2003 年 11 月 6 日 星期四 【雨】

今日空堂果陣emily笑我日記膚淺,平鋪直敘一日所做過既事.其實我好耐之前既某篇日記都解釋過點解我會咁寫法.所謂日記,就係用黎記一日所做過所發生過既野,如果覺得無聊唔寫,只係寫心情,呢個就唔算日記,或者可以叫佢回憶錄. 我覺得日記所記低今時今日看似無聊既事同物,但係經過假似時日再睇番,就會有一番感受,例如原來我果排做過d咩瑣碎白痴野,半年或者一年之後睇番都會覺得好正. 其實個日記一路以黎都係俾自己睇,冇諗過用情深浪漫文字,抑或幽默搞笑,誇張既風格去吸引人睇,所以開左咁耐我都冇咩特登叫過人黎睇呢個爛日記,只係o係info貼下網址俾大家有興趣就可以黎了解下我既生活姐=P. 廢話講完,今朝6點45分醒,番到去8點零,拎埋書都打鐘.今朝個早會玩反傳統,用英文黎主持. 今日第一堂文學,討論番揀邊d書做文學報告都搞左成堂,最後聽楊sir fun陣就落堂.第二,三堂中化,miss poon叫全班拎晒d手機出黎,收獲好豐富,裝滿一個袋,仲要有其他違禁品..我見尋日check書包唔成,今日咩都冇帶,好醒=).今日就傳會再check,結果miss poon好好人幫我地班同學仔keep野,不過俾左個warning佢地.其實我覺得miss poon係有心既,佢都幾奸,利用呢個機會收買下人心,加上今次俾左機會,下次捉到d人都冇得賴啦.結果今日係冇check書包既.擾釀一輪之後作文,作到落堂. 小息做econ功課,跟住之後兩堂空堂就用左黎趕econ同中史功課,lunch前做得晒,仲拎左d書黎睇左陣. lunch又上又一村惠康+7仔食,落到去岩岩好12點50分,點埋名就同bonnie去當值.之後又同我地班個carrie一齊行,後尾佢俾粒波打中跌低損左,我就同bonnie陪佢去校務處,不過之後俾人趕,校工好惡-__-". lunch之後三堂英文,做listening,做到我胃痛,可能係lunch舊壽司d豉油既問題..好彩做左2 part之後冇做,對下默書改下正,同做左張notes就放學. 今日班主任堂toto句「百年難得一見」好正,用呢句野鬧人既人都係百年難得一見=P. 放學見落雨去library做左陣功課,5點零冇雨先過花墟練排球,打到8點幾先走,雖然俾人讚,但係打到隻左手又篤魚蛋又損左,我要求退隊! 番到去食埋飯洗碗,洗碗果陣隻手痛到T.T..之後沖涼仲痛苦,總之就苦啦..跟住online同打日記,又一日,聽日星期六有得抖..yeah!

>>November 7, 2003 at 3:23:31 PM GMT+8

2003 年 11 月 5 日 星期三 【晴】

今朝6點50分起身,7點20分出門口,番到去8點,拎埋書就番課室. 第一堂空堂,拎左份中史功課去做.第二,三堂文學,派左默書簿..唉-__-".跟住教左堂書,然後又講文學報告d野,講完教多陣書就小息. 小息去左買野飲,跟住上番去做中史.跟住兩堂中史,都係討下論同教下書. lunch上左去又一村食,食完快速番去當值,今日同emme調左,我幫佢睇二樓,二樓d f.1仔幾過癮幾好玩,唔悶.lunch完之前toto走黎話訓導處可能會check書包,番到課室見d人陷入恐慌. lunch之後兩堂中化,今日做聆聽,做左兩堂.最後又空堂,落左去做中史功課. 放學去library做左陣中史功課,跟住同阿正,阿佬,sally,carrie去左新世紀food court坐,今日約埋hety出黎,諗住傾陸運會啦啦隊既野,點知都冇咩傾,傾下無聊野,傾到6點40分先走. 今晚sally為個社d野而喊,因為cheer搵唔到人又唔知要點練,搞到我好心痛..總之唔好俾咁大壓力自己啦,我會支持你.輸贏都唔好睇到咁重,盡左力對得住自己就得,因為社呢d野唔係一個人既責任,係成個社,包括埋d committee..如果d committee唔爭氣,都係冇計,呢d唔係你既錯,所以你都唔好咁唔開心啦.

>>November 6, 2003 at 3:35:32 PM GMT+8

2003 年 11 月 4 日 星期二 【晴】

今朝6點半醒,起身背文學,諗住朝早記性好d啦,點知眼訓得滯背唔到入腦.7點25分出門,等到7點40分先有車,今朝又撞到小虎,唔知佢有冇遲到呢最後? 番到去買左包橙汁飲,跟住去拎埋書.第一堂中化,教書.跟住兩堂英文,做miss tang派既notes,幾好玩. 小息繼續背書,唔知點解咩都入唔到腦..跟住兩堂中史又拎埋去邊聽書邊背,搞到個腦好亂,吃力不討好.. lunch上去又一村食,番到學校見都12點47分就去定等點名,跟住同bonnie當值,一路拎左文學黎背,入唔到腦,好煩.. lunch完左文學堂,默書,第一句我已經寫唔到,明明背左都寫唔出,仲要係第一句,未試過有種咁挫敗既feel,我真係咁失敗?時間一分一秒過去,我一路坐,個腦好空,跟住我叫番自己冷靜d,慢慢諗,終於俾我記到,但係已經冇咩時間淨低,撩左幾筆楊sir嗌停筆,我就面懵懵舉手要時間,果刻咩心機同信心都冇晒,心情不足為外人道. 之後兩堂econ忍眼訓聽書,食左橙薑+提子味爽浪,又難食又攻鼻,最犀利係佢通埋我鼻塞.. 放學去左花墟打波,11月11號就係社際排球比賽,今日好努力練波打到7點半. 夜晚番到去沖涼,食飯,洗碗,online同打日記.

>>November 5, 2003 at 3:39:03 PM GMT+8

2003 年 11 月 3 日 星期一 【晴】

今朝訓到6點就醒左,眼光光攤到6點50分,一路望住個天慢慢由暗轉光.今日既心情都起伏不定. 番到去就8點,拎埋書番課室食左包餅.第一堂中化開始教新書,又俾左閱讀報告既功課.跟住兩堂中史,今日派番d test既卷,有個好挫敗既成績,不過都遇左..雖然冇預到會咁差,下次再努力過啦. 小息sally話要搵miss so,幫佢當左陣值,之後佢番黎我就走去買左包野飲上課室慢慢飲. 跟住兩堂空堂,拎左d功課去做,但係做左兩堂都係寫左少少,而d同學仔搞埋d複雜既家庭關係,加上小玉傻左..笑左成堂. lunch去又一村既惠康+7仔食野,番到去當值岩岩好趕到.當值果陣同bonnie一路行一路都見到阿正同阿佬o係小食部閒聊.打鐘唔記得要守廁所,匆匆忙忙走番去. 跟住兩堂econ,本來好眼訓,不過食左show同左輪既兩粒唔同口味既爽浪,攻到我訓唔到,勁精神咁過左兩堂,又同左輪玩佢d pooh pooh換衫公仔(無聊到咁-__-"),我同左輪又俾人畫左隻錶o係手.最後中化oral堂,冇咩特別.. 放學擺完書去開coral會,為左陸運會啦啦隊要跳既歌好苦惱,唔知揀show up,shake shake定一擊即中,三首都有好同唔好,結果開左成個鐘會都係冇頭緒.. 邊個可以俾d好既意見呢?有冇其他歌係好岩跳cheer既呢?

>>November 4, 2003 at 3:20:13 PM GMT+8

2003 年 11 月 2 日 星期日 【晴】

今朝訓到6點50分醒,7點25分出門口,隻腳趾尾尋晚踢住椅痛到我傻,估唔到今朝仲痛..今朝都搞左我好耐.. 番到去拎埋書,好辛苦咁一步一步行番班房,步步痛心.今日頭兩堂英文,默書同對下功課又兩堂,默書又默到轟轟烈烈..跟住空堂,落左去做newspaper cutting.小息一拐一拐四圍走,又搵楊sir提佢文學要印野,但係搵唔到佢,楊sir話齋同佢冇緣份-__-".跟住文學堂,楊sir記得印野,上左兩堂,教左d書,但係楊sir今日唔夠訓,講到好悶,伏屍左大半班,我都半死.. lunch上左又一村7仔食,今日prefect輪到我果組當lunch.快快脆脆食完去到,好準時12點55分去到,點知成班俾vice話遲左,原來係12點50分喎.. 今日同bonnie巡地下,又曬又悶,熱到傻..好唔容易先到打鐘,但係仲要守廁所.. 之後econ堂,挨左堂眼訓,跟住中史堂聽左堂書教做資料題.最後中文堂派下野講下功課就完.第九堂個oral因為miss tang黎遲左上左一陣就放學,跟住去左整coral個board. 夜晚沖涼,食飯,洗碗,online同打日記.

>>November 3, 2003 at 3:30:10 PM GMT+8

2003 年 11 月 1 日 星期六 【陰】

今朝訓到10點半醒,跟住online到12點幾食午餐,下晝就用黎做功課. 夜晚做埋功課上左陣網2點先去訓.

>>November 3, 2003 at 3:14:47 PM GMT+8

2003 年 10 月 31 日 星期五 【晴】

今朝9點醒左醒,不過太眼訓訓到9點半先起身.起身沖完涼就出去.今日話朝早會番去幫drama手,佢地今日比賽.番到去11點,佢地化緊妝,化完妝就去左排戲,跟住我幫手set台,聽左聽講解同做左次就ok,之後佢地影左d劇照.今日除左我同sally之外,小玉,rebecca都唔係drama club但係又番左去義務幫手.12點佢地食飯,我同sally遲左黎冇買到,就上左又一村食,食完番去執埋野就過去聯德聯誼會胡兆熾中學等比賽. 去到見到好多人,個個都好pro咁,之後我地開始化妝,執野,睇場..我地學校係第16組,唔覺唔覺,綵排左幾次都差唔多夠鐘比賽,其間見到趙頌茹,佢好鬼高同真人幾靚下. 入左hall睇完一組到我地準備,時間過得好快,我地都好緊張..開場前set場有少少亂,好彩之後都冇野,演出順利,阿稀同bonnie佢地都做得唔錯,我諗有機入八強.演完晒出左去執野,跟住見tvb都黎左拍電視,有好多藝人,例如修哥,歐陽震華,gloria,嘉碧儀,楊思琦..之後裝佢地拍劇,又同楊思琦影左相.直到4點左右走,因為仲比賽緊,所以未知結果..我就同sally,小玉,rebecca走先,sally想去買材料整野食.結果落左尖沙咀海港城既city super,買完野行左陣就走. 跟住去街市買左d送同麵,又去左百佳.番到去食埋野跟住又download左fifa 2004既demo玩,d畫面好靚,動作好細膩,好想買隻玩..

>>November 1, 2003 at 5:26:43 PM GMT+8

2003 年 10 月 30 日 星期四 【晴】

今朝晨早6點35分起左身,番到去7點半,學校岩岩開門,諗住快快脆脆幫drama果邊錄好d音佢,點知番到去冇人-__-",就上左去拎書,番到去依然冇人,撞到sally,helen同toto佢地去緊當值,suyi仲未番,我就頂左佢一陣.行左陣suyi番我落番去,尋日約左我既人都仲未番,於是落去操場兜下圈,百無聊賴..去到門口果面終於見到emily同bonnie番,果刻先知原來改左小息..因為mmlc朝早冇人喎,仲搞到我白白痴痴咁浪費左個早上-__-". 今朝o係課室收到唔少糖,因為今日係萬聖節,今年d氣氛好好.頭三堂econ,上到悶到傻,難捱極,極難捱..好唔容易先到小息,但係又俾人捉去錄音,小息本來要當值,我已經連續兩日冇去,睇黎遲早烏紗不保-__-"..今日醒醒定定,錄左兩次就勉強叫搞掂. 小息之後兩堂文學,又重拾番文學興趣,兩堂都好精神,楊sir又勁fun d趣野我地知,又講番刑罰,又教下書,第二堂就講寫作既野. 因為呢兩日下晝都係有聯課活動,我地班中六唔駛上堂,又放學. 擺完書就同阿正,阿佬,sally,suyi,小玉去左新世紀大家樂食飯,食完就各自解散. 下晝由2點訓到差唔多5點,起身用左陣電腦就落左去街市同百佳買野食,今晚打邊爐.之後又落左去曬相,番到去過多陣就開始打邊爐,食到好飽.. 夜晚勁打同貼日記,慶祝showhappy重開嘛~祝各位萬聖節快樂! 多謝你今晚既果番話,我會好好記住,好開心有你俾我既無限信心.

>>October 31, 2003 at 5:36:52 PM GMT+8

2003 年 10 月 29 日 星期三 【晴】

今朝訓到7點05分先醒,趕到傻,番到去8點05分,快快脆拎書番課室. 第一堂係中史,派卷同對卷,好快就一堂.跟住兩堂空堂,同totoo係library用電腦上網上左兩堂.跟住小息諗住當值,俾人捉左去mmlc幫drama club錄音,早知就唔應承佢地會無條件幫佢地啦,佢地好唔客氣成日屈我囉-__-".. 結果錄極都唔掂,錄到過晒鐘,11點10分都未得,俾人催去聽talk,結果聽左兩堂講大學既講座,跟住12點10分放學,因為下晝係其他form聯課日. 放學諗住去錄音埋左佢,但係mmlc關左..結果要聽朝晨早流流番去錄..唉. 跟住lunch同阿正,carrie,阿佬,sally去太子食河粉.食完阿正佢番去,佢地仲要上堂,我同sally就去左ikea睇野同買杯,sally話今日早放慶祝整下梳乎里食. 跟住同sally行番去旺角搭van仔去佢度.落左車我順路去左恆生幫阿爸阿媽交管理費. 上到去suyi都到左,跟住sally同suyi整梳乎里食,好好食,有好濃既cheese味,配埋d茶真係好正. 夜晚上陣網,跟住食埋飯,洗埋碗就online同打日記. p.s.阿寶生日快樂!

>>October 31, 2003 at 5:51:06 PM GMT+8

2003 年 10 月 28 日 星期二 【晴】

今朝6點50分先訓,7點半先出去,又撞到小虎,仲有大麻同一峰..番到去拎埋書都打鐘. 第一堂文學,講左小小新一課書既前奏,楊sir好賤咁吊人癮,要"下回分解",但係下回都要唔知後日定下個星期一,結果o係我地起哄之下佢抽多幾分鐘講埋佢,原來我地班文人好鬼好學=P.跟住兩堂中化,本來做聆聽,但係餅錄音帶同部機同時虧左,一係播唔到,一係就好細聲,搞到miss潘好憫,不過佢臨危不亂,結果果堂變左做分組討論,都幾過癮. 小息去當值,得到一個唔知開心定傷心既訊息,我下個禮拜轉lunch要守地下..我最渴望既,充滿挑戰性既3樓離我而去,仲要同左輪拆夥..守地下唯一好處係太平冇乜野撈,亦即係悶..我同vice反映佢唔理..哼! 小息之後兩堂空堂,趕中史份功課,做左堂半,跟住同suyi研究邊個網上日記好,因為showhappy似乎摺左..佢諗住申請過,我就推薦左d要自己改同架既cgi日記,睇完岩岩好打鐘. lunch又去左太子食河粉,呢幾日都係咁食河粉因為下個月又要挨7仔,下個禮拜到我lunch當值.. lunch之後三堂英文,做practical skills,做左2堂幾,最後派番前日quiz既matching,成績居然出乎意料咁好,好開心. 放學打左陣排球,打到5點幾就同sally,阿正去又一城行,行到6點零先走. 夜晚食埋飯洗埋碗就online同打日記.

>>October 31, 2003 at 5:08:41 PM GMT+8