2003 年 9 月 2 日 星期二 【雨】

尋晚10點零天文台又掛番8號,都估到今朝實要番學,11點零就去左訓.果然,訓到5點40分我醒左醒,開收音機聽唔到佢提個颱風,跟住打左去天文台聽,連1號戒備信號都冇..除晒d風球,跟住訓過,7點起身,今日早d出門,費事朝朝趕到死..番到去仲好早,課室仲好空下,過左陣sally番左黎,跟住同佢同suyi去小食部買水. 等班主任處理完班務,今日頭兩堂上econ,第一堂例牌講下d課程,暫時教d野都仲明,不過似乎會越黎越難..break果陣,econ個miss趁econ堂大力宣傳佢有份負責既學會--sex education club,佢話個會冇咩野要做,但係就有幾個優點賺,於是大半班齊齊報左名.過完兩堂econ都中化oral,miss潘要我地自我介紹一番,我求求其講幾句就算,都唔知有咩好介紹..之後小息,阿正佢上左黎,出左去同佢傾陣,打鐘就番班房.之後兩堂用黎收通告,收錢,跟住去影校服相,番到黎就選班會,由於得五個男仔,有一個做左班長,所以其他四個男仔個個都有野做,1個主席,3個總務(難聽d叫打雜~). lunch果陣同阿正,carrie,suyi,sally去太子食河粉.1點零番到黎,跟住去搵鄭sir傾下做prefect定guidance prefect.下晝冇正堂既堂,得補課堂,第一堂geog我冇修,跟住同幾個coral社既同學去左interview個社d post,個miss叫我地扮開會討論一次佢地睇..個feel有d似會考英文oral group discussion既中文版咁.第二堂econ,上完第三堂BS,又唔關我事,落左去cover playground同新同學仔傾下計.. 今日同班裡面僅有既四個男仔(唔計我..)開始有計傾,好開心.今日又一次過apply左好多post,有中文學會,社既sports captain,prefect同埋sex education club,4個..我諗夠喇.. 放學諗住等埋阿正同carrie,但係醒起阿佬話會放4點半.於是決定走,之後同suyi去sally度,suyi要染番個頭,同佢落九龍城買左書先,跟住再上sally度幫手染,搞到我成手都黑晒,洗唔甩..suyi同sally都染番黑,今次似乎好有效,兩個個頭都染到好黑.之後上左陣網,發現..6點左右走,陪sally去機場對面一間琴行報古箏.等左勁耐,之後突然落勁大雨,淋到我濕晒,跟住sally交完學費,出到黎大風大雨到行唔到..佢冇帶遮,我把遮又細把,行過幾條街已經成身濕晒,不過見仲好大雨就企左陣,等到幾個字d雨細番就送佢然後搭車走. 番到去8點,沖左個涼,睇住上左陣網睇新聞就食飯.食完飯番房執野,online同打日記. 唉,中六好變態..好掛住上年中五既生活..

>>September 3, 2003 at 2:04:27 PM GMT+8

2003 年 9 月 1 日 星期一 【雨】

今朝訓到7點起身,刷牙洗面沖涼都搞到7點半,跟住勁趕咁落左搭車,今日好塞車下,差d遲到..番到去上到課室,忙住擺書包然後落去集隊,點知有位同學仔同我講佢坐左我個位,好無奈..搵晒全班都冇位,淨番一個正位..老師檯對住落果個位..都冇計,擺埋書包落去早會,今日個早會好爆笑,"震震下"發台瘟..自己左右不分o係度鬧人,笑到d人攣晒腰.之後番上去個課室門又鎖左,搞到全班又等一餐.跟住番到去第一堂用左黎收通告,第二,三堂去上中史,今日講果d都唔算難,不過睇番中史個高考既課程就越睇越驚心,似乎幾係野..跟住小息,阿正黎左搵我地,跟住出去同佢傾左陣,之後carrie又黎左,跟住sally同suyi,阿佬都o係度齊齊傾下計.打完小息個鐘,聽到人話掛左3號波,過左陣學校都透過mic話停課,11點幾就走得. 之後等齊人,有sally,carrie,suyi,阿正同我,就去左新世紀食lunch.食到1點幾去旺角行左陣,跟住聽到人話2個鐘內會掛8號,條街即刻多左好多人,就連d雨都落大d,風勢都勁左.suyi同carrie話買書,同佢地搵埋跟住就走.搭車果陣越落越大雨,3點左右番到屋企,跟住上網同online.之後阿媽番左勁俾佢鬧,熄左陣電腦,攤o係到睇左今日派d notes,不過好眼訓..5點零幫阿媽染髮,佢成日覺得自己好多頭髮,所以隔一排佢就會染髮-__-",之後無啦啦跳fuse,以為個風咁勁,但係見隔離屋燈光吹燦,check番先發現可能係電飯煲整到跳掣.幫完佢染頭番房online,6點零出廳食飯,食完飯睇報紙,跟住去洗碗.洗完碗番房online.成晚一路俾阿爸阿媽"哦",搞到我好大壓力..我都想讀好書架,唔駛特登提住我要點做點溫書,唔駛拎d 10A 8A生黎同我比,唔駛搵d讀得好過我既親戚朋友d仔女黎同我比.. 點解唔欣賞下我,每年有幾多人可以打敗會考,唔通我上年盡過既力就白費一筆抹去? 點解唔俾信心我,次次淨係搵d讀得叻既人黎比較,黎打擊我? 點解唔讚下我,我覺得呢個係我一世人既遺憾,我都好想俾你地讚下,可惜已經好耐冇試過.. 仲有今晚本來諗住同阿寶餞行,可惜黎左隻杜鵑..打亂晒d行程,8點幾仲掛到9號風球,窗外不時有ping ping pang pang既聲,幾得人驚..

>>September 2, 2003 at 12:23:43 PM GMT+8

2003 年 9 月 1 日 星期一 【雨】

颱風杜鵑 ─ 雙重眼壁的颱風 颱風杜鵑今日（2003年9月2日）掠過台灣南部後，直趨珠江口。在南海北部時，杜鵑曾出現雙重眼壁結構。內眼及外眼的直徑分別約為20公里及100公里。 眼壁是最接近颱風中心的環型對流雨帶，該區的風力最強，雨勢最大。通常大部份颱風只有一個眼壁，很多成熟而強烈的颱風亦會出現雙重眼壁結構（美國雙重眼壁的颶風達總數的一半以上），但並非所有強颱風都有雙重眼壁。 在西太平洋，雙重眼壁結構並不少見。2003年的颱風鯨魚、2000年的颱風鴻雁及颱風啟德、1997年的颱風芸妮及1987年的颱風戴娜都曾出現此現象。香港天文台的天氣雷達曾清楚展示颱風愛茜(1975年)及颱風荷貝(1979年)的雙重眼壁結構。愛茜及荷貝都是強颱風，中心風速超過每小時200公里。香港因此需要懸掛十號颶風信號。 現時普遍認為當強颱風出現雙重眼壁結構時，它們是處於「眼壁更替週期」：新的眼壁發展，替代當時的舊眼壁。週期開始時一個環型的密集對流區首先在眼壁外發展，繼而向內移動，以至出現雙重眼壁結構。其後內眼壁最終消散，外眼壁則增強並向內移動。雙重眼壁結構會維持約一至兩日，通常顯示颱風該次增強週期接近完結。

>>September 2, 2003 at 10:36:54 AM GMT+8

2003 年 9 月 1 日 星期一 【晴】

一峰填得好,離開--是為了回來 離開,未必係一件壞事,出到外面世界走一轉,可以擴闊下自己眼界,或者番到黎果陣,見識多左,學識多左,可能有一個新既你,會有一番新既感受,新既體驗. 祝各位要飛既朋友一路順風,旅途愉快&俾心機 離開是為了回來 曲 詞:林一峰 編:Edward chan 明天就要飛走 朋友都輕鬆奉上祝福 旅途愉快 留低是個選擇 離開亦未算放開一切壓抑 如愛上一個人 一起上路 才驟覺尚有 一些心野 行程未想好 起點經已太遠 人進進出出在我生命 季節更改幻變天地 歲月流過 遺憾若是放不下 仍可學習去感激得到過的 如放棄一個人 孤身上路 才驟覺尚有一些心軟 忙著讓傷口盡快風乾 沿路風光沒心機細看 明明是太軟弱偏裝作硬朗 倘若結束為了重新開始 乾掉了酒為了重新斟滿 旅途落泊 能讓記憶穩固 偶然下雨懷念陽光可愛 歡樂太短為了回憶千次 失掉瑰寶為了尋找安慰 我離別你全為太專心愛 怕忘掉了世間的色彩 離開 是為了回來 從機艙機望向跑道 迅速身處萬尺高空 我留下你 城市跟天空大概一樣 容納著敵友從不知道偏心 曾遇上幾個人 一心靠近 才驟覺尚有 一些心癮 離別再上路 不管遠或近 倘若結束為了重新開始 乾掉了酒為了重新斟滿 旅途落泊 能讓記憶穩固 偶然下雨懷念陽光可愛 倘若痛哭為了趁早解脫 失掉瑰寶為了尋找安慰 我離別你全為太專心愛 怕忘掉了世間的色彩 離開 是為了回來 明天就要飛走 朋友都輕鬆奉上祝福 旅途愉快

>>September 1, 2003 at 6:20:01 PM GMT+8

2003 年 8 月 31 日 星期日 【晴】

尋晚好早就去訓,10點半左右,訓到1點半無啦啦醒左,訓唔番,碌到3點零先訓到,今朝6點10分醒左.起身立即去刷牙洗面換衫,因房朝早廁所競爭激烈,每人用到果10-15分鐘.. 今朝carrie約左阿正,sally同我去食早餐,7點10分去到又一城麥記,見到sally.跟住等多陣carrie都黎左,之後就買住野食先,然後阿正都到埋..食完都7點50分,行埋落走搵的士搭番學,等埋的士上埋車已經8點過d,架車行左陣好塞唔塞呢個時候塞車..等到見就遲到就聽埋司機專業意見落左車快步行過去,點知落車行左陣見條路通晒-__-"..之後都算,行到番去已經遲左幾分鐘,不過好彩第一日番學,鄭sir俾我地過埋先,唔係就慘咯,差d開學第一日就遲到.. 番到去都冇時間上課室,結果早會埋先.早會完左終於上去課室.入到課室感室好怪,熟悉既環境,陌生既面樣,雖然去過camp,但係都係得好少人認到..課室都幾寧靜下,之後一路派通告,好多好多..派派下通告又有電視台,電台同報紙黎做訪問,sally又俾校長派去同人做訪問,好搞笑.. 跟住一路派同講解通告,講到11點零就走得.sally約放學唱k,但係一放學就唔見人,我出左學校門口等,見到阿正,齊齊等..等左無耐齊齊俾楊sir趕,之後sally黎左,suyi過左陣又到,跟住carrie最後黎埋,就齊齊去左尖咀寶勒巷唱k,12點唱到4點45分,$44左右,都幾抵..唱完同佢地行左陣,carrie同suyi搵染髮劑,其間撞到阿fa,之後5點45分搭車走.. 夜晚番到去食埋飯,食完飯開始勁忙,我拎晒d通告出黎填,填足成晚,搞到11點幾先有得訓..

>>September 1, 2003 at 5:46:39 PM GMT+8

2003 年 8 月 30 日 星期六 【晴】

今朝訓到10點醒,起身食埋早餐同阿爸去街市買送,問阿爸點解唔o係百鮮佳買,佢話果度好少野賣.去到街市阿爸撞到fd,佢地傾左5分鐘,我就等到好眼訓..買埋送都差唔多11點,行到番屋企樓下聽到人講緊呢排呢一區既話題.. 婦人:「聽講呢頭開左間百佳鮮..」(我心諗:明明間野就o係你背後,你聽乜鬼講..擰轉個頭咪見到囉..) 佢老公:「係百鮮佳呀!有好多新鮮野買架嘛.」(佢老婆仲要講錯埋個名..-__-") 跟住番到屋企,放番好d送就睇報紙,一路睇到12點幾,跟住阿爸叫阿妹落去買晏,阿妹話食車仔麵,點知佢落左去冇耐打黎話間野冇開..跟住叫佢去另一間車仔麵鋪買,過左陣阿妹又打黎,佢同我講唔識買,入到鋪好驚咁走番出黎,於是我一步一步教佢點買..點知佢話驚頭先咁出出入入樣衰唔肯再入去買,於是我就換衫諗住落去搵佢,點知我換晒衫果陣佢又打黎話唔食,唔駛我落去,結果佢o係樓下買左三盒飯就算. 食埋飯番房online,見無聊改下日記,改完見無聊又幫個icq個list d人分下group,點知領晒野..我千辛萬苦將d人搬完分好晒group之後,後來重新開icq,d人移d唔移d,亂晒,搬唔掂..諗住delete晒d group又delete d唔delete d,整整下仲發現個list d人唔見緊,由98個變23個-__-",個個變晒not in list..唉,下次唔敢喇,如果睇左呢篇日記既人快d hi番我啦..如有不便,懇請原諒-__-". 搞到5點幾費事理個list既問題,不斷嘗試delete番晒d group就算,但係因為icq login得太頻密俾icq server ban左唔俾login,好低b既icq!無奈之下出廳睇6點半新聞.睇完新聞番房整左整個list,呢個時候阿爸叫食飯,就擺低左個icq去食飯,點知去裝飯果陣,一開個飯煲發現入面連粒米都冇,原來阿爸忙到唔記得煮飯..結果要等多半個鐘先有飯食,今日充滿無奈-__-". 食完飯番到黎個list有個好人幫我add番個list,都叫add番一半,不過都係得四,五十個人,有十幾個等緊佢地authorize..望住個咁蒼涼既icq好悲哀.. 8點左右去左洗碗,洗完碗即刻番房執番個icq手尾,add個d人..順便打埋日記. 不過算啦,壞次list個icq都清到唔少人.

>>August 31, 2003 at 12:30:33 PM GMT+8

2003 年 8 月 29 日 星期五 【晴】

今日訓到12點零1點醒,起身又見阿妹用緊電腦,我依舊開住903聽,攤到2點幾,沖埋涼就落去買lunch食,行過岩岩開冇耐既百鮮佳,望到入面仍然人頭湧湧,d人真係貪新鮮-__-".跟住番去7仔買左杯野飲就上番去食lunch,一路睇forum一路食野,食左我半個幾鐘..跟住online同去睇下人地d日記.之後開左vos黎玩,玩左一輪上cmidi搵左d想聽既舊midi改左vos繼續玩.玩到6點幾上番網睇forum,之後玩crazy taxi 同vos,7點幾出廳睇下電視同報紙,跟住8點左右食飯,食埋飯見電視播緊兒歌金曲頒獎典禮,仲記得細個好鍾意睇,係我果陣唯一會夠膽死同阿爸阿媽抗衡會霸住睇既電視,不過人大左都冇咩興趣..於是番左房摺衫,摺完衫就番自己房開機上網(好彩阿妹俾部電視吸走左..),跟住見冇野做打日記. 後日就開學,放假放到懶晒,咩都未準備..弊-__-"

>>August 30, 2003 at 1:43:54 PM GMT+8

2003 年 8 月 28 日 星期四 【晴】

今日訓到1點45分先醒,其實未想起身,不過勁聽到"喔噢""喔噢"嘈醒左,以為發緊夢..原來阿妹用緊部腦icq-__-..自從尋日幫佢開左個icq a/c之後,佢就一路霸住部腦,尋晚佢用到12點幾..今朝10點零訓到模模糊糊都聽到"喔噢",突然有d"喔噢"恐懼症. 既然嘈醒左都就2點,就冇訓落去..開住903聽,睇住阿妹玩icq.突然,佢好懶醒咁唔睇keyboard打字,當時佢回緊人"ok la~",由於望mon冇望keyboard既關係佢打左做"pk la~",跟住佢見打錯想刪,我就扮好人搶先話幫佢按backspace刪番d字,仲曉以大義叫番佢要小心,當佢冷不提防之際,我禁左Ctrl+Enter send句左野出去..因為佢唔知send message有hotkey,果陣笑到我傻..之後搞到佢個fd話佢,佢要勁打sorry補鑊.. 跟住2點45分落左去等車,約左阿正同sally o係太子等,sally話睇檯..等左半個幾鐘車,3點20分先有車黎,上到車個司機話miss左班車,去到都就4點..跟住同佢地行Ikea,之後又落左旺角行陣,又去左實惠睇,行到累累地去食左d野.跟住阿正話行潮流特區,o係果度行左陣,其間撞到阿寶,跟住又去信和,之後見7點就走.跟住我話去剪頭髮,sally帶左我去旺角一間野度,剪到好短,睇唔慣,怪怪地咁..之後o係先達搭車走,番到屋企9點半,跟住食飯,食埋飯就洗碗,跟住番房online同打日記.

>>August 29, 2003 at 4:27:18 PM GMT+8

2003 年 8 月 27 日 星期三 【晴】

今朝訓到12點醒左醒,再訓過訓到1點幾先起身.起身冇耐阿妹叫我幫佢開icq,跟住幫佢開左個a/c,跟住去刷牙洗臉,番到黎見佢勁興奮咁打晒俾d fd叫d fd add佢..我仲有d眼訓就攤o係床聽903,一路聽到3點幾,訓下醒下..4點幾煮左個麵食,好食.食完就入房趕阿妹走上左陣網睇forum.7點落左去左百佳買d零食醫肚,番到去阿妹又用緊腦玩緊icq,有d後悔幫左佢開a/c,今日佢起碼on左5個幾鐘line,我就用得果一陣電腦,睇怕呢個情況都會持續一段時間-__-".. 8點半左右食飯,跟住洗碗,洗完碗番房online同打日記,又上網睇yahoo d新聞..夜晚阿媽拎左張傳單黎,原來樓下間百鮮佳聽朝9點開張,等我聽日去睇睇有咩好食先.

>>August 28, 2003 at 4:20:28 PM GMT+8

2003 年 8 月 26 日 星期二 【晴】

今日訓到2點先醒,起身開機online,一路睇下forum,2點零開左隻crazy taxi黎玩.玩到3點零又online睇下forum,4點幾沖涼.5點零peony上黎左,上網上到7點就一齊出去,今晚出去睇火星,今晚個火星係7萬3千年黎最接近地球既一次,大約5580萬公里,如果今次錯過左,要等到2287年,不過今晚錯過都唔緊要,一路去到9月中都仲會見到,只不過今晚掛名話係最接近既一日. 7點出去,諗住去附近既九龍城碼頭睇,不過peony話想去黃埔,跟住行左過去,其間o係紅磡間粥鋪食左粥,食到好飽,跟住先再行落黃埔.去到黃埔逛左陣行左去紅磡碼頭果邊,見到粒紅豆咁大既星,都唔知係唔係火星,橙橙地色,o係東南面,心諗都係..不過未免太細點,有d失望.跟住諗住去尖沙咀海傍睇,就諗住遊船河,紅磡搭船過灣仔再過番尖咀,不過去到碼頭發現停晒船.諗緊番九龍城碼頭定落尖咀,結果揀左尖咀,見近行落去,原來eason首《隨意門》既一句"出尖沙咀令人大累"係非常之岩既..去到都9點幾,行左落商場行陣,跟住行去海傍,見到好長人龍,諗緊d人會唔會係黎睇火星,但係又諗冇理由會咁大陣象..沿住文化中心行終於搵到答案,原來真係..原來太空館o係果度set左幾支天文望遠鏡俾人睇火星.之後行左上走廊,坐左陣吹左陣吹風.跟住之後落番去海傍行左陣,跟住就搭地鐵去左旺角.去左旺角中心附近買左杯野飲,勁正..又去先達附近食魚蛋,跟住就送佢走同搵車搭番屋企,番到去11點35分..睇電視同新聞睇到12點,跟住番房online同打日記.