2006 年 12 月 25 日 星期一 【晴】

Title：商務之聖誕禮物

　　請細心留意以下兩位少女既對話：

　　少女 A ：" 咦！據聞沙田商務就黎有個好靚仔既男職員喎！ "

　　少女 B ：" 點只咁簡單，佢係英俊瀟灑、高大威猛、風度翩翩、全城驚豔、拍案叫絕、目不暇給、不屈不撓、笑看風雲...

（狂數十分鐘）

... 兒科聖手、網路奇才、妙手仁心、停車熄匙、咕嚕咕嚕既男職員喎！ "

　　少女 A （興奮地）：" 係呀！唔知呢位咁萬眾期待既職員幾時會出現呢? "

　　少女 B ：" 我琴日係沙田見到佢啦！ "

　　少女 A ：" 琴日 ?? 據聞佢 2 月中先會去沙田返工喎！琴日佢都應該仲係星光架！！ "

　　少女 B ：" 你講阿匯呀 ?? 佢只係一個超級平凡、中等身材 、人見人走、極度無聊、傻傻更更 ...

（狂數二十分鐘）

... 蝦肉燒賣、視像鏡頭、午市定食、開車即走、 叮噹大雄既職員之嘛！"

　　少女 A （失望地）： " 咁都好既， Balance 番 D 丫嘛！ "

>>January 1, 2007 at 6:29:12 PM GMT+8

2006 年 12 月 25 日 星期一 【晴】

Title：第一次介紹新書

　　"介紹新書" 算係我地分店既傳統，每次都係星期日同星期一，因為通常呢上面 Office 係星期六同星期日放假，所以晨早流流無咩 Email 要宣佈，所以早會會少 D 野講．其實介紹下新書都幾好，一來可以善用時間，二來又可以知道最近有 D 咩新書或者暢銷產品．

　　今日雖然係係星期二，但係因為琴日係聖誕節，都係無咩 E-mail ．於是一朝早返到去，，戴小姐就話："喂！有無人今日有書要介紹呀 ? 今日得一封 E-mail 咋！" 我本來一直都有兩本書想講下，但係因為各英文部既同事都編左 Schedule ，所以無謂搞亂晒，最快都要 07 年先有機會．於是，今次既然有機會，就等小弟係 07 年來臨前介紹下新書啦！跟住去書架儸左兩本書去開早會，戴小姐講完佢要講既野之後，就話："咁跟住等阿匯介紹新書喇！" 我話："咁快到我喇 ? " （唔咪仲有中文部既咩??）

　　跟住就介紹左蘇民峰既 2007 Chinese Almanac 同埋 The Art of Referring ，其中介紹呢本英文版通勝，可以話打響頭炮，因為我有講話本書教我地點睇 "春牛圖" ，佢地好奇怪咁話："下 ?? 春牛圖都識睇 ?? " 跟住我講到本書有教人點睇掌相，本來想講話有教埋人點睇自己寵物既面相，但係因為我一路掛住揭本書，一路掛住講，講左 "介紹點睇寵物既掌相" ，引來佢地既笑聲，佢地話 "點睇貓狗既掌紋呀? " 結果我既 Presentation 就係一片笑聲中完結 lu ．

>>December 26, 2006 at 4:24:04 PM GMT+8

2006 年 12 月 21 日 星期四 【微冷】

Title：商務怪事錄

1. 商務阿叔

　　有日執執下架，突然見到櫃底伸左對鞋，抬頭四周張望，見到有個四十既五十歲既阿叔，赤住腳咁挨係個架旁邊睇書．呢位阿叔，我地同事稱為 "赤腳大師" ，總係徘徊係 Self Improvement 或者 "字典" 對開既位置，佢手上成日楂住一本法文或者關於法國既書，有時就楂住 Routledge 出版既書，完全係識貨之人，因為 Routledge 既書最少都賣 $200 ，屬於書既貴價貨．

　　本來企係度睇書唔咪問題，但係呢位商務阿叔的確將我地門市當成佢屋企，將我地 D 書掰開黎睇，搞到 D 書殘晒．有次見到有本殘書擺左係架上面，仲以為係佢自己帶黎，點知經過明查暗訪之後，發現原來本書係我地既，真係為之汗顏！！！而佢亦都會去我地個字典架 "借" D 英法字典黎用，所以下次遇岩搵唔到呢類書，可以搵佢幫下手！

　　2. 雙杖人

　　雙杖人好易認，本身個樣係皮膚黝黑、貌似癮君子既阿叔，而佢最特別就係雙手都各自楂住一個拐杖，完全係行動不便既樣．佢本身係一個賊仔，戰績係偷左我地 20 幾本 Grammar 書，本本都百幾蚊，可惜當時唔可以人贓並獲．但係我地既同事都已經認得佢，通常佢係門口入黎，收銀處既同事，都會叫我地搵專人照顧呢位行動不便既 "客人" ．

　　上次就遇岩收銀處打黎俾我地，阿溢就帶我去見識下邊 D 係賊仔，跟住佢一路周圍望，我就係佢既不遠處執架，當然佢咁富經驗，好快就知道我望住佢．跟住佢就走去藝術部，我又跟住去執藝術部 D 架，之後佢就走左 lu ．

　　3. 配音小朋友

　　有日臨收工既時候，我走左出去執架，跟住行番去 Counter 既時候，聽到有幾個人係度對話．跟住望望周圍，都無人企係附近，淨係有個差唔多十歲既小朋友坐係地下睇緊書．之後隔左一陣，都仲係有人講緊野，我就去睇下做咩事．行到去小朋友既附近，發覺佢旁若無人地一路睇書，一路讀書，最特別係佢扮緊書入面既角色：男人講野有男人聲、女人講野有女人聲、小朋友講野就有小朋友聲，而佢一路睇一路笑，睇得相當津津樂道．

　　當你以為佢係傻傻地既時候，細心聽下 "佢地" 既對話，英文講得相當流利！！

>>December 26, 2006 at 3:57:14 PM GMT+8

2006 年 12 月 20 日 星期三 【微冷】

Title：精選遊覽團

新歌：陳奕迅 --- 白玫瑰
　　食肆：沙嗲王 （強烈推介：冰鎮活煮蝦、白咖哩豬扒飯）
　　舊歌：周杰倫 --- 退後 @ 依然范特西
　　新歌：K --- Only Human
　　新歌：Remioromen --- 粉雪
　　舊歌：黃耀明+彭羚 --- 漩渦
　　新書：Peter So --- 2007 Chinese Almanac（蘇民峰2007年英文版通勝）
　　新書：梁科慶 --- Q 版特工 16 之迷城毒蹤

>>December 21, 2006 at 5:17:06 PM GMT+8

2006 年 12 月 17 日 星期日 【乍雨乍晴】

Title：休息日

　　今日係畢業禮翌日，遇岩有得放例假，可以兩日都唔駛返工！！細佬又儸左假留係屋企，心心仔又上左黎，於是岩岩湊夠四隻腳開檯．我地又三點鐘開始打，本來小弟一直都保持住領先位置，但係細佬臨尾食左兩舖大牌，竟然後來居上，成為 "竹林盟主" ！由於小弟係屋企一向都係著短褲，而出面亦都好凍，所以全程都要儸件褸蓋住對腳．

　　我地 "怒打" 到七點半，就搭的士去左禾輋既五十嵐食任食火鍋，都幾 OK 啦！！~

>>December 19, 2006 at 4:13:02 PM GMT+8

2006 年 12 月 16 日 星期六 【乍雨乍晴】

Title：畢業禮

　　等左三四個月，終於都左舉行畢業禮既大日子．晨早六點鐘起身，為既係要八點四十五分都港大禮堂 Rehearsal ．同心心仔落左巴士，正要行去禮堂既時候，突然聽到有人同我地講早晨，原來係阿 Roy ．跟住由佢帶路，我地一路行，一路講下近況，見有 D 時間，就去左 Canteen 食左早餐先．食完都八點五十分，但係落到去都未開門俾我地入去，再等左五至十分鐘先有得入去．

　　跟住負責呢次 Ceremony 既 Project Manager ，就話因為想係正式行禮前搵出問題所在，所以要成個 Rundown Run 一次，於是由司儀宣佈典禮開始，到我地逐一上台，到畢業生代表致詞（除左主禮嘉賓上台、落台之外），都做一次．其中發生小插曲，就係 Project Manager 宣佈司儀，眼前出現既係當年 AD 教我英文、兼係 AD Graduation Ceremony 司儀既 Dr Eliza Lau ．跟住我地魚貫上台，到我將我個名牌交俾 Eliza 時，我同佢講聲 Good Morning ，佢都無應我，諗住佢都唔記得左我．之後佢讀左我個名做 " Lam Man Wu" ，我就話應該係 " Wui " ．佢讀左一次，跟住突然諗起 D 野： "OH!! Do I know you? " 跟住我就話：" Yes! " 跟住 Dr Lau 就話： " Hi ! Congratulation! " 由於前面既人已經行左，後面都有人上緊黎，唯有匆匆講聲 Thankyou 就走．

　　之後大約十點鐘，個 Rehearsal 就完，我地出左出面著番件畢業袍，好趕咁搞到十點半就入去禮堂準備．家長們十點四十分先入黎，好彩我老豆同媽咪醒目排係前列位置，入到去都有前 D 既位坐．


U of London 同 HKU SPACE 既 Professor 作主禮嘉賓

　　個典禮美中不足既地方，就係我地上到台之後，會同中間個兩位 "大粒佬" 握手，跟住就企係佢地中間影相，之後再到旁邊另一個嘉賓接過畢業證書．當時我地 Rehearsal 就話中間同旁邊都會有人同我地影相，但係到典禮舉行時，兩個攝影師都對住中間影，無人影旁邊．人家最值得紀念既係拎證書丫嘛，鬼有人會在乎同個兩個大粒佬影相呢?? 而且要對住兩個相機係一件相當難遷就既事情，可能 AB 望 Cam 1 而 C 望 Cam 2 ，又可能係 AC 望 Cam 1 而 B 望 Cam 2 ，更有可能係 ABC 望 Cam 1 但其實係 Cam 2 影緊 ...

　　跟住大約一個鐘典禮就完左，我同 Daddy Mammy 一齊係個禮堂影左幾張相，之後就落番去下面影，何亨同我細佬都相繼到左，跟住又影左 D 相． Law Sir 同 J. Wan 都有到場，不過我淨係同左 Law Sir 影相．不可不提，本來個 Ceremony 完左之後有個茶點，但係我地搵到係邊既時候，D 野已經食晒，得杯汽水飲．再過左一陣，就趁下面多人，就上去 Canteen 食 Lunch ．行到去水池既時候，突然身後有人係咁叫 "阿匯阿匯" ，轉身望下，原來係我地分店既會計姐姐戴小姐，原來佢都有親戚畢業，所以佢都有見到我上台行禮．同佢握左下手，我地就繼續行上去，好彩等一陣就有位．


畢業大大 ga 攝於 Canteen 內

　　我因為唔係好肚餓，就無食到野．老豆食完野就要走，所以我送左佢去搭巴士．上番去 Join 番佢地，就上左去 Canteen 樓上影相，原來上面別有洞天，都幾靚架 !









　　我同心心仔既屋企人影到三四點就走，何亨抵得諗繼續同我地再戰港大 --- 再係港大兜多一次圈，影多 D 相．



　　影到五點半，終於去到港大既東翼門口，何亨就要走先，我同心心仔執野期間，見到 Stephen ，臨尾食番個 "尾糊" ，同 Stephen 合照一幅．之後就同心心仔 and 小魚搭小巴去左銅鑼灣食飯 lu ．

　　請各位到 http://community.webshots.com/user/wuifriend 睇當日其他照片 !

　　ps. 感謝何亨

>>December 22, 2006 at 3:29:14 PM GMT+8

2006 年 12 月 14 日 星期四 【微冷】

Title：週期性不適

　　以前返個兩份工，唔知點解，梗有一兩日 D 客會 "發癲" ，而癲既唔咪一兩個，係一堆人一齊癲，搞到自己都忟埋．諗住呢份工話晒 D 客都算係文化人，點煩都唔煩得去邊，但係原來唔咪．

　　一大朝早，拎起個電話，有個女人打黎話想買本 Accounting 書，要寄去美國．人地美國個邊 D 書因為係硬皮版 (Hard Cover) ，所以會貴好多；我地 Asia 因為物價指數較低，同埋消費能力較低，出版社會出普通既 International Student Version ( IE版)，兩者基本上內容都一樣．當然，IE 版既書會印住 Not Be Sold in US and Canada ，當地亦都唔會買到 IE 版．但係有 D 留學生未必 Afford 到買 Hard Cover 既教科書，所以都要叫外國親人寄俾佢地，當然唔俾咁做啦！

　　但係呢個女人一開始就話要寄本書去外國，問我 IE 版同 Hard Cover 版有咩分別，我就答佢基本上無咩分別．跟住佢就問，咁 IE 版頁數有幾頁，跟住我就跑去書架儸本書，再拆開袋儸本書出黎睇，跟住答左佢有 749 頁．之後佢又問，咁兩本書 D 編排有無唔同，我就話分別應該唔大，佢就話係咪真係一樣，咁我又唯有跑去後面貨倉搵阿溢同 Ling 姐求救．之後個女人問黎問去，煩到嘔，最尾佢問可唔可以黎我地分店對下兩本書，我心諗："真係求之不得"，之後就收左線．

　　跟住隔左一陣，聽到文具部既黃生嗌王生聽電話，我心諗："點解黃生嗌番過黎既 ? " 正想嗌番佢聽，Ling 姐就話："我地英文部都有王生個喎！" 係喎，我都唔記得左添！！:P 因為我地位王生放左假，所以我就儸左個電話黎聽，話："王生放左假喎！有咩幫到你呀 ? "

　　跟住個女人就話："岩岩個黃生咪幫緊我囉！"

　　我就問："咁你係咪搵英文書o架 ? "

　　佢就話："係呀！"

　　救命呀，呢個女人似乎認為總之叫黃生既人就會幫到佢喎，究竟佢訓醒未架 ?? 一啲 Sense 都無既 ?

　　我就答佢："岩岩個位黃生幫唔到你個喎！有 D 咩幫到你架 ? "

　　原來佢係問 D 訂書既問題，就請左 Ling 姐幫佢手．

　　到左四五點，有印巴籍人士一家三口黎到我地英文部，個細路睇落都成十幾歲，但係睇完 D 書就周圍擺，揭完 D 書冚都唔冚就攤左本書係度，仲要係幾本．之後佢同佢老豆，拎左十幾本書擺晒係窗台，又行左去，都唔知佢地係咪買既，搞到都唔知執唔執好．之後睇少一眼，個細路成個坐上個書架上面，佢老豆同佢影相，梗係即刻埋去制止佢啦！跟住係佢地游弋期間，係不同既書架都執到 D 書，例如係 Business 執到兒童書，係 Language 執到 Finance 書，平時都唔會咁，九成九係佢地係度搗亂啦！

　　最尾先搞笑，佢問我地有無 Broadcast System ，原來佢地要搵人，之後個細路就寫個名俾我，跟住我又未用過個咪，D 用開既同事又唔係度，搞左好耐先用到，仲要用英文黎嗌咪，真係救命！！！我諗住佢地搵得呢個人，應該係小朋友啦，所以就話 "Your father is waiting for you" ．點知我去番收銀處見到佢地，原來係細路個阿媽，真係一堆．．．（省略號）

>>December 18, 2006 at 3:42:46 PM GMT+8

2006 年 12 月 6 日 星期三 【晴】

Title：盤點日

　　今日係一年一度我地分店盤點既大日子，由於我聽日有例假，所以今日就要通宵．今日因為仍然係等開始盤點，所以都係無野做．

　　咁岩嘉敏叫我睇下有無書架要加 D 牌上去，於是我就把心一橫，將一路以黎想重新執過既字典架大執一番．呢個架一向都係將 D 字典跟字母排，但係我覺得將 D 同類既字典擺埋一齊會更加方便讀者，例如有個人想黎買本字典關於 Human Resources 既，但係佢可能只係見到本 Business 既字典，唔知都原來 Human Resources 都有一本專用字典既，咁就可能買左本未係咁適合既字典．

　　不過，要咁樣大執一番，都有一 D 技術上既困難，例如有 D 類型既字典都唔知點分，或者太多類別可以分，好似 "航空學" （Aviation）咁，都唔知將佢另開個 Topic 叫 Technology 好，定係擺係 Science 好；又例如 Geography 同 Astrology 咁，都唔知當佢地係文科（Art） 定係 Science 好．另外一個問題就係大家平時都咁忙，根本無時間搞咁多野，所以係得我先咁得閒去搞（冷笑！！）．

　　跟住好快就到七點，其他分店既 "外援" 亦都黎到左我地度幫手，咁由於我要做通宵，所以都跟埋佢地一齊開始盤點（其他本店同事就等間舖九點收工先開始做）．跟住我地就逐個架將 D 書儸個掃瞄器掃一次，掃完一個就去部電腦將 D Data Upload 上去．

　　開頭都覺得要點一個架既時間都好快丫，駛唔駛點到五點先收得工呢 ? 因為我地未夠九點已經點完兒童部，但係原來要點完英文部 D 書架真係幾甘下！點黎點去都好似點唔完咁．時間又一分一秒咁流得好快，去到十二點半既 "宵夜時間" ，即係時間過左一半，點左既書架又真係差唔多一半．宵夜有一碗牛丸米線再加一盒維他奶（聽聞人地分店得杯麵架咋），跟住有剩，我地 D 男同事又整多碗，我又食多碗墨魚丸麵．之後原來仲有西餅，但係已經食唔落．

　　跟住又係咁儸個掃瞄器係咁掃 D 書，隨住時間已經夜深，個人都呆呆滯滯，只係不停咁掃．到左四點幾，終於開始要搵 D 未掃既架，即係我地既工作就黎完結．跟住見有 D 肚餓，咁岩撞到黎我地分店幫手既同期 Trainee Yuki ，就去左食埋 D 西餅．

　　食完之後，都四點半，因為我地要做到五點，第二日先有補假，所以個個都 Hea 到五點先走．到左五點，全部 "外援" 都有得走，但係原來我地本店既同事唔走得住．點解 ? 我到依家都唔知，因為我地咩都唔駛做，淨係行行企企，如果有心既就執番靚 D 書架． Hea 左成 30 - 35 分鐘，先有得走．跟住出到去又未有巴士搭，就同左 D 同事搭的士去旺角，佢地去飲茶，我就去心心仔屋企訓覺 lu ！

>>December 14, 2006 at 2:33:39 PM GMT+8

2006 年 12 月 4 日 星期一 【微冷】

Title：暴風雨前夕

　　由於仲有兩日就盤點，所以呢幾日都無野做，悶得發慌．點解會無野做 ? 原因有以下幾項：

　　1) 後場（門市既貨倉）已經提早完成盤點， D 貨全部都唔郁得，所以無書出黎門市俾我地上架．

　　2) 門市 D 櫃筒都完成盤點， D 書又係唔郁得，所以縱使架上面無貨，都唔可以抽櫃筒 D 貨補番上去．

　　3) 因為就黎盤點，所以唔會轉書去其他門市，又唔會有書轉黎我地門市，變相其他分店少左打電話黎叫我地轉書，連電話都少埋．

　　4) 某段時間無咩人打黎問書，所以連電話聲都無．

　　5) 未到五六點，根本無咩人會係呢頭出現，所以無咩客．

　　結果，可以做既，只係久唔久巡下架，執番靚仔個場，但係巡一次都係三兩分鐘，巡夠兩次先過左五分鐘．唯有得閒係個電腦睇下新聞同體育，再唔係 Check 下股價同埋去下天文台睇下出面幾多度．

　　阿溢話："暴風雨前夕，都係風平浪靜架喇！"

>>December 5, 2006 at 4:00:11 PM GMT+8

2006 年 12 月 4 日 星期一 【微冷】

Title：這就是我 ?!



優點：
重義氣，對朋友全心全意的付出不會佔別人便宜。
順其自然、性格中庸、單純，做人處事以和為貴，容易與人相處。
對現況接受度高，不多對人做質疑。
單純、知足常樂、富有情趣。
中規中矩，盼望過無憂無慮的平凡生活。

缺點：
理想主義者，作決定欠缺實際利益考量。
不夠成熟，若沒有靠山很容易亂了分寸。
缺乏遠見、欠缺責任感與危機意識，應學習先思後行以免因為做了欠缺考量的決策而吃虧。
剛愎自用。
缺乏判斷能力。
墨守常規、拘泥於傳統思想。
缺乏自知之明、不敢多做嘗試。

http://www.whobirdyou.com/whobirdyou/thought.asp

>>December 5, 2006 at 3:43:27 PM GMT+8