零番房聽903,10點零菌姐打黎,同佢傾到12點左右,鯉魚打黎問三國志九d野,又吹左陣水,12點45分先online.

>>May 29, 2003 at 5:40:38 AM GMT+8

2003 年 5 月 26 日 星期一 【晴】

今朝10點零醒,起身無無聊聊,之後搵左隻vcd黎睇,睇左《一碌蔗》,套戲都幾無聊下,不過又南幾好笑.仲有,套戲將香港d往事配合埋舊戲名出場,都幾幽默同有創意. 下晝同阿舜,小虎玩diablo 2.到夜晚食埋飯,洗埋碗教阿妹做功課,睇番中一d野有d懷念以前,又覺得d野易過以前讀果陣..10點零番房聽903,之後11點零就去左訓.

>>May 29, 2003 at 5:40:04 AM GMT+8

2003 年 5 月 25 日 星期日 【晴】

尋晚同阿舜,小虎玩diablo 2,2點左右,阿so好醒咁join左入game(冇同佢講過佢都識join,抵讚~),玩到3點半左右訓.今朝10點零俾阿媽叫醒(佢番下晝-__-"),又睇下整網頁既爛書,睇完開腦整左陣網,冇咩進展,我勁試d html碼同介面,11點零,阿媽叫左條友上黎度尺寸整櫃,果個人俾左d專業意見叫阿媽做細d(個櫃長18吋襯番個位),阿媽就覺得俾錢人話事,佢又想整大d(想個櫃長20吋裝多d野)..其實最多咪多果兩吋,但係結果兩位女士因為咁擾嚷左一輪先傾掂數,跟住都已經12點,食埋晏阿媽就出左去(搞掂頭先d手尾+番工). 下晝同阿舜玩diablo 2. 到夜晚,食埋飯幫阿爸摺衫,跟住又上網幫阿妹搵功課,佢要搵d關於賭錢導致家破人亡既新聞喎..完全冇頭緒,上yahoo serach"爛賭"搵到好多deadlink,結果好頹咁o係東方既網逐日搵..搵左半個鐘已經好憫,幾經辛苦搵到篇賭錢導致情侶反面既新聞,我同阿妹都唔理咁多喇..情侶當家庭..咁就print左篇新聞出黎. 跟住打日記,打完都仲未上到日記個網,呢幾日日記個網又down..成日話我日記database error,仲係我login話我登入錯誤-__-". 之點11點聽三姑同icq,同sally講旅行d野,出港既多數唔駛預我,本地遊仲有得諗諗既..唉~咁大個仔都未搭過飛機,最遠既"旅行"就係搭長途車番鄉下..阿爸阿媽結婚咁多年都未去過旅行,莫過我同阿妹丫..睇黎要等第時大個賺到錢先有機咯,到時成家一齊去玩,諗都開心,不過呢d到時先算..我都唔知過唔過到8月.

>>May 26, 2003 at 3:30:19 PM GMT+8

2003 年 5 月 24 日 星期六 【晴】

尋晚睇波睇到5點幾,今朝11點零就俾阿媽叫醒..起身食埋個brunch,就俾阿媽叫去拖地,拖足三次,又漂白水又清水又地板水..之後累到死,跟住下晝睇整網既書,唔覺唔覺好快就6點零,食埋晚飯阿爸同阿媽出街,我番房聽左陣903同寫下野,之後見累去訓..醒左都10點幾,阿媽佢地先岩岩番.之後聽住"不設劃位",講d戲,講講下都好想去睇戲,目標係6月頭(4號?)上既《六樓后座》!跟住聽wasabi,佢又講左d好啟發既野醒我,抵我個個禮拜日都記得聽佢既.

>>May 26, 2003 at 3:20:02 PM GMT+8

2003 年 5 月 23 日 星期五 【晴】

尋日世衛徹銷對香港既旅遊警告,今日就首次錄得零感染,一切都好似好順利咁,d人都開始唔戴口罩,終於都可以唔駛搞到個嘴仔又熱又焗..不過個零感染係假象,因為仲有d懷疑個案,可能過幾日都仲有新增個案,都未可以太放心住,唔係好似多倫多咁就大鑊.香港呢兩個月黎既冤屈氣,o係呢兩日吐左唔少,今晚睇住個1:99音樂會,d人都玩得寧舍high,望埋去已經冇乜人戴口罩,個音樂會d人都表現得好團結. 我成晚睇個1:99音樂會,俾d氣氛感動到..可以見到d歌手流晒汗咁去演出,為左善事都義不容辭,比起台灣既混亂,香港人真係好勇敢同團結. 希望今次呢件事之後,香港能夠恢復並且去番昔日既光輝.

>>May 26, 2003 at 3:04:59 PM GMT+8

2003 年 5 月 22 日 星期四 【晴】

今朝8點就阿俾阿舜阿蘇叫醒打diablo 2,梳洗之後就準備玩,但係其間有d阻滯,結果9點幾先玩,玩到11點幾阿so出去先完.之後見無無謂謂,同阿舜玩番隻上年年尾勁熱愛既炸彈人online,雖然宜家要收錢,但係我個免費a/c仲有點數俾佢扣,所以仲玩到,玩玩下,3點零左右,小虎黎我度欏diablo 2隻碟去燒,佢見炸彈人咁可愛忍唔住玩左幾盤先走,我同阿舜玩到5點.之後我開始我d大計,開始整番個網,但係發現d files亂晒..呢次大鑊..搞到我都冇咩心機整,整到6點零又俾阿媽徵召..

>>May 24, 2003 at 3:46:54 PM GMT+8

2003 年 5 月 21 日 星期三 【晴】

今日10點醒左,起身打機..下晝阿舜打黎話玩diablo 2,之後就裝隻game,跟住諗住搵阿so,點知佢又未訓醒..成2點幾都未醒,之後幾經辛苦先嘈醒左佢,點知佢又話訓過..跟住就玩三國志九,到左4點零去拖地. 今日阿媽又好躁,又俾佢開刀..之後我成晚匿o係房到執房,間房原來好鬼亂(好耐冇執過)..執左成晚清左一疊疊既舊note,廢紙..搞到10點勁累,跟住就去左訓.

>>May 23, 2003 at 9:17:22 AM GMT+8