2007 年 1 月 17 日 星期三 【炎熱】

Title：第一次開早會

　　今朝早左成個鐘頭起身，一早返左公司預備開早會．返到去如常咁打番條呔同換番對鞋，跟住就開電腦，儸份時間表，睇下邊位同事今日同聽日放假，因為如果聽日放假既同事，今日就要係開舗同收工既時候，企係門口做 "迎送" ．搞左好耐，先搞得清楚邊 D 同事係例休同埋補假．

　　跟住就睇 Email ，對住 D Email ，都唔知邊 D 應該講，邊 D 唔駛講．因為有 D Email 淨係關某一個部門既事，又有 D Email 雖然係關呢個部門事，但係其他部門又有可能需要知道，所以都揀左好耐．好彩因為早左成個鐘返去，做左 45 分鐘就做完晒（平時 D 同事做 2 , 3 個字咋！！），跟住再 "咪" 下 D Email ，就要出去同同事開會 lu ！

　　一開始同同事講聲早晨，跟住講晒 D 工作分配，之後拎起 D Email ，唔知係咪太緊張，睇落去無咩印象，所以要睇住黎讀，同 D 同事無咩 Eye-Contact ．讀完 D Email ，等埋 D 主管補充，就散會 lu ！

　　之後問番 D 同事，一致既評語都係："幾好丫！夠大聲，又幾鎮定！" 不過就少左 D Eye-Contact ，呢樣野慢慢黎啦．跟住見到 Angela ，佢話："今日講得幾好喎！聽日本來唔咪你開早會既，不過聽日你都照開啦，因為詹小姐（分區經理）話想睇下你開早會喎！"

　　我既心情突然好似晴天霹靂："詹小姐？！！"

>>January 22, 2007 at 7:03:11 AM GMT+8

2007 年 1 月 16 日 星期二 【微冷】

Title：英文部 Farewell

　　由於小弟、阿溢同阿幗，都將會係短期內離開星光分店，所以今晚去左旺角漢陽苑食韓燒同我地 Farewell ．


揸 Fit 人 Ling 姐與英文部 "斷背仨"

尚欠阿幗同麗玲添！

>>January 22, 2007 at 7:14:25 AM GMT+8

2007 年 1 月 15 日 星期一 【微雨】

Title：宣傳部主管

　　本來小弟一直都只係幫 D 書架設計下 D 牌，同埋幫 D 英文書諗 D Caption 介紹下．但係唔知幾時開始俾店長 "睇中" ，連中文書都要搞埋．最早應該追溯到幫中文部整個 "暢銷書排行榜" ．

　　跟住琴日慧中拎左兩本書黎，話店長想我幫手諗 D 野介紹下 D 書．一睇之下，原來係一本 "文化讀物" ，之後睇左第一頁既 "序" ，只係半版既文字，足以令我由精神飽滿，變到鼻水、眼水直流，再加埋魂飛魄散．

　　之後唯有退回後方， "失魂" 地去左包書同埋上架，搞到夜晚食飯先 "回魂" ．

>>January 17, 2007 at 1:28:27 AM GMT+8

2007 年 1 月 13 日 星期六 【微雨】

Title：終於有得收銀喇

　　今日雖然係星期日，但係都唔係好多人，所以我地都唔咪好忙．咁岩麗玲被編做收銀，我又見無咩好做，於是走去收銀處幫下手入膠袋．跟住咁岩另一位收銀同事去 Toilet ，而有位客人要包合蠟筆，我又唔識得包（其實係驚包得核突），於是麗玲好有信心將個收銀機交俾我，叫我收住錢先．

　　之後收左三個客人，雖然佢地都已經買得少，又俾散銀我，唔駛點找錢，但係都足以令我非常緊張，兩隻耳仔都紅埋．之後麗玲接管返個收銀機，等我個人定返落黎，佢問我收唔收，等我練習下，跟住我 "欲拒還迎" 咁試下，今次有得用埋 Credit Card 同 EPS 先，收下收下都幾 OK ，覺得幾好玩，不過都係好驚收錯錢．

　　跟住靜左 D ，我就儸疊 Credit Card 收據出黎睇下有無打錯銀碼，因為部機入銀碼要補返 D "零" ，例如 $25 要入 2500 ．睇到有張單個銀碼無咩印象，係 $102 ，之後係收銀機睇返張單竟然係 $202 ，嚇得我同戴小姐一額汗．之後驚嚇左五秒鐘，先睇到左下角原來有 $100 係收左書券，真係嚇到成身都滾晒！

　　最尾收工既時候，收銀既同事要埋數，我就好緊張咁等緊成績表，睇下有無收錯錢．好彩最尾全日個收銀機只係爭左 5 毫子，唔駛交學費！

>>January 15, 2007 at 4:13:32 PM GMT+8

2007 年 1 月 12 日 星期五 【微冷】

Title：再度加場

　　繼先前小弟於聖誕節，傳出即將離開現時既分店，近日相繼有阿樹同阿影提出請辭，其中阿樹仲 "遲黎先上岸" ，走先過小弟．係呢餐或有或無既 Farewell 餐上面，主角已經升至三位，唔知仲會唔會有更多呢 ??

　　Anyway，在此祝各位前程錦繡！點都要引用番肥姐既節目名 --- "有緣相聚" ，如果你有緣睇到呢篇日記既話，就繼續 Online Keep In Touch 啦．

>>January 15, 2007 at 4:14:04 PM GMT+8

2007 年 1 月 11 日 星期四 【微冷】

Title：自動請櫻

　　今日跟住阿溢走去後場，應該係想推番部 "巴士" 入去既姐（其實都唔咪好記得入去做咩）．

　　跟住入到去， May 姐就問："你地得唔得閒呀 ? "

　　阿溢就話： "唔得閒！"

　　May 姐："叫親你做野就話唔得閒！"

　　跟住我就話："應該聽左 May 姐想叫我地做咩，先話唔得閒架嘛．"

　　之後就問 May 姐有咩要幫手 ，原來想我地幫手拆貨．小弟鑒於對上一次拆貨，都應該係一兩個月前既事，加上 " Practice Makes Perfect " ，於是就請櫻去拆貨．問下 May 姐有咩貨要拆，原來係英文採購部黎既 16 箱貨（先前仲以為係 6 , 7 箱 tim ）．不過數量多少唔緊要，最緊要俾時間我慢慢拆就得架喇．

　　結果開箱、執 D 貨出黎、再點下數量、再開箱、再執 D 貨出黎 ... 就咁就做左成兩個幾鐘，中途 May 姐怕我唔慣，問我累唔累．我就的確唔覺得累，仲覺得幾好玩添！跟住收工時間就岩岩做完 lu ．

　　PS. 睇完同門 Kitty 既日記，驚覺原來我未識開 "轉批單" ！！即刻叫 May 姐下次開單教埋我開單！！

>>January 12, 2007 at 4:55:54 PM GMT+8

2007 年 1 月 8 日 星期一 【微冷】

Title：精選遊覽團

　　為配合讀者既需要，小弟特地將過去比較 "書面語" 既文章，精選出黎，可根據 Post Date 搵番出黎啦（頭兩篇係最尾個兩頁）：

2003/04/10　聰明笨 "兔"

2003/04/12　戀愛專家

2003/04/27　遲來的禮物

2004/02/06　思念

2005/01/10　老鼠話你知

2005/03/06　讀書的意義

2006/05/08　這就是我！！

2006/06/04　Little Mermaid

>>January 9, 2007 at 3:30:52 PM GMT+8

2006 年 12 月 30 日 星期六 【晴】

Title：2006年大事回顧

29/01　過左第一次屋企無人既農曆新年

02/02　第一次食到難食既碗仔翅

27/02　第一次食 Yogurt 做午餐（依家諗起都覺得難以置信！！）

04/03　第一次去參加海關體能考試

12/03　第一次升做馬會既 Monitor

08/04　第一次去諾士佛台飲野（好 High Class 哦）

06/05　第一次同班 Friend 去桌球室篤波

08/05　第一次自己寫 "這就是我！！"

15/05　第一次去儸智能身分證

28/05　第一次見到堂甥女 Yumi（都已經四五歲 lu ）

19/08　第一次離開成記（唔會有下一次架嘛?!!）

31/08　第一次去濕地公園

26/09　第一次去投注站返工

30/09　第一次成家人去唱 K

01/10　第一次去睇舞台劇（詹瑞文 "男人之虎" --- 正！）

03/10　第一次去商務 Interview

08/10　第一次中六合彩 --- $160

10/10　第一次去北京旅行（大笑之旅）

16/10　第一日去商務門市返工

28/11　第一次離開馬會（唔會有下一次架嘛?!!）

30/11　第一次去廣州公幹

07/12　第一次參與門市盤點

31/12　希望下年繼續有得寫 ^^

>>January 7, 2007 at 4:22:35 PM GMT+8

2006 年 12 月 27 日 星期三 【晴】

Title：終於搵到喇！！

　　今日同心心仔係九龍城唱完 K ，行下唱片舖，突然眼尾 "睄" 到三盒好眼熟既 Products ，雙手以 100 Km/h 既速度將佢地一抱入懷，死手不放．

　　終於搵到佢地喇！！--- 咕嚕咕嚕魔法陣 II （Box Set Vol.1-3 ）

>>January 7, 2007 at 2:18:08 AM GMT+8

2006 年 12 月 26 日 星期二 【晴】

Title：第一次學收銀

　　今日係收銀處坐下，俾店長見到，就話：" 不如學下收銀丫！" 跟住 Joyce （即係蕭老師）就教我 "付款方法" 個幾個掣，同埋 "優惠類別" 既掣，聽就幾容易，做落就唔知 lu ．

　　跟住要去做野，所以學住咁多先，未駛真正收錢住．

>>January 1, 2007 at 4:19:14 PM GMT+8