2007 年 3 月 9 日 星期五 【陰】

Title：狂歡＠環球嘉年華

時間：二零零七年三月十日　下午十二點半至約五點
　　　地點：金鐘添馬艦 AIA 環球嘉年華會場
　　　人物：小蜜蜂、小蚊子、心心鼠同WoWo狗

內容：

　　入到會場，為免玩漏遊戲，只有循逆時針方向順住玩．第一站既 "激流滾木" ，其實等同海洋公園既滑浪飛船，但係呢度勝在 "有睇頭" ，就算自己個身唔咪好濕，部船都會湧起勁多水．

　　跟住到隔離類似龍船既機動遊戲，見到無咩人排隊，就即刻上去玩．上到去，除左得個轉之外，一 D 都唔驚，要自己 Nature High 大叫．但係呢個咁 Hard Sell 既結果，就係落黎既時候勁多人排隊，唔知佢地玩完之後會唔會 "＄＾）＊＄＊％＾＄＊" 呢 ??




　　之後去排 "老鼠也瘋狂" ，排緊隊見住人地玩，都唔明點解咁都要嗌一餐．因為部車似咖啡杯，但係跟住條路軌黎行，頂多係中間部分有一條小斜路（比滑浪飛船還要矮），再加一個 4 個 S 既彎．上到去又原來幾驚，成日有 D 90 度既彎，好驚會衝左出去．而中間既 S 彎，部車自己狂轉，Fing 到條頸都差 D 甩，而同時眼尾覺得條柱同個頭好近，懷疑條頸長 D 都會爆頭慘死！



　　之後同細佬膽粗粗去玩絕讚既 "超級大風車" ，呢個遊戲離遠望會令人望而生畏，排緊隊會有 5 % 既人打退堂鼓，坐到上去會勁驚，就算企係下面望住人地玩都會頭暈，而玩完就會面紅耳赤 --- 以上既形容絕對無半點誇張，唔信大家可以去試下．凌空 360 度前後+左右不停被轉，20 - 30% 既時候係倒掉半空，同時被機器向下直衝，40% 時間 PatPat 唔咪掂住張凳，全身既重量聚於膀頭上，而膀頭係靠過山車式既箍箍住，心只有想："你唔好鬆開呀！鬆開我就完架喇！" 途中只能慘叫 "人體奧妙展" 同埋 "人體極限" ．經過起碼分半鐘既蹂躪，終於面紅耳赤+腳步浮浮咁行番出黎．



　　跟住要抖一抖，就去左摩天輪到坐一陣，原來摩天輪對於一個畏高既人，都係一個驚險既遊戲．



　　落番黎既時候，暫時轉戰攤位遊戲．我一向無咩點玩過飛鏢，只係 "有姿勢、無實際" ，但係竟然分別係三個攤位，好好彩咁贏左三個公仔．



　　之後，玩到差唔多無晒金幣，就再去玩機動遊戲．小休之後第一個遊戲係跳樓機，可能係狀態問題，坐上去竟然有 D 驚．上到去最頂，一路望住前面既 G-Force ，原來仲高過佢，又大風，等極都未跌落去．但係跌落去又好快落到去，都唔咪好驚．



　　跟住排左成半個鐘玩 "急流漂進" ，呢個遊戲完全係為左濕身，首先係類似小巨浪既水湧埋黎，搞到連褲都濕埋，跟住再有 "噴水池" 補中，臨完之前，側邊 D 水湧入部船入面，連鞋都濕埋．



　　之後見到 G-Force 勁多人排隊，而且睇落都幾驚，所以都係留番下次先挑戰．而金幣都玩完，於是大約五點就走 lu ．

>>March 13, 2007 at 3:58:50 PM GMT+8

2007 年 3 月 7 日 星期三 【乍雨乍晴】

Title：精選遊覽團

電視：雪映移城
　　舊歌：張學友 --- 愛你痛到不知痛@有個人
　　VCD：林海峰 --- 踎低噴飯
　　工作：商務之春銷 （正價書八五折、文具九折、影音九五折、國版書無折）

>>March 8, 2007 at 3:08:14 PM GMT+8

2007 年 3 月 7 日 星期三 【乍雨乍晴】

Title：婦女節快樂

　　今日係婦女節．"節" 有分兩種，一種係要慶祝既，一種淨係掛係嘴邊既，而婦女節多數屬於後者．但係成日 Check 住門市個 Email 既我（因為無野好做 >_<），今日竟然有大發現，就係公司既福利組，竟然安排我地有免費下午茶，為既就係慶祝婦女節！！雖然只係一餐下午茶，但係都起碼真係有人會慶祝婦女節丫！（唔知兒童節有無呢 ?? ）

　　ps. 今日據聞公司係每位同事生日既月份，會有大利是一封！有幾大封 ? 大過新年開工利是喎！係咪好大 ??

>>March 8, 2007 at 3:01:42 PM GMT+8

2007 年 3 月 6 日 星期二 【乍雨乍晴】

Title：自己騙不了自己

係 "唔驚唔覺就收工" 定係 "等收工" ，只有自己才心裡有數，"自己是騙不了自己" ．

　　很懷念星光，很懷念 "斷背仨" ，很期望四月九日！

>>March 7, 2007 at 3:07:17 PM GMT+8

2007 年 2 月 28 日 星期三 【炎熱】

Title：沙商倒亂之旅

第一站：與 Davis 合力將全部 Fiction 同 Classic 架對調位置
　　第二站：獨力將已調位既 Classic 架同其中一個 Fiction 架再對調
　　第三站：獨力將 Law 架移去另一個架
　　第四站：去特價架執埋阿青 D 手尾
　　第五站：幫 Davis 執 7 折特價架

　　中途加插：將 D 唔知放邊既書周圍搵位亂塞

>>March 8, 2007 at 3:16:03 PM GMT+8

2007 年 2 月 24 日 星期六 【雷雨】

Title：遇上...

　　I will remember this, You will pay !!

>>February 25, 2007 at 5:54:01 PM GMT+8

2007 年 2 月 22 日 星期四 【炎熱】

Title：拜年之旅

　　今日適逢我同心心仔都放假，就決定出去拜年．首先上左去心心仔屋企拜年，坐左一陣，就同心媽媽同小魚一齊去石硤尾飲茶．跟住就返左去星光分館拜年，幸好好多同事都係度，又唔咪好忙，有時間傾下計，不過最主要都係同文具部同事報告軍情，唔知點解沙田既 NOD 32 超好賣．順帶一提，我應該係屬於英文部，但係因為我地 Counter 唔咪係英文部（英文部 Counter 唔喺英文部??），而近住文具部，所以好多防毒軟件、金筆同埋 VCD ，我地都略知一二！好鍾意 Davis 改既 "蝦部" =P

　　跟住就坐船過海，過海第一站係去中環文化快線，因為阿幗調左去都未探過佢．如果唔知地址都幾難搵，好彩記得佢話附近有間零食物語，於是我地目標鎖定 "文化快線" 同埋 "零食物語" ，而由於零食物語比較大間，所以我地都係見到零食物語先知到左．之後入去同阿幗傾左一陣，等到佢有 Dinner Break ，就同佢行左去搵阿溢．去到個度，阿幗就走先，因為佢行到去都差唔多夠鐘，我地就繼續留連．

　　留左一陣，就行去搭電車，搭去康怡，因為康怡搬左裝修完都未去過．搬左裝完修之後果然係靚左同闊落左，又比較有現代感，至少讀者都企得舒服 D ．行左兩個圈之後，就去麥當勞叔叔食 Dinner ，跟住就行吉之島．行完就搭番 102 返去旺角，行左新之城一個圈就完成我地既拜年之旅 lu ！

>>February 25, 2007 at 6:16:34 PM GMT+8

2007 年 2 月 19 日 星期一 【雷雨】

Title：東平洲 x 吉澳之旅

　　好難得一家咁齊人，又難得屋企既成員都放假，於是琴日就去左報團，今朝一大朝早成家人加埋心心仔就出發去東平洲．一早八點半係大學火車站集合，初初諗住個團 50 幾人已經叫好多人，點知等下等下，竟然有 230 人一齊去！結果我地成 200 幾人一齊行去碼頭，再坐專船出發．

　　第一個站係吉澳，沿途經過馬鞍山、大尾篤同印洲塘海岸公園，搭左成個幾鐘頭船先去到吉澳．之後就去參觀島上既天后廟，廟入面有一對門，平時自己去可能會覺得只係普通一對門，但係導遊介紹左呢對門既故事，原來上面既門神係一位 "啹咖兵" 按照另一位同袍畫既，所以對門神個樣有 D "鬼鬼地" ，人稱 "鬼佬畫門神" ．之後廟外又有棵 "連理樹" ，又係影相既景點，之後參觀左半個鐘，就去左附近既食店食左餐 "海鮮風味餐" ，其中一碟 "馳名墨魚丸" 同埋 "蒸吊筒魚乾仔" 值得一讚！！而我先前好期待既 "白灼蝦" ，遲遲都未見芳蹤，係我地放棄既時候，竟然壓軸出現，由於好多團友都食飽左，所以都無咩人食，結果我就食左幾多蝦 =P

　　跟住又上船去東平洲，今次既航程都要差唔多成個鐘．由於東平洲係香港最東面既島，所以同大陸都幾接近，途中見到深圳既鹽田貨櫃碼頭、深圳既葵涌同埋平時成日係漁民天氣報告聽到既 "南澳" ．一上左岸就先去島上出名既 "更樓石" ，據說當地既居民會企起呢兩塊大石上面，監視海面，睇下有無海盜入侵，如果有就會係石上面打鑼或者放煙．而途中見到既頁岩亦都係東平洲既獨有景點，呢 D 岩石經過長年風化，一頁一頁咁形成不同形狀．

　　跟住我地就行去斬頸洲，行左成半個鐘至一個鐘先去到．斬頸洲本來係連住東平洲，但係因為長年風化而令到兩者中間部分被侵蝕，因此望落去就好似俾人斬開咁，但其實都仲係相連既．個度附近有一條 "石脈" ，由東向西咁貫穿東平洲．又因為呢條石脈係呢度伸向海中，好似一條巨龍趨向海中，所以被稱為 "龍落水" ．

　　不得不提就係我地呢團無行既 "難過水" ，難過水呢個地方，係潮退既時候就會有岩石露出水面，成為一條路；到潮漲既時候就會被淹沒，成為一個不停有浪撲上黎既峭壁，所以要行呢段路必須要清楚知道潮汐漲退既時間，如果唔咪就會行行下被淹沒，所以稱為 "難過水" ．或者因為我地團友太多，不宜行下路，於是我地就行上面既主路．

　　行完 "龍落水" ，都已經行得幾累，之後我地就起程返去碼頭．之後就坐左差唔多兩個鐘頭船，返去馬料水碼頭解散，返到去都差唔多五點半．跟住我地就搭火車去沙角大排檔打邊爐 lu ！

>>February 25, 2007 at 5:53:00 PM GMT+8

2007 年 2 月 18 日 星期日 【晴】

Title：賀歲煙花之夜

　　今晚同左成家人去尖東睇煙花，去到差唔多六點半，但係遇岩警察叔叔開始將新世界中心旁邊出海旁既入口封閉，我媽咪行係前面，大嗌："個仔仲係後面呀！" 警察叔叔話："快 D 快 D ！" 我地先入得晒去，之後其他人就好似鐵達尼上唔到救生筏既人咁留左係外面．

　　之後我地就企左個有利位置，等煙花匯演開始．當然，無野做既時間，特別過得漫長，等左好耐先到八點．但係當睇完呢次煙花之後，就會覺得不枉此行，因為今年既煙花特別靚，除左第一次見到既 "吉" 、 "金元寶" 同 "笑臉" 圖案外，D 煙花既配合亦都恰到好處．另外，由於我地企係文化中心外面，有喇叭播放音樂配襯．個人最喜愛中間部份，比較節奏緩慢既一段，放既煙花唔咪 "嘭嘭" 既傳統類型，而係一 D "飄絮" 型既煙花，再加上柔和既音樂，感到 "浪漫" 既感覺！而臨尾兩節既表演，煙花既爆發次數和震撼指數，亦可謂多年來之冠，再加上強勁既 Maksim 式鋼琴伴奏，視覺與聽覺都得到滿足！

>>February 21, 2007 at 4:27:28 PM GMT+8

2007 年 2 月 17 日 星期六 【晴】

Title：新年喇！！

　　今日係大年初一，在此恭祝大家新年快樂，新一年身體健康，心想事成！

　　以往的農曆新年，對於我黎講，都唔咪太大意義，因為本身無咩年可以拜，又無咩利是逗．新年只係俾幾日假期，同埋有一日唔講得唔吉利既野既日子．但係出左黎返工，特別珍惜農曆新年，因為縱使係聖誕節或者中秋呢 D 大節，門市都繼續開，我地都繼續要返工，而唯獨係農曆新年，門市會有兩至三日閂門，同事先有兩三日既連續 Dayoff ．另一方面，農曆新年應該係最多打工仔集體放假既日子，所以要最齊人就算係呢個節日．

　　縱使係得三日假期，但係對於一個星期六日都要返工既打工仔黎講，已經係好矜貴架喇！

>>February 19, 2007 at 5:21:58 PM GMT+8