2007 年 9 月 15 日 星期六 【晴】

Title：古巨基簽唱會

　　今朝一早就起身，搞左一陣就去大埔，之後係美子屋企樓下坐左一陣，好多蚊呢！之後等到美子落黎，就行左去附近，因為約左佢個 Friend --- Jackie ．跟住我地去左大元村既 "愛爾蘭" 茶餐廳食早餐，幸好 11 點都仲有早餐食 ^.^

　　跟住我地搭車去火車站， Jackie 就走先，之後我地等到溥溥既家姐 Yvonne，車上面仲有溥溥、溥溥既媽媽同哥哥，好齊人呢！但係佢地原來係去行街，只有 Yvonne 係去見基仔，所以我地係九龍塘落車，再轉車去將軍澳．

　　我地一點半就去到，之後就排隊等參加簽唱會，排排下隊就陸續見埋另外 D Fans ，仲有一位係專程係台灣過黎呢！好捧場！由於佢地要入去排隊，所以我就自己企埋去 D 觀眾度睇，等左個幾鐘先開始．跟住就要頒獎俾 D 學生、睇學生表演、之後基仔就現場唱左一首 "愛回家" ，仲要等埋記者訪問先開始簽名，相信只有 Fans 先唔會企到腳軟！


唱緊歌既基仔


等簽名既美美

　　之後我同美美就同佢地分別，去左食 Tea ，兩個人食左一隻雞髀 + 紅豆冰，仲呃到三個...呢，嘻嘻 ^o^ 行左一陣，趕住過海，因為要攞番對 Con ，所以要去灣仔．攞完就行去搭船番尖沙咀，諗住去和花亭食野．但係係等緊既期間，玲兒就打電話黎約我地去旺角食米線，所以我地就搭左巴士去旺角．係先達門口等左一陣就 Join 到玲兒 + 阿然，之後就去食 "亞洲風味米線" ，食左好大兜米線呢，尚算好味！

　　食完就去左新世紀廣場行，去左先施，但係買唔到美子先前想買既泳衣呢．又去左 QuikSilver ，阿然都揀唔到岩心水既泳褲．之後就去搭火車返去，阿然同玲兒就係大圍落車，我同美子就返大埔．

　　落左車又行路返美子屋企，得到期待已久既野，我唔會忘記既， HeHe ^o^

>>September 18, 2007 at 3:17:16 PM GMT+8

2007 年 9 月 14 日 星期五 【晴】

Title：十號風球 + 雷暴警告 + 全部警告生效

　　今日英文部犯下彌天大錯，搞到大頭目超爆嬲，如果十個嬲係滿分既話，可以話係一百個嬲！！

　　而身經百戰既青媽媽，竟然俾大頭目鬧到喊（但係其實青媽媽係最無辜囉），就知大頭目有幾爆發！

　　而我同琪琪既 "沙商天文台" ，亦決定暫時棄守總部，因為睇黎呢場風暴短期內會持續橫掃整個沙商．所以預測未來一兩個星期繼續懸掛十號風球，同時其他警告全部生效，展望未來一個月持續密雲有驟雨，局部地區會有狂風雷暴...

　　要撤退 lu ，再見！

>>September 15, 2007 at 6:11:08 PM GMT+8

2007 年 9 月 13 日 星期四 【晴】

Title：又有得做外聯 lu

　　今日英文部全部同事都返工，我就得閒去幫恩慧姐姐開外聯單．實在係太耐無開，差 D 連係邊度開單都唔記得，睇黎要多多 Keep 住做先得！

　　McGraw Hill 既書終於都黎到沙商，可以講話係暫時解決燃眉之急．不過一次黎得太多，成部板車咁多．青媽媽拆左半個晏晝先拆左半車貨，之後我就加入戰團，同青媽媽拆埋一份，結果好快就拆晒，仲上埋架．但係英文部始終係書架太少，無咩位，所以有好多貨都擺左係後場既架上面．

>>September 15, 2007 at 5:59:02 PM GMT+8

2007 年 9 月 12 日 星期三 【晴】

Title：平靜的星期四

　　今朝一早返到去，換完衫，諗住拎個袋出黎袋返件衫．點知個袋口令有膠紙，原來係美子送既禮物，呢份係第一份禮物，我會好好對待佢既，呵呵 ^o^



　　之前忙左咁多日，諗住會繼續忙，點知今日出奇地好靜，成日都無咩做過 D 特別野．最記得既野就係 "沙商戰報" ，某同事繼續 "東張西望" ，而我地就繼續抗戰，誓要守住陣地．

　　夜晚收工，同左美子 + 華姐姐去左 Cholocate 睇基仔設計既衫，但係都係睇唔到．之後我地搭火車，去到大埔就 "遺棄" 左華姐姐係火車上面，我就同美子行番屋企．跟住我就搭車返屋企 lu ！

>>September 14, 2007 at 2:18:08 PM GMT+8

2007 年 9 月 11 日 星期二 【晴】

Title：逃過一劫

　　今日本來食第三班既，但係突然大頭目就埋黎，問我： "咦 !! 你唔咪食第一班咩?? " 我心諗： "我無擅自調班食飯丫．今日 Ivan 無返，我要食佢個班嘛！" 之後原來大頭目唔咪怪我食第三班，而係因為大頭目既大頭目陸生兩點鐘大駕光臨，而佢又要我出現，所以要我食早 D ．

　　結果就要食第二班，同左恩慧姐姐、阿珊同青媽媽去左間格局好 Cheap 、價錢好貴既茶餐廳 --- 德 X 餐廳食飯，一碟飯 + 飲品要三十幾蚊，叫碗粉麵 + 飲品都要廿七、八蚊，好貴呢！

　　之後食完飯，諗住返去受死，點知好忙，做呢樣做個樣，都未停過，遠望大頭目獨自招呼佢既大頭目．跟住終於得閒去，但又唔知自己駛唔駛現身，於是行過佢地身邊，睇下大頭目會唔會叫埋我．點知見佢無咩反應，我就走番去企 Counter ，結果留得住呢條小命 lu ！

　　晏晝青媽媽去左後場拆貨，Davis 又要上書，所以長時間得我自己係 Counter 俾 D 客圍攻，查書都查到傻．之後做做下就六點幾，都唔知時間過，終於等到食飯時間，等於就黎收工， Yeah！！

　　今晚埋數搞左好耐都唔岩數，整到九點九先走得．跟住就搭火車轉小巴去大角咀，因為約左成記既舊同事食飯．輾轉下去到一個好隱閉既地方打邊爐，我去到既時候，佢地都食飽 lu ！今晚有 Ivan 、阿 J 、夢夢、阿 Moon 、 阿 Mui 同佢 Honey ，好耐無見 lu ．之後聽左阿 Moon 講佢既 "戀愛故事" ，雖然係好慘，不過阿 Moon 實在係太得意，所以搞到個故事都好 Funny ．

　　之後就影相，因為夢夢要去英國，其實今晚都算係餞行，不過無咩傷感既感覺．在此祝夢夢去到個邊快 D 適應、生活愉快、當然仲要同老公仔甜甜蜜蜜啦！最後 11 點幾就走，同左 Ivan 同阿 J 去番去旺角，而其他就坐阿 Mui Honey 既客貨車返屋企．我地途中講工作、講感情同講股呢， Ivan 真不愧為股神呢！佢地陪我去到小巴站就分別 lu ！

>>September 13, 2007 at 4:50:41 PM GMT+8

2007 年 9 月 10 日 星期一 【乍寒還暖】

Title：過雲雨

　　這樣的期望都沒有，希望你不會後悔愛得太遲...

　　雖說沒有期望就沒有失望，我曾經也試過．可是沒有期望，那未來又有甚麼意義?? 你又會明白嗎??

　　不認同，但不會阻止的，算我認輸吧！

　　ps. 之後雨下得很大，眼睛也下雨了...

>>September 12, 2007 at 5:53:34 PM GMT+8

2007 年 9 月 10 日 星期一 【乍寒還暖】

Title：步行日

　　今朝一朝早八點就起身，點解休息都唔訓得晏?? 真係訓唔著 >.< 之後就上網同打機，搞到十一點就沖涼出門口，去左沙田等美子．去到沙田既時候，美子已經坐係度，跟住我地就搭火車去旺角，再行去朗豪坊．之後有得食 Mos Burger，好大既漢堡包，都幾好味架，不過薯條就少左 D ，有 D 唔夠喉啦 ^o^

　　跟住就上左去最高個層，由上面行番落去，但係行完都未夠鐘睇戲．於是就去左 Seven 買野食，之後就上去戲院睇 Trailer ，又睇扭蛋．唔記得講今日美子著裙呢，好斯文架！


斯文的美子

　　等左陣就有得入去睇戲，今次睇 "藉著寫真說愛你" ，都 OK 好睇既．不過個故事可能有 D 慢，但係 Focus 係男女主角都幾好睇既．

　　睇完我地就去左銀城諗住影相，點知原來無左，突然發覺好耐無去過旺角 lu ．好彩附近有兆萬，有得影相 ^o^ 影完相就去 Motorola 攞信用卡 D 贈品，跟住就行落去尖沙咀，又行左好耐，辛苦美子 lu ．

　　但係都有回報既，我地之後去左 Haagen-Daz 食雪糕：


天生一對


東方情懷

　　食完雪糕就搭船過海，去左眼鏡舖洗隱形眼鏡，由於要擺低幾日，所以要做幾日四眼仔 lu ，仲要係黑框眼鏡添！跟住我地去左銅鑼灣 Sogo ，又係行去既，再次由上而下咁行，今次行埋上面既皇冠書店呢．

　　行完就搭地鐵轉火車返大埔，然後行左去 "鍋貼大王" 食鍋貼，仲有水餃、炸饅頭同牛肉包添，特別推介：鍋貼 + 水餃，好好味！

　　最後行左去沿住林村河河邊行左一陣，之後就陪美子返屋企，走既時候落起大雨．差唔多行到美子屋企附近先停雨，跟住我就搭巴士去火車站，等車既時候又落雨，最後呢場雨都係陪到我返屋企！

>>September 12, 2007 at 5:52:50 PM GMT+8

2007 年 9 月 10 日 星期一 【晴】

Title：精選遊覽團

舊歌：陳思祺 --- 我是最後知道的一個
　　　新歌：古巨基 --- 你生
　　　新歌：梁漢文 --- 自作聰明
　　　新歌：何韻詩 --- 木紋
　　　舊歌：李克勤 x 容祖兒 --- 萬千寵愛在一身 @ 拉闊演唱會
　　　舊歌：張學友 --- 離開以後 @ 拉闊演唱會
　　　舊歌：張學友 --- Touch Of Love @ 拉闊演唱會
　　　電視：交響情人夢

>>September 11, 2007 at 2:37:12 AM GMT+8

2007 年 9 月 9 日 星期日 【晴】

Title：恆商度假團

　　今朝一早七點鐘就起身，八點鐘就約左熊貓美美係麥當勞叔叔食早餐．食完就返公司，要幫手整埋個暢銷書，點知意外地撕左張新榜做廢紙，越幫越忙呢 >.<

　　九點幾就出發去恆商賣書，今日既陣容： Ivan 、琪琪、美子、我同阿仔．十點鐘正式開始，之後忙過一陣間，做到成身大汗．學生們比平時 D 客仲麻煩，個個都嗌 "唔該" ，但係已經做到無停手，我都想講 "唔該你地唔好嗌唔該！" 跟住就靜落黎，而靜既程度真係好靜，成半個鐘都唔見有學生黎．之後坐到十二點幾就叫 Pizza 食，食既時候又有 D 學生黎，做完又食過．

　　兩點鐘咁上下，琪琪同阿仔就返公司幫手，我地三個繼續坐．好耐都無試過咁靜喇，真係舒服 ^o^ 不過時間就難過 D ！到左四點鐘，我地就開始執野走，執左兩部板車，而每部板車 D 貨都有成個人咁高．之後好辛苦先推到落樓下，又再成身大汗 lu ，而 Ivan 件恤衫就變左透視裝添，跟住再搬埋上客貨車走．

　　返到去好彩有阿健同教統既阿成幫手，分左做四部車推番公司．跟住就換衫開工，好彩今日唔算太忙．夜晚公司請 "教科書兼職" 食飯，我地去左麗都叫小菜食，坐埋都有兩圍檯，分別係教科書同埋全職兩圍，我地個檯女仔多，得我同 Ivan 兩位男士，結果都係要負責清埋檯上面 D 野食．今晚為左 Ivan ，硬食左一碗冬瓜盅同埋一舊炸豆腐，好飽呢！跟住 11 點，我地就散席返屋企 lu ！

>>September 11, 2007 at 2:59:23 AM GMT+8

2007 年 9 月 8 日 星期六 【晴】

Title：收錢頭暈暈

　　今朝一大朝早，就入去文具倉 "爬山" 搵膠袋，搵黎搵去到搵唔到要既 Size ，反而平時搵唔到既 Size 就搵到一兩大袋．之後搵到成頭大汗都搵唔到 "厚袋" ，慘！

　　之後今日美子做副收，晏晝就開收銀機支持下．當然仲要有咁上下長既人龍先可以咁早，平時開三部收銀機，通常好快就清得晒條龍，但係今日竟然收極都唔見隊尾，想停都無得停 >.< 結果由兩三點收到六點幾先停，因為去食飯．

　　出番黎就見到 Ivan 收錢，本來想去幫佢既，不過行埋收銀機去覺得暈暈地，所以都係無繼續收錢．之後都係留守英文部 Counter ，繼續查書同介紹人去第二間門市買，認真無奈！最後攞左半個鐘清左半部機，九點鐘就收工 lu ！

>>September 10, 2007 at 4:54:11 PM GMT+8