2003 年 8 月 7 日 星期四 【晴】

今朝訓到10點零abby打黎整醒左我,聽到佢話學校收番佢總算安心d,又少一個fd要擔心..原來升到同升唔到一樣煩..10點45分打左俾梓為,問番佢點,跟住同佢傾左陣,佢話兩個fd陪佢去睇副學士d野,於是我就o係屋企online.12點零接到peony電話,佢話出去食lunch,叫我等佢..我見有時間先沖個涼,再打番俾佢,開始發現有d唔對路,原來佢仲on緊line icq,無奈..-__-",餓到個胃有d痛,我就落左樓買d野食住先.等到1點40分佢先到,我都食到飽飽地,跟住同佢行左落黃埔.o係黃埔行左陣同食左d野. 3點幾,收到sally電話,就同sally過番去九記搵carrie睇下d情況,今日幾熱下,過到去身水身汗,又見到carrie o係校務處,過左陣佢出番黎,不過校長又冇番.. 走果陣打左俾梓為,跟住過左去東頭村搵佢,上左佢度坐左陣,6點幾走,行左過九龍城廣場果邊,又去左百佳買左d野,竟然撞到903既謝茜嘉.. 跟住去7仔幫張負左兩蚊既八達通增值,增完值就番屋企.番到去7點半,食完飯睇電視,皇馬對中港聯,場波幾好睇,不過覺得皇馬班球員都係係咁兒玩下..10點番房執野同睇番d通告,跟住online icq,之後菌姐打左黎,同佢傾番會考d野,佢又係14分,升到中六,都戥佢開心=).

>>August 9, 2003 at 4:19:44 AM GMT+8

2003 年 8 月 6 日 星期三 【晴】

今朝訓到10點幾醒,起身食埋早餐就上網睇學位,好緊張,因為仲有fd搵緊學校.下晝沖左涼就出去,今日同sally陪阿正番去九記碰運氣,之後carrie又黎左.跟住1點零入去學校,結果搞左一輪都係得個吉,無奈..又俾蚊叮到好痕,不過呢d事小,見佢地一路坐住等我幫唔到d咩,好苦惱..之後有唔同既老師同佢地傾過,經過miss Lam既分析,阿正下決心repeat(努力!我用過來人身分支持你,你得既~),之後carrie都話re,不過佢遲左申請full左冇位..要等消息,即係佢又要搵住學校先,佢想搵中六,但係都係聽日既事.. 之後5點零同阿正,carrie,正媽,sally去又一城個food court食野,食完就同carrie去左sally度,佢地玩tarot,7點幾8點先走. 番到屋企食埋飯洗埋碗,之後睇陣報紙d新聞,睇會考果d,又諗起有d fd仲迷茫緊就feel到唔太開心..跟住有人打左黎,就番房online icq,成晚都胃痛,之後又俾阿妹霸左部機玩到12點幾就1點先欏番部機..跟住打日記. 希望所有朋友+同學仔聽日可以settle down晒d野..

>>August 7, 2003 at 6:51:20 PM GMT+8

2003 年 8 月 5 日 星期二 【陰】

尋晚聽住903聽到3點零訓左,估唔到訓得著..今朝起身先識驚,個人震晒..食個早餐都搞到d野跌到四圍都係..7點半睇埋新聞就出左去,搭12A番學,一路都好緊張,今朝個天好陰,同上年情景有d似,有d驚歷史會重演.. 番到學校先8點,仲未有咩人番..一路坐一路驚,好不安..9點到左,d記者開始拍野,不過校長仲要訓話一番,呢個時候收到梓為打為既電話,佢喊晒..搞到我好不安..果下有d覺得就暈就暈,呼吸唔到..跟住都開始派,逐個逐個出..時間過得好快,唔覺唔覺就到我..我坐到唔識起身,俾NY催我先匆匆忙行出去,去到唔敢望,驚再次失望..簽完名欏埋d通告,到欏張result..我用好大勇氣望左望計分果欄,矇矇地隱約見到1x,睇唔清楚..快脆簽收就深呼吸左啖,一望..14分..岩岩好14分,今年總算冇白白repeat..最驚喜係econ,由F去D. 跟住落到操場,miss湯(牡丹姐姐-__-")走埋黎睇我,見我夠分叫我原校升,其實我都諗住夠就原校升,我跟本咩都冇影印過..上年九記呢度俾機會我,所以我升到都冇諗過走. 之後入課室填埋d表,跟住等左陣四圍行同埋打俾阿so,小虎,wilson,跟住同阿正,sally佢地傾下,後來梓為都過左黎..跟住番課室傾,後來上左去交錢,要$1204,阿爸尋晚淨係俾左$1000,好彩我自己帶定多$300,$400出黎..唔係就大鑊..後尾先知原來有$300係去d咩領袖訓練既camp既錢(又呃錢)..交埋錢去見校長,佢講左一輪,跟住走得,同suyi落番去搵sally,阿正同梓為.去新世紀食野,行極都爆晒..最後去左麥記.食野果陣氣氛好怪,阿正話我有14都唔覺我開心,當然啦,阿正同梓為d分數都好憫水,見佢地個樣好沉重..擔心佢地,但係又唔知點安慰佢地..唉,無奈.. 食完行下就走,跟住同sally搭van仔走.番到屋企3點幾,沖左個涼就一路online,個icq好忙.. icq到7點幾,阿媽話落去食飯,7點40分全家落左去樓下食飯,食到咁上下,阿妹話要趕番去睇電視,真係煩..結果全家因為佢催住而食得好快,8點05分就已經食完,埋緊單果陣阿妹已經一馬當先衝番上樓.我同阿媽就o係樓下行左陣,8點半番上樓,跟住番房online icq同打日記. 既喜亦悲既一日..再祝未搵到學校既好友聽日好運.. p.s.即時中六學位收生情況:http://embs6.hkbn.net/s6/CHI/chi.htm

>>August 6, 2003 at 2:24:43 PM GMT+8

2003 年 8 月 4 日 星期一 【晴】

今朝訓到10點幾醒,起身上網icq,1點零食埋個晏,跟住上網上到2點幾,2點20分出門口,今日去queenie度幫佢整電腦.首先去左7仔值價,跟住去左幫我電話儲值咭增值..排左一輪隊先發現d咭賣晒,跟住快快脆脆搭車去,sally打黎話都去,佢約左我3點德褔等,我就果陣飛巴士過去,跟住一齊上去queenie度.去到研究左陣,佢部機會無啦啦hang機,我覺得係cpu過熱或者個火牛有問題..不過queenie話部機好多野,就幫queenie format部機裝過個windows睇睇得唔得,結果裝左好耐,一路都好地地,不過又突然黎個hang機,無奈..之後幫佢裝番晒d driver,icq,同基本既software就算,之後坐多陣7點就走,搭van仔落地鐵站,轉地鐵去深水埔既西九龍中心食壽司.點個人數先,今日有阿正,阿fa,sally,queenie,suyi,阿寶同我. 7點幾等位等到9點,其間四圍行下,成晚都胃痛,9點幾終於入到去,$42任食,一路食一路等阿寶黎,差唔多10點阿寶先黎,我地都食飽晒,等佢食左少少,跟住就走.10點幾搭車走,11點零番到屋企,跟住online上網.今晚好多人online,因為聽日就放榜..氣氛好怪,驚..不過驚都無謂,都考左,d分都已經改唔番.. 祝自己同大家聽日好運~

>>August 5, 2003 at 4:30:34 PM GMT+8

2003 年 8 月 3 日 星期日 【陰】

今朝11點醒,起身食個早餐跟住就online,之後去睇forum,一路hei到12點幾食lunch,食完lunch上左陣網,直到2點零出去,約左2點半,但係我2點40分先到-__-"..遲左. 放榜前開開心心咁玩左個下晝,好想日日都係咁..6點40分搭巴士番屋企,7點番到去,之後on陣line去左沖涼.沖完涼見落好大雨,仲要掛埋黃雨,好彩我番黎先落車,唔係又濕一身.8點就食飯,食完飯睇左陣電視番房online同打日記. 夜晚阿媽講放榜,佢地講到越有信心,我就越大既壓力,就黎人都癲..好彩我不嬲都癲癲地=P,聽完就算..不過講真,淨番唔夠36個鐘,開始緊張-__-",不過我相信我得既,我會不斷同自己講實掂..放鬆~ 9點零聽vani,但係連佢都提住會考放榜,想死-__-",話晒始終都係有個陰影..

>>August 4, 2003 at 2:16:04 PM GMT+8

2003 年 8 月 2 日 星期六 【晴】

尋晚同梓為玩cm玩到3點零hang左,3點幾offline熄埋機諗住去訓,跟住o係電話同梓為傾下放榜d野,越講就越擔心..4點零俾佢呃左起身開機,跟住兩丁友上yahoo篤波,5點零我hang機先有得訓. 今朝10點俾個鬧鐘響醒左,morning call完人傾左陣,跟住去食早餐.食完早餐睇左陣報紙同電視.下晝冇食晏,星期日阿媽通常會勁我屈食早餐,食完都飽到唔駛食晏.. 下晝無無聊聊又熱,唔想開機,拖完個地又諗放榜,我feel到自己開始過份緊張..跟住就搬左d文學既書出黎睇餐飽..2點零阿妹同兩個表妹出去四圍玩,阿媽就無啦啦好認真咁走入房話學用電腦,阿爸都黎湊熱鬧,跟住就教阿媽開機,上網,點用mouse,點click野,阿媽都幾迷信,我用yahoo做示範點click野睇,阿媽就揀左風水,跟住真係o係度慢慢睇,睇完俾佢用d內容黎教訓我-__-"..跟住教打字,開左個word俾佢,教左佢點打字,打字手勢,點用backspace,space,ctrl,shift呢d掣,阿媽都算學得幾快.果陣聽住903,咁岩播緊首"shall we talk",感覺好warm,就係咁阿媽學到4點零,阿妹番黎見到阿媽學用電腦就笑佢,阿媽回左句"唔得咩?",就話累擺低部機,今次我覺得阿妹好過份,跟住就同阿媽講阿妹d打字手法唔岩,淨係識"篤篤篤",阿媽聽完就即刻反擊,大條道理叫阿妹學番d正常打字手勢,好笑.呢種和洽既家庭關係好鍾意,好開心,希望無時無刻都係咁,不過阿媽始終難改佢果套睇法. 之後欏番部腦就上考試局個網睇放榜d安排,今日下晝聽講有颱風又黎緊,唔知會唔會8月6號打風呢?不過係就煩lu,到時實好混亂,不過睇番考試局個網原來有講低萬一打風有咩安排,都叫做有準備. 之後上網睇forum,就6點去左沖涼.7點fiona打黎,佢要format部機,幫佢諗辦法keep住d要既 file,都幾大工程下,不過我都試過所以有計,其間佢icq又搞到開唔到,跟住我又俾人催食飯,混亂不堪..食埋飯再開netmeeting幫佢睇下,幾經辛苦終於搞掂個icq既問題,跟住佢zip埋個backup就send左過黎擺住先. 9點零online icq,今晚有港姐競選,不過冇興趣,淨係聽住佢地d無聊對答都想死.又聽到阿媽同阿妹討論,阿妹好有信心咁話2號實得,鬼唔知咩,報紙都話佢大熱..9點零姑媽黎左,佢又話o係度訓喎..-__-"(邊有咁多地方..). 冇錯喇,真係唔夠地方訓,10點零表妹同阿妹佢地入黎打地鋪..見住我房個地板冇左勁無奈,唉..想訓廳,廳冇得開冷氣,我又唔會咁蠢捱風扇=),保得住自己張床唔駛讓出黎就算喇..跟住快快脆脆打埋日記,今晚睇黎用唔到腦,早d訓算lu-__-". 孩童只盼望歡樂 大人只知道寄望 為何都不大懂得努力體恤對方 大門外有蟋蟀 迴響卻如同幻覺..

>>August 3, 2003 at 2:47:58 PM GMT+8

2003 年 8 月 1 日 星期五 【晴】

尋晚同人傾電話講到12點幾,果陣阿媽鬧緊阿妹,跟住俾佢見到我仲傾緊電話,俾佢順便啤左我一眼-__-".. 今朝10點幾俾電話嘈醒,起身刷牙洗臉,11點幾阿媽番黎,12點幾食lunch,邊食邊俾佢哦番尋晚既野,仲借題發揮..越講越好笑-__-". 跟住1點零online,聽903,之後成個下晝都係上下網,3點幾梓為打黎,本來諗住玩cm,不過佢on唔到line,一路傾到4點幾.5點零有兩個住深圳既表妹黎左,睇黎今晚會o係度過夜. 6點零又online,四圍睇下人日記,跟住同二佬,布丁icq到8點去睇波. 食埋飯,阿妹佢地一班人入房開機玩,我就一路睇電視,睇完場波佢地仲用緊,好彩有人打黎,一路傾,跟住10點半掠衫,11點終於收番間房,阿妹就同兩個表妹入左佢間房訓(玩?).我打左陣日記就冇打,傾到11點45分,繼尋日之後,又再次俾阿媽啤,乖乖收線..跟住聽森美..12點15分online icq同打日記.

>>August 2, 2003 at 4:59:46 PM GMT+8

2003 年 7 月 31 日 星期四 【晴】

尋晚都成5點半先訓,今朝11點幾起身,刷完牙阿媽都起左身,好彩早過佢-__-".. 跟住俾佢叫我拖地,12點零落去買飯食..1點零阿媽番工,個胃又有d痛,跟住攤左陣阿寶打黎,尋日話左去佢度幫佢整網,接完佢電話就換衫諗住去佢度,阿寶話到佢樓下打俾佢就收左線,但係我唔記得左佢電話(我對數字冇咩記憶,我有時會記唔起自己手機number-__-")..跟住要online問番佢-__-". 2點出門口,搭21號到牛池灣街市落,今次要自己行,仲有少少記憶,同埋我呢排愛上去d唔熟路既地方撞下路,例如前幾日油麻地既診所,尋日既九龍灣百老匯,搵到路既feel好正. 行到阿寶樓下先唔記邊棟打邊棟..無奈,打左俾佢,聽到sally同queenie都黎左-__-",不過落左去買野..驚訝. 上到去就開始整個網,整整下聽到sally同queenie買完野番黎,原來買左意粉黎煮-__-"..邊整個網邊聽到佢地手忙腳亂一番..過冇左耐煮好左,估唔到我岩岩先食完晏都俾人拉左出去食-__-"..d意粉阿寶話好好食.結果跟住大家都食唔晒,煮得太多,哈哈.. 收拾完sally同queenie玩阿寶個icq,佢地勁玩野..笑死XD..不過阿寶都好慘既,見佢幾無奈下..佢地之後放過阿寶,跟住聽歌,睇雜誌,之後玩埋大富翁-__-"..而個網只係整左少少,不過冇所謂啦,網呢d要整都好快既,今日玩得幾開心. 玩到6點幾,執野走人,搭21號番屋企,o係車度.. 7點30分番到屋企,跟住走去沖涼,沖完8點,on一online又俾人叫食飯,食完飯睇埋電視,9點去洗碗,洗完碗就番房online同打日記. 講起日記,打篇長既日記都起碼要用我一兩個鐘,其實長冇咩所謂,肯打既實有時間打,記多d第時自己睇番d回憶都多d啦..但係越長越難組織,所以都幾佩服二佬既泰國遊記既詳細描述,詳細得黎又好笑好睇..

>>August 1, 2003 at 8:18:07 PM GMT+8

2003 年 7 月 31 日 星期四 【晴】

eason新碟《Live for Today》其中一首我覺得好聽既歌. 首歌講出左編曲既幾位大男孩對戀愛既睇法. 談戀愛有如玩猜情尋,當中當然會有贏有輸. 想講失戀又點?就算輸左都唔代表咩,冇遊戲會輸足一世既. 輸當然會難過,但係都應該樂觀面對,大無畏,唔好諗之後會點,玩果陣認真去玩,全心去玩. 遊戲有輸有贏,談情費力仲要加上運氣..冇可必定得既,既然係玩既話,做咩要驚結果點? 唔好以為心口有個勇字就一定會贏,無論你聰明定愚笨,都冇話會一定贏或者一定輸. 猜贏猜輸都好,試下依舊笑面去迎人. 冇話你猜贏,得到左,就會一世快樂無憾..相對地,冇話輸左就一定會過得唔好. 輸得都可以活都精彩,都可以活得開心過贏既人,未來會點冇人知.. 總之宜家可以唔駛煩,又可以多一餐好覺訓. 人生如夢,前程錦唔錦繡都係咁生存.目標冇左,可能反而令你倍感輕鬆,又可以空閒d. 一切野都唔駛睇得咁認真既. 猜情尋 陳奕迅 作曲／編曲：吳國敬／孫偉明 填詞：林夕 監製：吳國敬／孫偉明／陳奕迅／陳永明 遊戲就算輸了亦有限 難過像過山車那麼辦 前程不管可否錦繡加燦爛 認真地玩 全心去玩 更好玩 遊戲若有輸也就有贏 除了力氣當然也講命 明明當初貪玩怎想搏命 何必面青 何必太驚 快聽聽 別當你要奮勇血戰 無論聰穎或愚笨 猜猜情尋 雖不如人 不影響你笑臉迎人 沒有說過你要戰勝留下歡樂便無憾 猜猜情尋 猜猜情尋 玩輸可以勝過別人 多一餐好覺訓 前進後退不過是個夢 搖過蕩過不失個好夢 前程不管可否錦繡都有用 目標落空 才可有空 放輕鬆 別當你要奮勇血戰 無論聰穎或愚笨 猜猜情尋 雖不如人 不影響你笑臉迎人 沒有說過你要戰勝留下歡樂便無憾 猜猜情尋 猜猜情尋 玩輸可以勝過別人 多一餐好覺訓 不必當真

>>August 1, 2003 at 1:37:30 PM GMT+8

2003 年 7 月 30 日 星期三 【晴】

尋晚"訓"到1點醒左,3點真係眼訓offline去訓,但係好奇怪,明明好眼訓,訓o係度又訓唔著喎,一路碌到4點幾先訓著..就放榜好多野諗好驚-__-". 今朝10點幾醒,起身睇電視,睇完食晏,食完都1點幾,跟住番房online,聽住903,hei到3點換件衫就出門口,o係巴士撞到suyi.去到九龍灣百老匯3點35分,今日約左去睇《戀上你的床》,見套戲4點40分先開始,就去淘大行,報個數..今日有阿正,阿寶,大勝,阿fa,sally,carrie,queenie,suyi同我.跟住佢地買野飲,我同阿寶,大勝就去左廁所,番到黎唔見人就番住去戲院等住先,大約4點35分人齊入場. 又係果句,套戲都ok正,唔多講啦,自己入場睇睇..睇完都6點幾,跟住四圍行左陣,搵地方食飯..行行下去左德褔果邊,o係德福廣場行行下,突然有3個女仔走埋黎同我,阿寶同大勝講話幫個fd慶祝緊生日,想俾個驚喜佢個fd,叫我地一人拎住一支假花送俾佢喎..撞鬼,我第一時間閃,不過見阿寶大勝拎左我都算..我地三個急急腳走左入間餐廳擺低支花同句生日快樂就閃左..係閃,極之飛快既速度離開咁解..大勝一路唸唸有詞,因為佢送花果刻俾人影左入相(佢真唔好彩-__-")..之後再o係德福逛左陣,其間snoce打黎叫我去一日遊玩釣墨魚,呢排真係開始窮,$148睇戲都可以睇3,4場..所以推左佢,但係有種內疚咁..唔開心=(. 8點零鐘搵到間野坐低食飯,食完9點幾,跟住番屋企,番到去9點半,沖埋涼,10點online,跟住聽vani,打日記,icq同睇forum..見到有人唱十面埋伏同eric kwok既demo,入左去聽..首十面埋伏超高難度,開始勁低音..後面又要上到好高..唔易handle,不過個人唱得唔錯..聽埋首pumpkin(十面埋伏demo),跟住又睇番d歌詞,今次聽係另一番感受..好好聽=)..聽完冇耐又聽到vani都播,好得意既感覺.

>>July 31, 2003 at 3:08:09 PM GMT+8