2003 年 7 月 21 日 星期一 【晴】

今朝起身9點俾阿媽叫左起身,連埋阿妹一齊唔知點解俾佢鬧左40分.晨早無啦啦俾人鬧左鑊,好唔開心,阿媽又唔知做咩心情唔好喇..跟住同阿妹俾佢叫左去幫手抹野.抹完10點幾,阿媽去左訓,我好眼訓,又去訓番..訓到1點零起身,食左個早餐就夠..呢排有時會冇咩胃口食野,個胃又不時又痛,好辛苦,搞到個人又瘦左.尋日去阿婆度又磅過(每次去都會用舅母買既磅磅下重),為食既阿妹上次磅完好重磅俾人笑,今次佢死都唔肯上磅.我就去磅,阿媽多事走過黎睇,136磅..上次磅142磅,輕左好多,自己都驚左驚,我日日都有食野..跟住阿媽爆我最重有150幾磅俾表姐聽,表姐碌大對眼望左望我,我中一,二果陣的確有d"圓潤"既,不過唔知點解呢幾年越食越瘦,我諗我有病,睇黎都唔長命得去邊..跟住阿媽又猛話我唔食野,其實我都幾刷得架.. 講番今日..食完brunch,跟住就上網,睇coolman forum睇到3點幾,自己又玩左陣cm,跟住又轉左d新vos歌玩..之後一路icq到6點幾,其實幫阿媽切菜洗菜. 7點零沖完涼出黎諗緊點寫俾商台封信,寫左句"本人對於貴台網頁的意見.."個腦就塞左,跟住去食飯,食完飯番房睇書,睇睇下好眼訓訓左陣,到左10點醒左就online,聽住903打日記.

>>July 22, 2003 at 4:48:05 PM GMT+8

2003 年 7 月 20 日 星期日 【晴】

尋晚都成6點先訓,今日訓到1點幾醒.起身食左d野就上網,之後同梓為玩左陣cm,玩到3點零入將軍澳.今日去幫外公慶祝生日,本來係諗住尋日去,不過阿姨唔得閒,改左今日,好彩..因為冇同踩單車撞時間. 宜家搭入將軍澳要兜好多路,兜多15分鐘左右,入到去將軍澳4點幾,去到d表弟表妹同阿妹去晒玩,我就睇下報紙.5點零佢地番黎,就同表弟入房打機,之後6點幾出廳睇新聞. 之後一路睇電視等食飯,去食飯果陣阿婆差d仆親,好彩我o係隔離快手扶左扶佢.食完飯就切蛋糕,影相.舅父即時將部數碼相機駁落電視播出黎,睇d相,我覺得外公笑得好開心,佢自從知道自己有cancer之後都好易發脾氣,心情唔好,今日都算人齊,其實都幾矛盾..我估緊外公既心情,睇住咁多兒孫濟濟一堂會點呢?開心咁多人同自己慶祝?定係唔開心自己可能大限將至,呢次見完下次都唔知幾時/仲有冇機會?唉,命運呢d野唔到你去諗,總之希望外公佢身體健康=). 9點45分阿爸就話走,原來佢想番去睇電視-__-".番到去10點20分,番房online睇coolman forum,同二佬icq,聽903,打日記. 今日有單怪新聞,無啦啦有隻BB抹香鯨擱淺o係西貢鹹田灣沙灘,睇新聞見到人d為左救番條生命都好落力去推,但係條鯨魚太重喇,成5,6噸,推左成日都係得個吉,最後聽講好似話放棄,要人道毀滅..好可憐. 生命好脆弱,就算有幾龐大強壯身軀都冇用=(.

>>July 21, 2003 at 3:49:24 PM GMT+8

2003 年 7 月 19 日 星期六 【晴】

尋晚4點幾訓,今朝較鬧鐘9點醒,印象我拍熄左個鬧鐘又訓過..一路訓到9點50分,好彩阿妹用緊電腦,播住歌,我就係咁俾twins叫醒左=).今朝阿siu約去踩單車,11點去大圍火車站等,計番d時間好彩仲趕得切.話時話呢兩個月出去居然去親都沙田大圍果邊(oral去聖心搭85A,拎野俾hety去沙田火車站搭85B,今日去大圍火車站既85),85,85A,85B呢幾架我甚少搭既巴士終於有佢用處,平時搭都係去樂富.. 講番今朝,快快脆脆刷牙洗臉換衫食早餐,搞掂晒都10點15分,本來都有大把時間o徙,樓下有85號直到,晨早流流45分鐘點都入到大圍掛? 不過尋晚應承左sally話一齊搭車去,10點15分就出門口,跟住見車搭車,85,85A,85B都去到,搭左架85A,好準時咁10點半去到佢樓下,見佢仲未落黎..開始有d不祥預感,打去佢屋企唔通,10點45分,我見再唔走就遲大到,一路轉身行緊去巴士站,終於打到俾佢,仲要轉個頭就見到佢..原來等人定律同等車定律一樣,有時你番學就遲到果陣,就會點都等唔到你等緊果架車,但係你一轉身諗住去飛的,架巴士又o係你視線範圍內慢慢埋站..吹脹.. 結果去到都11點`10分,今日有阿siu,阿正,sally,queenie同我.買埋水,就四圍搵地方租單車,但係sally又唔記得佢講果間點去,白行一趟,之後求其搵左間價錢合理既就租左,大約11點45分就開始踩入大埔. 今次係我學識之後第二次踩單車,講番對上果次係2001年既新年,果陣同903chatroom班人出黎踩,果次我都唔知點解咁就學識左..但係之後都冇踩過.今日上車之前俾人加左個籃,佢地班友仔勁擺野落黎,冇人性!好彩阿siu之後都加左籃分左d,哈哈. 初初上車果陣唔記得左點踩,不過好快就上番手,果陣好熱,岩岩中午12點幾,勁猛太陽,個人都就變人乾..我前後買左3支水飲..今次比起上次踩得辛苦,因為今日好熱..所以下次踩單車最好都係冬天先~今日一路踩,去到大學果段最欏命,差d中暑-__-",好彩一路間唔中都有補給站..一路去到吐路港,阿siu個fd Szeto又話join,佢反方向大埔踩出黎搵我地..踩左大半段路,o係條天橋撞到Szeto,跟住o係果度停左半個鐘,抖一抖d力都番晒黎,跟住就踩入大埔,果陣個天陰晒,冇咁熱,之後仲落毛毛雨.之後d雨開始大,我地搵左個橋底避雨,呢個時候我發現我架車後轆鬆左鏍絲,勁煩..白手又鎖唔到,之後每踩一段都要落車踢一踢個轆,好彩淨番好短既路程..雨停左我地繼續踩,2點半左右終於到大埔,呼左一大啖氣,辛苦踩入黎既果種感覺難以容易,總之就好感動啦T.T.交埋車就去搵地方食晏,去左吉之島果頭行,之後去左大埔超級城食kfc,其間d對話..-_-""".. 食完都4點,行去巴士站搭車走,搭75X-__-",睇黎屋企樓下個巴士總站d入新界既巴士o係呢兩個月內都俾我搭齊..搭到出去4點45分,見4點幾就同sally,阿正佢地去行樂富,行到5點零就搭車走. 番到去等好熱,等沖涼等左半個鐘..沖完涼食埋飯去洗碗,跟住睇小孩不笨,8點訓左陣,8點半就online邊打日記邊icq,打到9點幾. 個躉宜家好痛> <,今日到此為止.. p.s.突然覺得自己好似古代編寫歷史果d官-__-"

>>July 21, 2003 at 5:38:18 AM GMT+8

2003 年 7 月 18 日 星期五 【晴】

尋晚玩cm4玩到5點幾先訓,今朝10點零俾阿媽嘈醒,跟住幫佢抹左d野同食早餐,12點幾又訓過,訓到2點先醒.醒左online同二佬chat左陣,跟住之後上coolman forum,4點幾聽住903繼續玩cm4,玩到5點幾阿媽醒左,俾佢叫左去切野,雞手鴨腳切完一輪又要去摵窗框d膠紙,搞到成身灰,摵完去左沖涼. 7點零食完飯就番房online,跟住整下個日記,又上番coolman forum睇人吹水,9點零阿siu打黎話聽朝踩單車,我淨係驚我醒唔到姐..有冇好心人可以叫叫我起身?-__-" 10點半,幫阿爸去掠衫,搞左15分鐘,跟住番房icq同打日記.

>>July 19, 2003 at 3:07:04 PM GMT+8

2003 年 7 月 17 日 星期四 【晴】

尋晚5點幾訓,今朝11點零起身,俾阿媽叫去幫手摵番窗d膠.之後食埋早餐,就番房online.一路都無無聊聊,見到二佬都on緊line,hi完佢冇耐佢就打黎,佢個fd都o係度,原來佢幫佢家姐個fd整緊網頁,跟住開個netmeeting睇,睇落都幾麻煩下,一路整到就2點,跟住走左去玩pso,一路玩到3點,本來二佬話3點再整,不過見冇心情就繼續玩落去,玩到5點零,我俾阿媽叫去何幫佢做野,跟住就冇玩到.整到6點先on番line,跟住icq左陣就去玩富甲3. 8點零食埋飯,9點洗碗,番到房好累,就訓著左,訓到1點鐘又訓過,跟住online打日記. 今晚玩左個網上tarot,又講得幾中喎-__-".

>>July 18, 2003 at 5:52:04 PM GMT+8

2003 年 7 月 16 日 星期三 【晴】

今日一訓訓到12點幾,起身食左少少野,online打日記,其間阿寶send message黎就去佢度幫佢整網頁,跟住就去左佢到.打個日記打到2點半,2點45分先出去,3點半到牛頭角地鐵站果邊,就打左俾阿寶.佢好快就落左黎接我,佢住果度好豪華下,間屋又大,佢仲話細-__-",樓下又多會所設施喎.. 上到去就開始整個網,一路整到7點幾,大致上個網個外貌都出左黎,跟住7點20分就飛番屋企.o係車上接到阿爸既追魂call,番到去7點50分,坐左陣就食飯. 食完飯睇報紙,好多新聞睇,政治同娛樂都好大單,睇到10點幾先番房online,跟住上coolman個forum勁reply人d問題邊icq,同聽三姑. 『不過 從來是悲劇時代 方能上大舞台』

>>July 17, 2003 at 4:29:41 PM GMT+8

2003 年 7 月 15 日 星期二 【晴】

好充實既一日. 今朝6點幾先訓,9點就俾阿媽叫醒左,開始馬拉松式開潔既一日..一醒左佢就彈句今日唔准出去.原因係今日有人黎換鋁窗,我本來都有諗過出去避難,不過既然阿媽第一句就咁講,我都無謂作無謂既反抗.出到廳發現連個親戚都黎埋,我直覺今日會好混亂.梳洗完,個裝鋁窗既師父都黎埋,由於驚整污糟d野,阿媽就將房d野搬晒出廳,搞到本來都細既廳更加迫,想行都難,仲要個親戚又黎埋,廁所都冇埋,唯一有空間既係廚房. 9點半左右開始拆窗,阿媽又開始黎,佢d疑心好鬼勁,唔疑信人,差唔多隔半個鐘就叫個師父要整靚d,唔係唔收貨唔俾錢,又教個師父點整,激到個師父得閒寸番佢幾句,阿媽又同佢死撐,呢個場面一直維持到下晝5點半阿媽出左去先停止,阿媽真係人見人怕-__-"..仲要聽到個個都話佢長氣同煩. 12點零,個親戚整完個廁所,阿媽又駛人唔駛本用盡佢,叫個親戚油過晒全屋既牆,屋企都夠亂架啦..但係阿媽話既然整緊順便喎..1點零食埋lunch,下晝開始feel到熱,個師父裝好晒d窗框,阿媽依然叫佢要點要點,我發現個師父開始唔理佢,成日話"你講野盞阻住我做野,我做左幾十年識點做,你放心啦"..呢個時候個親戚開始油牆,阿媽就叫我四圍抹野,因為有好多灰同塵.. 熱果陣個人都躁d,見佢成日點點指指,下晝開始同阿媽有衝突,咁又係架,你想點你自己先知,做咩唔自己黎整呢?跟你意思去做,差少少就發脾氣鬧人..搞到我都好躁.2點半阿妹放學番黎,佢今日派成績表,佢d成績,真係...-__-.如是者,一路躁一路熱去到5點半,阿媽番工,d氣氛先好d,個裝修師父原來好鬼風趣,果個佢心情突然好好,同我同阿妹有講有笑,好玩~ 一路整到七點零,d水泥開始乾,個師父開始裝d窗花上去,阿爸都番左黎,見就完開始執野,阿妹一路都好歎,坐o係風扇面前吹住睇電視,我地就執到身水身汗.就8點,個師父整好晒走左,而個親戚油埋間房,阿爸就叫左好得閒既阿妹落去買飯,佢竟然唔肯,話咩要換衫先得,邊有位俾你換衫丫..最後三催四請先請到佢落去. 阿妹上番黎,我地仲執緊,好鬼多灰同塵,成張床就算鋪左紙都仲有d沙同泥.阿妹食左先,我執到9點先食,食完又執過,最後抹埋房個地下,10點半終於搞掂..沖埋涼,11點出到黎,又幫手掛埋d窗簾,跟住11點15分睇電視,聽到兩大高官辭職,有份幾唔捨得既感覺..我覺得佢地都係跟錯人姐,我相信佢地有料架.我仲記得wasabi都話過葉太係無間道既梁朝偉,佢特登表現得強硬d,煽動多d人出黎7月1日個大遊行,諗諗下都似喎,因為佢6月25日已經遞左辭職信啦..邊有人辭左職仲咁盡心呢? 好累,今晚12點就訓左lu.

>>July 17, 2003 at 6:17:58 AM GMT+8

2003 年 7 月 15 日 星期二 【晴】

自己一向都幾鍾意聽傅珮嘉d歌,最近佢又派左首正歌上台=). 首歌講過跳ballet既女仔,好想o係自己鍾意既人面前跳次ballet佢睇.可惜,轉到鞋穿,如何動人心弦,都吸引唔到佢既注意,不過佢依然好努力,嘔心瀝血,歇盡佢性命繼續去轉圈,佢只係希望可以博到自己鍾意既人望自己一眼,終於o係跌到之前,佢望左自己一眼. 轉 傅珮嘉 讓我選 只想聽簡單和弦 好過舊唱片唱腔俗套憂怨 討厭 情調被煽動迷亂 可憐唱沒了完 如果 愛你要貶低我自尊 也得不到一分鐘 感化心願 兜錯廿次圈 跳舞鞋亦穿 獨個在原地轉 如何地轉 嘔心瀝血 原地在轉 轉不出快樂 仍在轉 忘亦忘不完 動人心弦 並未停 我已就快斷 無能為力 歇盡我性命轉圈 如何地轉 會博到你望一眼就算 如了願 而在跌倒之前 仍落力 未完經典的 繼續轉 未夠苦 參考那齣天鵝湖 心痛為女主角被再次辜負 不過 從來是悲劇時代 方能上大舞台 如果愛你要貶低我自尊 也得不到一分鐘 感化心願 兜錯廿次圈 跳舞鞋亦穿 獨個在原地轉 如何地轉 嘔心瀝血 原地在轉 轉不出快樂 仍在轉 忘亦忘不完 動人心弦 並未停 我已就快斷 無能為力 歇盡我性命轉圈 如何地轉 會博到你望一眼就算 如了願 而在跌倒之前 仍落力未完經典的繼續轉 如果愛你要貶低我自尊 也得不到一分鐘 感化心願 兜錯廿次圈 跳舞鞋亦穿 夢才自覺原地在轉 如何地轉 嘔心瀝血 原地在轉 轉不出快樂 仍在轉 忘亦忘不完 動人心弦 並未停 我已就快斷 無能為力 歇盡我性命轉圈 如何地轉 會博到你望一眼就算 如了願 而在跌倒之前 仍落力未完經典的繼續轉

>>July 17, 2003 at 6:11:19 AM GMT+8

2003 年 7 月 14 日 星期一 【晴】

今朝訓到11點幾醒左,洗完個臉冇清醒到,反而覺得好眼訓..跟住又訓..之後訓下醒下咁,12點半決定起身,落街買左個lunch食,食完都1點幾,之後玩富甲3玩到2點零,夏日炎炎正好眠,我又訓過..呢排有渴睡症?其實都唔係既,冇排訓得少..朝朝6點先朝,睇黎係個生理時鐘轉變左. 訓到4點幾起身,聽左陣903,跟住俾阿媽捉去幫佢洗菜,之後又叫我整個天花,整完抹埋廁所d牆,成身汗..呢排好熱,都唔知細個果陣點解可以日日正午去踢波,冇曬到生cancer都算好彩.. 6點半搞掂晒d野就online,諗住玩vos,跟住梓為叫我玩cm,同佢玩左陣佢hang左而輸波,跟住就冇玩. 7點零我就開住icq擺,8點去沖涼,出到黎阿爸問我幾時出去,今日諗住出去同阿siu & suyi慶祝生日,去食飯..我話9點45分,阿爸即刻好大反應,又話夜又話唔好跟d壞人一齊..激到我暈,睇黎佢近朱者赤,近得我阿媽多..出夜街唔等如曳掛..何況我又唔係凌晨先出,幫人慶祝生日姐,一日半日..食餐飯仔,9點食到11,12點都飽啦,走得啦..食飯唔會學壞掛? 結果我扮講錯,話8點45分先岩,搞到我沖完涼就快快脆脆,好忙咁出左去.約左9點45分o係sally屋企度打邊爐,我出去果陣先8點45分,就算行過去都仲有時間淨,結果o係搭車既九龍城碼頭果度呆坐左半個鐘,今晚見到月亮,個月亮又圓又靚,黃色既.好彩碼頭唔熱,一路有海風吹住,坐到9點15分,見到架巴士開就走過去,9點半已經到左九龍城廣場,見仲有15分鐘個o係附近兜左陣,入左間7仔.之後行去獅子石道向許留山方向,跟住就轉番去sally屋企,去到岩岩好9點45分. 上到去發現好人齊,除左兩位主角-__-"..之後我地食住先,阿siu同suyi都話遲d黎,阿siu10點幾黎左,suyi 11點幾先黎,我地果陣都食到幾飽,不過佢地上黎唔係食野..傾左陣又玩左陣,都12點,阿siu話聽日要番大陸就走左先,之後見仲有好多野未食晒,就玩森美小儀佢地節目玩既遊戲,"量晶晶"同埋"我係傻佬幾多號",輸左要食(好大碗..sally見唔係佢輸就勁"不"野俾人食),12點45分左右都算食晒d野,跟住執野走人. 果陣都成1點,冇咩車搭..suyi同我同路就一齊行番去,送佢到樓下,果陣都1點20分,跟住行條直路,轉左..又見番我好喜愛既果條天橋,又行果度番屋企,番到去1點25分,跟住胃痛住咁online同打日記. 補祝番阿siu同suyi:生日快樂~

>>July 15, 2003 at 6:09:18 PM GMT+8

2003 年 7 月 13 日 星期日 【晴】

尋晚又玩住yahoo game同富甲天下3玩到5點幾,諗住訓,跟住醒起有個net fd話要搵何韻詩既叱o宅片,於是就開左個winmx碰下運氣(話晒都清晨5,6點),居然俾我搵到,不過就足足dl到6點20分先dl晒,跟住就去訓. 尋晚阿媽話今朝會有整鋁窗既人黎,叫我要早d訓早d醒,我好"早"訓,都好早醒=).今日訓到9點半就起左身,岩岩好個整窗既人就黎左,又係上次果個阿叔.刷緊牙果陣聽到阿媽又同佢爭論起黎,原來位阿叔約左今日黎整,但係就臨時話轉時間,阿媽當然激氣啦,聽到阿媽猛話唔整,嚇到果位阿叔面有難色,今次都算報番上次之辱(?).終於,再約多次o係星期三上黎,跟住我發現白早起一場,又去訓過.訓到1點零俾阿妹叫醒左,叫我落去幫佢買lunch,唔係嘛..咁都得?特登叫醒個訓得好地地既人幫佢落街買野..真係激死我,自己冇腳架咩.. 最後成功迫到佢自己去買,食完lunch就上網,icq左陣,跟住梓為話玩cm,同佢3點幾玩到4點,我見部機熱就冇玩落去,之後熄埋機,仲俾阿媽的去整廁所個天花,因為阿媽話又有裂縫..當我萬能既咩..硬住頭皮剷左幾下,之後又幫佢洗野,番到房開番機都6點,跟住玩富甲3玩到7點半,之後出去食飯,食完飯摺衫,睇電視. 9點幾番房online,carrie話佢部腦中毒,跟住send個pc-cillin佢裝,scan完發現有d中毒file delete唔到,好神奇..咩方法都試過,結果搞到2點幾,delete晒d run隻毒既file,雖然應該冇問題,不過都係清唔晒..好遺憾.. 好想搵自己部腦試下..哈哈=)

>>July 15, 2003 at 3:32:56 AM GMT+8