2007 年 8 月 19 日 星期日 【微雨】

Title：忙足一天

　　今日英文部淪陷！！

　　本來有三位俊男坐陣英文部，但係 Davis 未夠 12 點就要去大圍幫手，本來諗住佢頂到 2 點就會返，點知個邊唔夠人，要頂到 7 點先返．得番我同 Ivan 留守英文部，而 Counter 旁邊仲有成堆成大半個人咁高既貨仲未拆．

　　如果淨係做英文部就唔係好忙，但係要做埋學校攞書就真係非常吃力，家長一個接一個，一時又培僑，一時又培基，一時又德信，仲有沙官添，而最大既問題就係套套書都唔齊．今朝做第一單 Order 既時候，足足來回左收銀處同教科書 Counter 四五次，一早既晨運已經足夠我成頭大汗．

　　除左攞書之外，仲要幫收銀處，同埋要包禮物．平時都無咩人要包禮物，今日竟然一日要包兩次禮物，唔知係咪想趁熱鬧．於是今日重拾失去已久 "做到想死" 既感覺，而今日掛係嘴邊就係 "點解英文部咁慘? "

　　之後做得五六點，終於靜番少少，之後又有新野，就係我地將本讀者訂左既書擺左上架，而 Ivan 又口快快叫左佢黎攞書，點知我地搵左勁耐 + 地毯式搜索每一個架都唔見．跟住諗住打電話截住佢，叫佢唔好黎住，點知佢留左個公司電話，打極都無人聽，可以講話係 "屋漏兼逢連夜雨" ．於是唯有繼續搵，情況有 D 似望住前面係瀑布，等緊跌落去一樣．之後 Davis 出現番，叫埋佢去搵，但係個讀者黎到之前都係未搵到，好彩個客淨係講兩句，無好大反應，總算暫時鬆左一口氣！

　　夜晚因為 "大頭目" 放假，所以我提早出去截人，最後都係要 09:05 先落到閘，今晚雖然都係用界刀開蓋，但係又俾個門框電親，慘！！

>>August 20, 2007 at 4:59:46 PM GMT+8

2007 年 8 月 18 日 星期六 【微雨】

Title：＠兒童部 Episode 2

　　今日預期中中文部好少同事返工，點知返到去更加愕然，就係係 "少" 之中仲要 "更少" ，因為有同事 "請病假" ．於是恩慧姐姐就被捉左去做中文部 (最慘仲係阿華本來例休，因為唔夠人而要返黎) ，而我就被琪琪捉左去兒童部，可能係要同兒童部 "再續前緣" ．於是執左一陣英文部，就長駐係兒童部．同琪琪一齊包左陣書，佢就走左去教科書 Counter 收錢，我就自己係電腦 Load 埋 D Load 左幾日都未 Load 完既數．

　　之後一副病容既 Canny 走埋黎同我調位，我就出番去英文部 Counter ，即刻有 D 唔適應既感覺，因為收銀處好嘈，又多電話響，慘！！跟住去左食飯，食完之後諗住去 Ling Ling 個位訓覺，點知 Canny 已經無聲無息咁坐係度食緊野，於是坐左係 Ivan 既寶座睇 "朱薰 E " 既新書 --- "正音功" ，發覺本書既序好似好睇過正文，可能係聽得佢係電台既 "朱薰 E " 太多，無咩新鮮感．

　　跟住又返去兒童部，琪琪又去左第二度幫手，所以我攞左 D "森之愛情" 黎包，始終都係唔慣包中文書，仲俾琪琪話包得好核突 >.< (雖然我都覺) 輾轉下又返番去英文部 Counter ，幫手收學校先前既訂書，今日都幾好生意， D 家長一個接一個咁黎．之後又走左去兒童部同 Canny 姨姨傾計，而我係傾計既期間，就同時係度 Delete 公司 D Email ，就咁就清左個幾鐘，但係都係仲有好多！

　　夜晚收工同 Ivan 一齊清 3,4 號機，清左好耐，最尾搞黎搞去都係多左成千蚊．之後搵唔到原因拎埋 D 錢入返去，點知係後場搵到張單，成千幾蚊，變相我地部機爭左幾百蚊，好驚慌！但係我都係走先，返屋企，臨返到屋企樓下收到 Ivan 既電話，原來有張預訂單本來係六百蚊，我當左係 100 蚊，所以最尾都係無 Short 數．

>>August 19, 2007 at 4:56:34 PM GMT+8

2007 年 8 月 17 日 星期五 【雷雨】

Title：@兒童部

　　今日返十一點三，但係可能琴晚訓得太多，訓到八點就起身．之後無咩做，就搵下屋企有無染髮劑，最後搵到一樽，所以自己擺好個陣去染．之後媽咪起身幫我搽得 "均循" D，等左半個鐘就去洗頭．洗完頭首次食飯當早餐，咁樣晏晝就唔駛帶多個飯盒，某程度上都幾好 (如果朝早有胃口食既話) ．

　　跟住就返工，由於今日食第一班，所以 12 點就食飯．仲係好飽，望住阿維食．阿維食到咁上下，琪琪等同事就買左野返黎食．琪琪見我咁得閒，叫我讀報紙既娛樂版，之後我就問： "要說書式、社評式定係東張西望式? " 琪琪揀左 "東張西望式" ，我扮 D 主持對話式搞左半個爛 Gag ，阿維就同我出去履行我地既 "約會" ．

　　之後我地去左 Starbuck 買野飲，本來想買杯 "朱古力星冰樂" ，不過呢排飲得太多朱古力，所以都係揀左 "朱古力咖啡" ，而身旁既阿維就揀左 "特濃咖啡" ．無時間坐低飲，所以一路行一路飲，最後返到公司喪 Cher 都要遲成 5 分鐘先飲完．

　　第 3 班食飯時候，去左頂兒童部，對住部電腦 Load 數落貨．發覺原來坐兒童部都唔錯，無咩人埋黎問野，又無電話嘈住晒，靜靜地做自己野，有 "沙商世外桃源" 既 Feel ，突然愛上左坐兒童部．如果有機會搵人去頂既話，一定要爭住去先得 ^o^

　　之後出返去英文部 Counter ，青媽媽攞左好多小說返黎俾我地包，Canny 都有若干雜誌要包，所以成個晏晝如果唔咪幫手收培基 D 錢，就係係 Counter 度包書．

　　夜晚第 3 班食飯既時候，又再次去兒童部頂 Counter ，又係度補埋今朝未補完既貨．跟住坐到 8:50 先走番出去，之後被 "大頭目" 委派左去夜晚清 3 號機，好艱鉅既任務！之後 9:25 分去後場 "打碟" 之後，就出黎收銀處清機．一口氣要清兩部機，雖然 "大頭目" 已經好好咁幫我數埋基金，但係對住 D 訂單都唔知點計好，最後都係要等阿華同美子出手搞掂！

>>August 18, 2007 at 4:50:17 PM GMT+8

2007 年 8 月 16 日 星期四 【陰】

Title：精選遊覽團

吳浩康 --- 自卑

講理想　講半天　又憑甚麼
講遠景　講到底　讓人幸福
這期望　我不配去擔當

若面上偶然有些沮喪　不必打探我
曾為誰　孤單一個坐天光

人前人後　或者都不起眼
難怪每個夜晚　回家孤單進餐
明明沒氣力發光　世界何來耀眼
我構造太簡單　流淚嫌未夠悽慘

無謂談自己　只有自卑　屬於我
做不起討好角色　期望誰發現愛惜我
其實憑甚麼　資格無多
相信戀愛　不信可以被愛
心痛甚麼　習慣了孤單去過
不必高手教我

講細心　講信心　又憑甚麼
講到尾　講多一百句
但是誰人　陪我在每夜說天氣

或者　悲哀到用笑聲遮掩我未夠好
不爭氣　註定沒緣份成大器
我就每日去飾演　單身好戲

談自己　只有自卑　屬於我
做不起討好角色　期望誰發現愛惜我
其實憑甚麼　資格無多
相信戀愛　不信可以被愛
心痛甚麼　習慣了孤單去過
沒甚麼獎勵我

無謂談自己　只有自卑　屬於我
做不起討好角色　期望誰發現愛惜
六十歲也只得我自己
得到甚麼　相信戀愛　不信可以被愛
差了甚麼　習慣了孤單去過　不必伸手救我

ps. 想得到才會怕失去

>>August 17, 2007 at 6:44:40 PM GMT+8

2007 年 8 月 16 日 星期四 【陰】

Title：學校直銷日

　　今日要去 "天堂" 做直銷，一早六點半起身，07:45 返到去，幾經轉折先返到沙商既後門．之後等齊人就搭的士出發，去到搬下 D 檯做 Counter ，等左一陣就見到健叔推住 D 貨黎，幫手界開 D 膠紙，其他同事就將 D 書一袋袋咁分開年級擺番落地．

　　跟住我同阿然就一齊將 D 高年級排好 D 次序，係成日最辛苦 + 大汗既工作，因為 D 書好重．擺好檔攤就準時 10 點鐘開工．玲兒 + 琪琪負責 D 未俾錢既客，我同富惠 (Ivan大佬既女友) 就負責 D 俾左錢既客．初頭全部都係未俾錢既客，所以好得閒，坐係度同富惠傾計，同埋睇佢電話入面 D 相，成日話介紹女仔俾我識．之後又幫我影左張相，話拎俾 D 女仔睇，睇下有無人有興趣．



　　跟住覺得太得閒，而隔離就好忙，所以我地都做埋 "未俾錢既客" ，富惠就開單同收錢，我就幫手執書．做做下 D 俾左錢既人就黎到，仲要一黎就黎晒，突然間超爆忙，好彩 Ivan 之前 Briefing 既時候都提過會咁，所以都有心理準備．唔知忙左幾耐之後，就無晒人，而身後 D 書亦突然唔見左好多！

　　之後有飯食，身旁既富惠因為小弟先前講話 "有一塊 Pizza 做 OT 既人工" 而被挑起左食 Pizza 既癮，所以話要食 Pizza ．不過幾經轉折後，都係叫茶餐廳既外賣，有滑蛋蝦仁飯同凍朱古力飲，好野！！而杯朱古力都幾好飲 ^o^

　　食緊飯既時候都久唔久有人黎攞書，阻住晒食飯．食完之後就無咩人黎攞，悶到抽筋！之後我地有 D 訓左陣，而我本來都想訓，不過訓唔著，坐係度又唔咪，企係度又唔咪，可以用 "求生不得，求死不能" 黎形容．等左好耐，先等到四點幾撤退．出去搭的士返沙商．

　　返到去就換衫繼續開工，好眼訓．"大頭目" 唔知發生咩事，成日唔知係無表情定係黑面，好驚！終於知道點解要有 "沙商天氣報告" ，應該遲 D 加設 "天氣預報" ，如果加埋熱線查詢更好！

　　做左無幾耐就去食飯，食完出去收銀處幫手，超眼訓，差 D 成為第一個係收銀處訓著既同事！之後幫阿珊數書券黎 Keep 住唔好訓，臨收工前仲要幫手做埋分期先走得！收工就趕住返屋企，唔知點解熊貓美美仲有咁多精力同華姐姐 & 琪琪去行街，本來 "誠邀" 我去，不過實在太眼訓．返到屋企就上床訓覺 lu ！

>>August 17, 2007 at 6:33:08 PM GMT+8

2007 年 8 月 15 日 星期三 【雨】

Title：Down Down Day

1. 俾 "大頭目" 問 "點解唔做完一件事先做另外一件事? "

2. 成日亂諗野，希望真係亂諗！

3. 出面落雨，個天好黑

4. "大頭目" 黑足成日面，成日驚做錯野，過唔到今日

5. 去 Toilet 點解每次都要行到新城市既另一面，足足行左六次！

6. 之前 Short 數，第一次要賠錢，盛惠 $269

ps. Ivan 講左句："我地聽日去天堂喇！" 當時佢手舞足蹈，個樣好似小朋友，好可愛 ^o^

>>August 16, 2007 at 4:33:59 PM GMT+8

2007 年 8 月 14 日 星期二 【雷雨】

Title：九龍東一日遊

　　今日約左美子去睇 "五星級大鼠" ，未睇之前先約左去淘大食 D "沙田無得食既野" --- 就係肯德基！跟住行左陣淘大既三聯，同埋去百佳買零食準備去睇戲食．

　　之後就行番過去德福，再行去 MegaBox ．雖然睇落好似好近，但係行過去都 OK 耐，幸好最尾都準時去到．跟住就入場睇戲，套戲既內容唔多講，老鼠仔都幾得意．而開頭講述主角俾水沖走，有 D 似 "沖出水世界" 一樣，睇黎要用電腦動畫整出 "澎湃" 呢個效果，已經對 Pixar 手到拿來．

　　睇完之後，就同美子行 MegaBox ．傳說中既 MegaBox 係因為每間舖頭都係 Mega Size 而得名，但係好似除左 B & Q 同大眾比較大間之外，好似其他舖頭都係 Normal Size ，而且無咩特別既地方．係 MegaBox 既尾站係 "扭蛋騷" ，本來因為要收五蚊唔咪好想入去，不過原來善款係用黎做慈善用途，而美子又好鍾意扭蛋既，所以都係入左去睇下．雖然裡面既扭蛋機不時都係重覆，重覆又重覆，但係對於扭蛋發燒友算係多選擇 lu ！而最驚奇既收穫就係見到 "八達通扭蛋機" ，用八達通嘟一嘟就可以俾到錢，當然唔能夠缺少就係 "扭" 隻蛋出黎呢一下．

　　去完 MegaBox 之後，就帶住美子行去觀塘，目的地係 APM ．其間佢成日問我幾時到，我就話："就到就到！" 但係就行黎行去都未到，幸好今日唔咪好熱，如果唔咪實俾人咀咒爆 lu =P 最後行左半個鐘就到，行到我成頭大汗，連美子既面都紅左．唔知係嬲得滯定係熱得滯呢?? 哈哈！有無覺得誤上賊船呢??

　　入到去遇到 APM 既書展，行左個圈，之後去左 Godiva 買朱古力飲，美子個杯 "純牛奶朱古力" 雖然有少少 "朱古力味無 '訂' 企" ，但係都算係一杯朱古力，而小弟飲既 "牛奶朱古力" (Milk Chocolate Latte) ，竟然係一杯咖啡！係o係朱古力專門店買既咖啡！跟住就上左去 APM 最頂行返落去，落到去就上番上面 "赤丸製麵所" 排隊等食野．雖然好似好多人排隊咁，但係無幾耐都等到，點知我地都唔咪好肚餓，叫左少少野就兩份食，最後埋單連 50 蚊都唔駛，仲平過平日食 Lunch ^o^

　　食完野又上去上面 "電器層" 行多一次，都係未睇中買邊部電話好．跟住就搭車走，有個傻瓜話 APM 樓下無車搭返屋企，所以同佢行到去 "新城油站" o個個站搭車，其間落住 "好似好大" 既毛毛細雨，擔遮又唔咪，唔擔遮又唔咪，最尾都係選擇左擔遮．上左車後先知道原來個站唔咪係 APM 出面，而係 APM 下面，真係搞笑！之後 74X 途中既低能野，點解會變得咁低 B ??

　　跟住美子就返屋企，我就坐到經典既 "熱狗" 巴士，好耐都無坐過無冷氣既巴士．雖然會吹亂 D 頭髮，不過都幾 Enjoy 既．轉返火車就返屋企 lu ！

>>August 15, 2007 at 5:07:27 PM GMT+8

2007 年 8 月 12 日 星期日 【雷雨】

Title：很忙的星期一 Episode 2

　　今朝好多位同事都去左學校做直銷，幸好英文部仲有我、Davis同青媽媽坐陣，不過依然係好忙，唔醒起仲以為係星期日，一個接一個既培僑同學黎攞書．我開始慢慢適應 "對書" 呢個工作，講得有紋有路，好似好有信心咁．

　　之後，食第一班，玲兒請我飲左罐可樂，飲完之後先知原來個盒可樂係阿健既 =P 跟住出番去，阿珊去食飯，但係除左 Ling 姐之外，就得 LingLing 收錢，裡面教科書阿珊個妹又食飯，連收銀機都閂埋，全部教科書都出黎俾錢．於是係無人收錢之下，小弟又要繼續收錢．好似已經不知不覺日日都要收幾次錢，看來收銀處真係小弟存在既價值！好彩成個鐘都唔駛不停咁收，總算有空閒既時間．

　　跟住去左兒童部頂 Minnie 食飯，坐係電腦前面補貨，雖然有凳仔坐，但係個位都幾迫下．之後見到有個阿伯黎問字帖擺係邊，我就指左佢去中文部．點知隔左五六分鐘佢又好慢咁行番過黎，原來佢要買英文 Copy Book 俾佢 5 歲既孫仔，就幫佢揀左一本最容易，之後佢又問套 Phonic Kids ，我就慢慢咁解答佢 D 問題．跟住我坐番去兒童部 Counter ，見到 Minnie 返黎，點知阿伯又捉住佢，由開始問我 Copy Book 既問題到 Phonic Kids 由頭問 Minnie 一次．

　　我無咁好氣咁回歸英文部 Counter ，幫手包雜誌同埋 Memory Keeper's Daughter ．青媽媽則係收銀處忙過不停，又幫手入袋，又幫手對書，做到人都癲左，所以我話遲 D 如果青山開間商務，一定搵青媽媽去！

　　夜晚有 D 無聊，幫收銀處入袋，終於等到就黎收工，同一時間同琪琪不約而同咁行去後場諗住 "打碟" ，入到去見到 Canny 俾我地早左一步做左 DJ ．跟住琪琪就出去做守關大將軍，正當我諗住幫下收銀處既時候，就俾琪琪捉埋出去，可憐既阿珊同 Ling 姐就繼續單打獨鬥．

　　係門口企左一陣，琪琪話美子叫我去收銀處，跟住我就去睇下做咩事，原來係搵我清碌卡機．鬼馬既美子仲要取笑我一聲 "主管" 添！搞完三號機之後，就幫阿珊清埋機，搞左好耐都唔岩數．之後就放工返屋企 lu ！

ps1. 返到屋企發現亞視 "蠟筆小新" 腰斬左，原因係收視唔理想，要播番 "第一手真相" ．咩 "第一手真相" 收視真係咁好咩?? 唔見得！！

ps2. 青媽媽扮 "大頭目" 講 "你好商務" ，係超超超 (x100) 搞笑！

>>August 13, 2007 at 4:37:10 PM GMT+8

2007 年 8 月 12 日 星期日 【雷雨】

Title：精選遊覽團

藍奕邦 --- 巴不得

若性感不等於叫做美感
未算等於放任
衣著單薄一點　未等於渴望快感
熱了穿小背心

她肩帶鬆多兩度　不小心把你嚇到
未脫先興奮　還是怕暴露
這麼的虛假態度　口講 "該煨" 暗叫好
純潔的貞節留待各自當寶

男女相親又怎麼帶罪惡感
未見就談婚姻
身體挨近一點　未等於有事發生
別要想歪你心

口口聲聲講進步　給得少想得最好
又怕得到了　然後斷後路
閃閃縮縮講愛慕　公主般躲到城堡
昂貴的初吻留待各自當寶

講不得　講一套美德
聽不得　玩一套準則
巴不得　你們去唸經文　Say It

想不得　思想已閉塞
摸不得　身體也閉塞
巴不得　你們各自修行

根本不用太見外　它有益還是有害
隨你心所愛　其實最自在
Ooh 胸襟要打開　思想也要打開
盡快讓禁忌疑惑通通拋開

講不得　講一套美德
聽不得　玩一套準則
巴不得　看著你們封塵　Say It

想不得　思想已閉塞
摸不得　身體也閉塞
巴不得　你們各自修行

講不得　講一套美德
聽不得　玩一套準則
巴不得　去戥你太委屈　Say It

想不得　思想已閉塞
摸不得　身體也閉塞
這首歌　你們個個有份

ps. 歌詞雖然有 D 壞，不過睇睇下都係好有意思既！~

>>August 13, 2007 at 3:29:49 PM GMT+8

2007 年 8 月 11 日 星期六 【乍寒還暖】

Title：很忙的星期日

　　今日係星期日，雖然係第四組放假，但係由於要補返先前放假，所以都係要返工．培僑 3 個 Grade 既同學琴日開始黎儸書，再加上係星期日，所以比起先前沙官儸書更加忙．

　　今朝一早就係度諗："其實係咪應該搵平日黎補返工呢??點會揀星期日返工咁蠢??" 不過見住同事們都咁忙，無理由由得佢地捱咁慘既，所以呢個念頭一瞬即逝，還是選擇呢日返工係無錯既！

　　今晚臨收工前有個麻麻煩煩既人黎儸書，要叫琪琪去先搞得掂，所以我要幫佢頂收銀．頂到 21:15 先走得．今晚有個新既說話組合，就係："阿匯， Void 單！" 很樂意的，幫得手一定會幫！如果你地唔驚我 Void 錯單就得架喇　=P

　　ps. 如果可以得到一半你對朋友的好，相信夠我開心一世 lu ！

>>August 12, 2007 at 4:57:29 PM GMT+8