2007 年 8 月 10 日 星期五 【乍寒還暖】

Title：再見了！

　　要幫手既話，只要用 ＊3301 大嗌一聲 "阿匯" ，我就會出現架喇！

>>August 12, 2007 at 5:27:32 PM GMT+8

2007 年 8 月 9 日 星期四 【颱風】

Title：坐車日

　　今朝一大朝早六點幾就全家人起晒身，跟住決定去搵埋住係隔離村既外婆去飲茶．飲完茶，原來老豆無帶房門鎖匙，因為係我身上，於是姑丈用電單車車我返去先．好耐無坐過電單車，雖然只係短短五分鐘既車程，但係真係好無安全感，全程都好驚．由其是係落完雨個地下濕濕地，轉親彎都驚會跌．

　　之後好驚咁返到去，坐左一陣，就準備去拜山．成個家族浩浩蕩蕩咁行去，之後經過一個變左垃圾棄置區既爛地，又要行一 D 原本唔咪路既山路，最後幾驚辛苦就去到．個度除左葬左婆婆之外，仲有離開左十幾年既爺爺同埋離開左幾年既太婆，好耐無去探過佢地！

　　儀式完成後，我地就落番山，上山已經唔簡單，落山更加難，我地要幾個手拖手咁慢慢落去．而行到差唔多完既時候，竟然遇上一堆勁肚餓既蟻群，每人行過，對腳都俾佢地咬到超痕，好彩係紅左少少，無腫起．

　　返到去休息一下，俾精力旺盛兼無上山既小表妹，儸左一堆橡筋出黎同我紮辮，最多既時間同時有六七條辮！而最得意就係 D 小朋友每次同人地紮辮，都係越紮越興奮，最尾就會扭計要紮多 D ，之後就會比玩之前仲唔開心．

　　晏晝大約四點幾，突然睇到電視話香港掛起左八號風球，好突然！本來諗住食埋夜晚個餐先返香港，但係因為驚會無車搭，所以要即刻自己搭車返香港．結果搭到 5:10 分既車，本來應該 7:00 就會返到深圳，點知去到虎門、東莞同埋深圳都遇上塞車，出面又落住大雨，隔離又坐住個唔識既人，想郁都郁唔到．結果成 8:40 先返到羅湖落車，足足多左一倍車程時間！

　　跟住好快咁過關，搭火車返沙田．新城市廣場裡面大部份既舖頭都閂晒門，唔知點解仲有咁多人係度．之後去左美心買飯返屋企食，本來諗住岩岩十點返到屋企睇 "蠟筆小新" ，點知無得做，激死！

>>August 12, 2007 at 2:21:19 PM GMT+8

2007 年 8 月 8 日 星期三 【乍寒還暖】

Title：休息日

今日係鄉下家中，攤左係廳既 Sofa 同小表妹玩左成日．跟住又訓下，起身又玩過！

晏晝有得食北方水餃，好好味！！ ^O^

以下係笑起上黎會 "倒 U " 嘴既小表妹：



食完飯，返到村既士多，當然要食超抵 (人民幣 1.5) 既脆皮雪條．係士多裡面竟然見到只有係電視先見到既 "旺仔" 產品：


旺仔牛奶糖


旺仔小牛奶

>>August 11, 2007 at 5:25:10 PM GMT+8

2007 年 8 月 7 日 星期二 【颱風】

Title：一個月後

　　剛剛一個月前，回鄉探望患病既婆婆．一個月之後，就回鄉奔喪．返到鄉下家既門口，離遠見到婆婆躺係後廳既正中央，身旁既親戚圍住婆婆團團轉．大表妹同我返房擺返 D 野，之後就落番去加入 "團團轉" 既行列．呢個係一個儀式，孝子們都拎住一注香，每次行到亡者既腳下都會鞠三次躬．

　　其間最傷心既，唔咪因為婆婆離開，因為人總須一別，唔捨得當然有．不過最感觸仲係見到其他親人咁傷心，都忍唔住眼濕濕．婆婆係村裡面既人緣好好，好多鄰居都專程過黎見佢既最後一面．有 D 未見過既親戚都專程過黎參加喪禮，可以話係非常有心！

　　到左十點幾，法事開始，我地要跪係度，聽住法師念經．跪係地下係一件好辛苦既事，有 D 親友都要坐低一陣抖抖．但係我認為為表孝心，辛苦少少無所謂，所以堅持到底．

　　之後有晏晝食，真係七碟餸．之後經過一輪儀式後就出殯，之後我地搭車去火葬場，睇住棺木入火爐又係唔捨得．等左好耐之後，終於儸到骨灰，本來搭車諗住上去山上面安葬埋，點知臨去到之前，突然落住傾盤大雨，我地係車入面等停雨，等到我訓著左，但係都係無停雨，仲行雷閃電．跟住老豆同阿叔就拎住個骨灰罌 "單人匹馬" 上去，我地就坐車返去先．

　　返到屋企太眼訓，走左去房訓左兩個幾鐘．之後有 "解穢酒" ，菜式比今日晏晝好，有我好鍾意食既蝦蝦，食左好多！老豆今晚唔知係咪見到 D 好耐無見既親戚太高興，飲醉左，最後佢攤左係張床度訓著左．

>>August 11, 2007 at 5:00:58 PM GMT+8

2007 年 8 月 7 日 星期二 【微雨】

Title：大煞風景

　　今朝一大朝早五點半鐘就起身，七點鐘已經出現係深圳，立即上左返鄉下既旅遊巴．路途上無訓覺，係度睇書，本來成朝都陰陰地．但係睇睇下書突然有柔和既陽光照入車廂．

　　當時既情境，就好似 "白色巨塔" 入面，關欣坐住係農夫車既車尾，旁邊有柔和既陽光，微風亦都吹住長長既秀髮．

　　而依家除左係農夫車變左做旅遊巴之外，光線同埋畫面都有八九成相似！當然你會問，搭旅遊巴點解會有風吹?? 無錯，係無自然風，不過有冷氣，都有吹散我 D 頭髮．

　　平時既我，因為驚曬黑，一定會即刻拉埋窗簾，但係由於我仍然陶醉緊呢個畫面，所以繼續曬住太陽咁睇書．

　　最後，身後既麻甩佬因為被曬醒，所以 "攝" 一聲咁拉埋左個窗簾，可以講話係 "大煞風景" ！！

>>August 10, 2007 at 5:11:21 PM GMT+8

2007 年 8 月 6 日 星期一 【綿綿細雨】

Title："三個月之約" 之約滿

　　今日雖然係第四組放假，但係小弟依然準時上班，基本上仲早左一班車添．返到去，不停要答既問題係："咦?? 點解你返工既?? " 同埋 "同邊個調假呀?" 而我既答案分別係 ："哦！我調左假嘛！" 同埋 "同邊個調??未來既自己囉！" 雖然答左不下十次，但係都係開心既，總好過返左工而無同事發覺我點解唔咪放假，咁我到時就真係要檢討下自己先得！

　　今朝無咩好做，周圍係英文部拍番整齊 D 書，同埋八下 Davis 係度做咩，之後先發現原來搞左咁耐，自己個 Language 架竟然無執過．之後就返 Counter 包書，包到食飯．

　　跟住好乖咁食番第三班，食完就開始幫恩慧姐姐跟番 D 報價單．一開始想做，就聽到羅小姐係房裡面嗌我，我唔肯定，所以無認到．跟住恩慧姐姐就代叫我，點知我行到去房門口，羅小姐有電話，所以我就行返去後場部電腦面前坐住先，唔知開唔開始跟張報價單好，最後決定唔做住，費事到時唔知做到邊．

　　等到羅小姐傾完電話，我就入左去，見到佢揸住個信封，都諗到做咩事，結果就係得償所願，實現左三個月前定既約 --- 就係升做小主管！人工還是 Hope For The Best，Prepare For The Worst ，反正做得開心，唔計較咁多．聽完羅小姐既勉勵之後，就繼續出去跟返份報價單，搞左一兩個鐘，真係幾慢 =P 做完就出番去 Counter ，同同事們傾計．

　　夜晚臨收工前，阿珊叫 Ivan Void 卡，但係 Ivan 做緊野，我就儸左部機黎 Void ，事後阿珊話當時好奇怪我點解會 Void 卡．當然，要學既野仲有好多，呢個 Title 暫時只係係收銀處十萬火急，搵主管幫手既時候，多左一個人可以叫，但係小弟會繼續努力，要做一個 "八面玲瓏" 既主管！！哈哈哈．．． (傻左 ... )

　　返到屋企，接近 11 點半既時候，收到老豆係鄉下打番黎，宣佈婆婆（祖母）既死訊．雖然係唔捨得，不過唔駛再受病魔既折磨，某程度都應該感到欣慰！

　　婆婆安息了！

>>August 10, 2007 at 4:56:34 PM GMT+8

2007 年 8 月 5 日 星期日 【乍寒還暖】

Title ：這就是我 ?!

九型人格分析

第五型 智慧型、觀察者、思想型、理性分析者、思考型
14%

第三型 成就者、事業型、成就型、實踐型
12%

第二型 助人者、全愛型、助人型、成就他人者、博愛型
12%

第四型 藝術型、浪漫者、自我型、憑感覺者
11%

第七型 快樂主義型、豐富型、活躍型、創造可能者、享樂型
11%

第九型 和平型、和平者、和諧型、維持和諧者
11%

第六型 忠誠型、忠誠型、尋找安全者、謹慎型
10%

第八型 領袖型、能力型、挑戰者、保護者、權威型
9%

第一型 完美主義者、完美型、改革者、改進型、秩序大使
8%

鳴謝 Crystal 日記分享
測驗網址　http://tungisland.googlepages.com/article060.html

>>August 6, 2007 at 3:03:33 PM GMT+8

2007 年 8 月 4 日 星期六 【乍寒還暖】

Title：留在收銀處的週日

　　今日恩慧姐姐放假，所以連帶我都無開外聯單．今日比平時忙少少，不過都唔咪好忙，既然英文部既同事都齊集（雖然 Ivan 成日都係後場整學校既野），見到英文部 Counter 咁靜，而收銀處則未停過手，當然唔能夠袖手旁觀，所以就走左去幫手．

　　美子今日有位貼身侍候既 Carmen 幫佢手，相反主收阿珊就無人幫佢手，絕對係 3 個慘！而由於阿珊都要幫埋做沙官儸書，所以隨時都要留意住：當佢做緊學校，我就走去頂收銀機，費事得番一部收銀機收錢咁慘．

　　當晏晝同事食飯既時候，竟然又係收銀！結果我呢個 "不存在既收銀員" 比起第三收同第四收應該收得仲多，不過無咩所謂，反正收錢都係幾好玩既工作！

　　晏晝至夜晚，基本上都係幫手入膠袋，入到連自己都有 D 暈．到左夜晚就靜返少少，而教科書既暑假工同事都出黎幫手，於是我第一次係公司入面 "巡場" ，巡左兩三個圈，就俾青媽媽捉左去幫佢做野 lu ！原來只係幫佢將 D PO Email 出去，仲要快 D Send ，但係呢 D 5 分鐘都做得完既事駛咩咁趕去做呢?? 結果係英文部 Counter 等到收工 lu ！

　　ps. 今日肚仔唔舒服，雖然夜晚已經無咩事，但係青媽媽俾左樽私伙既 "五寶丸" 我食，多謝晒！ ^O^

>>August 6, 2007 at 4:15:32 PM GMT+8

2007 年 8 月 3 日 星期五 【酷熱】

Title：頭痛的一天

　　前晚夾埋都係訓左四個鐘，唔知係咪累得滯，琴晚竟然一訓訓左七個幾鐘，其間無醒過．終於知道無冷氣都可以訓得著，咁前晚既 "罪魁禍首" 一定係 Delifrance 杯咖啡．

　　但係雖然訓多左，起身反而仲眼訓．朝早還要俾琪琪問我做咩對眼咁腫，而除此之外，個頭仲有 D 唔舒服．諗住食 Lunch 有時間訓陣會好 D ，結果都係差唔多．於是同 "頭痛" 拍左一日拖，要形影不離，直到收工！慘 ... >.<

　　ps. 究竟訓到頭痛，應該再訓多 D 定係唔好訓咁多?? 謎 ...

>>August 4, 2007 at 3:15:04 PM GMT+8

2007 年 8 月 2 日 星期四 【酷熱】

Title：晨運

琴晚一點先瞓，但係五點就醒咗，仲要瞓唔番！

結果磨到六點半就起身做晨運，晨運內容如下：

1) 熨衫
2) 吸塵
3) 拎廢紙落去回收筒
4) 打日記
5) 煮早餐

>>August 3, 2007 at 12:19:47 AM GMT+8